Монгол Улсаас БНХАУ-д суугаа Элчин сайдын яам

10/08/2026

СЭРЭМЖЛҮҮЛЭГ

Бээжин хотын Цаг уурын газраас аадар борооны улбар шар түвшний сэрэмжлүүлэг гаргаж, 8 дугаар сарын 11-ний оройноос 13-ны өдөр хүртэл Бээжин хотын хэмжээнд хүчтэй аадар бороо орох төлөвтэй байгааг анхааруулав. Үүнтэй холбогдуулан тус хотын холбогдох байгууллагаас 8 дугаар сарын 11-ний өглөөнөөс үер усны аюулаас хамгаалах II зэргийн түвшний онцгой байдлын хариу арга хэмжээг эхлүүлэхээр төлөвлөсөн байна.

Иймд Бээжин хотод ажиллаж, амьдарч, суралцаж буй болон хот, орон нутгийн хооронд зорчихоор төлөвлөж буй Монгол Улсын иргэдэд дараах сэрэмжлүүлгийг хүргэж байна.

- Цаг агаарын мэдээ, холбогдох байгууллагаас гаргаж буй сэрэмжлүүлэг, зам тээврийн нөхцөл байдлын мэдээллийг тогтмол авч, шаардлагагүй тохиолдолд холын замд гарахгүй байх;
- Орон нутаг хооронд автомашинаар зорчихдоо аадар борооны улмаас авто зам усанд автах, зам хаагдах, хөрсний гулгалт, уулын үер зэрэг эрсдэл үүсэж болзошгүйг тооцож, зорчих чиглэл болон замын нөхцөлийг урьдчилан судлах;
- Ус тогтсон болон үерт автсан авто зам, гүүр, нүхэн гарц, хонгил, нам дор хэсгээр автомашинтай болон явганаар нэвтрэхгүй байх;
- Гол, нуур, суваг шуудуу болон үерийн ус урсаж болзошгүй газарт ойртохгүй байх;
- Уул, ам, хавцал, нам дор газар болон хөрсний гулгалт, нуралт зэрэг геологийн гамшиг үүсэх эрсдэлтэй бүсэд зорчихгүй байх;
- Хүчтэй аадар борооны үед нийтийн тээвэр, галт тэрэг, нислэг болон авто замын хөдөлгөөх саатах, өөрчлөлт гарч болзошгүй тул аяллын хуваариа урьдчилан нягталж, хангалттай хугацааны нөөцтэй зорчих;
- Бага насны хүүхэд, өндөр настан болон бусдын асаргаа шаардлагатай иргэдийн аюулгүй байдлыг онцгой анхаарч, шаардлагатай тохиолдолд аюулгүй газарт байрлах;
- Орон байр, ажлын байрны цонх, тагт болон гадна талбайд байгаа салхи, бороонд хийсэж унах эрсдэлтэй эд зүйлсийг бэхлэх, аюулгүй газарт хадгалах;
- Орон нутгийн эрх бүхий байгууллагаас нүүлгэн шилжүүлэх, хөдөлгөөн хязгаарлах болон бусад аюулгүй байдлын арга хэмжээ авахыг шаардсан тохиолдолд зааврыг чанд мөрдөх зэрэг болно.

Иргэд аюул, осол болон үер усны гамшгийн нөхцөлд орсон тохиолдолд БНХАУ-ын цагдаагийн 110, гал түймэр, аврах ажиллагааны 119 дугаарт яаралтай холбогдоно уу.

Иргэд Та бүхэн сонор сэрэмжтэй байж, өөрийн болон гэр бүлийн гишүүдийн аюулгүй байдлыг ханган, эрсдэлтэй бүсэд зорчихоос зайлсхийхийг Монгол Улсаас БНХАУ-д суугаа ЭСЯ-наас сэрэмжлүүлж байна.

30/07/2026

Монгол Улс, Бүгд Найрамдах Хятад Ард Улсын Гадаад харилцааны яам хоорондын Консулын XXIV зөвлөлдөх уулзалт 2026 оны 7 дугаар сарын 30-ны өдөр Улаанбаатар хотноо амжилттай зохион байгуулагдав.

