Oromia Administration and Security Bureau

17/08/2026

Nagana Boqonnaa sammuuti jedhan Miseensotni ABO Shanee Goidiina Shawaa Lixaattii Karaa nagana galan.

Hagayya 11/ 2018(BBNO): - Godina Shawaa Lixaatti hojii nageenya mirkaneessuu tibbana gaggeeffamaa tureen miseensotni ABO Shanee 10 daandii nagaa filachuun qaamolee nageenyatti harka kennachuu isaanii Odeeffannoo waajjira Bulchiinsaa fi Nageenya godinichaarraa argameen hubachuun danda'ameera.

Miseensotni ABO Shanee kunneen daandii nagaa filachuudhaan hidhannoo guutuu waliin qaamolee Nageenyaatti harka kennachuun ibsameera. Miseensotni kun ergaa dabarsaniin daandiin nagaa Boqonnaa sammuuti kan jedhan yoo ta’u, kanneen maqaa qabsootiin bosona keessa socho’anis daandii nagaa filachuudhaan nageenyummaa hawaasa isaanii labsuu qabu jedhan. Dabalataanis loojistikiin diinaa 7 too'atamuu fi meeshaaleen waraanaa kilaashii 9, kaaznaa kilaashii 20, rasaasa kilaashii 231,boombii 2, uffata loltuu 1 fi hidhannoo mudhii 7 too'annoo seeraa jala ooluu Ittigaafatamaan waajjira Bulchiinsaaf Nageenya Godinichaa Obbo Muusee Fiixumaa ibsaniiru.

Obbo Muuseen akka jedhanitti qaamoleen hidhatanii bosonatti galuun nageenya hawaasaa booressan kamiiyyuu yaada geeddaratanii karaa nagaatti yoo hi dhufne tarkaanfiin Nageenya mirkaneessuu Cimee kan ittifuufu ta’uu ibsaniiru.

12/08/2026

Uummata keenya qormaata hedduu keessatti nufilateef bu’a qabessummaadhan hojjachuudhan gara badhadhinaatti ceesisuu qabna” Jeneraal Abbabaa Garasuu
Hagayya, 06/2018 (BBNO): - Uummata qormaataafi bu’aa ba’ii hedduu keessatti hojii misoomaafi hawaas-diinagdee hojjatameefi amantaa egeree nurratti horachuun nufilateef bu’a qabessummaadhan hojjachuun gara badhadhinaatti ceesisuu qabna jedhan Jeneraal Abbabaa Garasuu, Itti’aanaa Hoogganaan Biiroo Bulchiinsaafi Nagenya Oromiyaafi Durataa’an gamtaa Nageenyaa ergaa Konfaransii gamtaa Nageenyaa Kurmaana 4ffaa irratti hirmaattotaaf dabarsaaniin.
Konfaransicharratti gabaasa raawwii hojii paartii waggaa bara 2018 kan dhi’eessan Obbo Taammanaa Saahiluu akka ibsanitti, Paartiin Badhaadhina gama Siyaas-diinagdeefi hawasummaatiin qormaatilee keessatti injifannoowwan gurguddoo galmeessisee jira jedhan.
Misensotni gamtaa nageenyaatis ergama dachaa qabaniin, hojiiwwan nageenya mirkaneessuu, taateewwan gurguddoofi ayyaanotni uummataa Sadarkaa Naannoofi biyyaalessaatti Kabajaman hundi karaa nagaatiin akka kabajamaniifi filannoon Biyyaalessaa Marsaa 7ffaa karaa nagaaafi milkaa’inaan akka xumuramuuf gahee isaanii bahachaa turaniiru jedhan Obbo Geetuu Dandeessaa Itti’aanaan waajjira milishaa Oromoyaafi Ittigaafatamaan Siyaasaa gamtaa Nageenyaa.
Konfaransicharratti gabaasni raawwii hojii paartii Bara 2018, Karoorri bara 2019 gamtaa nageenyaafi Karoorri komishiinii Inispeekshinii dhi’aachuun mariin irratti gaggeeffameera.
Obbo Getaachoo Taammiraat, Ittigaafatamaan waajjira Kilaastara Nagaafi Haqaa gama isaanitiin milkaa’inni dam-daneessa hanga ammaatti hojii paartiifi mootummaatiin galmaa’e akkuma jirutti ta’ee hanqinoota jiran fooyyessuudhan bu’aa caaluu galmeessisuun hawaasa keenya gara nageenya waaraafi badhaadhinaatti ceesisuuf ciminaafi kutannoodhaan hojjaachuu qabna jechuun dhaamsa dabarsaniiru. Konfaransichi Karooraafi gabaasa dhi’aate sagalee guutuun mirkaneessuun xumurameera

