YAP Biləsuvar Rayon Təşkilatı

01/06/2026

31/05/2026

Bu gün YAP Biləsuvar rayon təşkilatı 33 saylı şəhər ərazi partiya təşkilatının sədri Xalid Əliyevin doğum günüdür.
Xalid müəllimi təbrik edir, ona möhkəm can sağlığı, şəxsi və xidməti işlərində, siyasi fəaliyyətində uğurlar arzulayırıq.

27/05/2026

28 May – Müstəqillik Günü

26/05/2026

Qurban bayramınız mübarək!

26/05/2026

26/05/2026

28 May — müstəqillik tariximizin, milli birliyimizin və böyük zəfərimizin rəmzidir

28 May — Azərbaycan xalqının yaddaşında sadəcə bir tarix kimi deyil, milli qürurun, azadlıq düşüncəsinin və dövlətçilik iradəsinin tarixə çevrildiyi gündür. XIX əsrin əvvəllərində itirilmiş dövlət müstəqilliyini bərpa etmək arzusu ilə yaşayan Azərbaycan xalqı, yüz il sonra tarixi fürsətdən məharətlə yararlandı. Azərbaycan Xalq Cümhuriyyəti yalnız xalqımızın deyil, bütün Şərq dünyasının taleyində mühüm dönüş nöqtəsi oldu. 1918-ci il mayın 28-də Tiflis şəhərində Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan edərək, xalqımızın çoxəsrlik dövlətçilik ənənələrini davam etdirdi. Müstəqil yaşamağa əzm etmiş və bu yolda böyük qurbanlar vermiş Azərbaycan xalqı 1918-1920-ci illərdə özünü müstəqil yaşamağa qadir və buna layiq bir xalq olduğunu dünyaya nümayiş etdirdi.
Cümhuriyyətimizin yaranması, müsəlman Şərqində ilk demokratik, hüquqi və dünyəvi parlamentli respublikanın elan olunması anlamına gəlirdi. Bu, əsrlər boyu çar imperiyasının əsarətində yaşamış bir xalqın azadlıq, milli birlik və müstəqillik əzminin rəsmi təcəssümü idi. Azərbaycan Xalq Cümhuriyyəti 23 ay fəaliyyət göstərməsinə baxmayaraq, ilk respublika dövründə həyata keçirilən tədbirlər müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından mühüm əhəmiyyət kəsb etdi. Demokratik hüquq və azadlıqların bərqərar olması, etnik və dini mənsubiyyətdən asılı olmayaraq bütün vətəndaşların bərabər hüquqlarının tanınması, hətta bir çox Avropa ölkəsindən daha əvvəl qadınlara seçki hüququnun verilməsi, Azərbaycan dilinin dövlət dili elan edilməsi, nizami milli ordunun, təhlükəsizlik strukturlarının qurulması Xalq Cümhuriyyəti hökumətinin yürütdüyü siyasətin miqyasını və mahiyyətini əyani şəkildə göstərir. 1918-ci ildə Nazirlər Şurası formalaşdırıldı və ilk hökumət fəaliyyətə başladı. Məlum olduğu kimi, müstəqilliyin ilk aylarında Azərbaycan hökuməti Gəncədə yerləşdi. Çünki həmin dövrdə ölkənin mərkəzi başda olmaqla, ölkənin bir çox strateji məntəqələri işğal altında idi.
