ساعدوني

28/07/2026

عندي استفسار و ممكن رد صريح
انا 36سنه منفصله عندي ٣ أولاد عايش معايا بنتي بس دايما امي تقولي شكلك وحش رغم ان انا كل اليشوفني يقول عليا حلوه المهم بتقولي ان مش من حقي اتجوز وان انا كبرت وان اربي عيالي واكبرهم واجوزهم افضل وعيشي كده وخلاص حتي خبر طلاقي مخبياه عن الناس عشان ماحدش يعرف ان انا منفصله وطبعا اطلاق كان ودي بدون محاكم وقرف من ده فا أتصرف اذاي وانا فعلا محتاجه اتجوز لان اعتبر ماعشتش اتجوزت صغيره بس ماعشتش هل لو اتجوزت من وراهم حقي ولا اتصرف اذاي

بدون ذكر اسماء

06/07/2026

السلام عليكم
أنا أم وابني الكبير اتعرف على بنت معاه في الجامعة وبعد فترة قال إنه عايز يتجوزها بصراحة البنت وأسرتها مستواهم المادي والاجتماعي أقل مننا بفرق كبير وواضح لكل الناس لكن أنا وافقت عشان ما أكسرش بخاطر ابني وقلت المهم الأخلاق والتفاهم.
الحمد لله وقفت جنبهم في كل حاجة جهزتلهم شقة كويسة وفرشتها بأحسن عفش وعملت فرح يشهد له كل اللي حضره وما قصرتش معاهم في أي حاجة خصوصا إن أهل العروسة ظروفهم على قد حالهم ومقدروش يساعدوا زي ما كنا متوقعين بس مشينا الدنيا عشان خاطر ابني
في الأول كنت مرتاحة للبنت، ولقيتها هادية ومحترمة وبدأت أحبها وأعتبرها زي بنتي
لكن بعد الفرح بفترة عرفت إنها كانت حامل في الشهر التاني وقت الفرح، وده معناه إن الحمل حصل قبل الفرح بفترة أثناء فترة كتب الكتاب.
أنا عارفة إنهم كانوا كاتبين الكتاب، وإنهم شرعا زوج وزوجة ومفيش حرام في اللي حصل لكن اللي صدمني إنهم كانوا بيروحوا الشقة كتير قبل الفرح وكانت أكيد بيتم بينهم زي المتجوزين لدرجة إنها حملت قبل الزفاف
أنا بصراحة كنت متخيلة إنهم هيستنوا لحد ليلة الفرح أو على الأقل هيبقوا حريصين أكتر خصوصا إن الناس بتتكلم وممكن تحسب شهور الحمل.
من ساعة ما عرفت وأنا نفسيتي تعبانة وحاسّة إن الصورة اللي كانت في دماغي عنها اتغيرت واتصدمت فيها وقولت ازاي كده .. ديه كده بنت مش متربية وابني اجوز واحده زي ديه ازاي قليلة الرباية وبايعه نفسها بالشكل ده حتى لو اللي عمل معاها ده ابني بس انا شايفه ان ده مش مبرر ليها وكانت المفروض تحافظ على نفسها لحد ليلة زفافها زي كل البنات المتربية اللي خارجه من بيوت رجاله ويعرفوا الاصول
بصراحة مضايقه اوي منها وفرحتي انطفت خالص
البنت لحد دلوقتي معاملتها كويسة مع ابني ومعانا لكن جوايا إحساس إني فقدت جزء من الثقة فيها ومش عارفة أتجاوز اللي عرفته.
عايزة أسألكم بصدق... هل أنا فعلًا مبالغة في رد فعلي
ولا انا عندي جق في قفلتي منها
محتاجه اشوف رايكم انا صح ولا غلط واتعامل معاها تاني ازاي او اتجاوز كل اللي حصل ده ازاي

