South Wollo Zone High Court

30/10/2026

የደቡብ ወሎ ዞን ዳኞች አስተዳደር ንዑስ ጉባኤ የ2018 ዓ.ም አፈጻጸም ግምገማ እና የ2019 ዓ.ም እቅድ ትውውቅ መድረክ ተካሄደ⚖️
==============//============
ጥቅምት 20 ቀን 2019 ዓ.ም (ደሴ)

​የደቡብ ወሎ ዞን ዳኞች አስተዳደር ንዑስ ጉባኤ የ2018 ዓ.ም ስራ አፈጻጸም ግምገማ እና የ2019 ዓ.ም እቅድ ትውውቅ መድረክ አካሄደ።

​በመድረኩ ላይ የንዑስ ጉባኤ አባላት እና የወረዳ ፍርድ ቤት ፕሬዝዳንቶች የተገኙ ሲሆን፤ መድረኩን የደቡብ ወሎ ዞን ከፍተኛ ፍርድ ቤት ፕሬዝዳንት ወ/ሮ ትዕግስት ዳኛቸው በንግግር ከፍተውታል።

​የደቡብ ወሎ ዞን ዳኞች አስተዳደር ንኡስ ጉባኤ ጽ/ቤት ሃላፊ አቶ አላዩ አስፋው የ2018 ዓ.ም ስራ አፈፃፀም ሪፖርት እና የ2019 ዓ.ም እቅድን በዝርዝር አቅርበዋል።

​የመድረኩ ተሳታፊዎችም በቀረበው ሪፖርት እና እቅድ ላይ ጥያቄዎችን እና አስተያየቶችን ያነሱ ሲሆን፤ ውይይቱን የመሩት ወ/ሮ ትዕግስት ዳኛቸው እና አቶ አለዩ አስፋው ተገቢውን ምላሽ እና ማብራሪያ ሰጥተዋል።
​🏅 በመድረኩ ከ2014 ዓ.ም ጀምሮ በንኡስ ጉባኤ አባልነት ለረጅም አመታት ላገለገሉ እና ከአባልነት ለተሰናበቱ
​ አቶ አሊ ይማም ሁሴን እና
​ አቶ ደምስ እንድሪስ ይማም
የምስጋና የምስክር ወረቀት ተበርክቶላቸዋል።

​ሽልማቱን የከፍተኛ ፍርድ ቤቱ ፕሬዚዳንት ወ/ሮ ትዕግስት ዳኛቸው እና የደቡብ ወሎ ዞን ፍትህ መምሪያ ሃላፊ አቶ አብርሀም ሞላ አበርክተዋል።

​ክቡራን አቶ አሊ ይማም እና አቶ ደምስ እንድሪስ በአባልነት ቆይታቸው በሰጡት አገልግሎት ደስተኛ መሆናቸውን ገልጸው፤ ወደፊትም ባሉበት የስራ ሀላፊነት የፍትህ ስርአቱን መደገፍ እንደሚቀጥሉ አረጋግጠዋል፤ ለተሰጣቸው እውቅናም ምስጋናቸውን አቅርበዋል።

​ #ደቡብወሎ #ፍትህ #የዳኞችአስተዳደር #2018አፈፃፀም #2019እቅድ

29/10/2026

27/10/2026

ለወረዳ የባህል ፍርድ ቤት ፎካል ፐርሰኖች የተዘጋጀው የአሰልጣኞች ስልጠና ተጠናቀቀ።

ጥቅምት 17 ቀን 2019 ዓ.ም (ደሴ)

የደቡብ ወሎ ዞን ከፍተኛ ፍርድ ቤት ለወረዳ የባህል ፍርድ ቤት ፎካል ፐርሰኖች ያዘጋጀው የአሰልጣኞች ስልጠና መድረክ ተጠናቀቀ ።