Müstəqilliyin elanından sonra Qafqaz İslam Ordusunun və Azərbaycan Ordusunun birgə hərbi əməliyyatları sayəsində cəbhəboyu erməni-bolşevik ordusu darmadağın edildi və 1918-ci il sentyabrın 15-də Bakı daşnak-bolşevik işğalından azad olundu. İki gün sonra Azərbaycan hökuməti Gəncədən Bakıya köçdü. F.Xoyskinin müraciətinə əsasən, noyabrın 16-da Milli Şura yenidən fəaliyyətə başladı. Milli Şuranın noyabrın 19-da keçirilən iclasında Azərbaycan parlamentində ölkədə yaşayan bütün xalqların nümayəndələrinin təmsil olunması və qanunverici orqanın 120 nəfərdən ibarət olması qərara alındı. 1918-ci il dekabrın 7-də Hacı Zeynalabdin Tağıyevin Qızlar məktəbinin binasında Azərbaycan parlamentinin təntənəli açılışı oldu. Bütün müsəlman Şərqində demokratik prinsiplər əsasında formalaşdırılmış ilk parlamentin sədri o dövrdə bütün Rusiya müsəlmanlarının lideri hesab olunan Əlimərdan bəy Topçubaşov seçildi. Mövcudluğunun ilk günlərindən xalq hakimiyyəti və insanların bərabərliyi prinsiplərinə əsaslanan Azərbaycan Xalq Cümhuriyyəti bütün ölkə vətəndaşlarına eyni hüquqlar verərək irqi, milli, dini, sinfi bərabərsizliyi ortadan qaldırdı. Dünya birliyi tərəfindən tanınan Xalq Cümhuriyyətinin fəaliyyəti sayəsində ölkəmizin beynəlxalq hüququn subyekti olması bolşevik işğalından sonra Azərbaycanın bir dövlət kimi dünyanın siyasi xəritəsindən silinməsinin qarşısını aldı.
Azərbaycan Cümhuriyyətinin əsrlərə bərabər bu 23 aylıq müstəqilliyi 1920-ci ilin aprelində Rusiya təcavüzünün qurbanı oldu.Bununla belə, Azərbaycanı işğal edən Rusiya müstəqil Azərbaycan Cümhuriyyətinin mövcudluğu faktını silib ata bilmədi və bu əsas üzərində sovet quruluşunda formal da olsa Azərbaycanın müstəqilliyini təsbit və qəbul etməli oldu. Uzun illər, yəni sovet dövründə Azərbaycan Xalq Cümhuriyyətinin yaradılmasından və onun fəaliyyətindən bəhs etmək qadağan olunmuşdur. Hətta Azərbaycan tarixçilərinə də Azərbaycan Xalq Cümhuriyyətinin adının çəkilməsi qadağan idi. Azərbaycan 1991-ci ildə öz dövlət müstəqilliyini bərpa etdikdən sonra Azərbaycan Xalq Cümhuriyyəti ilə bağlı bütün qadağalara son qoyuldu.
Ruhu azad olan bir milləti heç kəs köləlikdə saxlaya bilməzdi.
1991-ci il 18 oktyabr tarixində 71 illik sovet hakimiyyətinin əsarətinə canı, qanı bahasına son qoyan Azərbaycan xalqı yenidən öz müstəqilliyinə qovuşaraq azad gələcəyə inamlı addımlarla Azərbaycan Xalq Cümhuriyyətinin qəbul etdiyi üçrəngli dövlət bayrağımızı yenidən başımızın üstündə qürurla dalğalandırdı. Cümhuriyyət dövründə qəbul edilən bayraq, gerb, himn yenidən Azərbaycan Respublikasının atributlarına çevrildi. 