Sendiráð / Fastanefnd Íslands í Genf

12/06/2026

Norrænu sendiráðin gagnvart Sviss héldu í sameiningu vel sótta málstofu í Bern í vikunni sem miðaði að því að efla samræður milli svissneskra og norrænna hagsmunaaðila um varnarmál, viðbúnað og áfallaþol í sífellt meira krefjandi öryggisumhverfi. Þetta er í þriðja sinn sem slík málstofa er haldin.

Markus Mäder, ráðuneytisstjóri svissneska öryggismálaráðuneytisins (SEPOS) hélt opnunarávarp um öryggi og áfallaþol Sviss og í kjölfarið voru kynningar frá öllum Norðurlöndunum og pallborðsumræður.

Við þökkum fyrir þessar mikilvægu umræður sem undirstrika að aukið samstarf er lykillinn að því að mæta síbreytilegu öryggisumhverfi.

11/06/2026

Alþingi samþykkti nýverið þingsályktun um að efna til þjóðaratkvæðagreiðslu um framhald aðildarviðræðna Íslands við Evrópusambandið. Atkvæðagreiðslan fer fram laugardaginn 29. ágúst 2026, en utankjörfundaratkvæðagreiðsla verður opin frá 27. júlí 2026.

Hægt verður að kjósa í sendiráðinu og hjá ræðismönnum þar sem það á við. Nánari upplýsingar um staðsetningar, opnunartíma og fyrirkomulag verða kynntar þegar nær dregur.

Af þessu tilefni hefur utanríkisráðuneytið opnað sérstaka upplýsingasíðu á íslensku og ensku sem verður uppfærð reglulega eftir því sem nýjar upplýsingar berast. Sendiráðið mun sömuleiðis veita frekari upplýsingar þegar þær liggja fyrir, en í millitíðinni hvetjum við öll til að skoða upplýsingarsíðurnar:

https://www.government.is/topics/foreign-affairs/iceland-in-europe/referendum/

https://www.stjornarradid.is/verkefni/utanrikismal/evropusamvinna/thjodaratkvaedagreidsla

Ríkisstjórnin hefur samþykkt að leggja fyrir Alþingi tillögu utanríkisráðherra til þingsályktunar um þjóðaratkvæðagreiðslu varðandi framhald aðildarviðræðna við Evrópusambandið.

09/06/2026

🚨Upplýsingar vegna G7 leiðtogafundarins í Evian🚨

Vegna G7 leiðtogafundarins í Evian 15.-17. júní má búast við auknum öryggisráðstöfum, mótmælum og truflunum á Genfarsvæðinu á tímabilinu 12.-18. júní.

Mótmælaganga verður í Genf sunnudaginn 14. júní klukkan 16:00 og búast yfirvöld við að 20-50 þúsund manns taki þátt.
Yfirvöld í Genf eru vel undirbúin en engu að síður má búast við skemmdarverkum og truflunum sem erfitt verður að koma í veg fyrir.

Tímabilið 12.-15. júní verður líklega mest krefjandi vegna aukinnar spennu á svæðinu og mikilli lögregluviðveru.

Yfirvöld mæla með því að fólk á Genfarsvæðinu:
🔹Haldi sig heima eins og kostur er um helgina.
🔹Forðist miðbæinn og svæðið við vatnið.
🔹Vinni að heiman ef mögulegt er.

🚫Ekki mælt með fara yfir landamærin milli Frakklands og Sviss nema brýna nauðsyn beri til, þar sem búast má við töfum og takmörkunum.
✈️Flugvöllurinn í Genf á samkvæmt núverandi upplýsingum að starfa með eðlilegum hætti.
🚌Almenningssamgöngur eiga að halda áfram að ganga, þó mögulega ekki á fullum afköstum allan tímann.
📻Fylgist vel með staðbundnum fréttum og upplýsingum frá yfirvöldum næstu daga.

A l'occasion du sommet du G7 à Evian (15-17 juin 2026) organisé par la France, la région lémanique se prépare à un défi sécuritaire majeur impliquant Genève, Vaud, le Valais et la Confédération. Cette page centralise les communications officielles suisses et françaises. Elle est mise à ...

08/06/2026

Í dag er heimsdagur hafsins og í gær var íslenski Sjómannadagurinn.

Hafið hefur ávallt verið undirstaða íslensks samfélags og efnahags. Það hefur gefið okkur lífsviðurværi, tækifæri og tengingu við umheiminn. Það hefur mótað menningu okkar, tungumál og sjálfsmynd.

Hafið þekur um 70% af yfirborði jarðar og er uppspretta fæðu, næringar og súrefnis fyrir jarðarbúa og er ein af undirstöðum lífríkis á jörðinni.
Íslendingar hafa því um áratugaskeið lagt áherslu á ábyrga nýtingu auðlinda hafsins, verndun hafsvæða og réttindi strandríkja.

Hafið er okkar allra og þess þarf að gæta.

19/05/2026

Á föstudaginn lauk 52. lotu Allsherjarúttektar Sameinuðu þjóðanna (Universal Periodic Review eða UPR) sem felur í sér heildarúttekt á stöðu mannréttindamála innan aðildarríkja Sameinuðu þjóðanna.

