Bng Catoira, Rúa do Concello, 14, Catoira (2026)

19/06/2026

📢 A PARCELARIA NON PODE AGARDAR ATÉ 2029: ESIXIMOS UN SOLUCIÓN XA PARA A VECIÑANZA DE CATOIRA 🛑

👉 O Concello de Catoira considera inaceptable que o horizonte para rematar a concentración parcelaria se vaia ao ano 2029. Levamos case un cuarto de século (26 anos!) agardando por un proceso que semella non ter fin. A veciñanza está cansa e non se lle pode seguir pedindo máis paciencia.

Tras a última reunión coa Xunta e as novas empresas adxudicatarias, esta é a situación actual:

❌ Prazos excesivos: Os novos contratos técnicos teñen un límite de 30 meses (dous anos e medio).

Desde o Goberno Municipal, o alcalde Xoán Castaño rexeita agardar tanto: "Como di o refrán, iso vai ser 'para cando os cregos deixen de pedir'".

O obxectivo debe ser rematar a zona Norte nun prazo aproximado dun ano.

🔍 Zona Sur (a máis atrasada): As empresas Topgal SL e Sial Ingeniería farán o levantamento topográfico e corrixirán os erros da anterior empresa (á que se lle retirou o contrato por deficiencias e sen cobrar). Pola súa parte, Enseros S.L. elaborará as bases identificando as propiedades. A colaboración veciñal será clave aquí.

🗺️ Zona Norte (máis avanzada): Unha vez resoltos os recursos, Lagares Oca perfilará o perímetro de camiños, ríos e zonas excluídas, e redactará a proposta de adxudicación das novas fincas.

🔄 Novidades e cambios:

Abrese un novo período para solicitar cambios nas preferencias de localización das parcelas. Para facilitar os trámites, habilitaranse dúas canles de WhatsApp de comunicación directa para as persoas afectadas.

🏛️ O noso compromiso: Esiximos á Xunta un seguimento exhaustivo para que as empresas aceleren o paso e non haxa máis atrasos. Como goberno local, imos seguir informando, asesorando e acompañando á veciñanza neste proceso estratéxico para Catoira.

O noso rural merece respecto e axilidade! ✊🌾

👇 Aquí vai a nota de prensa completa por se alguén a quere ler toda: 👇

O CONCELLO DE CATOIRA CRITICA QUE A PARCELARIA NON TEÑA PREVISTO REMATAR ATÉ 2029 E PIDE ÁS EMPRESAS QUE AXILICEN OS TRABALLOS

O alcalde Xoán Castaño reclama que o proceso se resolva nun ano na zona Norte e lembra que a veciñanza leva “case un cuarto de século” agardando.