07/08/2026

Gumiin dhaabbilee amantaa nagaa waaressuu keessatti gahee olaanaaa qabu jedhame.
Hagayya 01/2018 (BBNO):- Gumiin dhaabbilee amantaa nagaa waaressuu keessatti gahee olaanaaa qabaaachuu
Ittigaafatamaan Waajjira Bulchiinsaa fi Nageenya Magaala Naqamtee Obboo Abiyoot Kiisii marii Gumii dhabbilee amantaa magaalichatti gaggeeffame irratti dubbataniiru.
Mariin Kun Nageenya waaressuufi misooma Magaalichatti eegalame ittifuufsisuudhaaf gahee guddaa kan qabu ta'uusaa kan ibsan yoo ta'u,
Ittigaafatamaan siyaasa paartii Badhaadhina damee magaala Naqamtee Magaalichaa Obboo Gammachuu Galataa marii kanarratti yaada kennaniin, Paartiin Badhaadhinnaa Nageenya Waaraa fi misooma dam-daneessa mirkaneessuuf yeroo yeroon Dhaabbilee Amantaa waliin dhimmoota misoomaa, Nageenyaa fi Ijaarsa Biyyaa irratti qooda isaanii akka bahataniif xiyyeeffannoo fi qindoominnaan hojjatamaa jiraachuu ibsaniiru.
Akkasumas Ministeera nageenyaa irraa Ogeessa Feederaaliizimii fi Dimokiraasii kan ta'an Obbo Fiqaaduu Margaa fi Abbaa Adeemsa Hordoffii Odeeffannoo haala Nageenyaa Magaalaa Naqamtee Obbo Asaffaa Kabbadaa Sanada Mareef ta'u dhiyeessuudhaan Lammiilee jaalala biyyaa qabanii fi Safuu fi safeeffannaa beekan horachuun murteessaa ta'uu Miseensota gumii dhaabbilee amantaa fi qooda fudhattoota gara garaa wajjiin Mariin taasifamuu gabaasa Bulchiinsa Magaalaa Naqamtee irraa arganneen hubachuun danda'ameera

07/08/2026

Hojiin nageenya waaraa mirkaneessuu Bulchiinsa Magaala Adaamaatti bara 2018 hojjatamaa tura bu'a qabeessa ture jedhame
Hagayya 01/2018( BBNO):- Waajjirri Bulchiinsaaf Nageenyaa Bulchiinsa Magaalaa Adaamaa raawwii hojii bara 2018 gamaggamuudhaan, karoora hojii nageenyatiin Of danda'uu bara 2019 irratti mari'achuun kallattii kaa'eera.
Ittigaafatamaan Waajjira Bulchiinsaaf Nageenyaa Bulchiinsa Magaalaa Adaamaa ObboTaarraqany Tasfaayee akka jedhanitti raawwiin hojii nageenya mirkaneessuu magaalichaa bara 2018 bu'a qabeessa ture jedhaniiru. Obbo Taarraqany akka ibsanitti hojiin nageenya mirkaneessuu qindoomina qaamolee nageenyaafi hirmaannaa hawaasatiin magaalichatti hojjatamaa ture bu'a qabeessa ta'uusaa dubbataniiru.
Caasaaleen nageenyaafi hawaasni magaalichaa ammas akkum kanaan duraa magaalichatti nageenya waaraa mirkaneessuufi misooma magaalichaa deeggaruuf adda durummaan hojjachuu akka qaban Obbo Taarraqany dhaamsa dabarsaniiru. waltajjii gamaggama raawwiifi marii karooraa kanaan kutaalee magaalaafi aanalee bu'aa caalmaa qabu galmeessisaniif beekamtiin kennameera.

