28/08/2026
Azərbaycan - Özbəkistan münasibətlərinin böyük gələcəyi var
Azərbaycan və Özbəkistan münasibətlərinin bugünkü mənzərəsinə nəzər saldıqda bir məqam xüsusilə diqqəti çəkir: iki ölkə arasında siyasi etimad nə qədər möhkəmdirsə, bu etimadın yaratdığı əməkdaşlıq imkanları da bir o qədər genişdir. Prezident İlham Əliyevin Daşkənddə mətbuata bəyanatı məhz bu reallığı bir daha nümayiş etdirdi. Bəyanatda səslənən fikirlər Azərbaycan–Özbəkistan əlaqələrinin sadəcə dostluq münasibətləri deyil, konkret nəticələrə söykənən strateji tərəfdaşlıq səviyyəsinə yüksəldiyini göstərir.
Bu tərəfdaşlığın ən mühüm xüsusiyyəti qarşılıqlı hörmət və etimadın dövlət siyasətinə çevrilməsidir. Azərbaycan və Özbəkistan bir-birinin ərazi bütövlüyünə, suverenliyinə və milli maraqlarına daim hörmətlə yanaşır. Beynəlxalq təşkilatlarda qarşılıqlı dəstək də bu siyasi yaxınlığın mühüm göstəricilərindəndir. Belə mövqelər ölkələr arasında etimadı daha da möhkəmləndirir və ikitərəfli münasibətlərin sabitliyini təmin edir.
Prezident İlham Əliyevin Daşkənddə verdiyi bəyanatın mühüm məqamlarından biri də iki ölkənin inkişaf göstəricilərinin və qarşıya qoyduğu məqsədlərin bir-birinə yaxın olması ilə bağlıdır. Azərbaycan kimi Özbəkistan da iqtisadiyyatın şaxələndirilməsi, sənayeləşmə, yeni investisiyaların cəlb edilməsi və müasir infrastrukturun yaradılması istiqamətində mühüm layihələr həyata keçirir. Bu paralel inkişaf prosesləri əməkdaşlığın dərinləşdirilməsi üçün əlverişli zəmin yaradır.
İqtisadi əlaqələrin genişlənməsi isə artıq qarşılıqlı niyyətlərin konkret göstəricilərini ortaya qoyur. Ticarət dövriyyəsinin artırılması, investisiya layihələrinin həyata keçirilməsi və birgə müəssisələrin yaradılması iki ölkənin biznes dairələri üçün yeni imkanlar açır. Daşkənddə imzalanmış sənədlər arasında ticarət və investisiya əməkdaşlığına xüsusi diqqət yetirilməsi də bu istiqamətin prioritet olduğunu göstərir.
2030-cu ilədək qarşılıqlı ticarət dövriyyəsinin 1 milyard dollara çatdırılması hədəfi isə münasibətlərin iqtisadi gündəliyində yeni mərhələnin başlanğıcı kimi qiymətləndirilə bilər. Bu məqsədin reallaşdırılması üçün yalnız dövlət qurumlarının fəaliyyəti kifayət deyil. Sahibkarlar, investisiya şirkətləri, sənaye müəssisələri və maliyyə institutları arasında birbaşa əlaqələrin genişləndirilməsi də mühüm rol oynayacaq. Belə əməkdaşlıq yeni məhsulların istehsalına, xidmətlərin çeşidinin artırılmasına və iki ölkənin bazarlarının daha sıx inteqrasiyasına imkan verəcək.
Azərbaycan və Özbəkistanın iqtisadi potensialının birləşdirilməsi nəqliyyat və logistika baxımından da böyük perspektivlər vəd edir. Azərbaycanın Xəzər dənizi vasitəsilə Avropa istiqamətində formalaşdırdığı nəqliyyat imkanları Mərkəzi Asiya ölkələri üçün mühüm əhəmiyyət daşıyır. Özbəkistanın bu marşrutlarda fəallığının artması isə Orta Dəhlizin yük potensialının genişləndirilməsinə xidmət edə bilər. Bu prosesə daha geniş prizmadan yanaşdıqda Azərbaycan ilə Mərkəzi Asiya arasında formalaşan yeni əlaqələr sisteminin əhəmiyyəti daha aydın görünür. Prezident İlham Əliyevin Azərbaycanı və Mərkəzi Asiyanı vahid geosiyasi və geoiqtisadi məkan kimi qiymətləndirməsi də məhz bu reallığa əsaslanır. Nəqliyyat xətlərinin, enerji layihələrinin, ticarət əlaqələrinin və investisiya münasibətlərinin inkişafı bu məkanı getdikcə daha sıx bağlayır. Prezident İlham Əliyevin Daşkənddə səsləndirdiyi fikirlərdən aydın olur ki, Azərbaycan bu münasibətlərə uzunmüddətli perspektivdən yanaşır. Qarşıya qoyulan iqtisadi hədəflər, yeni investisiya layihələri, nəqliyyat imkanlarının genişləndirilməsi və humanitar əlaqələrin inkişafı münasibətlərin gələcək konturlarını müəyyənləşdirir.
Rüstəm Nağıyev,
YAP Gədəbəy rayon təşkilatının sədri.