Монголын талын төлөөлөгчдийг Гадаад харилцааны яамны Консулын газрын захирлын албан үүргийг түр орлон гүйцэтгэгч Б.Биндэръяа тэргүүлж, Эрүүл мэндийн яам, Гадаадын иргэн, харьяатын газар, Хил хамгаалах ерөнхий газар, Цагдаагийн ерөнхий газар, мөн Монгол Улсаас Бүгд Найрамдах Хятад Ард Улсад суугаа дипломат төлөөлөгчийн газрын тэргүүн нар оролцов. Хятадын талын төлөөлөгчдийг Бүгд Найрамдах Хятад Ард Улсын Гадаад харилцааны яамны Консулын газрын захирал Лун Жөү тэргүүлж, тус улсаас Монгол Улсад суугаа Элчин сайдын яамны төлөөлөл оролцов.

Уулзалтын үеэр талууд хоёр улсын иргэдийн харилцан зорчих нөхцөлийг хөнгөвчлөх, консулын үйлчилгээний хүртээмж, чанарыг сайжруулах, хоёр улсын иргэд, аж ахуйн нэгжүүдийн эрх, хууль ёсны ашиг сонирхлыг хамгаалах чиглэлээр хэрэгжүүлж буй хамтын ажиллагааны явцыг дүгнэж, цаашдын хамтын ажиллагааны чиглэлээр санал солилцов.

Мөн хоёр улсын нутаг дэвсгэрт оршин суугаа болон зорчиж буй иргэдтэй холбоотой тулгамдаж буй асуудлуудыг шат дараатай шийдвэрлэх, холбогдох байгууллагуудын хоорондын мэдээлэл солилцооны механизмыг боловсронгуй болгох асуудлаар ярилцаж, хил орчмын аялал жуулчлалыг хөгжүүлэх чиглэлээр дэлгэрэнгүй мэдээлэл солилцов.

Түүнчлэн, хөдөлмөр эрхлэлт, боловсрол, аялал жуулчлалын зорилгоор харилцан зорчиж буй иргэдийн тоо өсөн нэмэгдэж буйтай холбогдуулан консулын байгууллагуудын хамтын ажиллагааг улам бэхжүүлэх, консулын зөвлөлдөх уулзалтыг тогтмол, ойр давтамжтай зохион байгуулах, хоёр улсын иргэдийн эрх ашигт нийцсэн, бодит үр дүнтэй хамтын ажиллагааг цаашид эрчимжүүлэхээр талууд санал нэгдэв.

30/07/2026

02/07/2026

МОНГОЛ УЛС, БНХАУ, ОХУ-ЫН ЗӨВЛӨЛДӨХ УУЛЗАЛТ БОЛОВ

Монгол, Хятад, Орос гурван улсын Гадаад харилцааны дэд сайд нарын түвшний VII удаагийн зөвлөлдөх уулзалтыг энэ оны 7 дугаар сарын 2-ны өдөр Улаанбаатар хотноо зохион байгуулав. Уулзалтыг монголын талаас Гадаад харилцааны дэд сайд Г.Амартүвшин, хятадын талаас Гадаад хэргийн туслах сайд Лю Бинь, оросын талаас Гадаад хэргийн орлогч сайд А.Ю.Руденко нар тэргүүлэн оролцов.

Зөвлөлдөх уулзалтын үеэр талууд Монгол, Хятад, Оросын уламжлалт найрсаг харилцаа, гурван талт хамтын ажиллагааны өнөөгийн байдал, цаашдын төлөвийн талаар санал солилцож, гурван улсын төр, засгийн газрын тэргүүн нарын уулзалтын бэлтгэл ажил, өндөр түвшинд хүрсэн зарчмын тохиролцоонуудын хэрэгжилтийн явцын талаар мэдээлэл хийв.

