28/08/2026
Shirkii Komishineerada Booliska iyo Madaxda Hay’adaha Amniga ee dalka ayaa ka qabsoomay Addis Ababa.
Waxaana shirka hoggaaminayay Taliyaha Guud ee Booliska Federaalka dalka, Komishineer General Demelash Gebremichael, waxaana ka qaybgalay Komishineerada Booliska dalka iyo masuuliyiinta hay’adaha nabadda iyo amniga dalka. Deegaanka Soomaalida waxaa shirka ka qaybgalay Hoggaanka Nabadgelyada DDS, Mudane C/qaadir Rashiid Ducaale, iyo Komishineerka Booliska DDS, Sarreeye Guud Cabdi Cali Siyaad.
Taliyaha Guud ee Booliska Federaalka Itoobiya ayaa sheegay in hay’adaha amniga dalku ay dhiseen awood hay’adeed oo u saamaxaysa inay ilaaliyaan nabadda iyo amniga guud ee dalka. Wuxuna intaas kudaray in hay’adaha amnigu ay ka hortageen qorshayaal iyo falal ay soo maleegeen kooxo abaabulan oo argagixiso iyo isugu jira cadawga gudaha iyo dibaddaba, taas oo muujisay awoodda dalka ee ilaalinta amniga. Waxa kale oo uu xusay in wada-shaqaynta iyo isku-duubnimada hay’adaha amniga ay door muhiim ah ka qaadatay in si nabad ah oo guul leh lagu soo gabagabeeyo munaasabado heer qaran iyo caalami ah oo dalka ka dhacay. Taliyaha ayaa sidoo kale sheegay in hay’adaha amnigu door muhiim ah ka qaateen sidii Wadatashiga Qaran ee dalku sida nabadgalyada ah ugu soo dhamaaday. Dhinaca kale, wuxuu sheegay in la diyaariyey qorshe istiraatiiji ah oo lagu xaqiijinayo amniga munaasabadaha waaweyn ee dalka ka dhacaya xilliyada soo socda, ee ay ka midka yihiin Sannadka Cusub ee dalka, ee Meskel, Irreecha iyo munaasabada dhismaha dowladda.
Madasha ayaa sidoo kale lagu adkeeyay in hay’adaha amnigu, iyagoo kaashanaya shacabka, ay sii xoojiyaan ka hortagga falalka wax udhimaya midnimada bulshada, hurinta khilaafaadka qowmiyadeed iyo diimeed, iyo faafinta wararka been-abuurka ah iyo dacaayadaha, iyadoo xoogga la saarayo ilaalinta kala dambaynta iyo sarreynta sharciga
