02/09/2026
Sülh insanların təhlükəsiz, azad və qarşılıqlı hörmət şəraitində yaşaması üçün ən vacib dəyərlərdən biridir. Bu dəyərin bütün dünyada təbliği məqsədilə Birləşmiş Millətlər Təşkilatının Baş Assambleyasının 30 noyabr 1981-ci il tarixli qətnaməsi ilə Beynəlxalq Sülh Günü təsis edilib. Daha sonra, 28 sentyabr 2001-ci il tarixli qətnamə ilə 21 sentyabr hər il Beynəlxalq Sülh Günü kimi müəyyən olunub.
Beynəlxalq Sülh Günü insanları sülhün qorunmasına, zorakılıqdan uzaq olmağa, qarşılıqlı anlayış və əməkdaşlığı gücləndirməyə çağırır. Beynəlxalq Sülh Günü ərəfəsində Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyevanın müraciəti ilə 21 avqust – 21 sentyabr tarixləri ölkəmizdə “Sülh Aylığı” elan edilib. Bu müddət ərzində sülh, insan hüquqları, tolerantlıq, qarşılıqlı hörmət və dinc birgəyaşayış dəyərlərinin təbliği məqsədilə müxtəlif maarifləndirici tədbirlərin keçirilməsi nəzərdə tutulur.
Sülh yalnız müharibə və zorakılığın olmaması demək deyil. İnsan hüquqlarına hörmət, bərabərlik, ədalət, qarşılıqlı etimad, dialoq və anlayış da davamlı sülhün əsas şərtlərindəndir. Xüsusilə gənclərin sülh mədəniyyətinin formalaşdırılmasında mühüm rolu var. Hər bir gənc gündəlik həyatında fərqli fikirlərə və insanlara hörmətlə yanaşmaqla, tolerantlığı və qarşılıqlı anlayışı təşviq etməklə daha sağlam və dinc cəmiyyətin qurulmasına öz töhfəsini verə bilər.
Gəlin sülhü, birliyi və qarşılıqlı hörməti həyatımızın vacib dəyərinə çevirək. Çünki sülh hər birimizin davranışından və münasibətindən başlayır! 🕊️
