Fundación Fermín Penzol

Casa
España
Vigo
Fundación Fermín Penzol

Información de contacto, mapa y direcciones, formulario de contacto, horario de apertura, servicios, puntuaciones, fotos, videos y anuncios de Fundación Fermín Penzol, Biblioteca, Praza da Princesa, 2, Vigo.

12/06/2026

CELEBRACIÓN DO V CENTENARIO DO NACEMENTO DE CAMÕES
O luns 15 de xuño celebrarase na sede da Fundación Penzol, na Casa Galega da Cultura de Vigo, unha xornada conmemorativa do V centenario do nacemento de Luís de Camões. Os actos, que se desenvolverán en sesións de mañá e tarde, están organizados pola Fundación Penzol, o Consello da Cultura Galega, a Real Academia Galega e a Estrutura de Missão para as Comemorações do Nascimento de Luís de Camões, e contan coa colaboración do Concello de Vigo,
o Consulado-Geral de Portugal em Vigo e o Camões-Centro Cultural Português em Vigo.
Os actos terán lugar en sesións de mañá e tarde, e comezarán ás 12,30 da mañá coa inauguración da exposición “De aquí o xerme saíu. Presenzas galegas de Camões”, título que comparte coa xornada, que continuará á tarde con intervencións de Xosé Manuel Dasilva, Henrique Monteagudo, Micaela Ramon e José Carlos Seabra Pereira. Un recital poético-musical poñerá o ramo á xornada na nosa sede.
Os detalles da programación poden consultarde na imaxe que acompaña esta nota. A entrada é libre ata completar aforo.

04/06/2026

VISITA DO CÓNSUL XERAL DE PORTUGAL EN VIGO
O pasado 26 de maio achegouse ás nosas instalacións João Bezerra da Silva, cónsul xeral de Portugal en Vigo. Recibírono o presidente e o vicepresidente primeiro, Manuel Puga e Antón Vidal, e o director e mais o subdirector, Xosé Manuel Soutullo e Xosé Manuel Dasilva. Ademais de informalo sobre a historia, obxectivos e características dos fondos que custodia a nosa Fundación, houbo un interesante intercambio de ideas para establecer colaboracións con institucións portuguesas de características semellantes á nosa, onde o Consulado pode resultar un eficaz axente mediador.
Houbo tempo tamén para unha sesión informativa, á que tamén se sumou o concelleiro de Cultura do Concello de Vigo, Gorka Gómez, sobre a xornada “‘De aquí o xerme saíu’. Presenzas galegas de Camões”, que terá lugar o vindeiro 15 de xuño na nosa sede, organizada pola Penzol, o Consello da Gultura Galega, a Real Academia Galega, a Estrutura de Missão para as Comemorações do V Centenário do Nascimento de Luís de Camões, que tamén conta coa colaboración do propio Consulado, o Concello de Vigo, a Editorial Galaxia e o Camões-Centro Cultural Português em Vigo.

30/05/2026

NO CENTENARIO DE MARÍA DO CARME KRUCKENBERG (III)

O vindeiro mércores, 3 de xuño, cúmprense cen anos do nacemento da escritora viguesa María do Carme Kruckenberg. Con tal motivo, a Fundación Penzol, que custodia os seus fondos, celebrará, ás 19 horas, na sede da Casa Galega da Cultura de Vigo, un acto de homenaxe e conmemoración.

O acto constará de dúas partes. A primeira, unha conferencia, impartida por Mercedes Queixas, a súa biógrafa, autora de Vivir unha aventura irrepetíbel. Unha biografía de Mª do Carme Kruckenberg (Galaxia, 2011), na que glosará a súa vida e obra. A segunda constará dun recital dalgúns dos seus poemas, nas voces de Luísa Abad, Pepe Cáccamo, Oriana Méndez e Silvia P***s. A entrada é libre ata cubrir aforo. Gustariamos poder contar coa presenza de todas e todos vós.