05/07/2026

أنا ابني مسافر شغل بره مصر وهينزل اجازه اول شهر ٨ ومراته كانت قاعده في شقتها معانا في نفس البيت مع عيالها وبتنزل تقضي عندي طول اليوم وتطلع شقتها باليل
المهم من حوالي شهر كده مراته حصل بينها وبين أخوه خناقة في البيت بسبب انها كانت بتحضرله ياكل لأن مرات ابني التاني بتشتغل وكانت في الشغل وقتها وهو عاوز يتغدى فالمهم حطت له الاكل وقالها الأكل بارد وخدي سخنيه قالتله الأكل كان سخن وانت اللي كنت بتتكلم في التليفون لحد ما برد ومش هقدر أسخن تاني عشان أشوف ابني عشان بيعيط
والمهم شدوا مع بعض وفي وسط الخناقة أخوه زقها وضر.بها بالقلم غصب عنه بس هي اللي عصبيته الاول ورغم كده هي اللي زعلت ولمت هدومها وراحت قعدت عند أهلها وقالت إنها مش هترجع غير لما جوزها ينزل من السفر.
من يومها وجوزها كل شوية يبعتلي ان ابعتلها فلوس عشان فلوسه كلها مع اخوه فبيقولي خدي منه كذا ووصليهم لمراتي عشان متبقاش محتاجة حاجة عشان الاطفال اللي معاها
وأنا بصراحة رافضة أديها أي فلوس لأنها هي اللي سابت البيت ومشيت من غير ما تستنى لما المشكلة تتحل، وهو أصلا مش موجود وكان مسافر وقت اللي حصل يعني مالوش ذنب يبعتلها لوحدها لانها كانت بتاخد من اخوه اللي محتاجاه
كل ما أكلمه يقولي دي مراتي وعيالي وليهم حق عليا سواء قاعدة في بيتي أو عند أهلها وأنا مش هقطع عنها مصاريفها
أما أنا فشايفة إنها طول ما هي مصممة تقعد عند أهلها ومش راضية ترجع يبقى أهلها يصرفوا عليها لحد ما ترجع بيتها خصوصا إنها هي اللي اختارت تمشي محدش مشاها والله
دلوقتي ابني زعلان مني جدا وبيقولي انه هيتصرف ويبعتلها وإني ماليش حق أمنع عنها الفلوس اللي هو باعتها ليها وأنا شايفة إني بعمل الصح علشان متحسش إن كل حاجة هتمشي زي ما هي عايزة
بصراحة عايزة أعرف رأيكم... مين فينا الصح أنا ولا ابني
وهل الزوج فعلا يفضل ملزم يصرف على زوجته وهي غضبانة وقاعدة عند أهلها في الظروف دي ومش هو اللي قالها روحي وهي اللي مشيت بمزاجها معلش إحنا عايشين في ارياف وانتو عارفين العادات عندنا وبنحب كل حاجه تمشي بالاصول مش بلو.ي الد.راع

04/07/2026

أنا محتاجة أعرف إذا كنت غلطانة فعلا ولا لأ.
ابني متجوز كان بقاله حوالي اسبوعين ومراته صممت تعزمنا على الغدا عندهم وكانت عملت أكل محاشي بأنواعه وفراخ وبط وديك رومي وأصناف كتير تانية
بنتي كانت جاية ومعاها خطيبها ولما شافت الأكل سألت إذا كان فيه لحمة لأن خطيبها مش بيحب الطيور ومبياكلهاش ومش بياكل غير اللحمه
مرات ابني قالت إنها ما عملتش لحمة وانها مكنتش تعرف انه جاي معاها وانها اتفاجأت بي بس قالتلها
ممكن تبعت تجيب لحمه وتعمل بسرعة لكن بنتي زعلت و قالت خلاص بلاش وقالتلها لسا هتبعتي تجيبي وتعملي
المهم بنتي زعلت وتقريبا خطيبها كمان وخدوا بعضهم هي وخطيبها ولقتيهم علي الباب ماشيين و بتقول جالنا مشوار مهم و مشيوا من غير ما ياكلوا اي حاجة
وأنا بصراحة زعلت إنهم مشيوا من غير ما يتغدوا والموقف كان محرج خصوصا قدام خطيب بنتي وقولت لمرات ابني طالما مش قد العزايم ماكؤنتيش عزمتينا وانتي احرجتينا قدام خطيب بنتي والمفروض كنتي تعملي لحمه مش طيور بس وفي اخر الكلام قولتها العيب مش عليكي العيب علي أمك كان المفروض تعرفك الاصول قبل ماتتجوزي
طبعا كلامي ده كان بعصبيه وعفوي لاني كنت متعصبه جدا من الموقف والاحراج اللي حصل قدام خطيب بنتي .ومرات ابني زعلت من كلامي خاصة ان جوزها كان قاعد وماتكلمش نهائي وقاعد بياكل ولا رد حتي عشان انا اللي كنت بتكلم بس فهي كمان زعلت من النقطة ديه وزعلت كمان منه وخدت بعضها بعدها بيوم وراحت عند أهلها دلوقتي بقالها اكتر من أسبوع
والموضوع اتقلب زعل كبير ورافضة ترجع وأنا بجد مش فاهمة أنا غلطت في إيه، لأن قصدي ما كانش أزعلها ولا أجرحها ومش عارفه نتصرف معاهم ازاي لو سمحتم وعايز اعرف رايكم مين اللي غلطان في الموقف ده انا ولا هي

