30/07/2026
Yeni Azərbaycan Partiyasının Lənkəran və Salyan rayon təşkilatlarının birgə təşəbbüsü ilə görüş keçirilib
29 iyul 2026-cı il tarixində Yeni Azərbaycan Partiyasının (YAP) Lənkəran və Salyan rayon təşkilatlarının birgə təşkilatçılığı ilə Lənkəran şəhərində “Şəhərsalma və Memarlıq İli” çərçivəsində “Gənc fəallar arasında operativ məlumat mübadiləsi və peşəkar əlaqələrin qurulması” mövzusunda tədbir keçirilib. Tədbirdə YAP Lənkəran rayon təşkilatının sədri İqbal Əmənullayev, YAP Salyan rayon təşkilatının sədri Elmar Əhmədov, hər iki rayon təşkilatlarının əməkdaşları və fəalları iştirak ediblər.
Tədbir iştirakçıları öncə Lənkəran şəhər Heydər Əliyev Mərkəzində Ulu Öndər Heydər Əliyevin büstünü ziyarət edib, önünə gül-çiçək dəstələri düzərək xatirəsini ehtiramla yad ediblər.
Sonra tədbir iştirakçıları Lənkəran şəhər Heydər Əliyev Mərkəzini, General Həzi Aslanovun Ev-Muzeyini, Tarix-Diyarşünaslıq Muzeyini (Xan Evi), "Dairəvi Qala"nı və şəhərin digər tarixi-memarlıq abidələrini ziyarət edərək Lənkəranın zəngin memarlıq irsi, şəhərsalma ənənələri və tarixi-mədəni irsi ilə yaxından tanış olublar. Həmçinin, onlar Xanbulan gölü ətrafındakı istirahət məkanlarında və Hirkan Milli Parkında olublar.
Daha sonra tədbir YAP Lənkəran rayon təşkilatında davam etdirilib. İlk öncə Ümummilli Lider Heydər Əliyevin və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Tədbiri giriş sözü ilə açan YAP Lənkəran rayon təşkilatının sədri İqbal Əmənullayev bildirib ki, rəqəmsal platformaların və sosial media alətlərinin əhatə dairəsinin genişləndiyi müasir dövrdə milli informasiya resurslarının potensialının artırılması və qlobal informasiya məkanında mövqelərin daha da möhkəmləndirilməsi mühüm vəzifələrdəndir. O qeyd edib ki, partiya təşkilatları arasında təcrübə mübadiləsi bilik və bacarıqların paylaşılması, əməkdaşlığın inkişafı və gənclərin təşkilati fəaliyyətə daha fəal cəlb olunması baxımından xüsusi əhəmiyyət daşıyır. Təşkilat sədri həmçinin, vurğulayıb ki, ölkədə elan olunmuş "Şəhərsalma və Memarlıq İli" çərçivəsində keçirilən belə tədbirlər gənclərin milli memarlıq irsi, müasir şəhərsalma prinsipləri və şəhər mühitinin qorunmasına məsuliyyətli yanaşma ruhunda maarifləndirilməsi baxımından mühüm əhəmiyyət kəsb edir.
Daha sonra YAP Salyan rayon təşkilatının sədri Elmar Əhmədov çıxış edərək bildirib ki, belə görüşlər iş prosesinin daha operativ və səmərəli təşkilinə, peşəkar əlaqələrin genişlənməsinə, yeni yanaşmaların və müasir iş metodlarının öyrənilməsinə mühüm töhfə verir. O qeyd edib ki, son illər media fəaliyyətinin qanunvericilik bazasının təkmilləşdirilməsi, dövlətin kommunikasiya siyasətinin müasir dövrün tələblərinə uyğun qurulması və cəmiyyətimizi narahat edən mənfi halların aradan qaldırılması istiqamətində mühüm nəticələr əldə olunub. Elmar Əhmədov qeyd edib ki, Prezident İlham Əliyevin Sərəncamı ilə 2026-cı ilin "Şəhərsalma və Memarlıq İli" elan olunması ölkəmizdə müasir şəhərsalma siyasətinin, memarlıq irsinin qorunmasının və yaşayış məntəqələrinin davamlı inkişafının dövlət siyasətinin mühüm istiqamətlərindən biri olduğunu bir daha nümayiş etdirir. Bu baxımdan belə tədbirlər müxtəlif rayon təşkilatları arasında əməkdaşlığın genişlənməsinə, müasir yanaşmaların və müsbət təcrübələrin paylaşılmasına da töhfə verir.
Sonra YAP Lənkəran və Salyan rayon təşkilatlarının əməkdaşları və fəalları çıxış edərək belə tədbirlərin qarşılıqlı təcrübə mübadiləsinin genişlənməsi, işgüzar əlaqələrin möhkəmləndirilməsi və yeni əməkdaşlıq imkanlarının yaranması baxımından böyük əhəmiyyət daşıdığını bildiriblər. Qeyd olunub ki, bu cür görüşlər gənclərin həm peşəkar, həm də şəxsi inkişafına töhfə verir, yeni bilik və bacarıqların əldə olunmasına, fərqli baxış bucaqları ilə tanış olmağa və gələcək birgə fəaliyyət üçün möhkəm əlaqələrin qurulmasına əlverişli şərait yaradır.
Tədbirin sonunda YAP Lənkəran rayon təşkilatının qonağı olan Salyan rayon təşkilatının rəhbərliyi və əməkdaşları çay süfrəsi arxasında Lənkəran rayon təşkilatının rəhbərliyi ilə bir araya gələrək səmimi fikir mübadiləsi aparıblar. Görüş zamanı partiya fəaliyyətinin müxtəlif istiqamətləri, təşkilati işin təkmilləşdirilməsi, gənclərlə işin daha da gücləndirilməsi, partiyanın strateji hədəfləri və gələcək əməkdaşlıq perspektivləri ətrafında geniş müzakirələr aparılıb.
Sonda YAP salyan rayon təşkilatının nümayəndə heyəti göstərilən yüksək qonaqpərvərliyə və səmimi qarşılanmaya görə YAP Lənkəran rayon təşkilatına təşəkkürünü bildirib, bu cür birgə tədbirlərin qarşılıqlı əməkdaşlığın daha da möhkəmləndirilməsi və təcrübə mübadiləsinin genişləndirilməsi baxımından davamlı xarakter daşımasının vacibliyini vurğulayıb.
https://yap.org.az/az/view/news/107127/yap-lenkeran-ve-salyan-rayon-teshkilatlarinin-birge-teshkilatchiligi-ile-tedbir-kechirilib
