27/06/2026
Këshilli Lokal për Moshën e Tretë në Pejë finalizon draft Planin e Punës dhe merren veprime në themelimin e Komitetit për të Moshuar
Pejë, 26 qershor 2026 – Në kuadër të programit “Ndërtimi i komuniteteve miqësore për të moshuarit përmes veprimit ndërbrezor në Kosovë – AGE+ II”, organizata Syri i Vizionit organizoi sot takimin e radhës të Këshillit Lokal për Moshën e Tretë në Komunën e Pejës.
Anëtarët e Këshillit Lokal për Moshën e Tretë diskutuan dhe finalizuan draft Planin e Punës së ekipit për tri vitet e ardhshme, gjithashtu, gjatë takimit u shqyrtuan prioritetet kryesore, aktivitetet e planifikuara dhe rolet e secilit anëtar në zbatimin e planit, me fokus në avancimin e të drejtave, pjesëmarrjes dhe mirëqenies së personave të moshuar në komunë.
Një ndër temat kryesore të diskutimit ishte edhe kërkesësa për themelimin e Komitetit për Personat e Moshuar në Komunën e Pejës, krijimi i këtij mekanizmi do të forcojë përfaqësimin dhe adresimin e nevojave të personave të moshuar në nivel lokal, duke mundësuar një bashkëpunim më të strukturuar ndërmjet institucioneve, këshillit lokal për moshën e tretë dhe vetë të moshuarve.
Gjatë takimit, Drejtoresha e Mirëqenies Sociale, znj. Albulena Bajraktaraj, dhe Sekretari i Kuvendit Komunal, z. Avni Gashi, njoftuan se kërkesa për themelimin e Komitetit është shqyrtuar nga institucionet komunale dhe se kanë marrë zotimin e Kryetarit të Komunës për mbështetjen e themelimit të këtij mekanizmi. Ata theksuan se themelimi i Komitetit do të përbëjë një hap të rëndësishëm drejt shndërrimit të Pejës në një komunë miqësore për moshën e tretë, duke promovuar politika dhe shërbime më gjithëpërfshirëse për personat e moshuar.
Takimi është mbajtur në kuadër të projektit “Ndërtimi i komuniteteve miqësore për të moshuarit përmes veprimit ndërbrezor në Kosovë – AGE + project II”, i cili zbatohet nga Syri i Vizionit dhe mbështetet nga Volkshilfe Österreich dhe Austrian Development Agency (ADA).