O Concello de Catoira considera inaceptable que a concentración parcelaria do municipio teña fixado actualmente o seu horizonte de remate no ano 2029 e reclama á Xunta de Galicia e ás empresas adxudicatarias dos traballos que axilicen ao máximo os trámites para reducir drasticamente os prazos previstos. O alcalde, Xoán Castaño, advirte de que a veciñanza afectada leva xa 26 anos pendente dun proceso “que semella non ter fin e considera que non se pode seguir pedindo paciencia ás persoas propietarias.
“Levamos un cuarto de século coa tramitación da parcelaria. A xente está cansa e a sensação é de que isto nunca acaba. Os novos contratos dos traballos que faltan por facer rematan en 2029, mais sinceramente penso que non podemos permitirnos agardar tanto”, asegura o rexedor. Castaño fai esta queixa despois da reunión celebrada esta semana para analizar a situación da parcelaria, onde a Xunta presentou o novo cronograma e as empresas encargadas de completar a concentración nas dúas zonas nas que está dividido o proceso, Norte e Sur.
No caso da zona Sur, a que vai máis atrasada, as empresas ‘Topgal SL’ e ‘Sial Ingeniería’ asumirán o levantamento topográfico que aínda queda pendente e tamén a corrección dos traballos realizados pola anterior adxudicataria, á que se lle retirou o contrato ao non avanzar nos prazos previstos nin presentar documentación coa calidade requirida. Segundo se explicou na reunión, a empresa non chegou a cobrar polos traballos realizados debido ás deficiencias detectadas.
Pola súa parte, a firma ‘Enseros S.L’. será a encargada de elaborar as bases da concentración parcelaria, identificando e catalogando todas as propiedades incluídas no proceso. Dende a Xunta e as empresas insistiuse moito na importancia da colaboración veciñal para facilitar o desenvolvemento destes traballos.
Na zona Norte, unha vez resoltos os recursos de alzada presentados polas persoas propietarias, a empresa ‘Lagares Oca’ será a encargada de realizar o levantamento do perímetro correspondente ás augas, ríos, camiños principais e zonas excluídas, ademais de redactar o acordo de adxudicación das novas parcelas, é dicir, a proposta de fincas que corresponderán a cada titular. Posteriormente deberá realizarse a adxudicación definitiva.
Ademais, tamén se anunciou a apertura dun novo período para solicitar cambios nas preferencias de parcelas. Deste xeito, as persoas que queiran modificar a localización inicialmente solicitada ou aquelas que non definiran unha referencia concreta poderán facelo agora. Como novidade, habilitaranse tamén dúas canles de WhatsApp para facilitar a comunicação de maneira directa coas persoas afectadas.
A pesar da existencia de avances, Castaño considera que os novos prazos continúan a ser excesivamente longos para ver resultados finais. O alcalde lembrou que o contrato establece 30 meses como prazo límite para completar todos os traballos pendentes e amosouse moi crítico coa previsión. “Como di o refrán, para ‘cuando os cregos deixen de pedir” . A veciñanza non pode seguir agardando indefinidamente. Entendemos que queda moito traballo técnico por facer, mais tamén cremos que as empresas teñen capacidade para acelerar os procedementos e executar os traballos nun prazo moito máis razoable que dous anos e medio”, sinala. O rexedor considera que o obxectivo debería ser completar a concentración parcelaria da zona Norte no prazo aproximado dun ano.
Por iso, o Concello de Catoira solicita á Xunta de Galicia que realice un seguimento exhaustivo do traballo das empresas adxudicatarias e que adopte todas as medidas necesarias para evitar novos atrasos. O goberno local, pola súa conta, comprométese a seguir informando e acompañando ás persoas propietarias durante os próximos pasos dunha concentración parcelaria que considera “estratéxica”.

13/06/2026

📣 XOÁN CASTAÑO ACUSA A ALBERTO GARCÍA DE GASTAR EN DESPRAZAMENTOS EN SÓ 5 MESES O MESMO QUE TODO O ACTUAL GOBERNO DE CATOIRA EN MÁIS DE TRES ANOS

O rexedor lamenta que o socialista intente xerar sospeitas sobre as retribucións do executivo cando el está condenado en firme polo Tribunal de Contas.

O alcalde de Catoira, Xoán Castaño, acusou hoxe ao ex rexedor socialista Alberto García de pretender crear sospeitas sobre as retribucións do actual goberno local cando el mesmo chegou a gastar en dietas e quilometraxes, só entre os meses de xullo e novembro de 2021, os mesmos cartos que todo o executivo nacionalista xunto ao longo dos máis de tres anos que leva á fronte do Concello.

As declaracións do alcalde prodúcense tras o recurso presentado por Alberto García e o tamén concelleiro socialista Francisco Javier César Costoya contra a decisión da Alcaldía de non emitir unha certificación específica das retribucións do goberno municipal, unha solicitude que foi rexeitada pola Secretaría-Intervención ao considerar que non procede a expedición do documento nos termos solicitados, aínda que si se permitiu o acceso á información.

Para Castaño, o movemento do socialista resulta especialmente incomprensible “ao proceder dunha persoa que foi condenada polo Tribunal de Contas a devolver 20.280,69 euros ao Concello por percibir de maneira irregular cantidades en concepto de asistencias e dietas cando era alcalde, é dicir, por meter a man na caixa. Pensa o ladrón que todos son da súa condición”, di. Considera que García intenta agora proxectar sobre os demais as súas prácticas, que o propio Tribunal cualificou como “gravemente neglixentes e culposas”, sen ningún tipo de base.