በመጀመሪያው የስልጠና ቀን በመሰረታዊነት በባህል ፍርድ ቤቶች ማቋቋሚያ አዋጅ እና ማስተግበሪያ መመሪያ ላይ ትኩረት ያደረገ ሰፊ ስልጠና የተሰጠ ሲሆን በዛሬው እለት በተግባራዊ የስራ እንቅስቃሴ የገጠሙ ችግሮች በሰልጣኞች ቀርበው ሰፊ ውይይት ተደርጎባቸዋ ከተነሡ ጉዳዮች መካከልም
* የግንዛቤ ፈጠራ ስራ ማነስ
* የበጀት እጥረት
* የአጋር አካላት ድጋፍ ማነስ
* የማስቻያ እና የቢሮ እጥረት
* የፀሀፊዎች እና የሽማግሌዎች የጥቅማጥቅም ጥያቄዎች
* የፎካል ፐርሰኖች ግንኙነት መላላት
የሚሉት የሚጠቀሱ ሲሆን በተነሱት ጥያቄዎች ላይ ስልጠናውን በሰጡት የከፍተኛ ፍርድ ቤቱ ዳኛ እና የዞኑ የባህል ፍርድ ቤቶች ፎካል ፐርሰን አቶ ተስፋየ ከበደ እንዲሁም በደቡብ ወሎ ዞን ከፍተኛ ፍርድ ቤት ፕሬዝዳንት ወ/ሮ ትዕግስት ዳኛቸው በኩል ምላሽ እና ማብራሪያዎች ተሰጥተዋል ።

ስልጣኞችም በስልጠና ቆይታቸው በቂ ግንዛቤና ልምድ ማግኘታቸውን እና ስልጠናው የስራ ተነሳሽነት እንደፈጠረላቸው አስተያየታቸውን ሰጥተዋል ።

በመጨረሻም ፕሬዝዳንቷ ሰልጠኞች ወደ ወረዳዎቻቸው ሲመለሱ ሊተገብራቸው የሚገቡ የስራ አቅጣጫዎችን አጋርታው ስልጠናው በስኬት ተጠናቋል

26/10/2026

⚖️ የደቡብ ወሎ ዞን ከፍተኛ ፍርድ ቤት የባህል ፍርድ ቤት የአሰልጣኞች ስልጠና መስጠት ጀመረ ።

ጥቅምት 16 ቀን 2019 ዓ.ም (ደሴ)

​የደቡብ ወሎ ዞን ከፍተኛ ፍርድ ቤት ለወረዳ ፍርድ ቤቶች የባህል ፍርድ ቤት ፎካል ፐርሰኖች የአሰልጣኞች ስልጠና በደቡብ ወሎ ዞን ከፍተኛ ፍርድ ቤት የመሰብሰቢያ አዳራሽ መስጠት ጀመረ።

ከጥቅም 16-17 /2019 ዓ.ም ለሁለት ተከታታይ ቀናት የሚቆየውን የስልጠና መድረክ የደቡብ ወሎ ዞን ከፍተኛ ፍርድ ቤት ፕሬዝዳንት ወ/ሮ ትዕግስት ዳኛቸው በንግግር ያስጀመሩ ሲሆን፤ በንግግራቸውም ባለፈው በጀት ዓመት በዞኑ ወረዳዎች የባህል ፍርድ ቤት ዳኞችን በማስመረጥ፣ በማስልጠን ፣ ፍርድ ቤቶቹን በማቋቋም እና ወደ ስራ በማስገባት ረገድ ሰፊ እና ውጤታማ ስራ መሠራቱን ገልጸዋል።

​ፕሬዝዳንቷ አያይዘውም፣ የተቋቋሙት የባህል ፍርድ ቤቶች በአጭር ጊዜ ውስጥ በርካታ መዝገቦችን በመመርመር ጊዜና ወጭ ቆጣቢ፣ እንዲሁም ተደራሽ ዳኝነት የመስጠት ዓላማን በብቃት እያሳኩ መሆናቸውን ገልፀዋል።

የክልሉ ጠቅላይ ፍርድ ቤት የፍርድ ቤቶችን የ2018 ዓ.ም ስራ አፈፃፀም ገምግሞ ለፍርድ ቤቶቾች ደረጃን በሠጠበት ወቅትም እንደዞን በተመዘገበው መልካም ውጤት በባህል ፍርድ ቤቶች ረገድ የተሠራው ውጤታማ ስራ ከፍተኛ ድርሻን ማበርከቱን አውስተዋል።