1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktının qəbul olunması və həmin aktda 1918-ci il 28 may tarixli İstiqlal Bəyannaməsinə istinad edilməsi Azərbaycan Respublikasının Azərbaycan Xalq Cümhuriyyətinin varisi olduğunu bir daha təsbit etdi. 1993-cü ildə yenidən hakimiyyətə qayıdan ümummilli lider Heydər Əliyev zəngin siyasi təfəkkürü, idarəçilik təcrübəsi və rasional fəaliyyəti sayəsində müstəqilliyini yenicə bərpa edən Azərbaycan Respublikasını AXC-nin taleyini yaşamaqdan, yəni qısa zamanda müstəqilliyini itirməkdən qurtardı. Ulu öndər Heydər Əliyev həmin dövrdə ciddi təhdid və təhlükələr qarşısında olan müstəqilliyimizi qorudu və müasir, güclü, nüfuzlu dövlət kimi çıxış edən və regionda lider ölkəyə çevrilən Azərbaycanın təməlini qoydu.
Beləliklə, Heydər Əliyevin şah əsəri olan müasir müstəqil Azərbaycan dövləti quruldu və sürətli inkişaf yoluna qədəm qoydu. Ulu Öndərimizin “Bu gün tam qətiyyətlə demək olar ki, Azərbaycan dövləti, müstəqil Azərbaycan Respublikası 1918-ci ildə yaranmış Xalq Cümhuriyyətinin varisidir” sözləri ümummilli lider Heydər Əliyevin apardığı uğurlu siyasətin nəticəsi olaraq təsdiqini tapmış, Azərbaycan öz müstəqilliyini dünyaya sübut etmiş, istiqlaliyyətimizin daimi, əbədi olmasının əsasını yaratmışdır. Ulu Öndərimiz dəfələrlə bildirmişdi ki, biz ilk demokratik respublikanın yaranması gününü əziz tutaraq, onu Azərbaycanın dövlət müstəqilliyi günü kimi elan etmişik və bu, bizim milli bayramımızdır.
Bu gün Azərbaycan xalqı böyük bir iftixar hissi ilə müstəqilliyini qeyd edir. Ulu Öndərimizin qoyduğu siyasi irsi Prezident İlham Əliyevin rəhbərliyi ilə daha da möhkəmləndirilmiş, 2020-ci ildə Vətən müharibəsində əldə edilən tarixi zəfərlə yeni zirvəyə çatmışdır. Dövlətimizin başçısının Azərbaycan Xalq Cümhuriyyətinin 100 illik yubileyi haqqında Sərəncam imzalaması, 2018-ci ili ölkəmizdə “Azərbaycan Xalq Cümhuriyyəti ili” elan etməsi onun tarixi keçmişimizə və varisi olduğumuz Cümhuriyyətə göstərilən diqqət və qayğının bariz nümunəsidir.
Bu gün İlham Əliyevin liderliyi ilə müstəqilliyimizin ən şərəfli tarixi yazılır. Şanlı Ordumuz 30 ildən sonra düşmən tapdağında olan tarixi ərazilərimizi azad etdi. Azad edilmiş ərazilərdə həyata keçirilən genişmiqyaslı bərpa və quruculuq işləri dövlətimizin gücünün və siyasi-iqtisadi müstəqilliyimizin göstəricisidir. Üçrəngli bayrağımızın doğma Qarabağda – Şuşada, Ağdamda, Kəlbəcərdə, Xankəndidə, Xocalıda və işgaldan azad edilmiş bütün torpaqlarda qürurla dalğalanması həm cümhuriyyətin qurucularına, həm müasir Azərbaycan dövlətinin banisi, Ulu Öndər Heydər Əliyevə həm də torpaqlarımızın azadlığı uğrunda canından keçən şəhidlərimizin əziz xatirəsinə ən böyük ehtiramın ifadəsidir.
108 yaşın mübarək, qalib və müstəqil Azərbaycan!

