18/08/2026
Prezident İlham Əliyevin Naxçıvana 17-ci səfəri
Prezident İlham Əliyevin Naxçıvana 17-ci səfəri Muxtar Respublikanın təhlükəsizliyinin, sosial-iqtisadi inkişafının və regional əhəmiyyətinin artırılmasının Azərbaycanın dövlət siyasətində prioritet istiqamətlərdən biri olaraq qaldığını bir daha nümayiş etdirib. Dövlət başçısının Azərbaycan Televiziyasına müsahibəsində səfər çərçivəsində həyata keçirilən layihələr, qarşıdakı dövr üçün müəyyənləşdirilən hədəflər və Naxçıvanın Azərbaycanın ümumi inkişaf strategiyasındakı yeri barədə mühüm fikirlər səsləndirilib.
Prezident İlham Əliyevin diqqət çəkdiyi əsas məsələlərdən biri Naxçıvanın müdafiə potensialının daha da gücləndirilməsidir. Dövlət başçısı Naxçıvanın coğrafi xüsusiyyətlərini nəzərə alaraq onun təhlükəsizliyinə xüsusi diqqət göstərilməsinin zəruri olduğunu bildirib. Bu yanaşma Azərbaycanın əsas hissəsi ilə birbaşa quru bağlantısı olmayan muxtar respublikanın müdafiə imkanlarının ayrıca strateji əhəmiyyət daşıdığını göstərir.
Naxçıvanda Əlahiddə Ordunun yaradılması da məhz bu siyasətin mühüm istiqamətlərindən biri kimi təqdim olunur. Ən müasir hərbi texnika ilə təchizat, yeni komando qüvvələrinin yaradılması və hərbi potensialın davamlı şəkildə artırılması Azərbaycan Silahlı Qüvvələrinin ümumi gücləndirilməsi prosesinin Naxçıvan istiqamətində də ardıcıl davam etdirildiyini göstərir. Prezidentin vurğuladığı kimi, Azərbaycan Silahlı Qüvvələri artıq bölgədə söz sahibidir və bu potensial daha da gücləndiriləcək.
Naxçıvanın inkişaf strategiyasında təhlükəsizliklə yanaşı, iqtisadi dayanıqlılıq da xüsusi yer tutur. Səfər zamanı Naxçıvan Sənaye Parkının təməlinin qoyulması bu baxımdan diqqətçəkən hadisədir. Parkın yaradılması yeni istehsal sahələrinin formalaşmasına, investisiyaların cəlb edilməsinə və əhalinin məşğulluğunun artırılmasına imkan verəcək. Bununla da Naxçıvanın iqtisadi inkişafının yalnız dövlət investisiyaları hesabına deyil, özəl sektorun iştirakı ilə də genişləndirilməsi hədəflənir.
Enerji təhlükəsizliyi isə Naxçıvanın gələcək inkişafının əsas dayaqlarından biri kimi müəyyənləşdirilir. Naxçıvan Sənaye Parkının tərkibində 300 meqavat gücündə istilik elektrik stansiyasının inşasının nəzərdə tutulması muxtar respublikanın generasiya gücünü əhəmiyyətli dərəcədə artıracaq. Bu layihənin məqsədi yalnız daxili tələbatın qarşılanması deyil, gələcəkdə Naxçıvandan elektrik enerjisi ixracının mümkün qədər genişləndirilməsidir.
Prezidentin müsahibəsində diqqət çəkən məqamlardan biri də Naxçıvanın enerji potensialının artıq yalnız daxili ehtiyaclar kontekstində qiymətləndirilməməsidir. Günəş və su enerjisi imkanları hesabına burada böyük həcmdə bərpaolunan enerji istehsalının yaradılması planlaşdırılır. Aparılan təhlillər Naxçıvanın Günəş enerjisi istehsalı baxımından Azərbaycanın ən əlverişli ərazilərindən biri olduğunu göstərir. Artıq yüzlərlə meqavat gücündə yeni stansiyaların yaradılması üçün ərazilər müəyyənləşdirilib.
Bu mənada Naxçıvanın enerji siyasətində yeni mərhələ formalaşır. Muxtar respublikanın mövcud generasiya gücü bugünkü tələbatı ödəsə də, qarşıdakı dövr üçün daha böyük istehsal imkanlarının yaradılması nəzərdə tutulur. Günəş və su elektrik stansiyalarının, batareya saxlanc qurğularının və yeni ötürücü xətlərin yaradılması Naxçıvanın həm enerji təminatını daha dayanıqlı edəcək, həm də onu gələcəkdə enerji ixrac edən ərazilərdən birinə çevirə bilər.
Prezident İlham Əliyevin fikirlərindən aydın olur ki, Naxçıvanın inkişafı yalnız bir muxtar respublikanın sosial-iqtisadi göstəricilərinin yaxşılaşdırılması kimi nəzərdən keçirilmir. Burada yaradılan enerji, sənaye və infrastruktur imkanları daha geniş regional layihələrin tərkib hissəsi kimi qiymətləndirilir. Naxçıvanın Türkiyə və İranla enerji bağlantıları, gələcəkdə Avropa istiqamətində ixrac imkanlarının genişləndirilməsi Azərbaycanın enerji xəritəsində bu ərazinin rolunu daha da artırır.
Sosial-iqtisadi inkişafın digər mühüm istiqaməti kənd təsərrüfatıdır. Naxçıvanın inkişafına dair Dövlət Proqramında və kənd təsərrüfatı sahəsi üzrə qəbul edilən yeni tədbirlərdə muxtar respublikaya xüsusi yer ayrılması qarşıdakı mərhələdə bu sektorun da genişləndiriləcəyini göstərir. Suvarma layihələrinin həyata keçirilməsi, artezian quyularının qazılması və müasir suvarma sistemlərinin qurulması istifadəsiz və ya su çatışmazlığı səbəbindən tam istifadə olunmayan torpaqların iqtisadi dövriyyəyə cəlb edilməsinə şərait yaradacaq.
Bütün bunlarla yanaşı, Naxçıvanın inkişafının mühüm dayaqlarından biri onun tarixi-mədəni irsidir. Prezident İlham Əliyev Möminə xatun məqbərəsinin bərpası və digər tarixi abidələrin qorunması ilə bağlı görülən işləri xüsusi qeyd edib. Bu yanaşma Naxçıvanın yalnız iqtisadi və strateji əhəmiyyətini deyil, Azərbaycan xalqının milli yaddaşında və mədəni tarixində tutduğu xüsusi yeri də ön plana çıxarır.
Beləliklə, Prezidentin Naxçıvan səfəri çərçivəsində səsləndirdiyi fikirlər göstərir ki, muxtar respublika üçün qarşıdakı dövrdə təhlükəsizlik, sənayeləşmə, enerji, kənd təsərrüfatı və sosial inkişaf istiqamətləri paralel şəkildə həyata keçiriləcək. Dövlət başçısının vurğuladığı kimi, Naxçıvanın sürətli sosial-iqtisadi inkişafı davam etdiriləcək və burada yaradılan imkanlar Azərbaycanın regional gücünün daha da artırılmasına xidmət edəcək.