​በአስቸጋሪ ሁኔታዎች ውስጥም ሳይበገሩ ቀበሌ ድረስ በመውረድ የባህል ፍርድ ቤቶችን ላቋቋሙ የወረዳ ፍርድ ቤቶችም ምስጋናቸውን አቅርበዋል።

​ሰልጣኞቹም በስልጠናው ቆይታቸው ንቁ ተሳትፎ በማድረግ እና ልምዳቸውን በመጋራት መድረኩን ውጤታማ እንደሚያደርጉት እምነታቸውን ገልጸዋል።

ስልጠናውን የከፍተኛ ፍርድ ቤቱ ዳኛ እና የዞኑ የባህል ፍርድ ቤቶች ፎካል ፐርሰን የሆኑት አቶ ተስፋዬ ከበደ በመስጠት ላይ ይገኛሉ።

​ #ፍትህ

24/10/2026

⚖️ የደቡብ ወሎ ዞን ከፍተኛ ፍርድ ቤት ማኔጅመንት የ2019 በጀት ዓመት የ1ኛ ሩብ አመት የስራ አፈፃፀም ሪፖርትን ገምግሟል ።

​ፍርድ ቤቶቻችን የተቋቋሙበትን የዳኝነት አገልግሎት ቀልጣፋ፣ ተደራሽ፣ ጥራት ያለውና የሕግ የበላይነት የሰፈነበት የማድረግ ዓላማ ከግብ ለማድረስ ባለፉት 3 ወራት በርካታ ስራዎች ተከናውነዋል።

​በዚህም መሰረት በዞናችን የተከናወኑ ዋና ዋና የስራ አፈፃፀም ውጤቶች ከዚህ በታች ቀርበዋል፦

​የዳኝነት አገልግሎት እና መዝገብ እልባት፡-

በዞኑ በከፍተኛ እና ወረዳ ፍርድ ቤቶች ከቀረቡ 18,482 መዛግብት ውስጥ 17,928 መዛግብት እልባት ለ መስጠት ታቅዶ፣ 12,440 መዛግብት እልባት እንዲያገኙ ተደርጓል።

​የቴክኖሎጂ ተደራሽነት digitalisation (ኢ-ፋይሊንግ): -

የዳኝነት አገልግሎቱን ለማዘመንና ወጪ ቆጣቢ ለማድረግ በተሰራው ስራ በከፍተኛ ፍርድ ቤት ብቻ 421 መዝገቦች በኢ-ፋይሊንግ (E-Filing) ለጠቅላይ ፍርድ ቤት ተልከዋል፤ ስማርት ኮርቶችም በስራ ላይ ይገኛሉ።

​አማራጭ የፍትህ ስርዓቶች (የባህል ፍርድ ቤቶች): -

ህብረተሰቡን ከከፍተኛ ወጪ እና ጊዜ ማባከን ለማዳን በ255 ቀበሌዎች በተቋቋሙ የባህል ፍርድ ቤቶች 494 መዝገቦች ቀርበው 361 መዝገቦች እልባት ያገኙ ሲሆን፣ ህብረተሰቡ 9,731,932 ብር ሊወጣው ከሚችለው ወጪ እንዲድን ተደርጓል።

​የነጻ ሕግ ድጋፍ (ተከላካይ ጠበቃ): -

ጠበቃ ማቆም ባልቻሉ እና በከባድ ወንጀል በተከሰሱ ተከሳሾች ላይ በተደረገ ድጋፍ ተገልጋዮች በግል ጠበቃ ቢይዙ ሊያወጡት የሚችሉትን 5,910,000 ብር ወጪ ማዳን ተችሏል።

​ተጋላጭ ክፍሎች ተጠቃሚነት፡ ለአካል ጉዳተኞች፣ አረጋውያን፣ ህጻናት እና ሴቶች ልዩ ትኩረት በመስጠት የቅድሚያ አገልግሎት አሰጣጥ ስርዓት ተዘርግቶ አገልግሎት ተሰጥቷል።

