25/09/2026
ጤናማ እና አምራች ትውልድን ለመፍጠር፥መደበኛ የህፃናት ክትባት ላይ በትኩረት ሊ'ሰራ እንደሚገባ ተገለፀ። (መስከረም 15/2019፣ የባቲ ከተማ ጤና ጽ/ቤት)
የባቲ ከተማ አስተዳደር ጤና ጽ/ቤት ከቤዛ ፖስቴሪቲ ዴቨሌብመንታል ኦርጋናይዜሽን ጋር በመተባበር ላለፉት ሶስት ወራት የህፃናት ጤናን ለማሻሻል በቅንጅት የተሰሩ ዘርፈ ብዙ ስራዎችን አስመልክቶ በከተማ አስተዳደሩ የክትባት ግብረሃይል ተገምግሟል።
ተላላፊ የሆኑ በሽታዎችን ቀድሞ በመከላከል፥የህፃናት ጤናን ለማሻሻል አንድ ቁልፍ ተግባር የመደበኛ ክትባት ተደራሽነትን ማስፋት ሲሆን በከተማ አስተዳደሩ በፕሮግራሙ የተሰሩ ስራዎች ሪፖርት በአጋር ድርጅቱ የፕሮግራም አስተባባሪ ይማም ሙህዬ በኩል ቀርቦ ውይይት ተደርጎበታል።
ባለፉት ሶስት ወራት ውስጥ በዘርፉ ከተሰሩ ስራዎች መካከል፦ የፕሮግረሙን እቅድ ማቀድ እና ታላሚዎችን መለየት፣ ለጤና ባለሙያዎችና ለቀበሌ በጎ ፈቃደኞች አቅም በመገንባት ፈፃሚዎችን ማዘጋጀት፣ በክትባት አገልግሎትና ፍላጎት ዙሪያ የማህበረሰብ ውይይት ማካሄድ፣ በክትባትና ህፃናት ጤና ዙሪያ ለማህበረሰቡ ግንዛቤ መፍጠር፣ ክትባት ያላገኙ ህፃናትን ቤት ለቤት በመለየት ክትባት እንዲያገኙ ማድረግ፣ በክትባት ልንከላከላቸው የሚቻሉ በሽታዎች እና ሌሎች የህፃናትን ጤና የሚያሻሽሉ ተግባራት በሰፊው ተሰርተዋል።
መድረኩን የመሩት የባቲ ከተማ ከንቲባ እና የግብረሃይሉ ሰብሳቢ አቶ አብዱ አህመድ፤እስካሁን የተሰሩ ስራዎች አበረታች መሆናቸውን በመጥቀስ ጤናማ እና አምራች ትውልድን ለመፍጠር፥መደበኛ የህፃናት ክትባት ላይ በትኩረት ሊ'ሰራ እንደሚገባ ገልፀዋል።
የጤና ጽ/ቤት ሃላፊ መሀመድ እንድሪስ በበኩላቸው፥ፍላጎት ከመፍጠር ጀምሮ የጤና ባለሙያዎችንና የጎጥ ጤና መሪዎችን በማሰልጠን እንዲሁም በቋሚና ተንቀሳቃሽ የክትባት መርሃ ግብር አገልግሎቱን ተደራሽ በማድረግ በርካታ ልጆች ክትባት እንዲያገኙ ማድረግ መቻሉን አንስተዋል።
ለተግባሩ ውጤታማነትና ቀጣይነት የግብረሃይሉ አባላትና ሁሉም ባለድርሻ አካላት የበኩላቸውን ሃላፊነት መወጣት እንደሚገባ ተገልጿል።
የክትባት ግብረ ሃይሉ በከንቲባው የሚመራ ሲሆን የጤና፣ት/ት፣ሴቶችና ወጣቶች፣ገንዘብ ጽ/ቤቶች እና የመንግስት ኮሙኒኬሽን ሃላፊዎችን በአባላት የያዘ በመሆኑ የሴክተሮችን ቅንጅታዊ አሰራር ለማጠናከርና የብዝሃ ዘርፍ ተሳትፎን ለማሳደግ ጉልህ አስተዋጽኦ ይኖረዋል።
!
Bati Town Health Office