05/08/2026

“Aggaammii kamuu qolachuun nageenya fooyya’e waaressuuf qophii gahaan taasifameera”
- Komishinara Jeneraalaa Araarsaa Mardaasaa
Adoolessa 29,2018 (BBNO):- Aggaammii diinonni biyyattii kamuu taasisan qolachuun nageenya fooyya’e wareessuuf qophii gahaan taasifamuu Hogganaan Biiroo Nageenyaafi Bulchiinsaa Oromiyaa Komishinarri Jeneraalaa Araarsaa Mardaasaa ibsan.
Komishinarri Jeneraalaa Araarsaan turtii Kibxata darbe addatti Gaazexaa Bariisaa waliin taasisaniin akka jedhanitti, tuttuqaan saamichaa darbee darbee mul’atus nageenyi Oromiyaa yeroodhaa gara yerootti fooyya’aa jira.
Wixxirfannaan baandaafi diinonni biyya diiguuf akka biyyaattis ta’e Oromiyaatti taasisaa jiran abjuu ta’ee kan hafu malee yoomuu kan milkaa’u miti. Ilaalcha boodatti hafaafi fiixeetti ba’an Oromiyaa foxxoqsuufi Itoophiyaa afaaniifi aadaa tokkoo ijaaruun taasifamu yeroof nageenya booressuufi sochii misoomaa gufachiisa malee yoomuu ilaalcha mo’ataa hinta’u.
Waggaa haaraatti ummata buqqa’e qe’eetti deebisuufi haleellaa finxaaleyyii maqsuu ilaalchisee akka jedhanitti, Godina Shawaa Lixaa aanaalee akka Daannoo, Noonnoofi Jibaatifaatti akkasumas, Wallagga Bahaafi Horrroo Guduruu Wallaggaatti ummata buqqisuu kan eegale Shaneedha.
Aanaalee Jibaat, Noonnoofi Daannootti karra Shaneen saaqeen finxaaleyyiin karaa Itoophiyaa Giddugaleessaa seenuun buqqaatii ummataa dhaqqabsiisaniiru. Ammaan tana ummanni qe’eesaatti deebi’e akkuma jiru, kanneen qe’eesaaniitti hindeebine jiru.
Kanaafuu, naannolee ollaan walta’uun qaawwa mudate duuchuun ummata qe’eesaatti deebisuuf hojiin hojjetamaa jiru cimee ittifufa.
Horroo Guduruu Wallaggaafi Wallagga Bahaatti ummatarraa dursee meeshaa kan hiike Shaneedha. Finxaaleyyiin Faannoo irra deddeebiin ummatarratti riphanii haleellaa dhaqqabsiisan warra lafa Oromiyaa saamaa tureedha jedhan.
Ummanni Amaaraa duraan Oromiyaa keessa qubate garuu mootummaa deggaruun Shaneefi Finxaaleyyii Faannoorratti tarkaanfii fudhataa jiru jedhanii; faallaa kanaa Shaneefi Finxaaleyyiin Faannoo poolisii Oromiyaa ummata baraaruuf birmatu walta’uun waraanaa turuus yaadachiisaniiru.
Gaaffii, boora’uu nageenyaa keessatti gaheen qaamoleen nageenyaa akkamiin ibsama jedhuuf oggaa deebii kennan, milishaa dabalatee qaamoleen nageenyaa nageenya waaressuuf guyyaa guyyaatti aarsaa kaffalaa jiru.
Garuu ammoo, ummanni mootummaafi qaamolee nageenyaarraa akka amantaa dhabuufi qaama nageenya waaressuuf aarsaa kaffalu maqaa balleessuuf ololli hafarfamu bal’aadha. Kana jechuun qaamoleen nageenyaa dantaa dhuunfaaf bakka lama dhaabatan hinjiran jechuu miti jedhanii; muraasa ta’anis qaamolee rakkoo qaban eeruu ummataatiin adda baasuun hojiin tarkaanfii fudhachuu eegalame cimee akka ittifufu hubachiisaniiru.
Qabsoon bosonaa amma taasifamaa jiru ummata saamuufi hiraarsuun qabeenya horachuuf ta’uu dubbatanii; marii ummata waliin taasifameen qabeenyasaa eenyu akka saame ibseera. Mootummaanis eeruu ummataarratti hundaa’uun qabeenya Shaneefi Seeliin isaanii ummata saamuun horate to’annaa jala oolchaa jiraachuu Komishiinar Araarsaan ibsa addatti gaazzexaa bariisaaf kennaniin ibsaniiru.

