Xafiiska Qorshaynta iyo Horumarinta Dhaqalaha DDS

20/08/2026

Kulanka Wadatashiga iyo U Diyaargarowga Qorshaha Sanadka 2019 iyo Dhammaystirka Qorsheyaasha Horumarka ayaa ka furmay madasha shirarka ee Xafiiska kuwas oo kala ah

1-Diyaarinta Qorshe-hawleedka S.M. 2019

Diyaarinta qorshe-hawleedka sanadka 2019 S.M. oo ku beegan sannadka koowaad ee muddada doorashada 7aad. Qorshahan ayaa saldhig muhiim ah u noqonaya hirgelinta qorshaha iyo barnaamijka horumarineed ee shanta sano ee soo socda, iyadoo la waafajinayo mudnaanta, baahiyaha iyo himilooyinka horumarineed ee Deegaanka.

2-Dhammaystirka Qorshaha Horumarinta iyo Maalgelinta Deegaanka Soomaalida (2018–2022 S.M.)

Dhammaystirka iyo sixidda Qorshaha Horumarinta iyo Maalgelinta Deegaanka iyadoo la hubinayo in qorshuhu si cad uga tarjumayo mudnaanta horumarineed, baahiyaha bulshada, fursadaha maalgelinta iyo yoolalka istiraatiijiyadeed ee deegaanka.

3-Dhammaystirka Regional Strategic Result Matrix (RSRM)

Dhammaystirka Regional Strategic Result Matrix (RSRM), oo lagu jaan-gooynayo laguna waafajinayo halbeegyada wax-qabadka muhiimka ah (Key Performance Indicators – KPIs). Taas oo fududaynaysa cabbiridda natiijooyinka, la socodka wax-qabadka iyo qiimaynta heerka fulinta qorshayaasha horumarineed.

03/08/2026

Xafiiska Qorshaynta iyo Horumarinta Dhaqaalaha DDS ayaa maanta si firfircoon uga qayb qaatay ololaha Dhir-beerista Bilaha Xagaaga, kaas oo si ballaadhan uga qabsoomay Magaalada Jigjiga.

Ololahani wuxuu qayb ka yahay dadaallada lagu xoojinayo ilaalinta deegaanka, kor u qaadista cagaarinta, iyo la dagaallanka saamaynta isbeddelka cimilada. Xafiisku wuxuu mar walba ka go'an yahay ka qayb qaadashada barnaamijyada horumarinta waara iyo ilaalinta deegaanka.

Aan wada beeranno geed, aan wada ilaalinno deegaanka.

31/07/2026

31/07/2026

Ololaha Tabarucaadka Dhiigga ee Bilaha Xagaaga

Xafiiska Qorshaynta iyo Horumarinta Dhaqaalaha DDS ayaa ka qayb qaatay ololaha tabarucaadka dhiigga ee bilaha xagaaga, kaas oo lagu dhiirrigelinayo bulshada iyo hay’adaha kala duwan inay ka qayb qaataan badbaadinta nolosha dadka u baahan dhiigga.

Shaqaalaha xafiisku waxay muujiyeen masuuliyad bulsho iyo garab istaag, iyagoo si iskood ah uga qayb qaatay bixinta dhiigga. Ololahan waxaa sidoo kale ka qayb galay Ku-xigeenka Madaxa Xafiiska Qorshaynta iyo Horumarinta Dhaqaalaha DDS, Mudane Suurow Mahamed isagoo muujiyay taageerada iyo muhiimadda ay leedahay ka qayb qaadashada hawlaha bulshada.

Xafiisku wuxuu sii wadi doonaa dadaallada lagu xoojinayo adeegyada bulshada iyo taageeridda hawlaha samafalka ee wax ka tara nolosha bulshada

28/07/2026

Wasiirrada Xafiiska Biyaha iyo Xafiiska Qorshaynta iyo Horumarinta Dhaqalaha DDS oo la yeeshay hay'adaha deeq-bixiyeyaasha kulan lagu dardargelinayo horumarinta adeegyada biyaha

Waxaa madasha shirarka ee Xafiiska Biyaha Dowladda Deegaanka Soomaalida ka qabsoomay kulan muhiim ah oo ay ka soo qaybgaleen Wasiirka Xafiiska Biyaha DDS, Mudane Eng. Axmed Miraad Layli, Wasiirka Xafiiska Qorshaynta iyo Horumarinta Dhaqaalaha DDS, Mudane Cumar Faruk Warfaa, Maamulka Magaalada Qabribayax, masuuliyiin ka socday hay'adaha deeq-bixiyeyaasha caalamiga ah oo ay ka mid yihiin Wakiilka KFW ee dalka Itoobiya, Midowga Yurub (EU), hay'adda GIZ ee dalka Itoobiya, iyo hawl-wadeennada Xafiiska Biyaha DDS.

