Biləsuvar Rayon İcra Hakimiyyəti

07/09/2026

"İcra vaxtı" Biləsuvarda: ARB TV-nin Rayon İcra Hakimiyyətinin başçısı Faiq Qürbətovla eksklüziv müsahibəsi!

|ARB TV kanalına abunə olun: https://bit.ly/3jXlQkC Sayt: http://...

07/09/2026

Biləsuvarda Vətən müharibəsi şəhidləri İqbal Astanlının və Babək Mahmudlunun xatirəsinə həsr olunmuş sərbəst və yunan-roma güləşi üzrə 2012-2014-cü il təvəllüdlü yeniyetmələr arasında Biləsuvar rayon açıq birinciliyi keçirilib

Biləsuvar Olimpiya İdman Kompleksində keçirilən birincilikdə Biləsuvar Rayon İcra Hakimiyyəti başçısının müavini Vəlahəddin Yunsurov, YAP Biləsuvar rayon təşkilatının sədri Kamil Qurbanlı, Şirvan-Salyan Regional Gənclər və İdman İdarəsinin rəisi Aydın Yusifov, sektor müdiri Azad Quliyev, Biləsuvar Gömrük İdarəsinin rəisi Ramin Seyidov, Azərbaycan Güləş Federasiyasının nümayəndələri, beynəlxalq dərəcəli hakim Tural Əliyev, Olimpiya Kompleksinin direktoru Tofiq Şahbazov, rayonun hüquq-mühafizə orqanlarının əməkdaşları, idarə, təşkilat və müəssisə rəhbərləri, şəhidlərin valideynləri və rayon sakinləri iştirak ediblər.
Azərbaycan Respublikasının Dövlət Himninin səslənməsi və şəhidlərin xatirəsinin bir dəqiqəlik sükutla yad edilməsi ilə başlanan tədbirin açılış mərasimində çıxış edən natiqlər bildiriblər ki, 2020-ci ilin 27 sentyabrında Azərbaycanın ərazi bütövlüyü və müstəqilliyi uğrunda başlanan Vətən müharibəsində Biləsuvar rayonundan yüzlərlə gənc könüllü olaraq əlinə silah alıb 30-ilə yaxın erməni işğalı altında qalan torpaqlarımızın azadlığı uğrunda döyüşə yollandı. Onların arasında hamımızın yaxşı tanıdığı sərbəst güləş üzrə Azərbaycan çempionu İqbal İlqar oğlu Astanlı və Babək Süleyman oğlu Mahmudlu Vətən yolunda döyüşərək şəhidlik zirvəsinə ucalmışlar. Bugün keçirilən yarış İqbal Astanlının və Babək Mahmudlunun timsalında bütün şəhidlərimizə həsr olunur. Çıxışlardan sonra şəhidlərimizin həyatını və döyüş yolunu əks etdirən videoçarx nümayiş olunub.
Respublikanın müxtəlif bölgələrindən 200 nəfərə yaxın idmançı arasında gərgin və maraqlı görüş keçirilib. Yaş qrupları üzrə keçirilən görüşlərin sonunda qaliblər mükafatlandırılıb.
Mükafatlandırma mərasimində qalib idmançılara diplom, medal və qiymətli hədiyyələr təqdim edilib.
Azərbaycan Respublikasının Gənclər və İdman Nazirliyi

04/09/2026

Biləsuvar rayon İcra Hakimiyyətinin Başçısı rayon sakinlərinin müraciətlərini dinləyib.
Biləsuvar Rayon İcra Hakimiyyətinin başçısı Faiq Qürbətov keçirdiyi qəbul zamanı müraciət edən rayon sakinlərini dinləyərək, onların problemlərinin qanunamüvafiq qaydada aradan qaldırılması istiqamətində müvafiq göstərişlər verib. Qəbul zamanı bir sıra məsələlər yerindəcə həll edilib, icrası vaxt tələb edən müraciətlər isə araşdırılaraq həll edilməsi üçün icraata götürülüb.

04/09/2026

Biləsuvar rayonuna həsr olunan və Rayon İcra Hakimiyyəti Başçısının müsahibəsinin yer aldığı "İcra vaxtı" verilişi bu bazar günü, saat 22:30-da ARB TV-də yayımlanacaq.