05/08/2026

Godiinaalee Shawaa Lixaafi Wallagga Bahaatti Miseensotni Shanee 8 ta'an daandii nagaa filachuun qaamolee nageenya mootummaatti harka kennatan

Adoolessa 28, 2018(BBNO): - Godiinaalee Shawaa Lixaafi wallagga Bahaatti Miseensotni ABO Shanee 8 ta'an daandii nagaa filachuun qaamolee nageenya mootummaatti harka kennachuu isaanii Odeeffannoon waajiraalee Bulchiinsaafi nageenya godiinota kanneen irraa argame ni ibsa.

Akka odeeffannoon argame ibsutti godiina shawaa Lixaatti Miseensotni ABO Shanee 5 karaa nagaatiin hidhannoo guutuu waliin harka yoo kennatan,1 irratti tarkaanfii fudhachguun 1 too'atameera. Dabalataanis dabballee, loojistiksiifi seeliin diinaa 20 ta'an too'atamuu odeeffannoon waajira Bulchiinsaafi nageenya Godiina Shawaa Lixaa irraa argame ifoomseera.

Haaluma walfakkaatuun godiin Wallagga Bahaattis Miseensotni ABO Shanee 3 daandii nagaa filchuudhan hidhannoo guutuu waliin qaamolee nageenyaatti harka kennachuu isaanii hubatameera

30/07/2026

Godiina Shawaa kaabaatti tarkaanfiin Diinarratti fudhatamu cimee ittifufaa jiraachuun ibsame.

Adoolessa, 23/2018 (BBNO):- Godiina Shawaa kaabaatti tarkaanfiin Diinarratti fudhatamu cimee ittifufaa jiraachuu waajjirri Bulchiinsaafi Nageenya godiinichaa ibseera.

Ittigaafatmaan waajjirichaa Obbo Araarsaa Nagaasha akka ibsanitti oppireeshinii qindaa’aa qaamolee nageenyaatiin aanaa Waacaalee ganda Gabreelii Guutootti gaggeeffameen Miseensota ABO Shanee 17 ta’an irratti tarkaanfiin fudhatameera jedhan.

Oppireeshinii gaggeeffame kanaan meeshaaleen waraanaa Kilaashii 14 fi hidhawwoowwan adda addaa diinni ittifayyadamaa tures too’atamuu isaa Obbo Araarsaan ibsuudhaan tarkaanfiin nageenya mirkaneessuu godiinichatti gaggeeffamaa jiru kun ammas qindoomina qaamolee nageenyaafi hirmaannaa hawaasatiin cimee kan ittifufu ta’uusaa ibsaniiru.

22/07/2026

Godiina Shawaa Lixaatti hojiin nageenya mirkaneessuu qindoomonaan ittifufaa jira.

Adoolessa, 15/2018(BBNO):-Godiina Shawaa Lixaatti hojiin nageenya mirkaneessuu qindoomonaan ittifufaa jiraachuu waajjirri Bulchiinsafi nageenya godiinichaa beeksisera.

Ittigaafatamaan waajirichaa Obbo Muusee Fiixumaa akka ibsanitti godiinichatti hojiin nageenya mirkaneessuu qindoomina qaamolee nageenyaafi hirmaannaa hawaasatiin ciminaan hojjatamaa jira jedhaniiru.

Hojii qindoominaan hojjatamaa jiru kanaanis guyyaa har'aa miseensotni ABO Shanee 10 meeshaalee waraanaa Kilaashii 7, Bireenii 1, Bodat hafaa 1, rasaasa adda addaa 178fi hidhannowwan garagaraa waliin karaa nagaatiin qaamolee nageenyaatti harka kennachuu isaaniifi dabbaleefi seeliin diinaa 12 ta'anis too'atamuu isaanii Obbo Muuseen ibsaniiru.

Hojiin nageenyafi ol'aantummaa seeraa mirkaneessuu godiinichatti gaggeeffamaa jiru caalmatti cimee kan ittifufu ta'uusaafi ammas daandiin nagaa banaa waan ta'eef miseensotni shanee maqaa qabsootiin bosonatti hafan karaa nagaatiin akka galan Obbo Muuseen waamicha dabarsaniiru.

