Doba woreda Communication Office

31/03/2026

Aanaa Doobbaatti Boba'aa Seeraan Alaa To’atame
*************&
Bitootessa 22/2018 – Godina Harargee Lixaa, Aanaa Doobbaatti boba'aa seeraan alaa imalaa ture banzilaa litira 1,800 ta’u, qarshii (243,000) tti shallagamu to’atameera.

Boba'aa kun halkan irraa sa’aatii 9:00 irratti konkolaataa lakkoofsa gabatee 75802 (OR) irratti, sakatta’iinsa keellaa Hadasitti taasifameen qabamuu isaa Waajjirri Poolisii Aanichaa beeksiseera.

Ittigaafatamaan Ittisa Yakkaa Inispeektara Yoyanis Sammuu akka jedhanitti, daldalli seeraan alaa boba’aa dabalatee sochiiwwan akkanaa irratti hawaasni of eeggannoo cimaa akka godhu fi mootummaa waliin tumsee akka hojjechuu qabu dhamaniru.

⚠️ Daldalli Seeraan Alaa Galii mootummaa hir’isa, misooma biyyaas gufachiisa

Daldallii Seeraan Alaa Nageenya hawaasaa irratti balaa uuma
Daldallii Seeraan Alaa Carraa hojii seeraan uumamu hir’ise
Dinagdee biyyaarratti dhiibbaa hamaa geessisa kanafuu walin qindomine daldalaa Seeraan Alaa haa ittisnuu.
Waajjira Poolisii Aanaa Doobbaa
Kominikeeshinii Aanaa Doobbaa

25/03/2026

24/03/2026

Aanaa Doobbaatti Kaadhimamtoota Filannoo Biyyaalessaa Marsaa 7ffaa Naannoo Filannoo Doobbaa Ifomee jira
************
Bitootessa 15/2018-:Godina Hararghee Lixaa Aanaa Doobbaatti Kaadhimamtoota
Paarlamaa fi Miseensaa caaffee oromiyaa Aanichaa bakka Bu'an Miseensaaf ifoomee jira.

Bakka Bu'oota Aanichaa
1. Kabajamoo Obbo Juhar Mahammad Abdullaa Paarlaamaa
2. Kabajamoo Aaddee Haakkima Zakkariyyaa Bakka Bu'aa Caffee
3. Kabajamoo Obbo Ahamad Imaam Bakka Bu'aa Caffeef
4.Kabajamoo Aaddee Saartuu Jamaal Abdullaa Bakka Bu'aa Caffee !!

18/03/2026

18/03/2026

Ayyaanni Iid-Al-faxir waggaa 1447ffaan Jimaata kabajama.

Addeessi Shawaal har'a waan hin muul'anneef Ayyaanni Iid Al Faxir Bitootessa 11, 2018 kabajama.

Addeessi har’a waan hin mul’anneef Ayyaanni Iid-Al Faxir waggaa 1447ffaan Jimaata akka kabajamu ibsame.

16/03/2026

Aanaa Doobbaatti Sagantaan Afxiraa Mana Jireenyaa Ittigaafatamaa Paartii Badhaadhina Damee Aanaa Doobbaatti gaggeeffame.
***
Bitooteessa 7,2018-: Godina Harargee Lixaa Aanaa Doobbaatti Sagantaa Afxiraa Mana jireenyaa I/G Paartii Badhaadhina Damee Aanaa Doobbaa Obbo Muzayyaan Kamaalitti Ji'aa sooma Ramadaanaa sababeeffachuun sagantaan Afxiraa gaggeeffameera.

Sagantaan kun yeroo Ramadaanaa keessatti waliif yaaduu, jaalalaa fi tokkummaa hawaasaa cimsuuf kan qophaa’e ta’uu ibsameera. Hirmaattoonni sagantichaas Afxaraan akkasii walitti dhufeenya hawaasaa cimsuun waliin jireenya nagaa fi tokkummaa jajjabeessuuf gahee guddaa qaba jedhaniiru.!!!

Ziyaaraan Ziyaadaa .!!!
Gara Biyya Fakkeenyummaatti.
Kominikeeshinii Aanaa Doobbaa

14/03/2026

“Oromiyaan sochii misoomaa walirraa hincinne keessa jirti”
Obbo Hayiluu Addunyaa
****************
Qophii filannoo biyyaalessaa marsaa 7ffaa, haala nageenyaafi misoomaa Oromiyaa keessa jiru ilaalchisuun turtiin Gaazexaan Bariisaa Kibxata darbe Hogganaa Biiroo Kominikeeshinii Oromiyaa Obbo Hayiluu Addunyaa waliin taasise akka armaan gadiitti dhiyaateera.

Mootummaan filannoon biyyaalessaa marsaa 7ffaa karaa dimokraatawaa, haqaqabeessaafi nagaan akka geggeeffamuuf xiyyeeffannaan hojjetaa jira.

