12/08/2026
🚨 غار الهلاك الذي دخله نسبة لا يستهان بها من شبابنا....
يا بشر، يا بنادم، يا عبد، يا إنسان… راهو الإدمان ينقص رجولة، ماهوش يكملها
الحلوة، ليريكا، الصاروخ وكل ما يشبهها من المخدرات والمؤثرات العقلية، راهي ماشي قوة وماشي فحولة وماشي طريق للرجولة. بالعكس، مع مرور السنوات تقدر تهدم صحتك، تضعف جسمك وعقلك، وتسرق منك أجمل سنوات عمرك.
اليوم تقول: أنا نتحكم فيها… وغدوة تلقى روحك هي اللي تتحكم فيك.
وتخسر صحتك، خدمتك، عائلتك، مستقبلك، وحتى احترامك لنفسك.
وإذا ما وقفتش في الوقت المناسب، ممكن تفيق بعد 10 ولا 20 سنة وتلقى شبابك ضاع، والناس اللي كانوا في عمرك سبقوك في حياتهم: رجال خدموا وبنوا مستقبلهم، ونساء تزوجوا وربّوا أولادهم… وأنت ما زلت تحاول تخرج من الحفرة اللي دخلت لها بيديك.
شفت كي رانا نهدرو معاكم؟ والله ما نكرهوكم وما نستشفاوش فيكم. بالعكس، نشوفو في أغلبكم ولاد أصل، فيكم الخير والنية الطيبة، وغيّضنا عليكم حالكم، وغيّضنا أكثر على حال شباب المسلمين كامل.
🤲 ارجع قبل فوات الأوان… الرجولة الحقيقية أنك تقدر تقول: كفى، وننقذ روحي.