03/09/2026

Bu gün Azərbaycan teatr və kino sənətinin əvəzolunmaz ustadı, Xalq artisti Yaşar Nurinin 75 illik yubileyidir.
Bu məqsədlə Biləsuvar rayon Heydər Əliyev Mərkəzində keçiriliən kino günündə böyük sənətkarın canlandırdığı "Qatarda" televiziya tamaşası nümayiş olunub.
Televiziya tamaşasını Biləsuvar Rayon İcra Hakimiyyətinin başçısı Faiq Qürbətov, YAP Biləsuvar Rayon Təşkilatının sədri Kamil Qurbanlı, rayonun idarə, müəssisə, təşkilat rəhbərləri və rayon ictimaiyyətinin nümayəndələri izləyib.
Qeyd edək ki, 3 sentyabr 1951-ci ildə dünyaya göz açan böyük sənətkar, canlandırdığı hər bir obrazla milli mədəniyyətimizin qızıl fonduna silinməz izlər həkk etmişdir. Onun "Qatarda", "Bəyin oğurlanması" və digər onlarla unudulmaz ekran əsərində bəxş etdiyi bənzərsiz rollar bu gün də tamaşaçılar tərəfindən böyük rəğbət və heyranlıqla izlənilir.
1981-ci ildə ekranlaşdırılmış "Qatarda" televiziya tamaşası Azərbaycan televiziyasının qızıl fonduna daxil olan, ən populyar və sevilən komediyalardan biridir. Yazıçı İsi Məlikzadənin ssenarisi əsasında görkəmli rejissor Ramiz Həsənoğlu tərəfindən quruluş verilən bu əsər, cəmi iki həftəlik məşq və iki günlük çəkilişlə Azərbaycan televiziya tarixində ən qısa müddətdə ərsəyə gələn ekran işlərindən sayılır.
Tamaşanın uğur qazanmasının ən böyük səbəbi dövrün nəhəng aktyor heyətinin bir araya gəlməsidir. Rolları Azərbaycan teatr və kinosunun ustad sənətkarları olan Hamlet Xanızadə, Yaşar Nuri, Səyavuş Aslan, Səidə Quliyeva canlandırıb.
Hadisələr hərəkətdə olan bir qatarın daxilində (kupedə) cərəyan edir. Əsər sovet dövründəki bürokratiyanı, vəzifəpərəstliyi, rəhbər qarşısında baş əymə və yaltaqlıq xəstəliyini kəskin şəkildə tənqid edir.Hamlet Xanızadənin təmkinli obrazı, Yaşar Nurinin bənzərsiz mimikaları və Səyavuş Aslanın ironik yumoru tamaşanı zamansız bir sənət əsərinə çevirib. Cəmi 50 dəqiqə çəkən bu ekran əsəri, kiçik məkanda böyük bir cəmiyyət eybəcərliyini göstərməyi bacaran ən uğurlu Azərbaycan teletamaşalarından biridir.
Azərbaycan Respublikası Mədəniyyət Nazirliyi
Azərbaycan Dövlət Film Fondu
Azərbaycan Kinematoqrafçılar İttifaqı
ARKA - Azərbaycan Respublikasının Kino Agentliyi

02/09/2026

Biləsuvar Rayon İcra Hakimiyyətinin başçısı Faiq Qürbətov növbəti səyyar qəbulu Ovçubərə kənd sakinləri ilə keçirdi.

Səyyar qəbul zamanı Faiq Qürbətov ölkə Prezidenti cənab İlham Əliyevin rəhbərliyi ilə respublikamızda və rayonumuzda görülən işlər barədə kənd sakinlərinə ətraflı məlumat verib.
Sonra Rayon İcra Hakimiyyətinin başçısı kənd sakinlərinin təkliflərini, istəklərini dinləyib və onları narahat edən problemləri məsul şəxslərin iştirakı ilə araşdırıb.
Sakinlərlə keçirilən səyyar qəbulda Biləsuvar Rayon İcra Hakimiyyəti Başçısı aparatının məsul şəxsləri, hüquq mühafizə orqanlarının rəhbərləri, rayonun idarə, müəssisələrinin, xidmət sahələrinin rəhbərləri də iştirak edib.

01/09/2026

Biləsuvar şəhər Heydər Əliyev Parkında inşa olunmuş fəvvarənin açılışı olub.

Biləsuvar şəhər Heydər Əliyev Parkında inşa olunmuş yeni fəvvarənin açılışında rayon rəhbərliyi, ictimaiyyət nümayəndələri və sakinlər iştirak edib.
Biləsuvar Rayon İcra Hakimiyyətinin başçısı Faiq Qürbətov fəvvarənin açılışından sonra tikinti işlərində əməyi keçən insanlara minnətdarlığını bildirərək sakinlərə xoş istirahətlər arzulayıb.
Qeyd edək ki, fəvvarənin ətrafında abadlıq işləri aparılıb, istirahət üçün oturacaqlar quraşdırılıb. Əraziyə gözəllik verən fəvvarə, burada istirahətə gələn sakinlərin asudə vaxtını daha mənalı keçirmələri üçün gözəl töhfədir.