https://yeniazerbaycan.com/YAPxeber_e143457_az.html
https://sesqazeti.az/news/politics/1339372.html

Ceyhun Ağazadə
YAP Biləsuvar rayon təşkilatının gənc fəalı

25/05/2026

Azərbaycan Xalq Cümhuriyyəti Şərqin ilk demokratik və dünyəvi parlamentli respublikasını yaratdı

1918-ci il mayın 28-də Azərbaycan xalqı özünün ilk demokratik, hüquqi, dünyəvi və parlamentli respublikasını yaradıb. 1917-ci ildə Rusiyada baş vermiş Fevral inqilabı nəticəsində Çar İmperiyası devrildi. Ölkədə çarizmin məzlum vəziyyətə saldığı xalqların milli hərəkatı başlandı. Şərqdə və müsəlman aləmində ilk demokratik dövlət quruluşunu yaratmış Azərbaycan Xalq Cümhuriyyəti istiqlaliyyətimizi elan edərək, xalqımızın müstəqillik əzmini nümayiş etdirmişdir.Yeni dövlətin yarandığını elan etmək müstəqil dövlət qurmağın birinci mərhələsidir. Dövlətin strukturunu və Milli Ordusunu yaratmaq, daxili və xarici siyasət xəttini müəyyən etmək dövlət quruculuğunun ən çətin vəzifələridir.
Azərbaycan Xalq Cümhuriyyəti yarandığı gündən tarixi ərazilərimizə və milli dəyərlərimizə sahib çıxmağa başladı. AXC parlamentli respublika idi. Qərbi Avropanın demokratik dövlətlərində və ABŞ-da olduğu kimi, hakimiyyət bölünürdü. Qanunverici hakimiyyət orqanı kimi parlament yaradılmışdı. İcraedici hakimiyyət hökumətə məxsus idi. Hökumət parlament qarşısında məsuliyyət daşıyırdı. Milli dövlət quruculuğu sahəsində çox mühüm addımlardan biri türk dilinin Azərbaycanın rəsmi dövlət dili elan edilməsi oldu. Dövlət bayrağının qəbul edilməsi önəmli tarixi hadisə idi. Dövlət müstəqilliyini təmin etməyin başlıca yolu güclü ordu və donanma yaratmaqdan keçir. Ona görə də hökumət milli ordu quruculuğuna xüsusi diqqət yetirirdi. Hökumət Osmanlı dövlətindən hərbi yardım almaqla yanaşı, 1918-ci il iyunun 26-da “Müsəlman korpusu”nu “Azərbaycan korpusu” adlandırdı. Ölkədə 19-22 yaşında olan müsəlman gəncləri səfərbərliyə alındı. 1918-ci ilin noyabrında Hərbi Nazirlik təşkil olundu. 1919-cu ilin yayında isə hökumətin böyük səyləri nəticəsində Xəzər Hərbi Donanması yaradıldı. Avropanın demokratik dəyərləri ilə Şərq mədəniyyətinin xüsusiyyətlərini özündə birləşdirən Azərbaycan Xalq Cümhuriyyəti xalqımızın milli və siyasi şüurunun, yüksək mədəniyyətinin nəticəsi idi.
