25/02/2026
🛍️🛍️ 𝐏𝐀𝐑𝐓𝐈𝐃𝐎 𝐏𝐎𝐏𝐔𝐋𝐀𝐑 𝐃𝐄 𝐍𝐈𝐆𝐑Á𝐍 𝐑𝐄𝐂𝐋𝐀𝐌𝐀 𝐔𝐍 𝐏𝐋𝐀𝐍 𝐈𝐍𝐓𝐄𝐆𝐑𝐀𝐋 𝐃𝐄 𝐀𝐏𝐎𝐈𝐎 𝐀𝐎 𝐂𝐎𝐌𝐄𝐑𝐂𝐈𝐎 𝐋𝐎𝐂𝐀𝐋.
🛍️🛍️ O Partido Popular de Nigrán reclamou ao goberno municipal a posta en marcha urxente dun Plan Integral de Apoio ao Comercio Local ante o peche continuado de pequenos establecementos no municipio.
🛍️🛍️ A portavoz municipal popular, María José Pino, sinala que nos últimos meses o comercio tradicional está a sufrir un impacto moi significativo, especialmente tras a apertura do Parque Comercial Nasas. Segundo explica, esta nova infraestrutura trouxo consigo creación de emprego e unha maior oferta comercial, pero tamén provocou un cambio profundo no modelo comercial que está a afectar negativamente aos negocios de proximidade.
🛍️🛍️ Dende o PP consideran que existe unha competencia desequilibrada que moitos pequenos establecementos non poden soportar, o que está a derivar no peche de comercios históricos e na aparición de locais baleiros nos núcleos urbanos e parroquias.
🛍️🛍️ Os populares defenden que o comercio local é clave para a economía e a cohesión social, xa que xera emprego estable, garante servizos de proximidade —especialmente para as persoas maiores— e contribúe á vida nas rúas e á identidade propia do municipio.
🛍️🛍️ Ademais, critican que a campaña municipal “Vivo en Nigrán, compro en Nigrán” non acadou os resultados esperados por falta de dotación e continuidade. Tamén cuestionan que unha parte relevante das contratacións do Concello se realicen con provedores de fóra do municipio.
🛍️🛍️ Entre as medidas propostas inclúense axudas económicas directas para modernización e dixitalización, bonificacións fiscais, novas campañas de promoción con orzamento suficiente, programas de dinamización comercial e iniciativas para favorecer o relevo xeracional. Finalmente, solicitan a creación dunha Mesa Municipal do Comercio Local como órgano permanente de diálogo e seguimento.
