02/06/2026
01.06.2026-cı il tarixində İmran Qasımov adına Naxçıvan Şəhər Mərkəzləşdirilmiş Kitabxana Sisteminin Mərkəzi Kitabxanasında 01 İyun "Uşaqların Beynəlxalq Müdafiəsi Günü" ilə əlaqədar "Xoşbəxt uşaqlıq, parlaq gələcək" adlı tədbir keçirilmişdir.
Tədbiri giriş sözü ilə İmran Qasımov adına Naxçıvan Şəhər Mərkəzləşdirilmiş Kitabxana Sisteminin direktoru Minayə Nəbisoy açaraq qeyd etmişdir ki, bu gün çox gözəl, çox mənalı və çox xüsusi bir gündür. Bu gün dünyanın ən saf, ən təmiz, ən günahsız varlıqları olan uşaqların bayramıdır — 1 İyun Uşaqların Beynəlxalq Müdafiəsi Günüdür. Bu əlamətdar gün uşaqlara olan sevginin, diqqətin və qayğının ifadəsidir. Uşaqlar həyatın sevinci, ailələrin xoşbəxtliyi, millətin və dövlətin gələcəyidir. Onların gülüşü dünyanı gözəlləşdirir, saf baxışları insanlara ümid verir, sevinc bəxş edir.
Sonra isə Uşaq şöbəsinin müdiri İlahə Qasımova "Xoşbəxt uşaqlıq, parlaq gəlcək" və Uşaq şöbəsinin Oxu zal müdiri Səkinə Bayraməliyeva "Balaca qəlblərin böyük arzuları” mövzularında çıxış edərək vurğulamışlar ki, uşaqların ürəyi balaca olsa da, onların arzuları sonsuzdur. Uşaqlar xəyallar qurur, gələcəyi düşünür və həyata ümidlə baxırlar. Hər bir böyük insan bir zamanlar arzularla yaşayan bir uşaq olmuşdur. Bu gün müəllim, həkim, alim, şəhid qəhrəman və ya uğurlu bir insan olanların hamısı vaxtilə uşaqlıq arzularının arxasınca gediblər. Uşaqlar bizim gələcəyimizdir. Gələcəyin necə olacağı isə bugünkü uşaqların necə böyüməsindən asılıdır. Əgər uşaqlar sağlam, savadlı, mərhəmətli və vətənpərvər böyüsələr, gələcəyimiz də güclü və işıqlı olacaqdır. Buna görə də uşaqların tərbiyəsi hər bir cəmiyyət üçün ən vacib məsələlərdən biridir. Uşağa verilən sevgi, qayğı və düzgün tərbiyə onun gələcək həyatını formalaşdırır.Valideyn sevgisi uşağın həyatında xüsusi yer tutur. Uşaq üçün ən böyük xoşbəxtlik ailədə sevgi və mehribanlıq görməkdir. Ailədə böyüklərin davranışı uşağın xarakterinə təsir edir. Əgər uşaq sevgi ilə böyüyərsə, o da gələcəkdə insanlara sevgi bəxş edər..