Мөн Монгол, Хятад, Оросын эдийн засгийн коридор байгуулах хөтөлбөрийн хэрэгжилтийн явц болон төмөр зам, авто зам, транзит тээвэр, логистик, эрчим хүчний дэд бүтцийн төслүүд, бүс нутгийн хамтын ажиллагаа, Зүүн хойд Азийн аюулгүй байдал, НҮБ болон олон улсын байгууллагууд дахь хамтын ажиллагаа, “Улаанбаатарын яриа хэлэлцээ” санаачилга, Шанхайн хамтын ажиллагааны байгууллагын хүрээнд өрнөж буй үйл явц зэрэг өргөн хүрээний асуудлаар санал солилцов.

Түүнчлэн VII удаагийн зөвлөлдөх уулзалтын үеэр талууд ОХУ-аас Монгол Улсын нутаг дэвсгэрээр дамжуулан БНХАУ-д байгалийн хий нийлүүлэх хоолойн төсөл болон эдийн засгийн коридорын хүрээнд хэрэгжүүлэх бусад тэргүүлэх төслүүдийн явцын талаар ярилцав.

Талууд уулзалтыг ажил хэрэгч, үр дүнтэй боллоо хэмээн дүгнэж, гурван талт хамтын ажиллагааны үр өгөөжийг нэмэгдүүлэх, эдийн засгийн коридорын хүрээн дэх төсөл, хөтөлбөрүүдийн хэрэгжилтийг урагшлуулах, бүс нутгийн энх тайван, тогтвортой хөгжилд хувь нэмэр оруулах чиглэлээр хамтын ажиллагаагаа эрчимжүүлэхээр санал нэгдэв.

29/06/2026

МОНГОЛ УЛС, БНХАУ-ЫН ЭКСПОРТ, ИМПОРТЫН ХҮНСНИЙ АЮУЛГҮЙ БАЙДЛЫН ХАМТЫН АЖИЛЛАГААНЫ ДЭД САЙД НАРЫН ТҮВШНИЙ VI ХУРАЛДААН БОЛОВ

Монгол Улс, Бүгд Найрамдах Хятад Ард Улсын хүнсний аюулгүй байдлын хамтын ажиллагааны дэд сайд нарын түвшний VI хуралдаан 2026 оны 6 дугаар сарын 24-ний өдөр БНХАУ-ын Шямэнь хотноо амжилттай зохион байгуулагдлаа.

Хуралдааныг Монгол Улсын Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн, БНХАУ-ын Гаалийн ерөнхий газрын дэд дарга Ван Жүнь нар хамтран даргалж, хоёр улсын хүнсний аюулгүй байдал, хяналт шалгалт, хорио цээр, түүнчлэн мал, амьтан, ургамлын гаралтай бүтээгдэхүүний экспорт, импортын хамтын ажиллагааны өнөөгийн байдал, тулгамдаж буй асуудлууд болон цаашдын хамтын ажиллагааны талаар дэлгэрэнгүй санал солилцов.

Энэ удаагийн хуралдаанаар Монгол Улсаас БНХАУ-д адууны мах экспортлох үеийн хяналт, хорио цээрийн шаардлагын тухай Протоколд нэмэлт, өөрчлөлт оруулж байгуулав. Чингэснээр Монгол Улсаас БНХАУ-д адууны мөгөөрс, зүрх, элэг, бөөр зэрэг дайвар бүтээгдэхүүнийг экспортлох эрх зүйн орчин бүрдлээ.

26/06/2026

МОНГОЛ УЛСЫН ЕРӨНХИЙ САЙД Н.УЧРАЛ БНХАУ-ЫН ТӨРИЙН ЗӨВЛӨЛИЙН ЕРӨНХИЙ САЙД ЛИ ЧЯНТАЙ УУЛЗАВ

Монгол Улсын Ерөнхий сайд Н.Учрал БНХАУ-ын Далянь хотноо Дэлхийн эдийн засгийн форумын 17 дахь удаагийн “Шинэ манлайлагчдын уулзалт” буюу “Зуны Давос” чуулга уулзалтад оролцох үеэрээ 23-ны өдөр БНХАУ-ын Төрийн зөвлөлийн Ерөнхий сайд Ли Чянтай хоёр талын уулзалт хийж, худалдаа, эдийн засаг, дэд бүтэц, эрчим хүч, аж үйлдвэрийн салбарын хамтын ажиллагааны талаар санал солилцов.

