Embassy of Mongolia, Cairo

27/08/2026

ЭЛЧИН САЙД Д.БЯМБАДОРЖ ЕГИПЕТИЙН ИХ МУЗЕЙН (GRAND EGYPTIAN MUSEUM) ГҮЙЦЭТГЭХ ЗАХИРАЛТАЙ УУЛЗАВ

Элчин сайд Д.Бямбадорж 2026 оны 8 дугаар сарын 26-ны өдөр Каир хотноо Египетийн Их музейн (GEM) гүйцэтгэх захирал, доктор, профессор Ахмед Гонеймтэй уулзав.

Уулзалтаар хоёр улсын музейн харилцаа, хамтын ажиллагаа хөгжүүлэх, музейн менежмент, сан хөмрөгийн хадгалалт хамгаалалт, сэргээн засварлалт, музей судлал, мэргэжилтнүүдийн сургалт, үзэсгэлэн солилцох боломжийн талаар санал солилцов.

Талууд хоёр талын музейн мэргэжилтнүүдийн цахим уулзалтыг ойрын хугацаанд зохион байгуулж, хамтын ажиллагааны боломжит чиглэл, хэрэгжүүлэх ажлын дарааллыг нарийвчлан тодорхойлохоор санал нэгдэв.

Египетийн Их музей (GEM) нь 2025 оны 11 дүгээр сарын 1-ний өдөр албан ёсоор нээлтээ хийсэн бөгөөд нийт 500,000 м² талбайг хамарсан, нэг соёл иргэншлийн түүх, өвд зориулсан дэлхийн хамгийн том музей юм. Тус музейд эртний Египетийн түүх, соёлын өвийг балар эртний үеэс одоо үеийг хүртэлх цаг хугацааг хамруулан, 100 гаруй мянган үзмэрээр цогцоор нь танилцуулдаг байна. Түүнчлэн музей нь үзмэрийг олон нийтэд дэлгэн толилуулахын зэрэгцээ дэлхийн томоохон сэргээн засварлалтын төвүүдийн нэгийг түшиглэн эртний соёлын өвийг судлах, сэргээн засварлах, хадгалан хамгаалах чиглэлээр цогц үйл ажиллагаа явуулдгаараа онцлогтой.

24/08/2026

Хүнс, хөдөө аж ахуй, хөнгөн үйлдвэрийн сайд Ц.Идэрбат Арабын Бүгд Найрамдах Египет Улсын Усны нөөц, усжуулалтын сайд Хани Севиламтай уулзаж, хоёр улсын хөдөө аж ахуйн салбарын хамтын ажиллагааг өргөжүүлэх талаар санал солилцлоо.

20/08/2026

Гадаад харилцааны сайд бөгөөд Цөлжилттэй тэмцэх тухай НҮБ-ын конвенцын Талуудын 17 дугаар бага хурал (UNCCD COP17)-ын Дарга (President) Б.Батцэцэг Өмнөд Африкийн Бүгд Найрамдах Улсын Ойн аж ахуй, загас агнуур, байгаль орчны дэд сайд Бернис Свартсыг энэ 8 дугаар сарын 20-ны өдөр хүлээн авч уулзлаа.

19/08/2026

ЭЛЧИН САЙД Д.БЯМБАДОРЖ АЛЕКСАНДРИАГИЙН НОМЫН САНГИЙН ЗАХИРАЛ, ПРОФЕССОР АХМЕД А. ЗАЙЕДТАЙ УУЛЗАВ

Элчин сайд Д.Бямбадорж 2026 оны 8 дугаар сарын 18-ны өдөр Александриа (Bibliotheca Alexandrina)-гийн номын сангийн захирал, профессор Ахмед А. Зайедтай Александриа хотноо уулзав.

Уулзалтаар Монгол Улсын Үндэсний номын сан болон Александриагийн номын сангийн хамтын ажиллагааг сэргээн хөгжүүлэх, сан хөмрөгийг цахимжуулах, соёлын өвийг хадгалан хамгаалах, судалгаа, мэдээлэл болон мэргэжлийн туршлага солилцох боломжийн талаар санал солилцов.

Мөн номын сангийн зүгээс шинжлэх ухаан, соёл, урлаг, судалгаа болон цахим шилжилтийн чиглэлээр хэрэгжүүлж буй үйл ажиллагааныхаа талаар танилцуулга хийв. Тус номын сан нь дэлхийн хамгийн том уншлагын танхимтай гэдгээрээ Гиннесийн номд албан ёсоор бүртгэгдэж байсан түүхтэй.