21/06/2026

السلام عليكم ورحمة الله وبركاته
أنا مخطوبة بقالي سنة وخطيبي من فترة طويلة وأنا ملاحظة إنه كل شوية يلمح على المستوى المادي عند أهلي بطريقة بتضايقني لان هو ماديا هو واهله اعلى مننا بكتير وعيلته يعتبروا من كبار البلد وخطيبي عنده 24 ستة
انا كنت بعدي المواقف وكلامه ده عشان مكنتش عايزة أكبر المشاكل.
من كام يوم بابا اشترى تلاجة جديدة لجهازي ولما خطيبي جه يشوف التلاجه بابا كان فرحان جدا وهو بيفرجه عليها وعلى الحاجات اللي جهزها على قد إمكانياته.
أول ما شاف التلاجة قال قدام بابا وقدام ماما ومرات أخويا وكل اللي كانوا قاعدين حلوة التلاجة على قدك يا عمي أصل مكنتش أعرف إن شغل الحلاقة مبيدخلش فلوس كويسة وضحك قال يعني ييهزر
والدي اصلا شغال حلاق من أكتر من 30 سنة، وعمري ما شفته قصر في حقنا أو مد إيده لحد، بالعكس تعب وشقى عشان يربينا ويجوزنا.
أول ما سمعت الكلام حسيت بنغزة كده من جوايا لأن دي مش أول مرة يقلل من بابا سواء بكلام مباشر أو تلميحات أو حتى بنظراته.
ومقدرتش أتمالك أعصابي وخرجت عن وعيي وقولت اتفضل اطلع بره بيت الحلاق اللي مش عاجبك وربنا ما يتمم الجوازة لو دي طريقتك في الكلام
هو مشي وهو مصدوم وبابا فضل يهديني ويقولي إن كان المفروض أعدي الموقف ومكبرش الموضوع.
لكن أنا حاسة إن كرامة أبويا أهم من أي جواز ومش قادرة أنسى الإهانة ولا أتخيل نفسي أكمل مع شخص بيقلل من أبويا بالشكل ده ومش اول مرة وكل حاجه واخدها تريقة وهزار
أنا بحبه فعلا وهو كمان لكن في نفس الوقت حلفت إني مش هرجعله لأن اللي يهين أهلي مرة ممكن يكررها بعد الجواز.
هو دلوقتي سايق عليا صحباتي وعايز يعتذر واني كبرت الموضوع وانا مش قادرة اتجاوز كلامه ومحدش كان بيشوفه هو بيتريق علينا غيري ودايما يقولي بهزر
إنتوا لو مكاني كنتوا هتدوا له فرصة تانية بعد اعتذار حقيقي وبيقولولي انه لسه صغير ومش كلامه بيدركه وطيش شباب وكده اعمل ايه

20/06/2026

بعد 15 سنة زواج لقيت فيديو فا.ضح لزوجتي واتاكدت ، والفيديو واضح انه في بداية الزواج أو قبل الزواج ، وطول فترة زواجي ماشوفتش اي حاجه ممكن تشككني فيها وعندنا طفلين
ملاحظة أنا اخدت قرار اني اطلق خلاص بس حبيت اسمع ، ياريت حلول عن تجربة أو حلول دينية.