Уулзалтын үеэр Монгол Улс эрдэс баялгаа түүхий эд хэлбэрээр экспортлох тогтолцооноос үе шаттайгаар татгалзаж, нэмүү өртөг шингэсэн боловсруулах үйлдвэрлэлийг хөгжүүлэх бодлого хэрэгжүүлж буйг онцлон тэмдэглэв. Талууд зэс, хөнгөн цагаан, ган боловсруулах үйлдвэрийн төслүүдийг эрчимжүүлж, бодит үр дүнд хүргэхийн төлөө идэвхтэй ажиллахаа илэрхийлэв.

Энэ удаагийн уулзалт нь Ерөнхий сайд Н.Учралын Засгийн газрын тэргүүний хувиар БНХАУ-ын Төрийн зөвлөлийн Ерөнхий сайд Ли Чян-тай уулзсан анхны уулзалт болсноороо онцлог байв.

24/06/2026

МОНГОЛ, ХЯТАДЫН ХИЛИЙН БООМТУУДЫН 2026 ОНЫ 7 ДУГААР САРД АЖИЛЛАХ ЦАГИЙН ХУВААРЬ

22/06/2026

ОЛОН УЛСЫН ШАГНАЛААР ШАГНАГДЛАА

Хятадын зохиол, бүтээлийг түгээн дэлгэрүүлэх, Хятадын болон бусад орнуудын соёлын харилцааг хөгжүүлэхэд оруулсан хувь нэмрийг нь үнэлэн БНХАУ-ын Засгийн газраас гадаадын зохиолч, орчуулагч, хэвлэн нийтлэгч нарт олгодог “Тусгай номын шагнал” ( Special Book Awards)-ын 19 дэх удаагийн шагнал гардуулах ёслолын ажиллагаа энэ сарын 16-ны өдөр Бээжин хотноо зохион байгуулагдлаа.

Энэ удаагийн “Тусгай номын шагнал”-ыг Монгол Улсаас МУИС-ийн Хүмүүнлэгийн сургуулийн багш, хятад судлаач, орчуулагч Ш.Эгшиг гардан авлаа. Энэ жилийн хувьд тус шагналыг Монголоос гадна Арабын Нэгдсэн Эмират, Румын, Герман, Узбекистан, Польш зэрэг 12 улсын зохиол, орчуулагч нарт олгосон байна.

13/06/2026

ЕРӨНХИЙЛӨГЧ У.ХҮРЭЛСҮХЭД БНХАУ-ЫН ГАДААД ХЭРГИЙН САЙД ВАН И БАРААЛХЛАА

Монгол Улсын Ерөнхийлөгч Ухнаагийн Хүрэлсүхэд Хятадын Коммунист Намын Төв хорооны Улс төрийн товчооны гишүүн, Бүгд Найрамдах Хятад Ард Улсын Гадаад хэргийн сайд Ван И бараалхлаа.

Ерөнхийлөгч У.Хүрэлсүх, хоёр орны харилцаа, хамтын ажиллагаа “Иж бүрэн стратегийн түншлэл”-ийн түвшинд амжилттай хөгжиж буйд баяртай байгаагаа илэрхийллээ.

Өнгөрсөн онд БНХАУ-д болсон ШХАБ-ын Төрийн тэргүүн нарын өргөтгөсөн хуралдаанд оролцох үеэр тус улсын дарга Ши Жиньпинтэй уулзаж, харилцаа, хамтын ажиллагааны олон асуудлаар санал солилцон, нэгдсэн ойлголцолд хүрснээ тэмдэглэв.

Мөн БНХАУ-ын дарга Ши Жиньпинд мэндчилгээ дэвшүүлж байгааг уламжлахыг Ван И сайдаас хүслээ.