Paartiin Badhaadhinaa akka paartii biyya bulchaa jiruufi dorgomaa tokkootti kaadhimamtoota galmeessisuun, galmeessi filattootaa eegalames akka milkaa’uuf hojjetaa jira. Sadarkaa maanifeestoo keenya beeksisuurratti argamna.

Waggoota shanan darbanitti waadaa maalii galle, maal raawwanne? Waggoota shanan dhufaniif ammoo yoo ummanni sagalee nuu kennee mootummaa taane, waadaa akkamii raawwanna? karoora akkamii baafanna jedhu dhiyeessinee hojjechaa jirra.

Nageenyaan walqabatees haalli mijataan filannicha geggeessuu dandeessisu uumamuuf hojjetaa jirra. Filannicha milkeessuuf hojiin nageenya mirkaneessuu bakkawwan hundatti raawwatamaa jira.

Filannoo baranaa haala kan marsaa 6ffaa irraa adda ta’een geggeessuuf qophii xumurree hojii duula nafiladhaatti galaa jirra.

Oromiyaatti paartiileen morkattootaa 21 ta’an filannoo biyyaalessaa marsaa 7ffaaf kaadhimamtootasaanii dhiyeessaniiru. Filannoon baranaa hirmaannaa kaadhimamtootaatiinis yoo ilaalle kan marsaa 6ffaa nicaala.

Filannicha dimokraatawaafi nagaqabeessa taasisuuf rakkoolee paartiilee mudachuu danda’an karaa mana maree paartiilee siyaasaa furaa kan deemnu ta’a.

Paartii biyya bulchaa jiruufi morkattoota gidduu walmorkiifi tumsi madaalasaa eege akka jiraatuuf hojjetamaa jira. Kana jechuun dhimmoota biyyaalessaafi nageenyaarratti waltumsina, dhimma imaammataarratti ammoo waldorgomna jechuudha.

Biyya jabduu ijaaruun kan danda’amu yoo aadaa siyaasaa keenya gara kanatti fidneedha jennee sochii bal’aa taasisaa jirra.

Akka dhiibbaa uumtummaan Itoophiyaa Gaanfa Afrikaatti hinmul’anneef diinonnishii tasgabbii ishee dhowwuufi mul’atasheerraa maqsuuf socho’aa turaniiru. Sochiin sun bifasaa jijjiirratee ammas ittifufeera.

Adeemsa ijaarsa biyyaarratti waliigalteen biyyaalessaa uumamuu dhabuun idaa kaleessa dhaallerraa ka’uun, diinonni ajandaa sabaafi saba, amantaafi amantaa walittibuusu qabatanii akka biyyattiin hintasgabboofne taasisuu barbaadan yeroo gara garaatti dhiibbaawwan adda addaa taasisaa turaniiru.

Itoophiyaan garuu dhiibbaawwan taasifamaa turan dandamachuun ijaarsa hidha haaromsaa guddicha xumurteetti.

Ajandaan Itoophiyaa inni ittaanu ulaa galaanaati. Biyyattiin ulaa galaanaa karaa hinmalleen dhabde karaa dippilomaasiifi nagaatiin argachuuf sochiirra jirti.

Diinonnishii sochii kana danquuf hojmaneewwan kennaafii walitti bu’iinsa uumuuf socho’u.

Humnoonni ykn baandonni bitamanii ajandaa alagaa milkeessuuf Itoophiyaa keessa socho’anis jiru.

Isaan kunniin finxaaleyyii sabaafi amantii dahoo godhachuun walfixiinsa sabaa uumuun biyyattii tasgabbii dhorkuuf socho’aniidha.

Finxaaleyyiin ‘Faannoo’ Godinaalee Wallagga Bahaafi Horroo Guduruu Wallaggaatti ummata nagaarratti xiyyeeffatee badii raawwachaafi buqqisaa, mana gubaa, daa’immaniifi haadholii ajjeesaa tureera.

Finxaalessi murna ajjeechaa suukkanneessaa raawwatee bu’aa siyaasaa argachuuf socho’uudha.
Bifuma walfakkaatuun finxaalessi Afaan Oromoo dubbatu, Shaneenis walittibu’iinsa sabaa uumuuf ummata nagaarratti xiyyeeffatee ajjeechaa suukkaneessaa raawwachaa ture.

Mootummaan ummata waliin ta’uun akka murni badii sun gara nagaatti deebi’uuf waamicha nageenyaa taasisuudhaan namoonni hidhannoo qabatanii socho’aa turaniifi kumaatamaan lakkaa’aman gara nagaatti akka deebi’an taasiseera.

Murnoota ajandaa badii raawwachuuf socho’anirratti ammoo tarkaanfii fudhatee olaantummaa seeraa kabajchiisaa jira.

