26/05/2026
Yevlax Peşə Məktəbi və Yevlax şəhər Gənclər və İdman sektorunun birgə əməkdaşlığı ilə Yevlax Peşə Məktəbində 28 May – Müstəqillik Günü münasibətilə tədbir keçirildi.
Tədbirin əvvəlində Azərbaycan Respublikasının Dövlət Himni səsləndirildi. Daha sonra Ümummilli Lider Heydər Əliyevin və torpaqlarımızın azadlığı uğrunda canlarından keçən şəhidlərimizin əziz xatirəsi bir dəqiqəlik sükutla yad edildi.
Tədbiri giriş sözü ilə açan Yevlax Peşə Məktəbinin direktoru Nəbi Mehdizadə çıxış edərək bildirdi ki:
"28 May tariximizin ən şərəfli və parlaq səhifələrindən biridir. 1918-ci ildə Şərqdə ilk demokratik respublika olan Azərbaycan Xalq Cümhuriyyətinin qurulması xalqımızın azadlıq və müstəqillik eşqinin bariz nümunəsidir. Bu gün rəşadətli ordumuzun və Ali Baş Komandanımızın sayəsində müstəqilliyimiz daha sarsılmaz, suverenliyimiz isə tamdır. Biz pedaqoqların üzərinə düşən ən böyük vəzifə bu müstəqil dövlətə layiq, savadlı, vətənpərvər və peşəkar gənclər yetişdirməkdir."
Daha sonra Gənclər və İdman sektorunun müdiri Samir Kərimov çıxış edərək qeyd etdi ki:
"Müstəqilliyimizin qorunub saxlanması və inkişaf etdirilməsində gənclərin rolu əvəzsizdir. Dövlətimizin gənclər siyasətinin əsas məqsədi də məhz gənc nəslin fiziki və mənəvi baxımdan sağlam, dövlətçilik ənənələrinə sadiq böyüməsini təmin etməkdir. Bu cür birgə layihələr gənclərimizin ictimai fəallığını artırır."
Tədbirdə sektorun baş məsləhətçisi Hüseyn Həsənov da çıxış edərək öz fikirlərini bölüşdü:
"Bu gün Azərbaycan gəncliyi həm idmanda, həm təhsildə, həm də döyüş meydanında öz sözünü deyib və deməkdədir. Müstəqillik Günü hər birimiz üçün qürur mənbəyidir və biz gənclərimizin bu müqəddəs dəyərə hər zaman sahib çıxacağına tam əminik."
Daha sonra məktəbin istehsalat təlim ustası Simur Səfərov çıxış edərək gənclərə peşə təhsilinin önəmindən danışdı:
"Azad və müstəqil dövlətin güclü iqtisadiyyata, güclü iqtisadiyyatın isə savadlı peşə sahiblərinə ehtiyacı var. Biz ustadlar olaraq çalışırıq ki, tələbələrimizə təkcə peşənin sirlərini deyil, həm də dövlətinə xeyirli vətəndaş olmağı aşılayaq."
Məktəbin tələbəsi Dərya Nəsirova isə gənclər adından çıxış edərək minnətdarlığını ifadə etdi:
"Biz gənclərə yaradılan bu şəraitə görə dövlətimizə və məktəb rəhbərliyinə təşəkkür edirik. Müstəqil Azərbaycanın gəncləri olaraq söz veririk ki, dərslərimizə məsuliyyətlə yanaşacaq, gələcəyin savadlı kadrları kimi vətənimizə xidmət edəcəyik."
Tədbirin rəsmi hissəsinin sonunda məktəbin ictimai həyatında, dərslərdə və tədbirlərdə aktiv iştirak edən, fərqlənən tələbələrə təşəkkürnamələr təqdim olundu.
Tədbir tələbələrin hazırladığı vətənpərvərlik mövzusunda bədii kompozisiyalarla yekunlaşdı.