​የገቢ ማሰባሰብ፡ ከዳኝነት እና ከመቀጫ ገንዘብ ለመንግስት ገቢ የተደረገው ድምር 11,571,865.85 ብር ደርሷል።

​ተቋማችን ፍትህን ከህብረተሰቡ ጋር በማቀራረብ ረገድ አበክሮ እየሰራ የሚገኝ ሲሆን፣ በቀጣይም የአገልግሎት ጥራትንና ቅልጥፍናን ይበልጥ ለማሻሻል ርብርብ ይደረጋል።

​ #ዲጂታላይዜሽን

20/10/2026

18/10/2026

የኩታበር ወረዳ ፍርድ ቤት አላንሻ ቀጠና የባህል ፍርድ ቤት የሥራ ማስጀመር ፕሮግራም አካሄደ!
​📌 ኩታበር፤ ጥቅምት 8 ቀን 2019 ዓ.ም.
​የኩታበር ወረዳ ፍርድ ቤት ቀደም ሲል በምልመላ እና ሥልጠና ያዘጋጃቸውን የባህል ፍርድ ቤት ዳኞች ዛሬ ጥቅምት 8 ቀን 2019 ዓ.ም. ባለድርሻ አካላት በተገኙበት የሥራ ማስጀመር ፕሮግራም አድርጓል። ⚖️
​በመርሃ ግብሩም፦
🔹 ጠቅላይ ፍርድ ቤት ያዘጋጀውን የምስክር ወረቀት ለባህል ፍርድ ቤቱ በወረዳው ፍርድ ቤት ፕሬዚዳንት በኩል ተላልፏል።
🔹 ለሥራ የተዘጋጁ ኦፊሴላዊ ማህተሞች እና አስፈላጊ ቁሳቁሶች የማስረከብ ተግባር ተፈጽሟል።
​በዕለቱ የተገኙት የቀበሌ አስተዳዳሪ ለባህል ፍርድ ቤቱ አስፈላጊውን ትብብር ሁሉ እንደሚያደርጉ ገልጸው፣ ዳኞቹ ማህበረሰቡን በቅንነትና በታማኝነት እንዲያገለግሉ አሳስበዋል።
​በባህል ፍርድ ቤት ዳኞች በኩልም ማህበረሰቡን ከዕለት ተዕለት ውዝግቦች ነፃ በማድረግ በሰላም ለማገልገል ያላቸውን ጽኑ ቁርጠኝነት ገልጸዋል፤ እንዲሁም ለሥራው አስፈላጊ የሆኑ ግብዓቶች እንዲሟሉላቸው ጥያቄ አቅርበዋል። የወረዳ ፍርድ ቤት ፕሬዚዳንትም የቀረበውን ጥያቄ በመገምገም ተገቢውን ማብራሪያ በመስጠት መርሃ ግብሩ በጥሩ መንፈስ ተጠናቋል

12/10/2026

የደቡብ ወሎ ዞን ከፍተኛ ፍርድ ቤት የ2019 ዓ.ም የመደበኛ ችሎት ማስጀመሪያ መድረክ ተካሄደ ።

​ደሴ - ጥቅምት 2/2019 ዓ.ም

​በክረምት የዳኞች ዕረፍት ምክንያት በከፊል ዝግ ሆኖ የቆየው የደቡብ ወሎ ዞን ከፍተኛ ፍርድ ቤት ከዛሬ ጥቅምት 2 ቀን 2019 ዓ.ም ጀምሮ የ2019 ዓ.ም የዳኝነት አገልግሎቱን ሙሉ በሙሉ መስጠት መጀመሩን አስታወቀ።
​የፍርድ ቤቱ ሠራተኞች እና ጥሪ የተደረገላቸው እንግዶች በተገኙበት በሰንደቅ ዓላማ መስቀል ሥነ-ሥርዓት በተጀመረው የመደበኛ ችሎት ማስጀመሪያ መርሃ-ግብር ላይ፣ ፍርድ ቤቱ በ2018 በጀት ዓመት ያከናወናቸው አፈጻጸሞች በጥሩ ደረጃ ላይ እንደሚገኙ ተመልክቷል። የአማራ ክልል ጠቅላይ ፍርድ ቤት በክልሉ የሚገኙ ከፍተኛ ፍርድ ቤቶችን አጠቃላይ የሥራ አፈጻጸም አወዳድሮ ባወጣው ውጤት የደቡብ ወሎ ዞን ከፍተኛ ፍርድ ቤት 3ኛ ደረጃን ይዞ ማጠናቀቁ በመድረኩ በደስታ ተገልጿል።

