Office for Good Governance- office of the Prime Minister in Kosovo

10/09/2026

Sot, në takimin e radhës për hartimin e Strategjisë Kombëtare për Mbrojtjen nga Dhuna në Familje, Dhuna ndaj Grave dhe Dhuna me Bazë Gjinore 2027–2031, me fokus në Politikat e Integruara.

Ishte kënaqësi që, së bashku me kolegët nga Zyra për Qeverisje të Mirë – Zyra e Kryeministrit, të kontribuojmë në këtë proces të rëndësishëm, të udhëhequr nga Ministria e Drejtësisë.

Mirënjohje për Zyrën e Koordinatorit dhe znj. Artë Ademi Bajrami për koordinimin dhe bashkëpunimin e mirë në këtë proces.

Së bashku për politika më të fuqishme, parandalim më efektiv dhe zero tolerancë ndaj dhunës. 🤝
Sadete Demaj
Office for Good Governance- office of the Prime Minister in Kosovo

08/09/2026

Sot pata kënaqësinë të marr pjesë si folës në konferencën e organizuar nga rrjetet e organizatave të shoqërisë civile, ku u diskutua rëndësia e reformimit të kuadrit ligjor për sponsorizimet, me synim që ky mekanizëm të bëhet më gjithëpërfshirës dhe të shtrihet në të gjitha fushat me interes publik.

Një mekanizëm më gjithëpërfshirës i sponsorizimeve do të krijonte më shumë mundësi për mbështetjen e shërbimeve sociale, mbrojtjen e fëmijëve, arsimin, shëndetësinë, të drejtat e njeriut, fuqizimin e grave, përfshirjen e personave me aftësi të kufizuara dhe fusha të tjera me rëndësi për qytetarët.

Partneriteti ndërmjet institucioneve, shoqërisë civile dhe sektorit privat është thelbësor për të mobilizuar më shumë burime në funksion të interesit publik.

Një kuadër ligjor më i gjerë, i qartë dhe gjithëpërfshirës do të forconte këtë partneritet dhe do të krijonte më shumë mundësi për investime private në të mirë të qytetarëve dhe komuniteteve.
Office for Good Governance- office of the Prime Minister in Kosovo
KOMF
Platforma Civikos

07/09/2026

06/09/2026

MARTESAT E HERSHME NUK JANË ZGJEDHJE – PARANDALIMI I TYRE KËRKON VEPRIM TË PËRBASHKËT INSTITUCIONAL DHE SHOQËROR

03.09.2026
📄 Lansohet Raporti i Parë i Progresit 2024–2025 mbi punën për parandalimin dhe raportimin e martesave të hershme në komunitetet Rom, Ashkali dhe Egjiptian në Republikën e Kosovës

🏛️Zyra për Qeverisje të Mirë/Zyra e Kryeministrit ka prezantuar Raportin e Parë të Progresit 2024–2025 mbi punën e Grupit Ndërinstitucional për Parandalimin dhe Raportimin e Martesave të Hershme në komunitetet Rom, Ashkali dhe Egjiptian.

Grupi, i themeluar në dhjetor të vitit 2023 me vendim të Qeverisë së Republikës së Kosovës, ka shërbyer gjatë periudhës raportuese si një platformë për bashkëpunim dhe koordinim ndërmjet institucioneve qendrore e lokale, organizatave të shoqërisë civile dhe partnerëve ndërkombëtarë.

✅Raporti evidenton progres në disa fusha të rëndësishme, përfshirë:
• forcimin e koordinimit ndërinstitucional dhe shkëmbimit të informacionit;
• mbështetjen arsimore për nxënësit dhe studentët, përfshirë bursat dhe qendrat mësimore;
• funksionalizimin fillestar të mekanizmave të raportimit;
• realizimin e Hulumtimit Kombëtar mbi martesat e Hershme;
• aktivitetet e ndërgjegjësimit dhe parandalimit; dhe
• ngritjen e kapaciteteve të institucioneve dhe profesionistëve.

