ПЗС Аб'яднанага Пераходнага Кабінета Беларусі

24/06/2024

Напярэдадні чарговай сустрэчы Кансультатыўнай групы «Беларусь – ЕС» намеснік кіраўніцы Кабінета Валер Кавалеўскі распавёў пра важнасць дзейнасці групы для бе...

18/06/2024

Сенатары ЗША выступілі за статус сталага назіральніка ў Арганізацыі Аб'яднаных Нацый для беларускіх дэмакратычных сіл

Кіраўнікі сенацкага кокуса «За вольную Беларусь» сенатары Джын Шахін і Роджэр Уікер накіравалі ліст амбасадару ЗША ў ААН Ліндзе Томас-Грынфілд з просьбай аб супрацы з беларускім дэмакратычным рухам над заяўкай на атрыманне статусу пастаяннага назіральніка ў ААН.

Намеснік кіраўніцы Кабінета, прадстаўнік па замежных справах Валер Кавалеўскі падзякаваў сенатарам за ініцыятыву надаць пастаянны назіральніцкі статус беларускаму дэмакратычнаму руху:

«Гэты статус будзе лагічным развіццём нашых намаганняў па інстытуцыяналізацыі адносін з нашымі партнёрамі, якія ўжо ўключаюць у сябе кантактную групу з Радай Еўропы, кансультатыўную групу Беларусь-ЕС, стратэгічны дыялог з ЗША, супрацоўніцтва з Еўрапейскім Парламентам, альянс «За дэмакратычную Беларусь» з дзясяткамі парламентаў, спецыяльных пасланнікаў у шэрагу МЗС, групу сяброў дэмакратычнай Беларусі ў АБСЕ, якая складаецца з 30 краін, і развіццё палітычнага дыялогу з НАТА.

Гэтыя механізмы гарантуюць, што Беларусь застаецца ў міжнародным парадку дня, што вядзе да практычных рашэнняў і крокаў нашых партнёраў у падтрымку дэмакратычнай, незалежнай, вольнай Беларусі. Такія шырокія інстытуцыяналізаваныя адносіны падкрэсліваюць, што суверэнітэт належыць беларускаму народу, а не дыктатару».

Джын Шахін – сенатар ЗША ад Дэмакратычнай партыі, старэйшы чалец камітэтаў Сената ЗША па ўзброеных сілах і па міжнародных адносінах, старшыня падкамітэта па Еўропе і рэгіянальным супрацоўніцтве ў галіне бяспекі Камітэта па замежных справах Сената. Роджэр Уікер – сенатар ЗША ад Рэспубліканскай партыі, чалец Камітэта па ўзброеных сілах Сената ЗША.

11/06/2024

«Гэта будзе спрыяць пашырэнню і ўзмацненню праеўрапейскага курсу для беларусаў»

10-11 чэрвеня ў Празе праходзіць канферэнцыя чэшскай Асацыяцыі па міжнародных адносінах, у якой узялі ўдзел міністр еўрапейскіх спраў Чэхіі Марцін Дворжак, намеснік міністра замежных спраў Ян Мар'ян, спецыяльны прадстаўнік урада па пытаннях Усходняга партнёрства Дэвід Стулік, прадстаўнікі дыпламатычнага корпусу, аналітычных цэнтраў і грамадзянскай супольнасці.

Дзякуючы намаганням Офіса дэмакратычнай Беларусі ў Чэхіі, упершыню на гэтай канферэнцыі асобна была нададзеная ўвага Беларусі. Па запрашэнні арганізатараў з дакладам на канферэнцыі выступіў намеснік прадстаўніка ў замежных справах Кабінета, кіраўнік Місіі дэмакратычнай Беларусі ў Бруселі Уладзімір Астапенка.

У рамках дыскусіі аб будучым Усходняга партнёрства Уладзімір Астапенка адзначыў, што ў выніку дэструктыўнай палітыкі нелегітымных улад Беларусь апынулася ва ўнікальнай сітуацыі, калі не існуе ніводнага дзеючага міжнародна-прававога акта, які б рэгуляваў яе двухбаковыя адносіны з Еўрапейскім саюзам.