19/06/2026

سلام عليكم
محتاجة نصيحة منكم
انا وجوزي اخدين بعض عن حب جدا وبقالنا ١٣ سنة مع بعض منهم ٥ سنين جواز وحياتنا الحمد لله مستقرة جدا ومفيش احسن منها ومفيش مشاكل الحمد لله وعندي ولد وبنت واسرة مترابطة جدا وهزار وضحك وضرب كأننا ٢ اصحاب مع بعض ومفيش احسن من كدا
من سنة تقريبا كنت بشوف صورة علي تليفونه كانت اتحذفت فاتفاجئت ان في فيديوهات مش كويسة ف المحذوفات
رغم انه قريب جدا من ربنا وكويس ومحترم وعلي دراية كاملة بالحرام والحلال وممكن يفيد الي قدامه جدا ف اي اسئلة شرعية
المهم زعلت جدا وواجهته وقولتله انا بنصحك مش عشاني دا عشان ربنا ودا حرام وهيكون سبب فقر وقلة بركة للبيت وهو اتحرج جدا مني وقالي انا محروج منك اوي رغم اننا اصحاب ومش بنخبي حاجة علي بعض حتي لو غلط قالي بس هي ذلة كدا وكل واحد يمكن له غلطة او ذنب ميحبش حد يعرفها وادعيلي ربنا يهديني انتي احسن مني وان شاء الله معملش كدا تاني بس بلاش تكلميني ف الموضوع دا تاني
يمكن هو حس انه صغر ف نظري مثلا
بس انا فعلا مكلمتوش من يومها فيه
بس كل فترة كبيرة امسك تليفونه الاقي في بردو ف المحذوفات بقول ربنا يهديه وان شاء الله اكيد هيبطل الحاجة دي مع الوقت لان الي اعرفه بتكون زي الاد.مان فقولت طالما ذنب مش بيئذي بيه حد هي حاجة بينه وبين ربنا وربنا قادر يهديه
اول امبارح ببص لقيت بردو بس لقيت اسكرين من شات غريب كلام لواحدة بس استغربته لانه من ابلكيشن غريب قفلت الفون وقولت يمكن حد باعتهاله بس الكلام فضل يدور ف عقلي واقول دا اسلوب جوزي وكلامه فكرت كتير لحد ما قولت انا هعملها استعادة اشوف هترجع ف اي فولدر واعرف سواء هو الي اخد الاسكرين ولا حد باعته
وبالفعل لقيته هو الي اخدها دورت لقيت اسكرين تانية عادية للفون معرفش ايه قالي شوفي الابلكيشن دا الي اخدله اسكرين
بحثت ع الفون لقيته خافيه فتحته لقيته هو دا الي اخد منه الاسكرين
وكانت الصدمةةة لقيته ابلكشين مقر.ف كل الي عليه بنات قذ.رة زي المواقع الابا.حية كدا ولقيت شات كتير بينه وبين بنات كلام مقر.ف وقذ.ر وكلام خارج ولقيت ان في مكالمات فيديو بينه وبينهم ويقولها وريني كذا وهي تقوله وريني كذا بس مشفتش صور هما بعد ما يقولو كدا يقولها جاهزة او هي تقوله جاهز وعر..يانة وعر..يان والي فهمته انهم زي بيعملو علا.قة من بعيد كدا
مش دي خيانة ؟؟؟!!
طب قولولي اعمل ايه انا بمو..ت والله م الصدمة والخذلان
انا مامتي لسة متوفية مكملتش شهرين ومكسورة اوووي ومش عارفة اوصف لكم حالتي انا مش عارفة ازعل عشان الي حواليا ميسألش مالك
عشان ولادي لما بيشوفوني بعيط بيخافو ويزعلو
انا مش عايزة اهد بيتي مش عايزة افكر ف كلمة طلاق مجرد اصلا ما كتبتها صعبة اوي مش عارفة اتخيل حياتي انا وهو الي مكانش في اسعد منها انها تنتهي علي لحظة بدون اي مقدمات
مش عايزة ولادي يعيشو حياة اب وام منفصلين
انا نفسي هموو.وت م الوجع مش عارفة افكر ازاي مش مصدقة عايزة حد يكذبلي انه مش هو
انا مش عارفة اواجهه ولا اعمل ايه
بس انا مشيت عند اخواتي وبايتة معاهم عشان محتكش بيه علي ما افكر
وهو ملاحظ اني متغيرة بس واصله ان زعلانة علي ماما وهيتجنن من امبارح ويخرجني م الي انا فيه لان دي عادته مش بيحب يشوفني زعلانة ابدا وكلمني كتير ويقولي طب تعالي نخرج
طبعا هو مستحييييييل بتوقع ان اكون عرفت حاجة من دي بس هو من معاملتي بيقولي هو انا مزعلك انا حاسس انك مش طيقاني
انا طولت اووووي عليكم بس انا بفضفض وانا بكتب ومش عارفة اقصر ف الموضوع
بالله عليكم قولولي اعمل ايه
اعمل ايه مع الشخص الي مبرتاحش غير ف حضنه مبرتاحش الا ما افضفض معاه حتي لو زعلانة منه