🛡️Një nga mekanizmat që ka kontribuar në identifikimin dhe referimin e rasteve është Platforma Kombëtare për Mbrojtje nga Diskriminimi, përmes së cilës janë evidentuar dhe trajtuar raste/situata të ndërlidhura me martesat e hershme gjatë periudhës në fjalë. Rastet janë referuar tek institucionet kompetente, përfshirë Policinë e Kosovës dhe Qendrat për Punë Sociale.

📌 Raporti gjithashtu nënvizon se martesat e hershme nuk mund të trajtohen vetëm përmes ndërhyrjeve ligjore. Varfëria, niveli i ulët i arsimimit, mungesa e mundësive ekonomike, presioni familjar dhe normat sociale e kulturore janë ndër faktorët që lidhen me vazhdimësinë e këtij fenomeni. Prandaj, parandalimi kërkon një qasje të integruar që përfshin arsimin, mbrojtjen sociale, shëndetësinë, drejtësinë, fuqizimin e komuniteteve dhe krijimin e mundësive për vajzat dhe të rinjtë.

📍Raporti nuk dokumenton vetëm progresin e arritur, por identifikon edhe hapat që duhet të ndërmerren më tej. Ndër prioritetet e evidentuara janë forcimi i mekanizmave të raportimit dhe monitorimit, krijimi i një sistemi më të integruar të të dhënave, vazhdimi i mbështetjes për arsimin dhe bursat, forcimi i bashkëpunimit me prindërit dhe komunitetet, si dhe matja më e mirë e ndikimit të ndërhyrjeve.

📎Raportin e gjeni në web faqen: www.raportodiskriminimin.org

ℹ️Ky raport është zhvilluar në kuadër të projektit “Drejtësia Sociale për Romët, Ashkalitë dhe Egjiptianët”, i financuar nga Agjencia Zvicerane për Zhvillim dhe Bashkëpunim (SDC) dhe i implementuar nga Terre des hommes, Zëri i Romëve, Ashkalinjve dhe Egjiptianëve dhe HEKS/EPER.

19/08/2026

Sot, në një takim të përbashkët me znj. Veronika Vashchenko, Shefe e Zyrës së UNICEF-it në Kosovë, pata kënaqësinë të diskutoj për prioritetet kryesore që lidhen drejtpërdrejt me mirëqenien dhe mbrojtjen e fëmijëve në Kosovë.

Në fokus ishin shëndeti mendor i fëmijëve, Strategjia për të Drejtat e Fëmijëve, të drejtat dhe përfshirja e fëmijëve me aftësi të kufizuara, si dhe vullnetarizmi i të rinjve në funksion të mbështetjes së fëmijëve, së bashku me prioritete të tjera që synojnë përmirësimin e jetës së tyre.

Jam jashtëzakonisht i lumtur dhe mirënjohës për bashkëpunimin e shkëlqyer dhe përkrahjen e vazhdueshme të UNICEF-it. Falë lidershipit të znj. Veronika Vashchenko dhe stafit të saj të përkushtuar e profesional, kemi arritur rezultate dhe përparim të rëndësishëm në fushën e të drejtave të fëmijëve.

Na pret edhe shumë punë e përbashkët, me përkushtimin për të vazhduar të punojmë së bashku për të drejtat, mbrojtjen, mirëqenien dhe mundësitë e barabarta për çdo fëmijë në Kosovë. 🤝

Unicef Kosovo Programme

01/07/2026

Kënaqësi dhe privilegj të përfaqësoj Kosovën në High-Level Group on Non-Discrimination, Equality and Diversity, të organizuar nga DG JUST e Komisionit Evropian, në Bruksel.

Ky shënon një moment të rëndësishëm, pasi për herë të parë Kosova i është bashkuar këtij mekanizmi si anëtare vëzhguese, së bashku me vendet e tjera të Ballkanit Perëndimor. Pjesëmarrja në këtë forum forcon bashkëpunimin me institucionet e Bashkimit Evropian, mundëson shkëmbimin e përvojave dhe praktikave më të mira, si dhe mbështet harmonizimin e politikave, strategjive dhe dokumenteve tona me kornizën dhe standardet e Bashkimit Evropian në fushën e mosdiskriminimit, barazisë dhe diversitetit.