Lembra Castaño que a resolución xudicial que condenou a García confirmou que o ex rexedor percibía de forma periódica cantidades por asistencias e dietas que na práctica funcionaban como un salario encuberto incompatible coa súa pensión de xubilación. O fallo destacaba que cobraba asistencias practicamente todos os días do mes, incluídos festivos, sen poder acreditar nin a necesidade nin a realidade de boa parte desas presenzas.

Pola contra, o alcalde lembra que as retribucións do actual goberno municipal son completamente públicas e transparentes, xa que foron aprobadas no Pleno de Organización celebrado ao inicio do mandato e figuran igualmente recollidas nos orzamentos municipais. Así, explicou que os salarios da Alcaldía ascenderon a preto de 16.000 euros durante 2023, a 45.353 euros en 2024 e a case 47.000 euros en 2025, mantendo en 2026 os mesmos ingresos mensuais establecidos polos acordos plenarios. “Todo está publicado, aprobado en Pleno e ao alcance de quen queira consultalo. Non hai absolutamente nada que ocultar”, subliñou.

Con respecto aos gastos de desprazamento, Castaño entende que é especialmente sorprendente e surrealista que García reclame agora información detallada sobre quilometraxes cando durante a súa etapa como alcalde presentou ao cobro gastos que, segundo o actual rexedor, resultan cando menos difíciles de xustificar.

Segundo os datos existentes, Alberto García pasou ao cobro cando era alcalde gastos correspondentes a uns 4.500 quilómetros en apenas cinco meses. “Estamos a falar de desprazamentos e cantidades que hoxe resultan difíciles de entender e que nunca foron acreditadas nin comprobadas coa esixencia que merece o diñeiro público. Onde ía para facer eses desprazamentos tan longos cada mes? Só neses cinco meses do ano 2021 gastou practicamente o mesmo que todo o actual goberno local —alcalde e cinco concelleiras/os— ao longo de todo o mandato”, denunciou.

O alcalde considera, ademais, que o recurso presentado polos concelleiros socialistas para reclamar unha certificación dos gastos do actual goberno local carece de sentido práctico, xa que a información solicitada xa foi facilitada ao grupo municipal do PSOE e resulta plenamente accesible a través da documentación municipal e dos acordos plenarios. “Os datos están á vista. Están nos acordos do Pleno de Organización, están nos orzamentos municipais e entregáronse en tempo e forma. O único que pretenden agora é obrigar ao persoal funcionario a dedicar horas de traballo a elaborar unha certificación sobre información que xa teñen no seu poder”, criticou o rexedor.

Para o alcalde nacionalista, esta actuación responde a unha estratexia de desgaste político que acaba repercutindo directamente no funcionamento da administración municipal. Castaño insiste en que o goberno local seguirá facilitando toda a información á que teñen dereito os membros da Corporación, pero considera que o recurso presentado “non busca transparencia, porque a transparencia xa existe, senón xerar traballo administrativo innecesario e alimentar unha polémica artificial sobre uns ingresos que son públicos, legais e perfectamente coñecidos”.

11/06/2026

📣 Xa estamos en marcha! 🎥

Dende primeira hora desta mañá, o equipo de escenografía, grabación e dirección atópase traballando intensamente no entorno das Torres de Oeste.

Estamos a preparar todo o escenario para comezar a grabar as tomas do programa "Volando voy" con Jesús Calleja. Neste momento, agardamos pola marea chea para proceder á botadura do barco do Ateneo.

Seguide atentos ás nosas redes para máis novidades!

10/06/2026

📣 CATOIRA CONVOCA Á SÚA VECIÑANZA ESTE SÁBADO PARA PARTICIPAR NA MINI-ROMARÍA VIKINGA QUE GRAVARÁ O PROGRAMA ‘VOLANDO VOY’

👉 O Concello mobiliza persoal, embarcacións, e recursos municipais para colaborar coa produtora nunha promoción “sen precedentes” para a festa e o municipio.

