BNG de Maceda

11/04/2026

Por fin tivemos pleno!
O pasado xoves día 9, logo de varios meses pospondo as xuntanzas ordinarias alegando dende a alcaldía motivos diversos, por fin tivemos plano no Concello de Maceda.
Neste pleno, o Grupo Municipal do BNG presentou un par de mocións; unha relacionada coas mobilizacións agrarias contra o tratado do Mercosur; a outra en defensa da paz, en contra do militarismo e para frear as consecuencias da guerra no Irán.
Consideramos de vital importancia na nosa comarca o apoio ás reivindicacións do sector agrogandeiro galego e macedán. Lembrade que fai só un par de semanas xa organizamos un parladoiro sobre os perigos do Mercosur para o rural galego. É por todo isto que queremos facervos partícipes desta loita, deixando aquí a nosa moción para que poidades unirvos e apoiala.
Finalmente temos que comentar tamén que non nos sorprendeu que o resto de grupos municipais, PSOE e PP, votaran a favor da moción. Alegrámonos de que así fose, e de que defendan dende o ámbito local o agro, tan importante para o noso Concello. O que non entendemos é a falta de coherencia dos seus partidos noutras alturas, votando unha cousa aquí e outra alá, dando mostra daquilo que dicían os nosos vellos de ir cos da feira e volver cos do mercado...

31/03/2026

Experiencia enriquecedora para coñecer polo miúdo as implicacións do Mercosur na nosa comarca.

24/03/2026

Deixámosvos por aquí unhas fotos do pasado domingo no que celebramos o Día do Cómic, da Narración Oral, da Poesía e do Teatro coa participación de moitos amigos.
Maceda ten moito que contar!

20/03/2026

Convidámosvos a debater polo miúdo sobre o que significa o acordo co Mercosur para o noso rural.

13/03/2026

Os nosos compañeiros de Galiza Nova organizan mañá sábado este interesante parladoiro para contextualizar a importancia da muller na cultura galega.
Vémonos ás 11:00 h. no Café- bar Castillo!

09/03/2026

Onte celebramos o 8M, Día Internacional da Muller cun acto moi emotivo onde inauguramos unha placa que lembra as pandeireteiras de Castro de Escuadro que en 1944 foron encarceradas por tocar e cantar no Entroido. O BNG reivindicou, con verbas de Begoña Caamaño, o "dereito das mulleres a navegar". Fronte a medra dos discursos negacionistas do feminismo, nós declarámonos feministas, para transformar o mundo con perspectiva de xénero, de xeito transversal, en todos os eidos da vida.

08/03/2026

Onte sábado estivemos no encontro de Alcaldesas e Concelleiras do BNG en Compostela, co lema de Mulleres ao Fronte na Defensa dos Nosos Dereitos.
Encontro moi inspirador para pór en valor o papel das mulleres na politica. Quedámonos coas palabras de Ana; “non viñemos so a ocupar un espazo, se non a transformalo. Queremos frear calquera tipo de retroceso e facer medrar a sociedade cara a diante”.
Adiante as mulleres do BNG!

22/02/2026

Ardeu o Entroido, e ardeu ben. E dende aquí queremos amosar o noso agradecemento a todos os que, en maior ou menor medida, fixeron do Entroido de Maceda algo tan xeitoso. Non é preciso dar nomes, vós sabedes ben quen sodes.
Nós, polo que nos toca, só queremos mostrar o orgullosos que estamos do noso pobo e pór en valor aquilo no que a xente participa, que organiza e reivindica dende o sentimento. Estamos aquí para extrapolar este xeito de facer as cousas, dende o corazón, ao noso día a día. Ficamos convencidos de que é o mellor xeito de que Maceda mellore e o Entroido poda habitar en nós mil primaveras máis...

29/01/2026

28/01/2026

Lembrade que mañá día 29 e o venres día 30 temos sesións abertas aos veciños para a recollida de problemáticas e propostas de mellora para a modificación do PXOM do Concello de Maceda.
Aínda estades a tempo de participar!