23/05/2026

NO ANO DE OTERO PEDRAYO (IX)
SERVIZOS DO ARQUIVO DA FUNDACIÓN PENZOL
A conmemoración do “Ano oteriano” brinda a oportunidade realizar actividades de revisión e estudo dos seus escritos e documentos.
Otero Pedrayo dispuxo a conservación do seu arquivo persoal na Fundación Penzol. Hoxe este legado está formado por 138 caixas de documentos en papel que superan os 20 metros lineais en volume, aos que hai que engadir 16 caixas de fotografías. É propósito da Fundación ofrecer este ano parte deste acervo documental de forma pública e aberta a través do seu portal de arquivo, que se concretará na dixitalización do conxunto da obra orixinal pertencente ao seu fondo: 33 caixas. Mediante sucesivas entregas poderanse consultar variados textos de narrativa e poesía, de ensaios a traducións. As entregas formarán un bloque diferenciado de contidos dentro do portal xunto a outros xa dispoñibles do propio Otero, como é o caso das fotografías persoais. Pódese acceder en:
https://fondospenzol.vigo.org/portalArchivo/seleccionopac?action=inicio&OP=OP999&usr=consulta&PT=PT000001

15/05/2026

NO ANO OTERO PEDRAYO (VIII)
BOLETÍN ‘NOVAS PENZOL’ 32, ABRIL 2026

Presentamos outra iniciativa da Fundación relacionada co Ano Oteriano 2026: o número 32 do noso boletín ‘Novas Penzol’, dedicado desta volta aos fondos bibliográficos e documentais que se custodian na nosa sede.
A respecto dos bibliográficos, o boletín recolle 623 referencias de autoría oteriana, que remiten a monografías, capítulos en obras colectivas, prólogos e epílogos, artigos en revistas e traducións, entre outras. No tocante ás obras sobre Otero Pedrayo, as referencias son 288, divididas entre monografías, capítulos en libros colectivos e artigos en revistas.
Así mesmo, a publicación informa en detalle sobre a documentación que contén o Fondo Otero Pedrayo do Arquivo Penzol, voluminoso e de indubidable importancia, que consta de 7.282 inscricións, de características moi variadas, desde apuntamentos a manuscritos das súas obras literarias. Un material imprescidible para achegarse a o extenso universo do Patriarca das Letras Galegas, que se pode consultar (e descargar) en:
https://hoxe.vigo.org/pdf/PENZOL/NovasPenzol32-AnoOteroPedrayo.pdf

27/04/2026

NO ANO DE OTERO PEDRAYO (VII)
VISITA VIRTUAL Á EXPOSICIÓN “RAMÓN OTERO PEDRAYO, 1888-1976”
Xa é posible visitar de maneira virtual os paneis da exposición biobibliográfica que a Fundación Penzol, coa colaboración da Cátedra Institucional Otero Pedrayo da USC, instalou no vestíbulo da súa sede, na Casa Galega da Cultura de Vigo. Pódese acceder no enlace: https://maisgalaxia.gal/uploads/media/showroom/exhibition/otero-pedrayo-1888-1976/info.pdf.
Ademais, na mesma plataforma —“Máis Galaxia” (https://maisgalaxia.gal/exhibition/)— tamén se ofrecen outras mostras realizadas pola nosa Fundación, como: “Fundación Penzol. 60 pezas para sesenta anos”; “María do Carme Kruckenberg. Vivir, unha aventura irrepetíbel” e “Castelao. De ‘Sempre en Galiza’ ao Consello de Galiza”.

21/04/2026

NO DÍA INTERNACIONAL DO LIBRO
Para a celebración do 23 de abril, Día do Libro, dende a Penzol queremos dar a coñecer os libros da autoría Begoña Caamaño (Vigo, 1964- Santiago, 2014) ou sobre ela e a súa obra que están dispoñibles nos nosos depósitos.
Sumámonos tamén así ás celebracións do Día das Letras Galegas, este ano dedicado a ela.
Entre outras imaxes, reproducimos as cubertas das súas dúas novelas, onde reescribe dende unha ollada feminista coñecidos mitos clásicos, ‘Circe ou o pracer do azul’ e ‘Morgana en Esmelle’, publicadas en 2009 e 2012 por Editorial Galaxia, e, en castelán polo selo Mar Maior, recentemente reeditadas.
Tocante a obras aparecidas en 2026, incorporáronse á nosa biblioteca: ‘A nena que perdeu un zapato na lama. Begoña Caamaño no Calvario vigués (1954-1976)’ (Galaxia), de Ramón Nicolás; ‘Os fíos de Begoña. Pequena biografía de Begoña Caamaño’ (Xerais), de Eva Mejuto; ‘Bego e o mundo do revés’, de Iria Collazo (Galaxia); ‘Begoña Caamaño. O transgredir das ondas’ (Galaxia), de Paula Carballeira; ‘Begoña ou o pracer da amizade’, de Beatriz Maceda (Xerais); ‘Begoña Caamaño. Xornalismo para a cidadanía. De Vigo a Compostela’ de María Xosé Porteiro (Galaxia), e ‘Volveredes brindar por min. Unha biografía de Begoña Caamaño’, de Ana Romaní e María Xesús Nogueira, doadas polas dúas editoriais á nosa Fundación.
Nunha próxima entrada actualizaremos a relación, segundo vaian entrando novas achegas á nosa biblioteca.
Fotografía da escritora: Real Academia Galega