👉 Catoira vivirá este sábado unha xornada moi especial coa celebración dunha ‘Mini-romaría Vikinga’ organizada para a gravación do programa televisivo ‘Volando Voy’, que presentará Jesús Calleja e que será emitido nas semanas previas á festa oficial deste ano. A produtora do programa, da man do alcalde Xoán Castaño e do concelleiro de Cultura, Raúl Gómez, fai un chamamento á veciñanza para participar na rodaxe que terá lugar no Espazo das Torres entre as 9.30 e as 14.30 horas, animando ás persoas asistentes a acudir vestidas de época para contribuír a recrear o ambiente característico. Durante a mañá haberá música, almorzo e comida.

👉 Segundo explica o alcalde Castaño, a gravación incluirá unha recreación do tradicional desembarco viquingo adaptada ás necesidades da produción audiovisual. Trátase de manter a esencia e a espectacularidade do evento real, aínda que cun percorrido de navegación máis reducido. A rodaxe contará cun importante despregamento técnico, incluíndo a gravación aérea mediante helicóptero durante toda a actividade. Posteriormente, as imaxes obtidas complementaranse con material de arquivo para mostrar ás persoas espectadoras a dimensión real da Romaría Vikinga como unha das festas máis recoñecidas de Galicia.

👉 O Concello de Catoira destaca a estreita colaboración mantida coa produtora para facer posible a gravación. O goberno local puxo á súa disposición persoal de Protección Civil, operarios das brigadas municipais, os drakkars municipais, os patróns das embarcacións e realizou toda a coordinación necesaria para facilitar o uso das infraestruturas e espazos requiridos polo equipo de televisión. Ademais, o Concello impulsou tamén un bando público para conseguir persoas voluntarias que participasen na recreación do propio desembarco, unha convocatoria que completou todas as prazas dispoñibles en pouco tempo.

👉 O concelleiro de Cultura Raúl Gómez explica que esta colaboración responde á importancia que ten para o goberno nacionalista aproveitar oportunidades de promoción exterior. “Estamos a falar dun programa de gran difusión que permitirá mostrar a milleiros de persoas a riqueza patrimonial, cultural e paisaxística de Catoira. É unha oportunidade extraordinaria para seguir consolidando a Romaría Vikinga como unha grande referencia festiva e turística e para dar a coñecer o noso municipio a novos públicos”, sinala.

👉 Gómez lembra que a gravación do programa non xurdiu de maneira improvisada, senón que foi o resultado de meses de traballo e negociacións. Segundo explica, as conversas coa produtora comezaron hai bastante tempo, mais foi durante a última edición de Fitur, en xaneiro, cando se mantivo unha reunión presencial en Madrid que permitiu confirmar definitivamente a colaboración e concretar os detalles necesarios para desenvolver o capítulo en Catoira.
“Levamos tempo traballando neste proxecto porque entendemos que a promoción turística e cultural é fundamental para seguir situando Catoira no mapa. Xa o fixemos co videoxogo ‘Viking Rise’ e agora coa TV. Este tipo de espazos teñen unha capacidade enorme para atraer visitantes, xerar interese e reforzar a nosa imaxe”, destaca.

⛺⛺ Campamento vikingo ⛺⛺

👉 O edil de Cultura explica que a pesares de participar activamente no desenvolvemento do programa, o Concello non toma parte algunha no guión nin na escolla da veciñanza protagonista: será a propia produtora quen decida as persoas que participarán nas entrevistas e actividades. “Non sabemos quen vai participar activamente nas gravacións nin tampouco quen acompañará a Jesús Calleja no helicóptero. Procuran manter o factor sorpresa para captar a atención e o interese da xente”, explica.

⛺ A xornada do sábado tamén contará con outros atractivos novidosos para a veciñanza e as persoas visitantes. Coincidindo coa recreación, unha asociación procedente de Madrid instalará un campamento viquingo no Espazo das Torres que poderá ser visitado libremente durante toda a mañá.

⛵ Tamén se presentará oficialmente unha das grandes novidades da próxima Romaría Vikinga: a botadura do novo barco do Ateneo Ullán. A embarcación, construída grazas á campaña de recadación de fondos desenvolvida nos últimos meses, recibe o nome de ‘Knarr’ e converterase a partir de agora noutro participante habitual da festa. A diferenza dos tradicionais drakkars de guerra, o novo ‘Knarr’ é un barco de carga, característica que o fará especialmente chamativo polo seu tamaño.

