05/05/2026
📖✨ O pasado xoves, no marco da programación dos Maios, o Salón de Actos Casa da Cultura de Verín acolleu a presentación de “Artigos, contos e Maios”, do autor Bruno Rúa.
A obra recupera a figura de Enrique Gómez Pato, referente da cultura popular local, a través dunha completa recompilación de artigos, contos e coplas que reflicten a súa mirada crítica, con humor e retranca, sobre a realidade da vila.
A publicación é froito dun intenso traballo de investigación e recompilación desenvolvido ao longo de máis de sete anos por parte do autor. Segundo explica Bruno Rúa, o proxecto xurdiu a partir do acceso a un arquivo documental facilitado no seu día polo verinés Plácido Romero (falecido no ano 2024), elaborado no marco do seu traballo audiovisual “Conversas e petiscos de pato” (presentado no ano 2019), no que se recollían materiais e imaxes vinculadas a Enrique Gómez Pato. A partir dese punto de partida, Rúa levou a cabo un labor exhaustivo de recollida e transcrición literal dos textos orixinais —entre artigos, contos e coplas—, respectando fielmente a súa forma e contido. O resultado son dous volumes de arredor de 375 páxinas cada un que reúnen, case na súa totalidade, a produción literaria do autor, sen intervención interpretativa, co obxectivo de devolver á veciñanza de Verín a voz directa dun dos seus referentes culturais.
O acto contou coa presenza da concelleira Purificación Caldelas, e reuniu a numeroso público interesado en reivindicar e poñer en valor o noso patrimonio inmaterial.