UPR fer fram þrisvar á ári í tveggja vikna löngum fundarlotum og er mikilvægur þáttur í starfi mannréttindaráðs Sameinðu þjóðanna.

Ferlið byggir á jafningjarýni - ríkin fara yfir stöðu mannréttindamála hjá hverju öðru og koma með ábendingar og áskoranir um það sem mætti betur fara.

Ísland tekur virkan þátt í úttekt allra ríkja og leggur áherslu á þrjú meginmál í tilmælum sínum: afnám dauðarefsinga, jafnréttismál (þ.m.t. kyn- og frjósemisheilbrigði) og réttindi hinsegin fólks.

Að þessu sinni voru 14 ríki tekin fyrir: Namibía, Níger, Mósambík, Eistland, Paragvæ, Belgía, Danmörk, Palaú, Sómalía, Seychelles-eyjar, Salómónseyjar, Lettland, Síerra Leóne og Singapúr.

17/05/2026

Þetta er ekki flókið. Við eigum öll að hafa frelsi til að vera við sjálf.

Í dag, 17. maí, er alþjóðlegur dagur gegn fordómum í garð hinsegin fólks. Ísland beitir sér á alþjóðlegum vettvangi fyrir mannréttindum alls fólks og reynir að stuðla að lagalegum umbótum og berst gegn hvers konar ofbeldi, mismunun og fordómum í garð hinsegin fólks.

Mannréttindi eru fyrir alla – óháð kynhneigð, kynvitund, kyneinkennum eða kyntjáningu.

05/05/2026

Halla Tómasdóttir, forseti Íslands heimsótti í gær Vatíkanið og átti þar einkafund með Leó XIV páfa. Í kjölfarið fundaði hún með kardinálanum Pietro Parolin, ráðherra Páfastóls og Paul Richard Gallagher erkibiskup, sem fer með samskipti við ríki og alþjóðastofnanir.

Með henni í för voru Sif Gunnarsdóttur forsetaritari og Einar Gunnarsson sendiherra Íslands í Genf, en sendiráð Íslands í Genf er einnig tvíhliða sendiráð gagnvart Páfastóli.

Heimsóknin var vel heppnuð og styrkti samskipti Íslands og Páfastóls sem byggja á sameiginlegum gildum og áherslu á mannréttindi, frið, félagslegt réttlæti og trúfrelsi ásamt stuðningi við samstarf á alþjóðavettvangi.

Myndir: © Vatican Media

30/04/2026

🇮🇸Sendiráðið og fastanefndin flytur í nýtt skrifstofuhúsnæði í Green Village í Genf í næsta mánuði. Seinasti opnunardagur sendiráðsins á núverandi stað á Avenue Blanc 49, er þriðjudaginn 12. maí og opnum við á nýjum stað mánudaginn 18. maí.

📍Nýtt heimilisfang: Chemin du Pommier 42 (Kyoto building), 1218 Grand Saconnex

🗳️Seinasti dagur til að kjósa í utankjörfundarkosningu vegna sveitarstjórnarkosninga í sendiráðinu er því 12. maí á Avenue Blanc 49.

📧Bókanir sendar á [email protected]

17/04/2026

🇮🇸 Utankjörfundaratkvæðagreiðsla 🇮🇸

Í dag hefst utankjörfundaratkvæðagreiðsla vegna sveitarstjórnarkosninga 16. maí 2026.

Upplýsingar um kjörstaði og tímabókanir í Sviss og Liechtenstein:

🗳️Genf: Bóka þarf tíma með því að senda tölvupóst á [email protected]

🗳️Bern: Bóka þarf tíma hjá ræðismanni með því að senda tölvupóst á [email protected] eða hringja í +41 31 326 27 56

🗳️Zurich: Bóka þarf tíma hjá ræðismanni með því að senda tölvupóst á [email protected]

🗳️Liechtenstein: Bóka þarf tíma hjá ræðismanni með því að senda tölvupóst á [email protected] eða hringja í +423 340 0828

Í sveitarstjórnarkosningum byggir kosningaréttur á lögheimili og gildir í því sveitarfélagi sem viðkomandi er skráður með lögheimili í.

Kjósendur geta flett upp hvort og hvar þeir séu á kjörskrá á vef Þjóðskrár: https://www.skra.is/folk/kjorskra-og-kosningar/hvar-a-eg-ad-kjosa/sveitarstjornarkosningar-2026/

🔹Sýna þarf skilríki (vegabréf, nafnskírteini eða ökuskírteini) á kjörstað.
🔹Kjósendur bera sjálfir ábyrgð á því að koma atkvæði sínu til skila.
🔹Athugið að senda þarf atkvæði beint á það sveitarfélag sem kjósandi er skráður með lögheimili í.
🔹Ef senda á atkvæði með pósti er ráð að kjósa tímanlega og þá þarf sömuleiðis að taka mið af sendingartíma og áreiðanleika viðkomandi póstþjónustu þess ríkis sem kosið er í.

Kosning utan kjörfundar erlendis vegna sveitarstjórnarkosninga 16. maí 2026 hefst 17. apríl nk.

01/04/2026

Viðburðarríkri vetrarlotu mannréttindaráðs Sameinuðu þjóðanna lokið. Sjá meira hér ⬇️