З іншага боку, падкрэсліў намеснік прадстаўніка ў замежных справах, у адрозненні ад рэжыму Лукашэнкі, які скасаваў удзел краіны ва Усходнім партнёрстве, беларускія дэмакратычныя сілы выступаюць за больш актыўны ўдзел нацыянальных экспертаў і грамадзянскай супольнасці ў праграмах «Усходняга партнёрства» у розных рэлевантных сферах.

Уладзімір Астапенка выказаў упэўненасць, што гэта будзе спрыяць пашырэнню і ўзмацненню праеўрапейскага курсу для беларусаў.

Удзельнікі дыскусіі пагадзіліся з тым, што праграма Усходняга партнёрства стварае дадатковыя магчымасці як для кандыдатаў на ўступленне ў ЕС, так і для патэнцыйных партнёраў па падтрымцы еўрапейскіх каштоўнасцей і развіццю субрэгіянальных сувязей.

07/06/2024

Чаму да гэтага часу няма органа выдачы новых нацыянальных пашпартоў, які абяцалі яшчэ ў сакавіку?

Намеснік кіраўніцы Кабінета, прадстаўнік у замежных справах Валер Кавалеўскі адказаў на крытыку ў адрас праекта новага нацыянальнага пашпарта і распавёў, чаму да гэтага часу няма органа выдачы і ўзораў пашпарта.

Мы сабралі ўсё самае важнае – на картках.

/

06/06/2024

Намеснік кіраўніцы Кабінета, прадстаўнік у замежных справах Валер Кавалеўскі выказаў спачуванні сям'і і сябрам польскага салдата, які быў смяротна паранены нелегальнымі мігрантамі на мяжы з Беларуссю і памёр сёння ў шпіталі Варшавы:

«Глыбокія спачуванні сям'і і сябрам Матэуша, польскага салдата, які загінуў у чарговай правакацыі на мяжы, арганізаванай рэжымам Лукашэнкі, загінуў, абараняючы Польшчу і ЕС.

Адказнасць за гэтае забойства цалкам ляжыць на Лукашэнку і яго рэжыме, якія арганізавалі міграцыйны псеўдакрызіс на мяжы ЕС з падтрымкай Пуціна.

Рэжым Лукашэнкі ўжо прайшоў кропку невяртання. Але небяспека ад яго эвалюцыянуе, у той час як адэкватная, эфектыўная рэакцыя на яго злачынствы ўсё яшчэ адсутнічае»

Валер Кавалеўскі нагадаў, што ўнутраныя рэпрэсіі вядуць да знешняй агрэсіі, і падкрэсліў, што пакуль Беларусь не адновіць дэмакратыю, рэжым Лукашэнкі будзе працягваць быць крыніцай небяспекі для еўрапейскіх суседзяў Беларусі.

04/06/2024

«Спадзяюся, у хуткім часе будзе дадатковая інфармацыя ад літоўскіх уладаў»

Намеснік кіраўніцы Кабінета, прадстаўнік у замежных справах Валер Кавалеўскі распавёў Euroradio () пра новыя абмежаванні Літвы, якія закранулі простых беларусаў і тыя крокі, што ўжо зроблены на шляху вырашэння гэтай праблемы:

«Атрымліваецца, што чарговыя захады на сённяшні дзень бʼюць міма і наводзяць на пытанне: чаму краіна Еўрапейскага саюза так рэагуе на звычайных беларусаў?»

Адразу пасля першых паведамленняў пра «новыя падыходы» ў працы літоўскіх мытнікаў, Валер Кавалеўскі 03.06.2024 кантактаваў з прадстаўнікамі МЗС Літоўскай Рэспублікі, каб звярнуць увагу на водгукі беларусаў з мяжы:

«Рэакцыя была канструктыўная, спадзяюся, у хуткім часе будзе дадатковая інфармацыя ад літоўскіх уладаў»

Але адным кантактам праца Прадстаўніцтва па замежных справах не абмяжоўваецца:

«Вядома, са свайго боку мы будзем шукаць магчымасці высветліць акалічнасці новай палітыкі. Будзем высвятляць, ці магчыма неяк скарэктаваць гэтую палітыку, датычную фізічных асобаў, якія перасякаюць мяжу з Літвой.

З аднаго боку, магчыма, гэта спроба абмежаваць нейкі памежны гандаль, якім, дарэчы, карысталіся і многія літоўцы, што ездзілі ў Беларусь, нешта куплялі і прывозілі ў Літву. Але відавочна, што гэта закранае не так гандляроў, як звычайных людзей.