01/09/2026

“Abad məhəllə” layihəsi çərçivəsində Biləsuvar şəhərində növbəti park salınır.
21 avqust - 21 sentyabr tarixləri müddətində ölkəmizdə keçirilən “Sülh Aylığı” və Biləsuvar Rayon İcra Hakimiyyətinin təşkilatçılığı ilə şəhərin ayrı-ayrı məhəllələrində həyata keçirilən “Abad Məhəllə” layihəsi çərçivəsində şəhid Hüseyn Dəmirli küçəsində yeni park salınır.
Park üçün müəyyənləşdirilmiş ərazidə torpaq səthinin hamarlaşdırılması işləri aparılmış, Kommunal Müəssisələr Kombinatı və DOST xidmətinin əməkdaşları tərəfindən səliqə-sahman yaradılaraq təmizlik işləri həyata keçirilmişdir. Bundan əlavə parkın ərazisində alaq otları vurularaq, ağacların budanması işləri aparılır.
Hazırda rayonda keçirilən növbəti ağacəkmə aksiyası çərçivəsində yeni salınan parkda müxtəlif növ ağaclar əkilərək suvarılıb.
Qeyd edək ki, layihə çərçivəsində rayon ərazisindəki digər məhəllələrdə də analoji abadlıq işlərinin mərhələli şəkildə davam etdirilməsi nəzərdə tutulub. Bu cür ekoloji aksiyalar şəhərin estetik görünüşünü gözəlləşdirməklə yanaşı, həm sakinlərin asudə vaxtının səmərəli təşkilinə, həm də ətraf mühitin qorunmasına da böyük töhfə verir.

01/09/2026

Nəsimi kəndində fermer və mülkiyyətçilərlə görüş keçirilib.
Prezident İlham Əliyevin 25 may 2026-cı il tarixli Sərəncamı ilə təsdiq edilmiş “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın icrasını təmin etmək məqsədilə rayonun Nəsimi kəndində fermer və mülkiyyətçilərlə görüş keçirilib.
Tədbirdə Biləsuvar Rayon İcra Hakimiyyəti başçısının müavini Vəlahəddin Yunsurov, Biləsuvar rayon Dövlət Aqrar İnkişaf Mərkəzinin (DAİM) məsul şəxsləri, Nəsimi kənd sakinləri və fermerlər iştirak edib.
Görüşdə çıxış edən Rayon İcra Hakimiyyəti başçısının müavini Vəlahəddin Yunsurov proqramın kənd təsərrüfatı, balıqçılıq və akvakultura sahələrinin inkişafındakı mühüm rolunu vurğulayaraq, bu strateji sənədin rayonda torpaqlardan daha səmərəli istifadə olunmasına, məhsuldarlığın artırılmasına və aqrar sektorun regional infrastrukturunun gücləndirilməsinə xidmət edəcəyini bildirib. V.Yunsurov qeyd edib ki, dövlət tərəfindən aqrar sahəyə göstərilən diqqət və qayğı fermerlərin fəaliyyətini daha da stimullaşdırmaqla yanaşı rayonda kənd təsərrüfatı məhsullarının istehsal həcmini əhəmiyyətli dərəcədə artıracaqdır.
Görüşdə mülkiyyətçilərə məhsul istehsalı və emalı prosesinin müasirləşdirilməsi istiqamətində dövlət tərəfindən yaradılan yeni imkanlar barədə geniş məlumat verilmişdir.
Sonda kənd sakinləri və fermerləri maraqlandıran suallar cavablandırılmış, onların təklifləri dinlənilərək müvafiq qeydlər götürülmüşdür.

31/08/2026

Biləsuvarda təmizlik və abadlıq işləri davam edir.

Biləsuvar şəhərində Kommunal Müəssisələr Kombinatı və “DOST” İş Mərkəzi tərəfindən gündəlik olaraq təmizlik və abadlıq işləri davam etdirilir. Küçələr təmizlənərək tullantılar zərərsizləşdirilir, məişət tullantılarının müvəqqəti saxlanc yerləri mütəmadi olaraq boşaldılır, ətrafı təmizlənir, yol kənarlarındakı ağaclar və dekorativ kollar suvarılır.