Mirënjohës për mundësinë që të përfaqësoj Kosovën në këtë forum të rëndësishëm evropian dhe për diskutimet e frytshme me kolegë e përfaqësues të institucioneve të Bashkimit Evropian dhe vendeve pjesëmarrëse. Me përkushtim do të vazhdojmë të punojmë për avancimin e politikave dhe standardeve që promovojnë barazinë, mosdiskriminimin dhe diversitetin, në përputhje me vlerat dhe kornizën e Bashkimit Evropian.

15/06/2026

Në kuadër të Forumit Rajonal të Mbrojtësve të të Drejtave të Njeriut, pata privilegjin të jem pjesë e njërit prej paneleve diskutues, ku folëm për sfidat aktuale me të cilat përballen mbrojtësit e të drejtave të njeriut, zbatimin e Deklaratës së OKB-së për Mbrojtësit e të Drejtave të Njeriut, rolin e institucioneve kombëtare në mbrojtjen e hapësirës qytetare, vlerësimin e rrezikut dhe sigurinë, si dhe rëndësinë e bashkëpunimit rajonal dhe avokimit të përbashkët. Gjithashtu, prezantova draft Programin dhe Planin e Veprimit për të Drejtat e Njeriut 2026–2031.

Forumi mblodhi mbrojtës të të drejtave të njeriut, përfaqësues të institucioneve kombëtare, organizata të shoqërisë civile, gazetarë dhe partnerë ndërkombëtarë nga i gjithë Ballkani Perëndimor dhe më gjerë, duke krijuar një hapësirë të vlefshme për shkëmbimin e përvojave, forcimin e bashkëpunimit dhe avancimin e mbrojtjes së të drejtave të njeriut. 🤝🌍

Ky aktivitet u organizua nga Nisma për të Drejtat e Njeriut në Kosovë, në bashkëpunim me partnerë vendorë dhe ndërkombëtarë, të cilët po kontribuojnë vazhdimisht në forcimin e demokracisë, të drejtave të njeriut dhe hapësirës qytetare në rajon.
Office for Good Governance- office of the Prime Minister in Kosovo

11/06/2026

Më 10 qershor 2026 u mbajt takimi konsultativ me organizatat e shoqërisë civile lidhur me hartimin e Programit për Mbrojtjen dhe Avancimin e të Drejtave të Njeriut dhe Lirive Themelore (2026–2031) dhe Planit të Veprimit (2026–2028) në Republikën e Kosovës.

Takimi u organizua nga Zyra për Qeverisje të Mirë në Zyrën e Kryeministrit, në bashkëpunim me OJQ-në ACDC, dhe mblodhi përfaqësues të organizatave të shoqërisë civile nga e gjithë Kosova për të dhënë propozimet dhe rekomandimet e tyre për përmirësimin e këtyre dokumenteve të rëndësishme strategjike.

Gjatë takimit u prezantuan rezultatet e deritanishme të procesit të hartimit të Programit dhe Planit të Veprimit, ndërsa pjesëmarrësit patën mundësinë që, përmes diskutimeve të hapura dhe konstruktive, të kontribuojnë në përcaktimin e politikave dhe masave të ardhshme në fushën e mbrojtjes dhe avancimit të të drejtave të njeriut dhe lirive themelore.

Zyra për Qeverisje të Mirë – Zyra e Kryeministrit e Republikës së Kosovës do të vazhdojë procesin e konsultimeve të gjera me organizatat e shoqërisë civile dhe partnerët relevantë, me qëllim finalizimin e Programit për Mbrojtjen dhe Avancimin e të Drejtave të Njeriut dhe Lirive Themelore, një dokument kyç dhe strategjik për Republikën e Kosovës në promovimin, mbrojtjen dhe avancimin e të drejtave të njeriut.