Звярну ўвагу, што іншыя суседнія еўрапейскія краіны такіх захадаў не рабілі»

27/05/2024

«Выбары ў КР – сустрэча ў Місіі дэмакратычнай Беларусі ў Бруселе»

Актывісты беларускай дыяспары Бельгіі правялі сустрэчу ў Місіі дэмакратычнай Беларусі ў Бруселі, падчас якой удзельнікі абмеркавалі асноўныя элементы праграм кандыдатаў на выбарах у Каардынацыйную Раду Беларусі ІІІ склікання, прайшлі працэдуру верыфікацыі і паўдзельнічалі ў галасаванні.

Акрамя беларусаў Бельгіі, якія прыйшлі прагаласаваць, імправізаваны «выбарчы ўчастак» наведалі міжнародныя назіральнікі і бельгійскія журналісты, якія з цікаўнасцю сачылі за працэсам першых беларускіх дэмакратычных выбараў, пабудаваных на бяспечных тэхналогіях ХXІ ст.

Нагадваем, што нелегітымны рэжым пазбавіў беларусаў за мяжой магчымасці выбіраць сваіх прадстаўнікоў у Беларусі, а выбары ў Каардынацыйную Раду ІІІ склікання працягваюцца, уся інфармацыя – толькі на афіцыйнай старонцы КР: https://bit.ly/rada2024

16/05/2024

Новая версія Акту аб дэмакратыі, правах чалавека і суверэнітэце Беларусі ставіць на мэце ў чацвёрты раз аднавіць дзеянне Акту ад 2004 года з улікам злачыннага ўдзелу рэжыму Беларусі ў несправакаваным уварванні Пуціна ва Украіну, гандлі ўкраінскімі дзецьмі і адкрыцці беларускай тэрыторыі для расейскіх ваенных аперацый. Адна з практычных мэтаў – пашырыць спіс беларускіх уладаў, у дачыненні да якіх могуць быць уведзеныя санкцыі ЗША, за межы вышэйшага кіраўніцтва краіны і службаў бяспекі, уключыўшы ў яго асоб, непасрэдна адказных за выкраданне ўкраінскіх дзяцей, супрацоўніцтва з Расеяй у несправакаваным уварванні ва Украіну і расейскую мілітарызацыю беларускай тэрыторыі.

Суаўтарамі праекту з'яўляюцца чальцы Кокуса па Беларусі Біл Кітынг, Масі Каптур, Джо Уілсан, а таксама старшыня падкамітэту па Еўропе Том Кейн.

Важнае з новай версіі Акту аб дэмакратыі:

▪️ адмовіцца прызнаць Лукашэнку законна абраным лідарам Беларусі;

▪️ працягваць заклікаць да неадкладнага вызвалення ўсіх палітычных зняволеных у Беларусі;

▪️ адмовіцца прызнаваць любое ўключэнне Беларусі ў так званую «Саюзную дзяржаву», якая знаходзіцца пад кантролем Расеі;

▪️ Дазволіць дапамогу ЗША ў прасоўванні дэмакратыі, правоў чалавека, вяршэнства закону і суверэнітэту ў Беларусі.

Акрамя таго, Акт вымагае ад Дзяржсакратара ЗША даць справаздачу перад Кангрэсам аб злачынствах, здзейсненых рэжымам Беларусі ў падтрымку несправакаванай агрэсіўнай вайны Расеі ва Украіне.

«Кангрэс ЗША з'яўляецца адным з найбольш паслядоўных саюзнікаў дэмакратычнай Беларусі. Актуалізаваная версія Акту аб дэмакратыі ў Беларусі, якую ў пяты раз распрацаваў кангрэсмен Крыс Сміт, даказвае, наколькі шчыльна сочаць амерыканскія заканадаўцы за сітуацыяй у Беларусі і прапануюць ураду ЗША практычныя захады.

Варта дадаць, што ў Сенаце таксама ўнесены падобны законапраект. Чакаецца, што Кангрэс прыме гэты закон да канца года», – пракаментаваў навіну намеснік кіраўніцы Кабінета, прадстаўнік у замежных справах Валер Кавалеўскі, які зараз знаходзіцца ў працоўнай паездцы ў Вашынгтоне.