​
​ መድረኩን በንግግር የከፈቱት የፍርድ ቤቱ ፕሬዚዳንት ወይዘሮ ትዕግስት ዳኛቸው ባደረጉት አጠቃላይ ንግግር፡-
​ * የተገኘው የ3ኛ ደረጃ እውቅና በአጋጣሚ የተገኘ ሳይሆን የዳኞች፣ የሠራተኞች እና የአጋር አካላት በቅንጅትና በትጋት መሥራት የተገኘ ውጤት መሆኑን ገልጸው፣ በ2018 በጀት ዓመት ፍርድ ቤቱ የቀረቡለትን መዝገቦች 83.4 በመቶ፣ የወረዳ ፍርድ ቤቶች ደግሞ 96 በመቶ ማጠናቀቃቸውን አብራርተዋል።

​* 2019 ዓ.ም የሥራ ዘመን እንደ “ሌላ የሥራ ዓመት” ሳይታይ የለውጥ፣ የሥራ ባህል ማሻሻያ እና የሕዝብ እምነት ማጠናከሪያ ዓመት እንዲሆን ጥሪ አቅርበዋል።

​* በ2018 በጀት ዓመት የነበረውን 71.37 በመቶ የተገልጋይ እርካታ ዳሰሳ መነሻ በማድረግ፣ በዘንድሮው ዓመት በተገልጋዩ ላይ የሚታይ ተጨባጭ ለውጥ ማምጣት እንደሚያስፈልግ አጽንኦት ሰጥተዋል።

​* ፍትሕን ተደራሽ ለማድረግ የባህል ፍርድ ቤቶችንና የማህበረሰብ ፍትሕ ሰጭ ማዕከላትን ማጠናከር፣ እንዲሁም የመዝገብ አያያዝንና አሠራርን በቴክኖሎጂ (ዲጂታላይዜሽን) ማዘመን የዘንድሮ ዓመት ዋና ዋና ትኩሮቶች መሆናቸውን ገልጸዋል።

​* የፍትሕ ሙያ ከሰው መብትና ከክብር ጋር የተያያዘ በመሆኑ ብቃት ብቻውን በቂ እንዳልሆነ፣ ከሥነ-ምግባር፣ ከታማኝነት እና ከተጠያቂነት ጋር መጣመር እንዳለበት አሳስበዋል።

​በመጨረሻም የመደበኛ ችሎቶችን በተሟላ ሁኔታ ለማስቀጠል የሚያስፈልጉ የሥራ አቅጣጫዎች በፍርድ ቤቱ የበላይ ሀላፊዎች ቀርቦ ውይይት የተደረገበት ሲሆን፣ የፍትህ ተቋም ሀላፊዎችም በቀጣይ የተጀመሩ የትብብር ስራዎችን አጠናክሮ ለማስቀጠል ያላቸውን ቁርጠኝነት ገልጸዋል።
በመድረኩ ማጠቃለያ ላይም ወ/ሮ ትዕግስት ዳኛቸው የ2019 ዓ.ም የመደበኛ ችሎት መጀመሩን በይፋ አብስረዋል።

​በ2019 ዓ.ም የተያዙ ዋና ዋና የትኩረት አቅጣጫዎች (መሪ ቃል)፦
​በቅንጅት እንሥራ!
​በቴክኖሎጂ እናዘምን!
​በአማራጭ ሥርዓት ፍትሕን ተደራሽ እናድርግ!
​በጥራትና በፍጥነት ፍትሕን እናስፍን!
​የሕዝብን እምነት እናጠናክር