09/04/2026

NO ANO DE OTERO PEDRAYO (VI)
OBRA DIXITALIZADA NA FUNDACIÓN PENZOL

Ramón Otero Pedrayo legou o seu arquivo persoal á Fundación Penzol, ao que pertencen boa parte dos escritos orixinais que forman parte da súa obra. Con motivo da declaración de 2026 como Ano Oteriano e grazas á colaboración da Editorial Galaxia, propietaria dos dereitos da súa obra, dedicaremos ao longo deste 2026 sucesivas entregas a divulgar obra orixinal depositada no seu arquivo. Hoxe comezamos pola vertente máis lírica, ofrecendo para consulta poemarios, poemas soltos e prosa poética.
Pódese acceder a través de:
https://fondospenzol.vigo.org/portalArchivo/seleccionopac?action=inicio&OP=OP999&usr=consulta&PT=PT000001

06/04/2026

NO ANO DE OTERO PEDRAYO (V)
INAUGURACIÓN DA EXPOSICIÓN “RAMÓN OTERO PEDRAYO, 1888-1976”
O 31 de marzo celebrouse a inauguración da exposición biobibliográfica que a Fundación Penzol, coa colaboración da Cátedra Institucional Otero Pedrayo da USC, instalou no vestíbulo da súa sede, na Casa Galega da Cultura de Vigo. A exposición forma parte das actividades que ambas as entidades desenvolven con motivo da declaración de 2025 como Ano Otero Pedrayo, conmemorativo do 50 cabodano do seu falecemento.
No acto de inauguración interviron o presidente e o subdirector da Fundación, Manuel Puga e Xosé Manuel Dasilva; Dolores Vilavedra, codirectora da Cátedra Institucional Otero Pedrayo, e Olga Alonso, conselleira de Educación do Concello de Vigo.
A exposición, comisariada por Xosé Manuel Dasilva e Xosé Manuel Soutullo, estará aberta ao público ata o 14 de xuño.
A prensa recolleu de maneira destacada o acto. Velaí o enlace a algunhas crónicas:

https://www.lavozdegalicia.es/noticia/vigo/2026/04/01/penzol-conmemora-cunha-exposicion-50-cabodano-ramon-otero-pedrayo/0003_202604V1C69920.htm
https://www.atlantico.net/vigo/fundacion-penzol-saca-luz-legado_1_20260401-4221129.html
https://www.farodevigo.es/gran-vigo/2026/03/31/fundacion-penzol-descubre-tesoros-oterianos-128633065.html
https://www.facebook.com/photo?fbid=1515835583884626&set=pcb.1515836767217841

28/03/2026

NO ANO DE OTERO PEDRAYO (IV)
EXPOSICIÓN SOBRE RAMÓN OTERO PEDRAYO, 1888-1976
O vindeiro 31 de marzo, ás 11,30 horas, terá lugar a inauguración da exposición biobibliográfica que a Fundación Penzol, coa colaboración da Cátedra Institucional Otero Pedrayo da USC, instala no vestíbulo da súa sede, na Casa Galega da Cultura de Vigo. A exposición estará aberta ao público ata o 14 de xuño.
No acto participarán: Xosé Manuel Dasilva, subdirector da Fundación Penzol; Dolores Vilavedra, directora da Cátedra Institucional Otero Pedrayo da USC, e Manuel Puga Pereira, presidente da Fundación Penzol.
A exposición, que forma parte das actividades desenvolvidas pola nosa Fundación con motivo da declaración de 2025 como Ano Otero Pedrayo, é un percorrido da súa traxectoria vital, intelectual e académica. Ademais, en varias mesas-vitrina amósase unha selección de primeiras edicións das súas obras, acompañadas dos manucritos de dúas das súas novelas máis recoñecidas: Os camiños da vida e Arredor de si, ademais documentos e correspondencia con figuras importantes do galeguismo político e cultural. A Fundación Penzol custodia o seu arquivo, formado por milleiros de documentos, por desexo do propio Otero Pedrayo.

Dirección

Praza Da Princesa, 2
Vigo
36202

Página web

https://accesible-hoxe.vigo.org/movemonos/m_penzol.php?lang=gal#/

Notificaciones

Sé el primero en enterarse y déjanos enviarle un correo electrónico cuando Fundación Fermín Penzol publique noticias y promociones. Su dirección de correo electrónico no se utilizará para ningún otro fin, y puede darse de baja en cualquier momento.