📺 O resultado de todo o traballo emitirase nas vindeiras semanas. A produtora confirmou que o capítulo será emitido antes da vindeira Romaría Vikinga do primeiro domingo de agosto, mais non concretou data.

09/06/2026

▶️ Pontón chama á participación masiva na Illa para defender Galiza fronte ao espolio de Altri e a mina de Touro-O Pino

▶️ Pide denegar todas as autorizacións e permisos ao proxecto da macrocelulosa e paralizar a megamina

09/06/2026

📢 CATOIRA DUPLICA OS FONDOS DESTINADOS AO SERVIZO DE AXUDA NO FOGAR (SAF) PARA AUMENTAR O NÚMERO DE PERSOAS BENEFICIARIAS E DE HORAS PRESTADAS

👉 O alcalde Xoán Castaño subliña que os vindeiros orzamentos reservan 460.000 euros para o servizo fronte aos 230.000 euros que se destinaban en 2021.

“Dar atención de calidade á xente maior é para nós unha prioridade absoluta”

O Concello de Catoira vai duplicar os fondos destinados ao Servizo de Atención ao Fogar (SAF) para aumentar o número de veciños e veciñas beneficiarias do programa e tamén o número horas prestadas. Así o confirmou hoxe o alcalde Xoán Castaño, quen avanzou que os vindeiros orzamentos reservan unha partida de 460.000 euros fronte aos 230.000 que se destinaban por parte do anterior goberno local no último orzamento aprobado.
“Para nós dar atención de calidade á xente maior é unha prioridade absoluta”, subliña Castaño, quen fai unha defensa total do coidado das persoas máis vulnerables, sobre todo das maiores. O rexedor subliña o esforzo económico que supón facer o incremento orzamentario para o SAF ante a situación de axuste que ten Catoira, e sinala que o goberno local está a realizar unha aposta decidida polos Servizos Sociais e polas políticas públicas como ferramentas fundamentais para garantir a igualdade de oportunidades e a permanencia das persoas dependentes na súa contorna habitual. “O SAF non é un gasto, é un investimento en benestar, dignidade e calidade de vida”, apunta.

Con todo, o nacionalista lembra que o SAF é unha competencia impropia para os concellos e insiste en que a Xunta de Galicia e o Estado deben asumir a totalidade do financiamento do servizo. “Os concellos estamos a facer un esforzo extraordinario para soster o sistema de coidados, pero non podemos seguir asumindo unha responsabilidade que corresponde a outras administracións. Mentres non cheguen os recursos necesarios, nós en Catoira temos claro seguiremos prestando o servizo porque sabemos o importante que é para as familias, pero non renunciamos a reclamar un financiamento xusto”, afirma.

Castaño explica que o aumento de fondos con respecto ao ano anterior no Concello de Catoira será de 95.000 euros, chegando aos 460.000 euros totais, unha cifra que duplica os cartos destinados polo anterior goberno local do PSOE. O incremento tan considerable conseguido polo BNG, subliña, permitirá tanto incorporar novas persoas usuarias dependentes ao servizo, como tamén aumentar o número de horas concedidas para persoas con grao 2 recoñecido que xa reciben atención mais precisaban un reforzo, esgotando así a totalidade das dispoñibles no contrato.

O rexedor destaca que a prioridade do goberno municipal é reducir as listas de agarda e dar resposta ao progresivo envellecemento da poboación. “Queremos que as persoas maiores poidan permanecer nas súas casas o maior tempo posible, con autonomía, seguridade e acompañamento profesional. Esa é a mellor política social que podemos desenvolver desde o Concello”, sinala.

Por outra banda, co incremento orzamentario que se vai aprobar, Castaño subliña que Catoira tamén garantirá unhas condicións laborais dignas ao persoal que realiza o servizo, ao actualizar os prezos a pagar á concesionaria, o que repercutirá directamente nas traballadoras. Sinala que “o coidado das persoas dependentes non pode sustentarse sobre a precariedade de quen as atende.