Гадаад хэргийн сайд Ван И, хоёр орны төрийн тэргүүний удирдлага дор харилцаа, хамтын ажиллагаа эрчимтэй хөгжиж буйг онцолж, цаашид ч хамтын ажиллагааг өргөжүүлэхийн төлөө байгаагаа илэрхийллээ.

Тэрбээр, БНХАУ-ын дарга Ши Жиньпинээс Ерөнхийлөгч У.Хүрэлсүхэд төрсөн өдрийн мэндчилгээ дэвшүүлсэн албан захидлыг гардууллаа.

Уг мэндчилгээнд “Урт хугацааны, тогтвортой хөгжлийг цогцлоох нь хоёр орны ард түмний язгуур эрх ашигт нийцэх нь дамжиггүй. Харилцан итгэлцлээ бэхжүүлэн, “Иж бүрэн стратегийн түншлэл”-ийн хүрээнд хамтын ажиллагааг улам гүнзгийрүүлэн хөгжүүлэхийн төлөө байна” гэдгээ тэмдэглэжээ.

Уулзалтын үеэр худалдааны эргэлт, уул уурхайн бүтээгдэхүүний экспортыг нэмэгдүүлэх, нэр төрлийг олшруулахад чиглэсэн бүтээн байгуулалт, төмөр замын холболт, боомтын нэвтрүүлэх хүчин чадлыг нэмэгдүүлэх, дамжин өнгөрөх тээвэр, газрын тос, ногоон эрчим хүч, хиймэл оюун ухаан, цахим худалдаа зэрэг салбарт харилцан ашигтай хамтран ажиллах талаар санал солилцлоо.

БНХАУ-ын Гадаад хэргийн сайд Ван И 2022 онд манай улсад айлчлахдаа Ерөнхийлөгч У.Хүрэлсүхэд бараалхаж байсан юм.

13/06/2026

ГАДААД ХАРИЛЦААНЫ САЙД Б.БАТЦЭЦЭГ БҮГД НАЙРАМДАХ ХЯТАД АРД УЛСЫН ГАДААД ХЭРГИЙН САЙД ВАН И-ТАЙ АЛБАН ЁСНЫ ХЭЛЭЛЦЭЭ ХИЙВ

Монгол Улсын Гадаад харилцааны сайд Б.Батцэцэг Бүгд Найрамдах Хятад Ард Улсын Гадаад хэргийн сайд Ван И-тай 2026 оны 6 дугаар сарын 13-ны өдөр албан ёсны хэлэлцээ хийв.

Гадаад харилцааны сайд нар хоёр орны харилцаа, хамтын ажиллагаа сүүлийн жилүүдэд Иж бүрэн стратегийн түвшинд эрчимтэй урагшилж, талуудын харилцан ойлголцол, улс төрийн харилцан итгэлцэл бэхжин бүхий л салбарын хамтын ажиллагаа өргөжин хөгжиж байгаа гэдэгт санал нэгдэв.

Гадаад харилцааны сайд Б.Батцэцэг БНХАУ-тай найрсаг хөршийн өргөн хүрээний хамтын ажиллагааг хөгжүүлэх нь Монгол Улсын гадаад бодлогын тэргүүлэх чиглэлийн нэг болохыг тэмдэглэж, олон улсын нөхцөл байдал тогтворгүй энэ цаг үед харилцаа, хамтын ажиллагаагаа улам бэхжүүлж, бүс нутгийн аюулгүй байдал, тогтвортой хөгжлийг хангахад хамтын хүчин чармайлт гаргах нь зүйтэй болохыг тэмдэглэв.

Талууд Монгол, Хятадын харилцаа, хамтын ажиллагааны өнөөгийн байдалд үнэлэлт, дүгнэлт өгч, харилцааны хөгжлийн цаашдын чиг хандлага, дээд, өндөр түвшний харилцан айлчлалын давтамжийг хадгалж, улс төрийн харилцан ойлголцол, итгэлцлийг гүнзгийрүүлэх талаар санал солилцов.

