09/07/2026
Un curso máis pechamos unha tempada do Club de Lectura.
Ao longo do ano, ademáis de ler, intentamos construír un espazo de encontro, diálogo e aprendizaxe compartido e por que non dicilo, tamén un espazo gastronómico no que compartir café, infusións e doces caseiros 😉
Este curso lemos libros de diferentes xéneros, estilos e temáticas: clásico, autobiográfico, histórico, crítica social, medio ambiente, realismo máxico…
Viaxamos polas páxinas destes libros desde a China do século XV ata a Galicia de hoxe, desde os salóns ingleses de Jane Austen ata o universo dixital de Delphine de Vigan. Reflexionamos sobre a identidade, a memoria, os vínculos familiares, o papel das mulleres e o poder da literatura para explicar o mundo.
Case sen querer, construímos unha ponte entre Oriente e Occidente, entre a tradición e a modernidade, entre a memoria e o presente, e moitas veces chegamos á conclusión de que, pese as diferenzas de tempo e lugar, as grandes preguntas da humanidade seguen sendo sorprendentemente parecidas.
E non podíamos imaxinar unha mellor maneira de pechar o curso que coa visita a Villa Florentina, un lugar cargado de memoria literaria que nos permitiu achegarnos aínda máis á figura e obra de Wenceslao Fernández Flórez.
O noso agradecemento á Fundación Wenceslao Fernández Flórez e, de maneira moi especial, a Alicia Longueira e a Teresa, pola súa cálida acollida. Grazas polo seu tempo, a súa cercanía e a súa xenerosidade ao compartir con nós tantas historias, curiosidades e lembranzas que fixeron desta visita unha experiencia inesquecible.
❤️ E xa para rematar, grazas a todas as persoas que participáchedes nesta edición do Club de Lectura. Foi un auténtico pracer compartir esta viaxe literaria con vós.