Mootummaan naannichaa finxaalessa Shaneerratti tarkaanfii olaantummaa seeraa mirkaneessuu fudhachaa jira.

Namoota qe’eefi qabeenyasaaniirraa buqqa’an ammoo deebisee dhaabuuf deggarsaafi marii hawaasaa taasisaa jira.

Mootummaan naannichaa murnoota ergama diinotaa fudhatanii socho’an, finxaaleyyii Faannoofi shororkeessaa Shanee irratti tarkaanfii fudhachuun hariiroo hawaasummaafi obbolummaa ummattootaa cimsuuf hojjechaa jira.

Nageenyaafi tasgabbii naannichaa caalaatti mirkaneessuuf mootummaan yoomiyyuu caalaa xiyyeeffannaan ummata waliin ta’ee hojjechaa jira.

Mootummaan naannoo Oromiyaa hojii misoomaa daqiiquma tokkoofillee addaan kutee hinbeeku.

Hojiileen misoomaafi ijaarsi pirojektootaa sababa rakkoo nageenyaatiin danqamanis hinjiran.

Daaw’annaa hojiilee misoomaafi ijaarsa pirojektootaa Ministirri Muummee Doktar Abiyyi Ahmad dhiyeenya kana godinaalee Wallaggaa sadanitti taasisan kanaaf ragaadha.

Godina Qellem Wallaggaatti inisheetiivoonni hojiirra oolaa jiru. Godina Wallagga Lixaatti pirojektoonni guguddoon mootummaa federaalaatiin hojjetamanii xumuramanii eebbaaf qophaa’aa jiru.

Godina Wallagga Bahaattis pirojektoonni ijaarsisaanii xumurameefi hojjetamaa jiran jiru.

Mootummaan naannichaa harka tokkoon hojii nageenya mirkaneessuu harka biraan ammoo hojii misoomaa hojjechaa jira. Omishaafi omishtummaan Oromiyaas yeroo gara yerootti dabalaa jira.

Yeroo ammaa godinaalee Oromiyaa hundatti lafti hektaara miliyoona afur qamadii bonaatiin misoomeera.

Hojichi nageenyaafi misooma naannichaa mirkaneessuu faana adeemsifamaa jira. Omishniifi sadarkaan qulqullina buna naannichaa gabaa addunyaaf dhiyaatus waggaa waggaan dabalaa jira.

Hojiin ijaarsa pirojektootaas yeroo qabameef keessatti akka xumuramaniif hordoffiifi to’annoon barbaachisu taasifamaa jira.

Waliigalaan, olola miidiyaa hawaasummaarra jiru utuu hintaane goleewwan Oromiyaa hundi misoomarra jiru. Dh.P.I

14/03/2026

Aanaa Doobbaatti Leenjii Paakeejjii Qonnaa Arfaasaa fi Gannaa Ogeessota Misoomaaf Kennama turee Xumurame
************************
Bitooteessa 5, 2018 –: Godina Harargee Lixaa Aanaa Doobbaatti Waajjirri Qonnaa fi Lafa Aanaa Doobbaa leenjii paakeejjii qonnaa Arfaasaa fi Gannaa irratti xiyyeeffate ogeessota misoomaa gandaafi itti-aantota bulchaa gandaatiif guyyaa afuriif kennaa ture xumuramee jira

Leenjichi dandeettii ogeessota misoomaa qonnaa cimsuun teeknooloojii qonnaa haaraa lafa qabsiisuufi hojii ekisteenshinii qonnaa cimsuuf kan qophaa’e ta’uu ibsameera.

Hirmaattonni leenjii kanaa yaada isaanii kennaniin akka jedhanitti, leenjichi dandeettii isaanii guddisuuf akkasumas hojii isaanii sirnaan raawwachuuf beekumsa barbaachisaa ta’e akka isaaniif dabale himaniiru. Beekumsa argatan kanas gara iddoo hojii isaanii deebi’anii hojii irraa olchuun hojiitti hiikuuf qophii ta’uu isaanii ibsaniiru.

Itti-aanaan Bulchaa fi Itti-gaafatamaan Waajjira Qonnaa fi Lafa Aanaa Doobbaa Obbo Darajee Tamiiraat saganticha irratti argamuun kallattii hojii fuulduraa kennan Akka jedhanitti Ogeessoonni misoomaa qonnaa leenjii kana fudhatan gara iddoo hojii isaanii deebi’anii qonnaa Arfaasaa bara kanaaf xiyyeeffannoo guddaa kennuun hojjechuu, teeknooloojii qonnaa haaraa lafa qabsiisuu, inisheetiivoota qonnaa garaagaraa fayyadamummaa hawaasaa mirkaneessan hojiirra oolchuu akkasumas hojii eegumsa biyyee fi bishaanii fi kunuunsa qabeenya uumamaa irratti xiyyeeffannoo guddaa kennuun hojjechuu akka qaban dhaamsa dabarsaniiru.

