07/09/2026
Setembro, o mes do Alzheimer 💜
En AFALU queremos invitarvos a acompañarnos durante todo o mes de setembro, un mes no que imos saír ao encontro das persoas, compartir, informar e, sobre todo, facer visible o Alzheimer e a realidade de quen convive con el cada día.
Preparamos un programa con actividades moi diferentes: formación, encontros, música, sensibilización, propostas para compartir en familia e tamén espazos pensados para coidarnos.
Porque cando falamos de Alzheimer non podemos esquecer a quen está detrás de cada diagnóstico: as persoas enfermas, as súas familias, os coidadores e coidadoras e todos os profesionais que as acompañan día tras día.
Levamos tempo insistindo en algo que para nós é fundamental: quen coida tamén necesita apoio. Necesita ter onde preguntar cando aparecen as dúbidas, onde sentirse comprendido, onde aprender a afrontar situacións novas e, tamén, onde parar un pouco. O autocoidado non é un luxo. A prevención tampouco.
Este ano, ademais, queremos facernos eco dunha mensaxe que compartimos coa Confederación Española de Alzheimer e outras Demencias, CEAFA: o “NON” xa non é resposta.
A ciencia avanzou e están aparecendo novas posibilidades para algunhas persoas diagnosticadas en fases iniciais. Non son a cura nin serven para todo o mundo, pero poden significar máis tempo con calidade de vida. E non parece xusto que o acceso a estas oportunidades dependa do lugar no que vivas ou das posibilidades económicas de cada familia.
O Alzheimer non espera. As respostas tampouco deberían facelo.
Así que xa sabedes: este setembro queremos vervos. Nas actividades, nos encontros, nas rúas, compartindo un anaco deste camiño con nós.
Agardamos que nos acompañedes neste mes do Alzheimer.
Porque facer visible, apoiar, coidar e reivindicar tamén é unha maneira de estar ao lado das persoas que viven con esta enfermidade.
💜 Cada día conta.
📞 607 843 384
✉️ [email protected]
🌐 www.afalu.org