22/07/2026

“Biqiltuun Har’a dhaabnu abdii dhaloota Egereefi gaaddisa Nagaati”
Sagantaan ‘Ashaaraa magariisaa’ Itoophiyaa keessatti, bara 2011 A.L.I Muummee Ministiraa Dr. Abiy Ahimadiin kan jalqabame yoo ta’u, kaayyoon isaatis Jijjiirama qilleensaa dandamachuu, manca'iinsa bosonaa ittisuu, lafa miidhame deebisanii misoomsuu, eegumsa biyyoofi bishanii guddisuu, haguuggii bosona biyyattii dabaluufi birmadummaa wabii nyaataa mirkaneessudha.
Jijjiiramni qilleensaa sadarkaa idil-addunyaatti wagga waggaan dabalaa dhufe biyyaafi naannoo keenyattis haalum wal fakkaatuuun dhiibbaa uumaa jiraachuun isaa beekamaadha. Sababa kanaan waggoottan darbanitti sadarkaa biyyaafi naannoo keenyaatti roobni yeroo isaa hin eegne uumamuudhan hongeefi lolaan darbee darbee uumamu miidhaa hawaas-diingdee geessisaa tureera. Rakkoo kana furuudhafis duulli sagantaa Ashaaraa Magariisaa Bara 2011 eegalame bara baraan biqiltuuwwan gosa adda addaa Biiliyoonan lakkaa’aman dhaabudhaan hanga ammaatti ittifufee jira.
Sagantaan Ashaaraa Magariisaa Mummicha ministeeraan eegalame kun sadarkaa biyyaalessaafi naannoo keenyattis qaamolee hawaasaa garaagaraa, kanneen akka dhaabbilee mootummaa, manneen barnootaa, abbootii qabeenyaafi aambasaadaroota biyyaa alaa dabalatee deeggarsa ol’aanaa argachuudhan hanga bara 2017tti biqiltuun biiliyoona 20 ol ta’u dhaabachuu isaa ragaaleen jiran ni mul’isu.
Sochii kanaan Itoophiyaanonni miliyoonaan lakkaa'aman hojii biqiltuu dhaabuu keessatti hirmaachaa jiru. Akka ragaan dhaabbata mootummoota gamtoomanii ibsutti Sagantaan Kun jijjiirama qilleensaa hir'isuu qofa osoo hin taane, hubannoofi kaka’uumsa uummaanni biqiltuu dhaabuu irratti qabus jajjabeessaa jira.
Caasaleen nageenyaa naannoo keeynatis sagantaa ashaaraa magariisaa waggaa waggaan gaggeeffamaa jiru kana keessatti gama tokkoon nageenya waaraa mirkaneessaa gama biraatiin immoo biqiltuu miiliyoonaan lakkaa’amu dhaabudhaan seenaa dhalootaa dhalootaatti darbu kana adda durummaadhan raawwachaa jiru. Biqiltuun har’a dhaabnu abdii dhaloota egereefi gaaddisa nagaa waan ta’eef hirmaannaafi gumnmaacha gama kanaan qabu kan kanaan duraa caalaa cimsuudhaan itti fufuu qabna. Uuummaanni Oromoo biqiltuu dhaabuun ilmoo guddisuudha akkuma jedhu, bara kanas Mootoo ykn dhaadannoo “Abdii haa dhaabnu” jedhuun dhaabbiin biqiltuu ashaaraa magariisaa kana eegalame yoo ta’u hooggansiifi hojjattootni Biiroo Bulchiinsaafi Nageenya Oromiyaatis dhaabbii biqiltuutiif qophii gahaa taasisaniiru. Caasaa nageenyaa sadarkaan jiru hundis akkuma kanaan duraa nagaafi nageenya naannoo keenyaa qindoomina cimaafi hirmaannaa hawaasaa hoo’adhaan eegsisuun akkuma jirutti ta’ee, sagantaa ashaaraa magariisaa keessattis gumaacha isarraa eegamu akka bahatu carraa kanaan dhaamsa keenya dabarsina.

“Abdii haa dhaabnu”
Biiroo Bulchiinsaafi Nageenya Oromiyaa
Adoolessa 2018, Finfinnee

20/07/2026