07/09/2026
قلتلها ولا يهمك أنا هتصرف وأنا اصلاً ما كنتش عارفة هتصرف إزاي !!
حدث بالفعل .. كنت مع صديقتي مسافرين في عربيتها ، كان عندنا تصوير في الساحل وهى اضطرت تقعد تكمل وأنا هرجع بعربيتها قالتلي هتعرفي تتعاملي مع العربية قلتلها ولا يهمك هتصرف ، مع إني ما كنتش عارفة الأوبشنز بتاعتها كويس ، المهم توكلت ع الله وماشية في آمان الله لقتني في الصحراء.
أمشي شوية برضه صحراء ، أرجع تاني صحراء ، اتوترت جداً .
والجو عمال يضلم لحد ما بقى كحل فعلاً ومافيش شبكة إني أكلم حد ، وبتعامل مع العربية بالعافية مش فاهماها أصلاً .
وفجأة ظهرت عربية فيها 4 شباب ومشغلين أغاني بصوت عالي وقربوا من عربيتي براحة لحد ما بقوا جنبي وبيشاورولي وقفت وأنا مرعوبة .
رعب الدنيا كله وأفلام الخطف والقتل وغيره كلها عدت قدامي .
نزل واحد منهم وجه عندي وشاورلي أنزل الإزاز ، فعلاً نزلت الإزاز حتة صغيرة قالي ايه ده ! أستاذة ندى بسيوني وابتسم بسعادة وسلم عليا بمودة وقالي هو طريق القاهرة منين إحنا تايهين .
بصراحة أول ما قال تايهين وعايزين طريق القاهرة ، روحي رجعتلي في ثانية ، قلتله أنا تايهة بقالي ساعة أصلاً قالي طب تعالي امشي ورانا ، وفضلنا نتحرك شوية كده وشوية كده لحد ما طلعنا على طريق القاهرة الحمد لله شكرتهم وسلموا عليا ومشينا .
أنا لما قلتلها هتصرف كنت عارفة إن ربنا مش هيسيبني ومطمنة ، حتى وأنا تايهة وعربية الشباب قربت مني قلت يارب أنا في حمايتك .
ربنا خلى الشباب يتلغبطوا في الدخلة بتاعة الطريق عشان يوصلوا عندي ويبقوا معايا ونس وحماية وتوجيه للطريق .
ولو حد منهم شاف البوست ، أنا بشكركم وبحكي لأصحابي عن شهامتكم وجدعنتكم ، مش ناسية لحظات الرعب وأنا تايهة لوحدي في طريق الضبعة لحد ما انتوا جيتوا وطلعنا على الطريق .
الثقة في الله مش في البشر بتخلي ربنا يسخرلك البشر نفسهم لخدمتك.