En calquera caso, e a pesares da súa aposta por facerse cargo do SAF, o alcalde vikingo insiste en que “Galiza precisa un verdadeiro sistema público de coidados, con financiamento suficiente e sen que os concellos, neste caso Catoira, teñan que actuar como administracións de último recurso para garantir dereitos que deberían estar plenamente cubertos pola Xunta”. Insiste en que “as nosas prioridades están claras: o SAF é prioritario, pero cada euro que o noso Concello ten que poñer para suplir a falta de financiamento da Xunta é un euro menos para investir noutras necesidades da veciñanza”.

08/06/2026

📢 CATOIRA RECIBE A AUTORIZACIÓN DE PATRIMONIO PARA REALIZAR A SONDAXE ARQUEOLÓXICA PREVIA ÁS OBRAS DE AMPLIACIÓN DA CURVA DE GONDAR

👉 Castaño explica que un técnico realizará mañá os traballos no terreo para emitir un informe, que aínda deberá ser valorado polo departamento autonómico antes de comezar a mellora da estrada.

👉 O Concello de Catoira vén de recibir a autorización da Dirección Xeral de Patrimonio pola que autoriza o proxecto de sondaxe arqueolóxica previa ás obras de mellora do camiño de Gondar, na parroquia de Dimo. O departamento autonómico subliña que os traballos, obrigatorios pola proximidade do Castro de Gondar, deberán realizarse de maneira manual para despois emitir outro informe segundo o que se concederá a autorización definitiva para a reforma da estrada.

O alcalde Xoán Castaño explica que a intención do Concello é que o arqueólogo inicie as catas xa este mércores, sen perder máis tempo. A esixencia do proxecto arqueolóxico, explica o nacionalista, débese á proximidade da pista ao asentamento castrexo, xa que cabe a posibilidade de que aparezan estruturas defensivas ou depósitos arqueolóxicos relacionados co xacemento. Para valorar a viabilidade da obra, Patrimonio considera imprescindible realizar unha limpeza vexetal controlada da franxa afectada pola ampliación da curva baixo a supervisión por parte dun especialista.

A resolución de Patrimonio indica que de atopar algún tipo de elementos, debe velarse pola conservación ‘in situ’ das estruturas arqueolóxicas tomando medidas de protección para a súa salvagarda no caso de descubertas de especial relevancia. Todo o resto do material que poida aparecer deberá ser depositado provisionalmente no Museo de Pontevedra. O arqueólogo deberá presentar unha memoria técnica de valoración final indicando se hai cambios substanciais con respecto á información sobre a croa que figura xa no Catálogo do Patrimonio Cultural de Galicia.

Unha vez Patrimonio teña o informe técnico, de confirmarse que non hai achados de importancia, poderá dar autorización final para proceder aos traballos de mellora da pista municipal. Así, o prazo de inicio dos traballos aínda podería demorarse unhas semanas.
O Concello incluíu a actuación na estrada municipal de Gondar na última fase do Plan de Asfaltados do pasado ano. Entón solicitárase subvención do + Provincia para actuar tamén nas pistas de Corredoira, O Paso, As P***s e Fabeira, que xa foron renovadas. Segundo explica Castaño, a estrada de Gondar, na zona norte do concello, conecta o núcleo das casas co cruce coa PO-548 e Baiuca.

A principal mellora, ademais de aglomerar unha superficie de 120 m2, será a eliminación do estreitamento que hai no xiro situado a uns 170 metros da intersección. Agora mesmo a estrada está cortada ao tráfico.
O alcalde lembra que o Concello conseguiu os terreos para facer a ampliación da sección da pista logo de negociacións coas persoas propietarias. Grazas a iso será posible facer un desmonte do terreo e formar un novo noiro ampliando o paso ata igualar o ancho do resto da estrada.

05/06/2026

🛣️ Sempre hai que estar desmontando as loiadas do PP.

🎬 Olalla Rodil explíchaque moi clariño por que a conselleira mentiu no último pleno sobre a transferencia da AP-9 a Galiza.