Уулзалтын үеэр талууд бие биеийн тусгаар тогтнол, бүрэн эрх, нутаг дэвсгэрийн бүрэн бүтэн байдал, дотоод хэрэгт хөндлөнгөөс үл оролцох болон өөрсдийн сонгосон хөгжлийн замыг харилцан хүндэтгэхээ дахин нотлов.

Эдийн засгийн хамтын ажиллагааны хүрээнд хоёр улсын төрийн тэргүүн нарын тохиролцсон худалдааг 20 тэрбум ам.долларт хүргэх зорилтыг хэрэгжүүлэх, уул уурхайн бүтээгдэхүүн болон хөдөө, аж ахуйн гаралтай бүтээгдэхүүний экспортыг нэмэгдүүлэх, дэд бүтцийн бүтээн байгуулалтыг эрчимжүүлэх, боомтын нэвтрүүлэх хүчин чадлыг сайжруулах, газрын тосны олборлолт, хөрөнгө оруулалтын хамтын ажиллагааг гүнзгийрүүлэх, эрчим хүчний хамтын ажиллагааг өргөжүүлэх, хөнгөлөлттэй зээл, буцалтгүй тусламжаар хэрэгжүүлж буй бүтээн байгуулалтын төслүүдийн явцыг урагшлуулах зэрэг асуудлаар дэлгэрэнгүй хэлэлцэв.

Гадаад хэргийн сайд Ван И БНХАУ Монгол Улстай харилцахдаа “найрсаг дотно, чин сэтгэлээсээ, харилцан ашигтай, хүртээмжтэй” байх гадаад бодлогыг баримталж, сайн хөршийн найрсаг харилцааг тууштай хэрэгжүүлэхээ илэрхийлэв. Монгол, Хятадын төрийн тэргүүн нарын дипломат харилцаа нь хоёр орны харилцаа, хамтын ажиллагааны чиглэлийг тодорхойлох чухал үүрэгтэйг онцолж, төрийн тэргүүн нарын хүрсэн нэгдсэн ойлголцол, тохиролцсон ажлуудыг хэрэгжүүлэхийн төлөө идэвхтэй хамтран ажиллахаа тэмдэглэв.

Тэрээр хоёр улсын худалдаа, эдийн засгийн хамтын ажиллагааг өргөжүүлэн хөгжүүлэхэд бэлэн буйг илэрхийлэв. Мөн хоёр улсын төрийн тэргүүн нарын тохирсон талуудын худалдааг 20 тэрбум ам.долларт хүргэх зорилт удахгүй биелнэ гэдэг итгэлтэй байгаа бөгөөд цаашид худалдааны хэмжээг нэмэгдүүлэх илүү том зорилт тавин ажиллах хэрэгтэйг онцлон тэмдэглэв.

Хятадын тал энэ оны 8 дугаар сард Улаанбаатар хотноо зохион байгуулах Цөлжилттэй тэмцэх тухай конвенцын талуудын 17 дугаар бага хуралд дэмжлэг үзүүлэхээ илэрхийлэв. Мөн Монгол Улсын баруун аймгуудад мал амьтны гоц халдварт шүлхий өвчин гарч буйтай холбогдуулан вакцин нийлүүлэх чиглэлээр хамтран ажиллахад бэлэн буйг мэдээлэв.

Энэ үеэр талууд олон улс, бүс нутгийн харилцан сонирхсон асуудлаар илэн далангүй санал солилцсон болно.

Уулзалтын төгсгөлд хоёр улсын Гадаад харилцааны сайд нар Монгол Улсын Гадаад харилцааны яам, Бүгд Найрамдах Хятад Ард Улсын Гадаад хэргийн яам хоорондын 2026-2027 онд хэрэгжүүлэх хамтын ажиллагааны төлөвлөгөөнд гарын үсэг зурав.

Монгол Улсын Гадаад харилцааны сайд Б.Батцэцэг, БНХАУ-ын Гадаад хэргийн сайд Ван И нар уулзалтын дараа хэвлэл, мэдээллийнхэнд хэлэлцээний үр дүнгийн талаар мэдээлэл хийв.