03/02/2026
💗🛄 O CONCELLO DE TOURO CONVERTARASE NUN MUNICIPIO CARDIOPROTEXIDO CUNHA REDE PÚBLICA DE DESFIBRILADORES
🏥🏥 O goberno municipal aprobará nos vindeiros días unha iniciativa de carácter claramente pioneiro no ámbito da saúde pública e da prevención: a implantación dunha rede municipal de desfibriladores externos semiautomáticos (DESA) nas vías públicas do municipio, dispoñibles as 24 horas do día.
🪛🧰 O proxecto permitirá a instalación de 18 desfibriladores en espazos públicos das distintas parroquias, garantindo a cobertura de todo o termo municipal, ademais dun dispositivo adicional que se porá a disposición de Protección Civil, co obxectivo de reducir drasticamente o tempo de resposta ante unha parada cardiorrespiratoria. Con esta medida, Touro dá un paso decisivo para converterse nun concello cardioprotexido, poñendo a saúde e a seguridade da veciñanza no centro da acción política.
📊📊As paradas cardiorrespiratorias son unha das principais causas de falecemento fóra do ámbito hospitalario. Os expertos coinciden en que cada minuto que pasa sen intervención reduce un 10% as posibilidades de supervivencia, mentres que o tempo medio de chegada dunha ambulancia supera, en moitos casos, os 15 minutos. A dispoñibilidade inmediata dun desfibrilador pode marcar a diferenza entre a vida e a morte.
🛄🛄Os dispositivos estarán situados en tótems de aceiro inoxidable, perfectamente sinalizados conforme á normativa internacional, e poderán ser utilizados por calquera persoa, mesmo sen formación sanitaria previa, xa que contan con instrucións por voz claras e sistemas automáticos de axuda á reanimación cardiopulmonar (RCP).
🩺🏥O proxecto inclúe tamén un programa de formación presencial en soporte vital básico e uso do DESA, dirixido á cidadanía, así como un sistema integral de mantemento, monitorización continua e rexistro oficial dos equipos, garantindo o seu correcto funcionamento en todo momento.
💬💬Desde o Concello de Touro destácase o carácter estratéxico e preventivo desta iniciativa, que sitúa á veciñanza no centro da resposta ante emerxencias sanitarias e aposta por achegar recursos vitais á poboación, tamén no ámbito rural.