XX əsrin sonlarında müstəqilliyinə yenidən qovuşan Azərbaycan suverenliyini qoruyub saxlamağı bacardı. Çətin siyasi-iqtisadi dövrdə hakimiyyətə qayıdan Ulu Öndər Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. 1993-cü il oktyabrın 3-də keçirilən seçkilərdə Heydər Əliyev böyük səs çoxluğu ilə Azərbaycan Respublikasının Prezidenti seçildi. O, əsas diqqətini ordu quruculuğuna yönəltdi. Milli Ordunun hərbi hissələrini ayrı-ayrı siyasi qrupların təsiri altından çıxardı. Ulu Öndər Heydər Əliyevin respublikada uğurla reallaşdırdığı siyasət xalqımızın tarixi-mədəni yaddaşını özünə qaytararaq milli mənlik şüurunu inkişaf etdirdi, azərbaycançılıq məfkurəsi işığında müstəqillik arzularının güclənməsi və yaxın gələcəkdə yenidən həqiqətə çevrilməsinə zəmin yaratdı.
Bu gün Prezident İlham Əliyevin rəhbərliyi ilə Azərbaycan Respublikasında demokratik, hüquqi, dünyəvi dövlət, vətəndaş cəmiyyəti quruculuğu prosesi, siyasi, iqtisadi və sosial islahatlar uğurla həyata keçirilir, ölkə iqtisadiyyatı dönmədən inkişaf etdirilir, əhalinin sosial müdafiəsinin gücləndirilməsi üçün əsaslı tədbirlər görülür. Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi altında 44 gün davam edən Vətən müharibəsində düşmən üzərində qələbə çalaraq tarixi nailiyyətə imza atdı. 300-dən çox şəhər və kənd döyüş meydanında işğaldan azad edildi. Düşmən ağ bayraq qaldırdı, təslim oldu və məcbur oldu ki, noyabrın 9-dan 10-na keçən gecə kapitulyasiya aktına imza atsın.
2023-cü il sentyabrın 19-20-də 24 saatdan az müddətdə həyata keçirilən antiterror tədbirləri nəticəsində Azərbaycan ərazisində qanunsuz yerləşən Ermənistan ordusu təm şəkildə tərksilah edilərək, ölkəni tərk etdi. Qarabağda qeyri-qanuni xunta rejimi ləğv edildi, separatçıların əsas rəhbərləri həbs edildi və Azərbaycan öz dövlət suverenliyini tam təmin etdi. Azərbaycanın Zəfər tarixi Xankəndi, Xocalı, Ağdərə, Xocavənd, Əsgəranda üçrəngli bayrağımızın yüksəldilməsi, ərazi bütövlüyümüzün tam bərpası ilə yekunlaşdı.
Azərbaycan xalqı 28 May – Müstəqillik Gününü qalib xalq kimi qarşılayır. Bu əziz bayram erməni işğalından azad edilən torpaqlarda da qeyd olunur. Üçrəngli bayraq doğma Qarabağda – Şuşada, Ağdamda, Zəngilanda qürurla dalğalanır.
Azərbaycan parlamentinin 15 oktyabr 2021-ci il tarixli plenar iclasında “Müstəqillik Günü haqqında” yeni qanun qəbul edildi. Elə həmin gün də Prezident İlham Əliyev tərəfindən "Müstəqillik Günü haqqında" qanun təsdiqlənib. Qanunun təsdiqlənməsi ilə 28 May - Respublika Gününün adı dəyişdirilərək Müstəqillik Günü elan edildi.