05/06/2026

📣 CATOIRA INICIARÁ AS OBRAS DE RECUPERACIÓN DO CAMIÑO REAL DESPOIS DO VERÁN

🤝 O goberno local coñecerá a semana próxima que empresas optan a facer as obras do primeiro do treito e ten xa en marcha a licitación da segunda fase.

O Concello de Catoira vai iniciar despois do verán as obras de reforma e recuperación do Camiño Real. Así o confirmou hoxe o alcalde Xoán Castaño, quen explicou que a finais da vindeira semana vai pechar o prazo de presentación de ofertas das empresas interesadas en realizar a primeira fase - entre o centro da vila, Pedras Miúdas e o Miradoiro de Abalo-, e xa está en marcha a licitación do segundo treito -Abalo e Vilagarcía-.

O rexedor subliña que desta maneira Catoira xa ten encamiñada “con feitos” unha das actuacións máis ambiciosas do goberno nacionalista neste mandato: a construción dun corredor peonil seguro entre o núcleo urbano e o concello veciño que, ademais, vai tomar parte do Camiño do Litoral, a ruta de sendeirismo e cicloturismo que quere promover a Xunta por toda a costa galega.

Cabe lembrar que o Camiño Real do bordo costeiro é unha ruta pintoresca que combina impresionantes paisaxes mariñas coa rica historia e cultura da zona. Actualmente, está recollido no catálogo de ‘Camiños naturais do sector noroeste’ publicado polo MITMA como parte da ‘Guía dos camiños naturais de España’, mais o seu estado non era axeitados para ser utilizado nin a pé nin en bicicleta, motivo que levou ao Concello a redactar o proxecto de mellora e buscar financiamento para as obras.

Segundo explica Castaño, os trámites administrativos están a chegar ao seu fin. O primeiro treito trátase dunha actuación ambiciosa dende o centro até o Miradoiro de Abalo. Inicialmente só ía transcorrer entre o centro a Pedras Miúdas, mais a ampliación foi posible xa que, ademais de dispoñer da subvención do anterior Plan Extra, o Concello conseguiu máis fondos europeos a través de Mar de Santiago, o que fixo que o orzamento dispoñible medrase até os máis de 900.000 euros.

As obras desta actuación están actualmente en fase de contratación. A última hora do vindeiro venres remata o prazo para que as empresas construtoras interesadas en facer a reforma do camiño presenten as súas ofertas económicas. Unha vez analizado pola mesa de contratación se cumpren as garantías, procederase á proposta de adxudicación e á sinatura do contrato coa firma que presente a proposta máis beneficiosa para as arcas municipais. Unha vez que se asine o contrato, a construtora aínda terá un prazo dun mes para facer o replanteo da actuación no propio terreo e iniciar as obras.

No que se refire á segunda fase, entre o Miradoiro de Abalo e Vilagarcía, o Concello acaba de recibir a confirmación da Deputación do visto bo á financiación do proxecto con fondos do Plan +Provincia. En total, a actuación pagarase cos 500.000 euros xa autorizados do Plan Extra e con 110.000 da partida que corresponde ao goberno local do mencionado plan de transferencias provinciais. Tan pronto como se recibiu a confirmación de que todas as axudas tiñan o ok, explica Castaño, o goberno local iniciou o expediente de licitación.

Lembra Castaño que a reforma e posta en valor do Camiño Real suporá unha intervención global que converterá o espazo nun área de esparexemento peonil de plataforma única con dúas partes diferenciadas: o propio Paseo da Ría, onde se permitirá tráfico de servizos para as vivendas, creando espazos de convivencia e esparexemento con pavimento de formigón e lastros, bancos, zonas verdes e nova iluminación, e unha segunda parte que se estenderá a través dunha senda peonil en saburra artificial, tamén con novo equipamento e iluminación, máis en consonancia coa identidade tradicional do camiño.

Bng Catoira

19/06/2026

13/06/2026

11/06/2026

10/06/2026

09/06/2026

09/06/2026

08/06/2026

05/06/2026

05/06/2026

Dirección

Página web

Notificaciones

Atajos

Compartir

Categoría