Office for Good Governance- office of the Prime Minister in Kosovo

05/06/2026

Me znj. Inkeri Lahtinen nga The Finnish Association of the Deaf njihemi dhe kemi punuar së bashku për më shumë se 25 vjet. Ky ka qenë një rrugëtim i gjatë, i mbushur me përkushtim, sfida dhe arritje të jashtëzakonshme për avancimin e të drejtave të personave që nuk dëgjojnë në Kosovë dhe Shqipëri.
Nën udhëheqjen dhe koordinimin tim, me mbështetjen e palodhshme të Inkerit dhe në bashkëpunim me shoqatat KAD dhe ANAD, arritëm të udhëheqim procese historike në Kosovë: zyrtarizimin e gjuhës së shenjave në vitin 2010, zhvillimin e Programit Kombëtar për Personat e Shurdhër në vitin 2014 dhe krijimin e rregullores për ofrimin e shërbimeve të interpretimit në gjuhën e shenjave në të gjithë vendin.
Jam veçanërisht i lumtur që ky bashkëpunim u zgjerua edhe në Shqipëri, duke ndarë përvoja dhe praktikat më të mira për avancimin e gjuhës së shenjave, në vitin 2014 u bë zyrtarizimi i gjuhës së shenjave në Shqipëri!
Takimi ynë i fundit ishte një moment i veçantë reflektimi, pasi Inkeri po përmbyll një karrierë të jashtëzakonshme dhe po pensionohet. Në pak kohë rikthyem kujtimet e një çerek shekulli pune të përbashkët, të mbushur me angazhim dhe rezultate konkrete për komunitetin e personave që nuk dëgjojnë.
Mbetet ende shumë për t’u bërë, veçanërisht në arsim, shërbime dhe mundësi të barabarta për personat që nuk dëgjojnë.
Faleminderit Inkeri për miqësinë, partneritetin dhe përkushtimin e jashtëzakonshëm gjatë gjithë këtyre viteve. Kontributi yt do të mbetet gjithmonë frymëzim. ❤️

05/06/2026

Dje, në Europe House Prishtina, u mbajt eventi “Beyond the Barriers: Roma Resilience in the Western Balkans”, ku u diskutua për mundësitë e punësimit, përfshirjen sociale, bashkëpunimin institucional dhe fuqizimin ekonomik të komuniteteve rome në Ballkanin Perëndimor.

Gjatë këtij eventi u prezantua edhe platforma BalkanJobMarket, një iniciativë e rëndësishme rajonale që synon të lidhë punëkërkuesit, punëdhënësit dhe mundësitë e punësimit, duke krijuar ura të reja bashkëpunimi dhe zhvillimi profesional për të rinjtë në rajon dhe më gjerë.

Me këtë rast, ritheksova angazhimin e Zyrës për Qeverisje të Mirë – Zyra e Kryeministrit për nxitjen dhe promovimin e punësimit të komuniteteve rom, ashkali dhe egjiptian në Kosovë, si një ndër prioritetet kryesore në avancimin e barazisë, përfshirjes sociale dhe fuqizimit ekonomik.

Si udhëheqës i mekanizmit për nxitjen dhe promovimin e punësimit të komuniteteve rom, ashkali dhe egjiptian, po punojmë vazhdimisht për krijimin e mundësive të qëndrueshme të punësimit dhe fuqizimin ekonomik të këtyre komuniteteve, duke siguruar trajtim të barabartë, dinjitet dhe pjesëmarrje të plotë në jetën ekonomike dhe shoqërore. Besojmë se vetëm përmes bashkëpunimit institucional, përfshirjes aktive dhe qasjes së barabartë në mundësi mund të ndërtojmë një shoqëri më gjithëpërfshirëse dhe më të drejtë për të gjithë.

🔗 BalkanJobMarket: https://balkanjobmarket.com

Ky projekt implementohet nga Roma Versitas Kosovo, mbështetet nga Romalitico dhe financohet nga Bashkimi Evropian.
Office for Good Governance- office of the Prime Minister in Kosovo
Roma Versitas Kosovo