https://yeniazerbaycan.com/YAPxeber_e143397_az.html
https://sesqazeti.az/news/politics/1339184.html

Qismət Həbibov
YAP Biləsuvar rayon təşkilatı Yuxarı Ağalı kənd ərazi partiya təşkilatının sədri

25/05/2026

28 May – Müstəqillik Günü: Azərbaycan xalqının azadlıq iradəsinin, dövlətçilik ənənələrinin və milli birliyinin təntənəsi

Azərbaycan xalqının çoxəsrlik dövlətçilik tarixi zəngin və şərəfli səhifələrlə doludur. Bu tarixin ən mühüm və qürurverici günlərindən biri isə 28 May – Müstəqillik Günüdür. Bu tarix xalqımızın azadlıq iradəsinin, milli kimliyinin və dövlətçilik ənənələrinin dünyaya bəyan edildiyi müqəddəs gündür. 1918-ci il mayın 28-də yaradılmış Azərbaycan Xalq Cümhuriyyətinin yaradılması yalnız Azərbaycan xalqı üçün deyil, bütün Şərq aləmi üçün mühüm tarixi hadisə olmuşdur. Çünki həmin gün müsəlman Şərqində ilk parlamentli demokratik respublika yaranmış, xalq hakimiyyəti, milli suverenlik və demokratik idarəetmə prinsipləri əsas götürülmüşdür.
XX əsrin əvvəllərində dünyada baş verən siyasi proseslər, imperiyaların zəifləməsi və xalqların milli azadlıq hərəkatlarının güclənməsi Azərbaycan xalqının da milli dövlət yaratmaq arzularını daha da qüvvətləndirdi. Çar Rusiyasının süqutundan sonra Cənubi Qafqazda yaranmış mürəkkəb siyasi vəziyyət Azərbaycan xalqını öz müqəddəratını müəyyən etmək məsuliyyəti ilə üz-üzə qoydu. Belə bir tarixi şəraitdə Azərbaycanın görkəmli ziyalıları, maarifçiləri və siyasi xadimləri böyük cəsarət nümayiş etdirərək milli dövlət yaratmaq uğrunda mübarizəyə başladılar. Bu mübarizənin nəticəsi olaraq 1918-ci il mayın 28-də Tiflisdə Azərbaycan istiqlaliyyəti elan olundu və Azərbaycan Xalq Cümhuriyyəti yaradıldı.
Azərbaycan Xalq Cümhuriyyəti qısa müddət fəaliyyət göstərməsinə baxmayaraq çox mühüm addımlar atdı. Dövlət atributları – bayraq, gerb və himn qəbul edildi, parlament yaradıldı, milli ordu quruculuğuna başlanıldı, qadınlara seçki hüququ verildi, təhsil və maarif sahəsində mühüm islahatlar həyata keçirildi. Bütün bunlar Azərbaycan xalqının yüksək siyasi mədəniyyətə və demokratik düşüncəyə malik olduğunu göstərirdi. 1920-ci ildə bolşevik Rusiyasının Azərbaycanı işğal etməsi nəticəsində Xalq Cümhuriyyətinin fəaliyyəti dayandırıldı və ölkə uzun illər sovet imperiyasının tərkibində qaldı. Lakin Azərbaycan xalqının azadlıq arzusu heç vaxt sarsılmadı. Milli ruh, milli kimlik və dövlətçilik düşüncəsi xalqın yaddaşında yaşamaqda davam etdi. Sovet dövründə Azərbaycan xalqı bir çox çətinliklərlə üzləşsə də, milli dəyərlərini qoruyub saxladı. Xalqımızın dilinə, mədəniyyətinə və tarixinə bağlılığı gələcək müstəqilliyin ideoloji əsasını formalaşdırdı.
Məhz həmin dövrdə Heydər Əliyev Azərbaycanın inkişafı və milli maraqlarının qorunması istiqamətində mühüm fəaliyyət göstərirdi. Ulu Öndərin hələ sovet dönəmində Azərbaycana rəhbərlik etdiyi illərdə milli kadrların hazırlanmasına, milli mədəniyyətin inkişafına və iqtisadi potensialın gücləndirilməsinə xüsusi diqqət yetirməsi gələcək müstəqil dövlət quruculuğuna mühüm zəmin yaratdı. 1991-ci ildə Sovet İttifaqının dağılması ilə Azərbaycan yenidən dövlət müstəqilliyini bərpa etdi. Lakin müstəqilliyin ilk illərində ölkədə ağır siyasi böhran, iqtisadi tənəzzül, idarəetmədə xaos və vətəndaş qarşıdurması hökm sürürdü. Ermənistanın Azərbaycana qarşı təcavüzü nəticəsində torpaqlarımız işğal olunur, minlərlə insan qaçqın və məcburi köçkün vəziyyətinə düşürdü.