Орчин үеийн Александриагийн номын сан нь МЭӨ 300 орчим онд байгуулагдаж, хожим галд өртөж устсан эртний Александриагийн номын сангийн уламжлалыг сэргээн үргэлжлүүлэх зорилгоор 2002 онд байгуулагдсан судалгаа, эрдэм шинжилгээ, соёл, боловсрол, урлагийн цогц байгууллага юм.

14/08/2026

Элчин сайд Д.Бямбадорж Египетийн Гадаад хэргийн туслах сайд бөгөөд ГХЯ-ны Судалгаа, үнэлгээний газрын захирал, Дипломат судлалын хүрээлэнгийн захирал, Элчин сайд Яссер Элвитэй уулзаж харилцаа, хамтын ажиллагааны асуудлаар санал солилцов.

Египетийн Дипломат судлалын хүрээлэн нь 1966 онд байгуулагдсан бөгөөд Египетийн Гадаад хэргийн яамны дипломат ажилтнуудыг бэлтгэх, давтан сургах, судалгаа шинжилгээ хийх үндсэн академи юм. Мөн хүрээлэн нь геополитик, олон улсын харилцааны чиглэлээр судалгаа хийж, бодлогын зөвлөмж боловсруулах чиг үүргийг гүйцэтгэдэг болно.

12/08/2026

Гадаад харилцааны сайд бөгөөд Цөлжилттэй тэмцэх тухай НҮБ-ын конвенцын Талуудын 17 дугаар бага хурал (UNCCD COP17)-ын Дарга (President-Designate) Б.Батцэцэг 2026 оны 8 дугаар сарын 12-ны өдөр Арабын Бүгд Найрамдах Египет Улсын Усны нөөц, усалгааны сайд Хани Севиламтай утсаар ярилаа.

ГАДААД ХАРИЛЦААНЫ САЙД Б.БАТЦЭЦЭГ АРАБЫН БҮГД НАЙРАМДАХ ЕГИПЕТ УЛСЫН УСНЫ НӨӨЦ, УСАЛГААНЫ САЙД ДОКТОР ХАНИ СЕВИЛАМТАЙ УТСААР ЯРИЛАА

Гадаад харилцааны сайд бөгөөд Цөлжилттэй тэмцэх тухай НҮБ-ын конвенцын Талуудын 17 дугаар бага хурал (UNCCD COP17)-ын Дарга (President-Designate) Б.Батцэцэг 2026 оны 8 дугаар сарын 12-ны өдөр Арабын Бүгд Найрамдах Египет Улсын Усны нөөц, усалгааны сайд Хани Севиламтай утсаар ярилаа. Тэрбээр COP17-д оролцох тус улсын төлөөлөгчдийн тэргүүн юм.

Сайд Б.Батцэцэг Египет Улс конвенцын үйл ажиллагаанд идэвхтэй оролцож, яриа хэлэлцээнд үнэтэй нэмэр оруулан, талуудын байр суурийг ойртуулах, харилцан зөвшилцөлд хүрэхэд чухал үүрэг гүйцэтгэж ирснийг тэмдэглээд COP17-ын үеэр ус, гангийн асуудал болон газрын доройтлын харилцан уялдаатай асуудлаарх хэлэлцээ, бодит үр дүнд чиглэсэн шийдвэрүүдийг урагшлуулахад тус улсын дэмжлэг, оролцоо чухал болохыг онцлов.

Талууд COP17-ын хүрээнд өрнөх яриа хэлэлцээг үр дүнтэй явуулж, конвенцын хэрэгжилтийг эрчимжүүлэхэд чиглэсэн бодитой үр дүнд хүрэхийн төлөө нягт хамтран ажиллахаа илэрхийлэв.

Сайд Б.Батцэцэг Арабын Бүгд Найрамдах Египет Улс нь COP17 болон COP18-ын залгамж холбоог хангах, конвенцын хүрээнд ус, газар, ган гачиг, уур амьсгалын өөрчлөлтийн харилцан уялдаатай сорилтыг шийдвэрлэх чиглэлээр хамтын ажиллагааг тууштай үргэлжлүүлэхийн чухлыг тэмдэглэв.

05/08/2026

ОМАНЫ СУЛТАНТ УЛСЫН ЭЛЧИН САЙД АБДУЛЛА АЛЬ-РАХБИТАЙ УУЛЗАВ

Элчин сайд Д.Бямбадорж 2026 оны 8 дугаар сарын 4-ний өдөр Оманы Султант Улсаас Арабын Бүгд Найрамдах Египет Улсад суугаа Элчин сайд Абдулла Аль-Рахбитай уулзав.

Уулзалтын үеэр талууд сүүлийн жилүүдэд эрчимтэй өргөжиж буй Монгол Улс, Оманы Султант Улсын найрсаг харилцаа, хамтын ажиллагаа, цаашид авч хэрэгжүүлэх ажлуудын талаар санал солилцов.