Kulanka ayaa lagu gorfeeyey xaaladda guud ee adeegyada biyaha ee Deegaanka Soomaalida, iyadoo si qoto dheer looga falanqeeyey caqabadaha jira, fursadaha horumarineed iyo mudnaanta la siinayo ballaarinta adeegyada biyo nadiif ah iyo fayadhowrka bulshada.
Sidoo kale, waxaa si gaar ah loogu soo bandhigay lana falanqeeyey heerka ay marayaan mashaariicda RWASH ee Qabribayax iyo Awbare–Shedder, horumarka laga gaadhay, qorshayaasha xiga iyo baahiyaha maalgelineed ee lagama maarmaanka u ah dhamaystirka mashaariicdaas.

Kulanku wuxuu muujiyey sida ay Dowladda Deegaanka Soomaalida iyo hay'adaha deeq-bixiyeyaashu uga go'an tahay xoojinta iskaashiga iyo dardargelinta mashaariicda horumarinta biyaha, si bulshada deegaanka loo gaadhsiiyo adeegyo biyo iyo fayadhowr oo waara, tayo leh, isla markaana daboola baahiyaha sii kordhaya ee bulshada.

20/07/2026

‎Tallaabo muhiim ah oo lagu xoojinayo hal-abuurka, tiknoolajiyadda iyo kobcinta xirfadaha dhallinyarada ayaa maanta ka hirgashay Dowlad Deegaanka Soomaalida, kaddib markii si rasmi ah loo daah-furay Xarunta Curinta iyo Tiknoolajiyadda Deegaanka (SRS Innovation Hub), taas oo uu saaka xadhiga ka jarey Madaxwaynaha DDS Mudane Mustafe Mohamed Omer.
‎
‎Waxaan si gaar ah ugu hambalyeynaynaa Omer Mohamed Omer Timocade oo ka tirsan hawlwadeennada Xafiiska Qorshaynta iyo Horumarinta Dhaqalaha DDS , kadib markii uu ku guuleystay Kaalinta 1-aad tartankii Hackathon/Startup Pitch ee ugu horreeyay ee noociisa ah ee deegaanka lagu qabto, isagoo ku guuleystay abaalmarin lacageed oo dhan 80,000 Birr.
‎
‎Omer Mohamed Omer, oo horey u qoray buug ka hadlaya Caqliga Macmalka ah (AI), ayaa tartanka ku soo bandhigay mashruuca Gargaar AI, oo ah AI Agents Xal u noqonaya maaraynta dukumentiyada islamarkaana fududeynaya geedi-socodka shaqada xafiisyada dawliga ah iyo kuwa aan dawliga ahaynba.
‎
‎Guushani waxay tusaale u tahay sida dhallinyarada deegaanka ay uga qayb qaadan karaan xalinta caqabadaha jira iyagoo adeegsanaya aqoonta tiknoolajiyada casriga ah.
‎
‎Waxaan Markale hambalyo iyo bogaadin u diraynaa Omer Mohamed Omer iyo team kiisa waxaana rajaynaynaa in guushani ay dhiirrigelin u noqoto dhammaan dhallinyarada hal-abuurka leh ee deegaanka.
‎
‎ Farouk Warfa Hon:-Faysal Odowa

08/07/2026

Jigjiga

Waxaa maalintii labaad ka socota madasha kulamada ee Garaad Maxammed Dool ee xarunta Madaxtooyada DDS, qiimaynta warbixinnada waxqabadka xafiisyada heer deegaan ee sannad-miisaaniyadeedka 2018 T.I.

07/07/2026

Madaxweynaha Dowladda Deegaanka Soomaalida, , ayaa si rasmi ah u furay shirka qiimaynta warbixinnada waxqabadka xafiisyada heer deegaan ee sannad-miisaaniyadeedka 2018 T.I., kaas oo ka socda Madasha Kulamada ee Garaad Maxamed Dool ee xarunta Madaxtooyada DDS.

Shirkan ayaa ujeeddadiisu tahay in si qoto dheer loo qiimeeyo heerka fulinta qorshayaashii sannadka, waxqabadka ay soo hooyeen xafiisyada kala duwan, caqabadihii la kulmay iyo casharradii laga bartay, si loo xoojiyo hufnaanta, isla xisaabtanka iyo tayada adeegyada loo fidiyo bulshada.

