17/05/2026
Të nderuar anëtarë dhe bashkëvendas të shoqatës „Bushtrani“
Kryesia e shoqatës sonë dëshiron t’ju bëjë një thirrje të sinqertë dhe vëllazërore për ta mbështetur sa më fuqishëm organizimin e Lugina Day 2026, duke blerë bileta dhe duke ftuar edhe familjarë, miq e dashamirë të tjerë që të marrin pjesë në këtë ngjarje të rëndësishme për komunitetin tonë.
Kjo ditë nuk është organizuar vetëm nga një shoqatë, por është një kërkesë dhe dëshirë e përbashkët e shoqatave të gjithë Luginës së Preshevës në Zvicër, që të kemi më në fund një ditë ku mblidhemi të gjithë bashkë dhe ta shohim forcën, unitetin dhe potencialin e komunitetit tonë.
Qëllimi i kësaj dite është shumë më i madh sesa vetëm një organizim festiv.
Së pari, kjo është një mundësi që luginasit të takohen mes vete, të afrohen më shumë dhe të krijojnë lidhje më të forta si komunitet.
Së dyti, kjo ditë u shërben sidomos gjeneratave të reja që të njohin më mirë profesionistët tanë, bizneset shqiptare, familjet tona, të rinjtë dhe të rejat e Luginës, duke krijuar ura bashkëpunimi dhe njohjeje për të ardhmen.
Së treti, gjatë këtij organizimi do të prezantohen projektet konkrete që janë realizuar dhe ato që janë në zhvillim nga kryesia dhe organizatat tona, si:
• workshopet me profesionistë,
• platforma globale shqiptare ALTAK,
• projekti i Qendrës Kulturore Shqiptare në Zvicër,
• si dhe platforma e re e LUGINAS me projektet dhe iniciativat tona.
Këto projekte nuk janë vetëm për Luginën, por janë projekte që i shërbejnë gjithë komunitetit shqiptar në Zvicër.
Së katërti, pjesëmarrja sa më e madhe është mënyra më e mirë për të treguar interesimin dhe mbështetjen tonë ndaj Luginës dhe ndaj projekteve që po ndërtohen për të ardhmen e komunitetit tonë.
Njëkohësisht, është shumë e rëndësishme të kuptohet se të ardhurat nga ky organizim do të përdoren për zhvillimin e projekteve të Luginës. Andaj, çdo biletë e blerë është një kontribut konkret dhe një ndihmë direkte për realizimin e këtyre iniciativave.
Për këtë arsye, ju bëjmë apel të gjithë anëtarëve:
edhe nëse personalisht nuk mund të merrni pjesë, ju lutemi flisni me rrethin tuaj, ndani informacionin, loboni dhe shpjegoni rëndësinë e kësaj dite tek miqtë, familjarët, mjekët, biznesmenët, shokët zviceranë, si dhe shqiptarët nga Kosova, Maqedonia dhe të gjitha trojet shqiptare.
Ftojini të vijnë, të njihen më afër me Luginën dhe të shohin nga afër projektet serioze që po ndërtohen për komunitetin shqiptar në Zvicër.
Le ta bëjmë këtë ditë një dëshmi të unitetit, organizimit dhe potencialit tonë si komunitet.
Me respekt,
Kryesia e Shoqata Bushtrani