Belə ağır və mürəkkəb bir dövrdə xalqın təkidli tələbi ilə hakimiyyətə qayıdan Ümummilli Lider Heydər Əliyev Azərbaycan dövlətçiliyini məhv olmaq təhlükəsindən xilas etdi. Ulu Öndərin siyasi uzaqgörənliyi, qətiyyəti və zəngin idarəçilik təcrübəsi nəticəsində ölkədə sabitlik təmin edildi, qanunsuz silahlı dəstələr zərərsizləşdirildi və dövlət idarəçiliyi sistemi formalaşdırıldı. Heydər Əliyevin rəhbərliyi ilə Azərbaycan yeni inkişaf mərhələsinə qədəm qoydu. 1995-ci ildə müstəqil Azərbaycanın ilk Konstitusiyası qəbul edildi, hüquqi dövlət quruculuğu istiqamətində mühüm addımlar atıldı. Ölkənin iqtisadi inkişafı üçün geniş proqramlar həyata keçirildi.
Ulu Öndərin müəllifi olduğu neft strategiyası Azərbaycanın gələcək inkişafını təmin edən əsas amillərdən biri oldu. “Əsrin müqaviləsi”nin imzalanması nəticəsində Azərbaycan dünya iqtisadi sistemində mühüm yer tutmağa başladı və böyük investisiyalar cəlb edildi. Bu siyasət ölkəmizin iqtisadi müstəqilliyini möhkəmləndirdi. Bu gün Ümummilli Liderin siyasi kursu İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan son illərdə böyük inkişaf yolu keçmişdir. Ölkədə genişmiqyaslı infrastruktur layihələri həyata keçirilmiş, iqtisadiyyatın şaxələndirilməsi istiqamətində mühüm addımlar atılmış, sosial rifahın yüksəldilməsi dövlət siyasətinin əsas prioritetinə çevrilmişdir.
Azərbaycan artıq regionun aparıcı dövlətidir. Prezident İlham Əliyevin uğurlu xarici siyasəti nəticəsində ölkəmizin beynəlxalq nüfuzu əhəmiyyətli dərəcədə artmışdır. Azərbaycan bir çox beynəlxalq təşkilatlarda fəal rol oynayır, mühüm enerji və nəqliyyat layihələrinin təşəbbüskarı kimi çıxış edir. Xüsusilə ordu quruculuğu sahəsində görülən işlər Azərbaycanın hərbi gücünü ciddi şəkildə artırmışdır. Güclü iqtisadiyyat və müasir ordu dövlətimizin əsas dayaqlarına çevrilmişdir. Azərbaycan tarixinin ən parlaq səhifələrindən biri 2020-ci ildə baş vermiş İkinci Qarabağ Müharibəsi olmuşdur. Ermənistanın uzun illər davam edən işğal siyasətinə son qoymaq məqsədilə başlayan Vətən müharibəsi Azərbaycan xalqının milli birliyini və dövlətinə bağlılığını bütün dünyaya nümayiş etdirdi.
Müzəffər Ali Baş Komandan İlham Əliyevin rəhbərliyi altında Azərbaycan Ordusu 44 gün ərzində böyük qəhrəmanlıq göstərərək torpaqlarımızı işğaldan azad etdi. Şuşanın azad olunması Azərbaycan tarixində xüsusi əhəmiyyətə malik hadisə oldu. Ermənistan kapitulyasiya aktına imza atmağa məcbur edildi və tarixi ədalət bərpa olundu. Bu Zəfər yalnız hərbi qələbə deyil, həm də milli ruhun, dövlətçilik ənənələrinin və xalq-iqtidar birliyinin təntənəsi idi. Azərbaycanın gücü, siyasi iradəsi və xalqın birliyi bütün dünyaya nümayiş etdirildi. Bu gün Azərbaycan tam suveren, müstəqil və güclü dövlətdir. Dövlət bayrağımız ölkəmizin hər yerində qürurla dalğalanır. Azərbaycan xalqı öz dövlətinə inanır, onun ətrafında sıx birləşir və gələcəyə böyük ümidlə baxır.
28 May – Müstəqillik Günü yalnız tarixi bayram deyil, həm də milli birlik, dövlətə sədaqət və vətən sevgisi günüdür. Bu gün hər bir azərbaycanlı üçün müstəqilliyin dəyərini daha dərindən anlamaq və onu qorumağın vacibliyini dərk etmək baxımından xüsusi əhəmiyyət daşıyır. Azərbaycan xalqı əsrlər boyu böyük sınaqlardan keçmiş, lakin heç vaxt öz azadlıq iradəsindən dönməmişdir. Bu gün qazanılmış uğurların əsasında xalqımızın birliyi, dövlətə bağlılığı və uzaqgörən siyasi rəhbərlik dayanır. Müstəqilliyimizi qorumaq, dövlətimizi daha da gücləndirmək və gələcək nəsillərə qüdrətli Azərbaycan ötürmək hər birimizin müqəddəs vəzifəsidir.
Yaşasın müstəqil Azərbaycan!
Yaşasın Azərbaycan dövlətçiliyi!
Yaşasın Azərbaycan xalqının sarsılmaz birliyi!

Elşən Ağazadə
YAP Biləsuvar rayon təşkilatı 19 saylı şəhər ərazi partiya təşkilatının sədri

https://yeniazerbaycan.com/YAPxeber_e143357_az.html
https://sesqazeti.az/news/politics/1339092.html