13/05/2024

Супрацьдзеянне спробам Расеі паглынуць Беларусь, спыненне ўдзелу Беларусі ў вайне, супрацоўніцтва на міжнароднай арэне, візавыя пытанні

Распачалася працоўная паездка намесніка кіраўніцы Кабінета, прадстаўніка ў замежных справах Валера Кавалеўскага ў сталіцу ЗША.

На парадку дня:

▪️ Супрацьдзеянне агрэсіўным дзеям у дачыненні да Беларусі, нашага суверэнітэту, незалежнасці і практычныя крокі па змяншэнню ўплыву «рускага свету» на Беларусь;

▪️ Спыненне ўдзелу Беларусі ў вайне: стратэгія, практычныя крокі, эфект для рэгіёну;

▪️ Новая версія Акта аб дэмакратыі ў Беларусі

▪️ Візавыя пытанні беларусаў;

▪️ Дапамога беларускаму дэмакратычнаму руху і грамадзянскай супольнасці Беларусі.

На бліжэйшыя некалькі дзён у Валера Кавалеўскага запланаваныя сустрэчы ў Белым Доме, Кангрэсе ЗША, Дзяржаўным дэпартаменце, іншых установах:

«АПК працягвае працу па інфармаванні аб падзеях у Беларусі і па выпрацоўцы супольных дзеянняў з нашымі партнёрамі па выкананні нашых галоўных задач – захавання незалежнасці і аднаўлення дэмакратыі. Беларускі парадак дня ў Вашынгтоне заўсёды запатрабаваны, і сярод структур выканаўчай улады, і ў Кангрэсе ЗША»

10/05/2024

«Беларусь не трэба разглядаць як сатэліта Расіі, гэта – еўрапейская нацыя»

Намеснік кіраўніцы, прадстаўнік па замежных справах Кабінета Валер Кавалеўскі ўзяў удзел у панэльнай дыскусіі «Яшчэ адна анексія: паступовае паглынанне Беларусі Расіяй» у Цэнтры Дэвіса Гарвардскага ўніверсітэта.

Дыскусія пачалася з відэазвароту кіраўніцы Кабінета Святланы Ціханоўскай. Яна нагадала, што ў 1991 годзе, калі наша краіна аднавіла дзяржаўнасць, ЗША запэўнівалі ў адданасці суверэнітэту і дэмакратычнаму выбару Беларусі:

«Мы жывём зараз у такой складанай сітуацыі, што гэтае абяцанне стала абсалютна актуальным. Мы мусім знайсці спосабы цалкам яго выканаць».

Ціханоўская заклікала не ўспрымаць паглынанне Беларусі Расіяй як нешта адасобленае ад бяспекі ў рэгіёне, бо гэта «распальвае апетыты Пуціна да падпарадкавання іншых краін».

Валер Кавалеўскі адзначыў: тое, ува што Лукашэнка пераўтварае Беларусь, – дасканалая мадэль для Пуціна, але вельмі благі сігнал для іншых суседзяў Расіі:

«Беларусь пад рэжымам Лукашэнкі – пагроза не толькі для Беларусі, але і для нашых суседзяў і ўсёй еўраатлантычнай супольнасці».

Удзельнікі дыскусіі абмеркавалі еўрапейскі выбар Беларусі і практычную дапамогу, якую могуць аказаць заходнія партнёры беларускаму народу на шляху да дэмакратыі. Кавалеўскі падкрэсліў:

«Беларускі народ хацеў б, каб яго пакінулі ў спакоі, хацеў б мець магчымасць жыць нармальным жыццём. Але зараз гэта немагчыма праз інтарэсы Расіі, якія агрэсіўна ўрываюцца ў жыццё беларусаў».

Намеснік кіраўніцы Кабінета заклікаў дапамагаць дэмакратычнаму руху ў змаганні за вольную Беларусь ужо зараз, што дапаможа і Украіне, а таксама можа справакаваць змены ў Расіі.

У дыскусіі ўзялі ўдзел намеснік памочніка дзяржсакратара ЗША Крыстафер Сміт, былы амбасадар ЗША ў Беларусі Джордж Крол, прафесар Гарвардскага ўніверсітэта Аксана Шэвель. Мадэратарам выступіла былая памочніца дзяржсакратара ЗША Карэн Донфрыд.

Валер Кавалеўскі працягне візіт у ЗША дыпламатычнымі кансультацыямі ў ААН і серыяй перамоў з амерыканскім урадам.

07/05/2024