Leenjii paakeejjii qonnaa Arfaasaa fi Gannaa sadarkaa Aanaa irratti kenname kun sadarkaa gandaatti kan kennamu ta’uu ibsameera.

Kominikeeshinii Aanaa Doobbaa.

08/03/2026

Miseensonni Mana Maree Bakka Bu’oota Ummataa Paarlaamaa fi Caffee Oromiyaa Hawaasa Magaalaa Gooroo Kanniisaa Waliin Mari’atan
*****,***********************
Guraandhala 29, 2018: Godina Harargee Lixaa, Aanaa Doobbaatti miseensonni Mana Maree Bakka Bu’oota Ummataa Paarlaamaa Federaalaa fi Caffee Oromiyaa qaamolee hawaasaa Magaalaa Gooroo Kanniisaa waliin marii gaggeessaniiru.

Maricha irratti miseensi Mana Maree Bakka Bu’oota Ummataa Paarlaamaa Federaalaa Kabajamoo Obbo Juhar Mahammad, akkasumas miseensonni Caffee Oromiyaa Kabajamoo Obbo Ahmad Imaam, Aaddee Hakimaa Zakkariyyaa fi Aadde Mardiyaa Jamaal argamaniiru.

Mariin kun rakkoolee uummanni mudachaa jiru, akkasumas hojiiwwan mootummaa sadarkaa aanaa fi gandaatti hojjatamaa jiran maal akka fakkaatan ilaaluun gaggeeffame. Akkasumas hanqinoota jiran adda baasuun furmaata itti kennuuf yaada wal jijjiiruun taasifameera.

Hawaasni gandoota baadiyyaa sagal fi jiraattonni Magaalaa Mana Qopheessaa Guddattuu Gooroo Kanniisaa marii kana irratti hirmaachuun gaaffii, yaada fi komii isaanii dhiyeessaniiru. Bakka bu’oonni uummataas gaaffii hawaasaa dhaggeeffachuun deebii fi ibsa kennaniiru.

Bakka bu’oonni marii kana irratti hirmaatanis gaaffiin uummanni qabu karaa sirrii ta’een akka deebii argatu, akkasumas itti quufinsi fi abdii uummanni Paartii Badhaadhina irratti qabu akka cimuuf amaanaa uummanni filannoo irratti isaanii kenne bahuuf akka hojjetan ibsaniiru.

Xumura marii kanaa boodas hoggansa Magaalaa Mana Qopheessaa Guddattuu Gooroo Kanniisaa waliin ta’uun hojiiwwan misoomaa adda addaa hojjatamaan daawwataniiru.

Kominikeeshinii Aanaa Doobbaa

07/03/2026

Aanaa Doobbaatti Miseensonni Mana Maree Paarlamaa fi Caffee Oromiyaa hojiilee misooma fayyadamummaa ummata mirkanneessan fi pirojektootaa garagaraa aanichaatti hojjataman daawwataniiru
*****************
Guraandhala 28/2018-:Godina Harargee Lixaa Aanaa Doobbaatti miseensonni Mana Maree Bakka Bu’oota Ummataa Paarlaamaa fi Caffee Oromiyaa hojii pirojektootaa fi inisheetiivota garaagaraa laga Karaabaa keessatti hojjatamaan daawwataniiru.

Daawwannaa kana irratti Kabajamoo Bakka Bu’aan Paarlamaa Obbo Juhar Mahammad, Kabajamoo Bakka Bu’aa Caffee Oromiyaa Obbo Ahmad Imaam, akkasumas Bakka Bu’aan Caffee Aanaa Doobbaa Aaddee Hakimaa Zakkariyyaa argamaniiru.

Daawwannaa isaanii keessatti keellaa fayyaa dhaloota 2ffaa Qarshii miliyoona 29 oliin ijaarame, riiqicha Gandaa Ifaa Baallam Qarshii miliyoona 40 oliin hojjatamaa jiru, akkasumas hojii misooma qamadii laga Karaabaa misooma jiru daawwataniiru.

Miseensonni mana maree kunneen hojiiwwan misoomaa naannawaa kana keessatti gaggeeffamaa jiran akka ciminaan itti fufan, yeroo murtaa’etti akka xumuraman fi uummataaf tajaajila gahaa akka kennan dhaamsa dabarsaniiru.

Hojiiwwan misoomaa akkanaa babal’achuun misooma aannichaa saffisiisuu fi jireenya uummataa fooyyessuuf gahee guddaa kan qabufi fayyadamummaa uummata mirkanneesuuf abdi kan namatti horu jedhaniiru.

Kominikeeshinii Aanaa Doobbaa