01/06/2026
🟦 No pleno ordinario do pasado xoves, 28 de maio de 2026, no punto 4º tratouse a Aprobación provisional da Modificación Puntual núm. 4 das Normas Subsidiarias do Planeamento de Malpica de Bergantiños para avanzar na construción dun novo centro de saúde.
🟦 Este punto nº 4 aprobouse cos votos a favor do PP (6) e BNG (2), e coas abstencións do PSOE (4) e AIM (1).
🟦 A posición do BNG de Malpica sobre este punto foi a seguinte:
Hoxe tratamos un asunto de grande relevancia para Malpica: a aprobación inicial da Modificación Puntual nº4 das Normas Subsidiarias, necesaria para avanzar na construción dun novo centro de saúde e dun espazo dotacional ao servizo da nosa veciñanza.
O BNG quere deixar claro desde o principio que o noso voto será favorable. Será favorable porque estamos diante dun proxecto que responde a unha necesidade social evidente, porque supón unha mellora real dos servizos públicos e porque está avalado por informes técnicos e xurídicos que garanten a súa legalidade e viabilidade.
🔵 Un proxecto necesario para Malpica:
O actual centro de saúde leva anos quedando pequeno, obsoleto e insuficiente. A veciñanza merece unha atención sanitaria digna, moderna e adaptada ás necesidades actuais. A recalificación deste ámbito permite avanzar cara a ese obxectivo, e ademais incorpora un espazo dotacional múltiple e un aparcamento disuasorio que mellorará a mobilidade e o acceso.
Estamos, polo tanto, ante unha actuación que non responde a intereses privados nin especulativos, senón ao interese xeral. E iso, para o BNG, é determinante. A saúde é un dereito, non un luxo. E garantir un centro de saúde digno non é unha cuestión urbanística: é unha cuestión de dereitos e de benestar colectivo.
A necesidade é tan evidente que o SERGAS asinou un convenio co Concello para construír o novo centro, que os informes sectoriais son favorables e que tanto Costas da Xunta como Costas do Estado avalan a actuación.
E non falamos só dun edificio sanitario. Falamos dun proxecto que incorpora un espazo dotacional múltiple, un aparcamento disuasorio e unha mellora integral da mobilidade e do espazo público. É dicir: non é só un centro de saúde, é unha oportunidade para mellorar Malpica.
🔵 Un procedemento garantido e fiscalizado:
O informe de Secretaría é claro: cumpríronse os trámites, obtivéronse os informes sectoriais preceptivos, a avaliación ambiental é favorable, Costas da Xunta e Costas do Estado informan positivamente e non existe afección ao dominio público marítimo-terrestre.
É dicir, o procedemento é sólido e está ben fundamentado.
🔵 Pero tamén hai deberes pendentes: reforzar os servizos públicos municipais.
O informe de Secretaría tamén pon enriba da mesa unha realidade que o BNG leva anos denunciando: o Concello de Malpica ten unha carencia estrutural de persoal técnico propio, especialmente no ámbito urbanístico.
Non é normal, e a Secretaría así o di con claridade, que informes tan sensibles teñan que ser emitidos por persoal externo contratado, cando existen prazas vacantes de arquitecto/a técnico/a que deberían estar cubertas por persoal funcionario. O BNG quere deixar isto moi claro: votamos a favor da modificación puntual, pero non votamos a favor de manter esta situación de precariedade técnica.
Pedimos ao goberno municipal que acelere a cobertura das prazas vacantes e que garanta que o urbanismo municipal se xestione con medios públicos, profesionais e estables.
🔵 Un urbanismo ao servizo da veciñanza:
Esta modificación puntual é positiva, pero non pode facernos esquecer que Malpica precisa avanzar cara a unha planificación urbanística máis ampla, máis moderna e máis participativa.
O BNG defende un urbanismo que: priorice o ben común, recupere espazos para a cidadanía, mellore a mobilidade e garanta que o crecemento do pobo sexa ordenado, sostible e pensado para as persoas.
O BNG vota a favor porque este proxecto é bo para Malpica, porque cumpre coa legalidade e porque responde a unha demanda social que non admite máis atrasos.
Desde o BNG, valoramos positivamente todas as actuacións e inversións de calquera administración, que supoñan unha mellora nas infraestruturas do noso concello e que repercutan nunha mellora dos servizos e da calidade de vida da nosa veciñanza; máis tamén botamos en falta que a Xunta de Galiza mellore e aumente nos Centros de Saúde o persoal médico en todas as categorías da atención primaria.
Pero tamén votamos con responsabilidade, lembrando que o Concello debe reforzar os seus servizos técnicos e avanzar cara a unha xestión urbanística plenamente pública e profesional. O noso apoio é un apoio construtivo, esixente e comprometido co futuro do Concello de Malpica e de todas as veciñas e veciños.
Esperemos que os prazos para a construción deste novo Centro de Saúde se acurten e axilicen o máximo posible e sexa unha realidade canto antes, e que non ocorra como co Centro de Saúde de Buño no que se iniciaron os trámites para a súa construción no ano 2.000 e a súa apertura tivo lugar 16 anos despois, no ano 2016.
