03/09/2026
Polimer Materialları İnstitutunun əməkdaşlarının Q4 kvartilli jurnalda növbəti məqaləsi dərc olunub
Azərbaycan Respublikası Elm və Təhsil Nazirliyi Sumqayıt Dövlət Universitetinin tabeliyində Polimer Materialları İnstitutunun Yüksək şaxələnmiş polimerlər laboratoriyasının müdiri kimya üzrə fəlsəfə doktoru, dosent Elnarə Aslanova, laboratoriyanın əməkdaşları – elmi işçi Aybəniz Qarayeva, mühəndislər Sevinc Heydərova və Vüsalə Atakişiyevanın həmmüəllifi olduqları məqalə Q4 kvartilli “Russian Journal of Organic Chemistry” jurnalında (2026, 27 August 2026,Volume 62,article number 145 https://link.springer.com/article/10.1134/S1070428026602712) dərc olunub.
“Synthesis of a Sulfoimide-Containing Polyhydroxy Ester Based on 2 Hydroxypropyl-1,3-bis (hydroxyethyl ester) Sulfoimide of Saccharin-6-carboxylic Acid” (Saxarin-6-karbon turşusunun 2-hidroksipropil-1,3-bis-hidroksietilefirosulfoimidi əsasında sulfoimid tərkibli polihidroksiefirinin sintezi) adlı məqalədə yüksək temperatura davamlı polimerlərin istehsalı üçün sulfoimid qrupları saxlayan yeni polihidroksiefirin sintezi istiqamətində aparılan tədqiqatların nəticələri təqdim olunub. Tədqiqatlar nəticəsində yüksək temperatura davamlı yeni polihidroksiefir sintez edilib. Sintez edilən polimerin termiki, fiziki-kimyəvi və mexaniki xassələri differensial termiki analiz və differensial termoqravimetriya üsulları ilə tədqiq olunub. Alınan birləşmələrin quruluşları İQ-spektroskopiya üsulu ilə təsdiqlənib. Müəyyən edilib ki, polihidroksiefir yüksək fiziki-mexaniki və termiki xassələrə malikdir.
Qeyd edək ki, 2025-ci il üzrə impakt faktor göstəricisi 0.7, Scopus CiteScore göstəricisi 1,3 təşkil edən jurnal Pleiades Publishing nəşriyyat platformasında yayımlanır, Web of Science (ESCI), Scopus və digər beynəlxalq xülasələndirmə və indeksləmə sisteminə (bazasına) daxildir.