Madaxweynaha ayaa carrabka ku adkeeyay muhiimadda ay leedahay in Xafiisyada dawladdu ku shaqeeyaan natiijooyin muuqda, isla markaana la dardargeliyo hirgelinta qorshayaasha horumarineed ee mudnaanta u leh shacabka. Waxa uu sidoo kale ku boorriyay madaxda xafiisyada inay sii xoojiyaan wada-shaqaynta, isla xisaabtanka iyo adeeg-bixinta hufan si loo xaqiijiyo yoolalka horumarineed ee Dowladda Deegaanka Soomaalida.

Shirkan qiimaynta waxqabadka ayaa la filayaa inuu noqdo madal lagu falanqeeyo guulaha la gaaray, lagu aqoonsado meelaha u baahan horumarin, isla markaana lagu dejiyo jihooyin cad oo lagu xoojinayo waxqabadka xafisyada dowladda sannadka soo socda.

25/06/2026

Wacyigelinta Arrimaha Dib-u-habaynta Shaqada iyo Shaqaalaha

Waxaa saaka ka qabsoomay Madasha shirarka ee Xafiiska Qorshaynta iyo Horumarinta Dhaqalaha DDS shir muhiim ah oo ku saabsan wacyigelinta arrimaha dib-u-habaynta shaqada iyo shaqaalaha, kaas oo uu shir-guddoominayay Ku-xigeenka Madaxa Xafiiska, Mudane Faysal Odowa.

Kulankan ayaa lagu falanqeeyay muhiimadda dib-u-habaynta nidaamka shaqada si loo xoojiyo hufnaanta, isla xisaabtanka, iyo tayada adeegyada uu xafiisku u hayo bulshada. Sidoo kale, waxaa la adkeeyay doorka shaqaalaha ee hirgelinta isbeddellada iyo muhiimadda ay leedahay u hoggaansanaanta habraacyada iyo qiyamka shaqo ee dowladda.

Ugu dambayn, Ku-xigeenka Xafiiska ayaa ku boorriyey dhammaan shaqaalaha inay si wadajir ah uga shaqeeyaan hirgelinta dib-u-habaynta, si loo xaqiijiyo adeeg tayo leh, waxqabad sare, iyo horumar waara

22/06/2026

Waxaa saaka ka furmay Jigjiga International Hotel tababarka Kobcinta Awoodda Shaqaalaha Xafiiska Qorshaynta iyo Horumarinta Dhaqaalaha ee Dawlad Deegaanka Soomaalida.

Tababarkan oo socon doona muddo laba maalmood ah ayaa diiradda lagu saarayaa kobcinta aqoonta iyo xirfadaha shaqaalaha ee dhinacyada diyaarinta warbixinnada, qorsheyaasha, habraacyada maaraynta mashaariicda, iyo Maaraynta wakhtiga (Time Managment)si loo xoojiyo hufnaanta shaqo, tayada adeegyada iyo hirgelinta qorshayaasha horumarineed.

Furitaanka tababarka waxaa si rasmi ah u sameeyay Wasiir Ku-xigeenka Xafiiska Qorshaynta iyo Horumarinta Dhaqaalaha, Mudane Faysal Odowa, oo hadal dhiirrigelin iyo dardaaran isugu jira u jeediyay ka-qaybgalayaasha.
Wasiir Ku-xigeenku wuxuu xusay in horumar waara lagu gaadhi karo oo keliya marka la helo shaqaale leh aqoon, xirfad iyo karti ku filan gudashada waajibaadkooda, isagoo ku boorriyey ka-qaybgalayaasha inay si buuxda uga faa'iidaystaan casharrada iyo waayo-aragnimada lagu soo bandhigayo tababarka.

Sidoo kale, wuxuu tilmaamay in tayaynta shaqaalaha ay laf-dhabar u tahay horumarinta Xafiisyada dowladda, isla markaana ay door muuqda ka qaadanayso sare u qaadista tayada qorshaynta, diyaarinta warbixinnada, dabagalka iyo qiimaynta mashaariicda, si loo xaqiijiyo adeeg hufan, isla-xisaabtan leh oo waafaqsan himilooyinka horumarineed ee Dawlad Deegaanka Soomaalida.

Tababarkan ayaa la filayaa inuu kor u qaado awoodda farsamo ee shaqaalaha, isla markaana uu gacan ka geysto horumarinta nidaamka qorshaynta iyo maaraynta mashaariicda, si loo dardargeliyo adeegyada loo hayo bulshada.