Ялангуяа Оманы Гадаад хэргийн сайд Бадр Аль-Бусайдигийн 2024 онд Монгол Улсад, Монгол Улсын Гадаад харилцааны сайд Б.Батцэцэгийн 2025 онд Оман Улсад тус тус хийсэн айлчлалууд нь хамтын ажиллагааг идэвхжүүлэн өргөжүүлэхэд голлох үүрэг гүйцэтгэснийг талууд тэмдэглэж, айлчлалуудын мөрөөр авч хэрэгжүүлэх ажлыг хэлэлцэн, тэдгээрийг урагшлуулахад нягт хамтран ажиллахаа илэрхийлэв.

Түүнчлэн хоёр улсад ойрын хугацаанд зохион байгуулагдах олон улсын арга хэмжээнүүдэд төлөөлөл оролцуулах асуудалд дэмжлэг үзүүлж ажиллахаа нотлов.

Монгол Улсын Гадаад Харилцааны Яам Ministry of Foreign Affairs of Mongolia
Batmunkh Battsetseg Батмөнхийн Батцэцэг

29/07/2026

ЕГИПЕТИЙН ГАДААД ХЭРГИЙН ТУСЛАХ САЙД АМР ХАМЗАТАЙ УУЛЗАВ

Монгол Улсаас Арабын Бүгд Найрамдах Египет Улсад суугаа Элчин сайд Д.Бямбадорж 2026 оны 7 дугаар сарын 28-ны өдөр Египетийн Гадаад хэргийн яамны Азийн асуудал эрхэлсэн туслах сайд, Элчин сайд Амр Хамзатай уулзав.

Уулзалтын үеэр талууд Монгол, Египетийн уламжлалт найрсаг харилцаа, хамтын ажиллагааны өнөөгийн байдал болон цаашдын хөгжлийн төлөвийн талаар санал солилцов.

Талууд Гадаад хэргийн яамд хоорондын яриа хэлэлцээг эрчимжүүлэх, худалдаа, эдийн засаг, хөдөө аж ахуй, аялал жуулчлал, эрүүл мэнд, боловсрол, соёл зэрэг харилцан сонирхсон салбарт хамтын ажиллагааг өргөжүүлэх боломжийн талаар ярилцаж, хоёр улсын харилцаа, хамтын ажиллагааны шинэ боломжийг эрэлхийлэх чиглэлээр нягт хамтран ажиллахаа илэрхийлэв.

Монгол Улсын Гадаад Харилцааны Яам Ministry of Foreign Affairs of Mongolia
Batmunkh Battsetseg Батмөнхийн Батцэцэг

29/07/2026

29/07/2026

СУУРЬ БОЛОН БҮРЭН ДУНД БОЛОВСРОЛЫН ТОДОРХОЙЛОЛТЫГ АНГЛИ ХЭЛЭЭР ЦАХИМ АПОСТИЛЬ ГЭРЧИЛГЭЭГЭЭР БАТАЛГААЖУУЛАХ БОЛОМЖТОЙ БОЛЛОО

Суурь болон бүрэн дунд боловсролын тодорхойлолт, дүнгийн жагсаалтыг англи хэл дээр Төрийн үйлчилгээний нэгдсэн систем “E-Mongolia”-аар дамжуулан цахим апостиль гэрчилгээ олгож эхэллээ.

Дээрх тодорхойлолт, лавлагаанд цахим апостиль гэрчилгээ олгож эхэлснээр иргэд тухайн баримт бичгийг гадаад улсад ашиглах тохиолдолд нотариатаар гэрчлүүлэх болон баталгаат орчуулга хийлгэх шаардлагагүй болж, баримт бичиг баталгаажуулах үйл явцыг хялбар, шуурхай байдлаар цахимаар гүйцэтгэх боломж бүрдэж байна.

Цаашид цахим апостиль гэрчилгээ олгох боломжтой лавлагаа, тодорхойлолтын нэр төрлийг нэмэгдүүлэхийн зэрэгцээ тухайн баримт бичгийг олгох хэлний сонголтыг төрөлжүүлэхээр ажиллаж байна.

Иргэд цахим апостиль гэрчилгээ болон түүнд хавсаргасан лавлагаа, тодорхойлолтын үнэн зөв, хүчин төгөлдөр байдлыг цахим апостиль гэрчилгээний QR кодыг уншуулах замаар шалгах боломжтой.

Цахим Апостиль авах зааварчилгаа: https://www.facebook.com/share/v/1HssEAYPXp/

Баримт бичгийн үнэн зөвийг шалгах: https://e-mongolia.mn/check

Монгол Улсын Гадаад Харилцааны Яам Ministry of Foreign Affairs of Mongolia E-Mongolia Боловсролын яам