06/06/2026

*البنت ما تخرجش لوحدها مهما حصل "ايوا انا رجعي"
*البنت ما تصاحبش اي بنت وتقعد معاها وقت وانتي نايمة علي ودنك ولا يتقفل عليهم باب "ايوا انا متخلف"
*البنت ما تنامش في اوضه لوحدها وفي حضنها الفون بتاعها ."اهبل ايوا انا اهبل"
*البنت ما تتعاملش مع أي رجاله خارج إطار عينك وبيتك وعائلتك وكلة وانتي صاحيه "مجنون ايوا انا مجنون"
عشان ما تقعش في مصيبه وانتي نايمة علي ودانك وفي الاخر ندور علي حته نستخبي فيها من الفضائح
طبعا انتوا عارفين بتكلم علي ايه #فضيحةـالشرقيه
ادمن وليد

02/06/2026

أنا متجوزة بقالي شهر بس وتاني يوم العيد أنا وجوزي روحنا نزور أهلي وقعدنا عندهم حوالي ساعتين، الدنيا كانت عادية جدا وقاعدين بنتكلم ونضحك أنا وجوزي مع بابا وماما وإخواتي.
بعد شوية جوزي قالي يلا نمشي عشان مسافر الصبح
هو كان مسافر يزور اخته في البحيرة ويعيد عليها
و أنا قبلها كنت باعتة لبابا إني نفسي أبات عندهم يومين عشان وحشوني
بابا أول ما سمع جوزي بيقول نمشي قاله سيبها تبات عندنا يومين وسافر انت وتعالي بالسلامه
جوزي قال لا معلش خليها تيجي معايا عادي ونبقى نيجي تاني.
لكن بابا أصر جدا عشان عايز يعملي اللي انا عايزاه
وقاله لا هي هتفضل هنا ومش هتمشي دلوقتي.
وجوزي حاول يهزر ويعدي الموضوع وقاله لا لازم ترجع معايا.
لكن بابا اتكلم بعصبية شوية وصوته علي وقال بنتي هتبات عندنا يعني هتبات عندنا.
ساعتها جوزي بصلي وقالي إنتِي عايزة تفضلي ولا تيجي معايا؟وأنا بصراحة اتوترت وسكت ومقولتش حاجة بس كان من نظرتي باينه اني عايزه أقعد وهو فهم كده لأني مقمتش من مكاني ولا غيرت هدوم البيت عشان نمشي
وجوزي شافني كده قام وخرج من البيت وهو متضايق جدا وشكله اتكسف من اللي حصل
بعدها بشوية بعتلي رسالة على الموبايل بيقولي فيها إن قدامي ساعتين وأكون في البيت ولو ما رجعتش يبقى ما أرجعش تاني.
أنا اتضايقت من طريقته ورديت عليه وقلتله حل الموضوع مع بابا وأنا فضلت قاعدة عند أهلي.
لقيت تاني يوم حمايا بيكلم بابا في طلاق والموضوع خد اكبر من حجمه بكتير
والله أنا لحد دلوقتي مش مستوعبة إن الموضوع كبر بالشكل ده وهو في ايه هو يعني الطلاق بقى سهل كده عند الناس والرجاله اللي متجوزه ده احنا لسه بنقول يا هادي في حياتنا
مش فاهمة هل جوزي مكبر الموضوع زيادة ولا بابا مثلا غلط عشان عايزني ابات باقي يومين العيد معاهم
بجد محتاجة أفهم مين الغلطان في الموقف ده انا عملت ايه لكل ده حسبي الله ونعم الوكيل في كل راجل نكدي وبينكد على بيته ومراته في أيام المفروض تبقى كل فرح وسعادة

14/05/2026