ናፅነት - Tigrai Independence Party

27/06/2026

#ሓበሬታ
‎
‎ንኩለኹም አባላትን ደገፍትን ውድብ ናፅነት ዞባ ምዕራብ ትግራይ
‎ # # # # # # # # # # # # # # # # # # # # # # # # # # #
‎አብዚ ቀረባ ግዜ ካብ ደምብን ኣሰራርሓን ወፃእ ንውድብ ናፅነት ጨዊዮም መሳርሒ ህወሓት ክገብርዎ ብኣይተ ገ/መድሕን ሮምሃይ እናተመሩሑ ላዕልን ታሕትን ይብሉ ከም ዘለዉን ሎሚ ዘይሕጋዊ ጉባኤ ኣካይድና ዝብሉ ገለ ግለ ሰባት ከም ዘለዉ ክንሕብረኩም ንፈቱ ፡፡
‎
‎ልክዕ ከምቲ ዝሕሽከሩሉ ዘለው ውድብ መረፃ ቦርድ ኢትዮጵያ ዘይፈልጦ ናይ ይምሰል ጉባኤ ከካይዱ፣ናይ ኣመራርሓ ለውጢ ክገብሩ፣ኣብቲ ኣብ ቀረባ ግዜ ዝተጣየሸ ፌክ መንግስቲ ህወሓት ድማ ስልጣን ክረኽቡ መፅብዓ ተኣትይሎም ብኣፍ ኣርክብ ተኣዚዞም ይሰርሑ ከምዘለው ሙሉእ ሓበሬታ ከምተረኸበ ኩሉ ኣባልን ደጋፍን ናፅነት ነዚ ነገር ይፍለጥ።
‎
‎አብ ደንበ ዕንክሊል ተሸጉጥካ ምግሃድ ሃገረ ትግራይን ምድኑጓይ ይከኣል እዩ፤ምዕጋት ግን ኣይከኣልን። ከም ጉጅለ ህወሓት ዝበሉ መደናጎይቲ ኣገሀድቲ ሃገረ ትግራይ ክኾኑ ኣይኽእሉን።ምስ ፋኖ ተሻሪኾም ዋላ ስልጣን ኣርባዕተ ኪሎ እንተሓዙ እዞም ልማደኛ ገዛእቲ ህዝቢ ትግራይ መፃኢ ዕድሉ ክውስን ሪፈረንደም ክካየድ ኣይፈቕዱን።
‎
‎በዞም ካብ ውድብና ብዲስፕሊኒን ህረፍ ስልጣንን ፡ መጋበርያ እዚ ድሑር ጉጅለ ብምኻን ውድብ ናፅነት ንምብታን ትደኽሙን አብ ቀረባ እዋን ጉባኤ ክንገብር ኢሎም ከምቲ በኽቲ ውድብ ናፅነት ከመራስሑ ላዕልን ታሕትን ይብሉ አለዉ ፡፡
‎
‎ስለዝኾነ ድማ ኩለኹም አባላትናን ደገፍቲ ናፅነት ዘለኹም ካብዞም መዳነገርቲ ቃልሲ ናፅነት ዓርስኹም ክተግልሉን እቲ ሓቀይና ቃልሲ ናፅነት ከም ቀደምኩም ሓገዝኩምን ድጋፍኩም ክትቅፅልሉ ይላቦ ፡፡

Share and Like ናብ ኩሉ ናፅነታዊ ክባፃሕ ግበሩ .!

✍️ Kalayu Hagos ኣመራርሓ ቤት ምኽሪ ናጽነት

27/06/2026

ኣቦ መንበር ውድብና ብፃይ ዶ/ር ደጀን መዝገበ ኣብ ዝነበሮ ፃንሕቲ ተዓደሙታ!

Enjoy the videos and music you love, upload original content, and share it all with friends, family, and the world on YouTube.

25/06/2026

ካብ ሓለዋ ናጽነት (ቁጽጽር ኮሚቴ ናፅነት) ዝተውሃበ መግለጺ
**************************************************
ዝተኸበርኩም ኣባላትን ደገፍትን ናፅነት:
ወለዶታት ትግራይ ብዘመናት ዝኸፍልዎ ዘለዉ ተጋድሎ ክዛሪ ዘይከኣለ፤ ትግራይ ኣብ መወዳእታ ኣልቦ ኣዙሪት ድሕረት - ጽንተትን - ኲናትን ክትእዘኽን ብዝኸፈለቶ መስዋእትነት ልክዕ ብሔራዊ ረብሓኣ ክተውሕስ ዘይከኣለትን ብወታደራዊ ስዕረት ዘይኮነስ ብሔራዊ ረብሓ ዘማእኸለ ፖለቲካዊ ቅንዕናን ንጹር ዕላማን ብዘይምህላዉ ምዃኑ ውድብ ናፅነት ብውነ ተገንዚቡ እዩ። ብዘመናት ቅብብል ወለዶታት ትግራይ ምእንተ ባህጊ ጎይታ ነብስነትን ብሔራዊ ህላወን ዝኸፈልዎ መሪር መስዋእትነት ብዘላቕነት ዝድበስ ኣብ ምግሃድ ናፃ ሃገረ ትግራይ ምዃኑ ኣምር ሉኡላዊ ብሔራዊ ቀጻልነት ንዝርዳእ ግልጺ እዩ። ስለዝኾነ እዩ ውድብ ናጽነት ናይ ወለዶታት ባህጊ ጎይታ-ነብስነት መኸንበትን ዘላቕነትን ዘውሕስ ዕላማ ምስረታ ሃገረ ትግራይ ንምግሃድ ዝተመስረተ።

ውድብና ዕላማ ሃገርነት ዝዕወት ብቲ ንዘመናት እናወደቕናሉ ዝመጻና ብበለጸኛታት እናተሓንሸሸ ዝተረፈን ዘሎን ወታደራዊ ኣምር ዘይኮነስ ብሰላማውን ሕጋውን ኣገባብ ክኸውን ኣለዎ ዝብል ኣንፈት ብምሓዝ ዘይድፈር ዝመስል ዕላማ ሃገርነት ብምድፋር ሕጋዊ ኣፍልጦ ረኺቡ ኣብ ርሱን ፖለቲካዊ ቃልሲ ይርከብ። ብሔራዊ ህልውናን ረብሓን ትግራይ ዝገሃድ ግዝኣታዊ ሓድነት እናቖርመመ፣ ኣእላፍ ወለዶታት እናገበረ፣ ተጻብኦን ዲፕላማሲያዊ ተነጽሎነትን እናቖለለ ብዝደጋገም ሓንሻሻይን ተበላጻይን ኣካይዳ ዘይኮነስ ህልውና ወለዶታት ዘቐጽልን ኣብ ናጻ ፍቓድ ደቂ ብሔር ዝድረኽን ዝተወደበ ሰላማዊ ፖለቲካዊን ዲፕሎማሲያውን ቃልሲ ብምክያድ ምዃኑ ውድብና ብጽኑዕ ይኣምን። ካብዙይ ዓሚቕ ብሔራዊ ቅንዕናን ወድዓዊ ክዉንነትን ብምብጋስ ብፍላይ ድሕሪ ስምምዕነት ሰላም ፕሪቶሪያ ስሩዕ ፕሮግራምን ስትራተጂን ሓንጺጹ ብሔራዊ ሓላፍነቱ እናፈጸመ ይርከብ።

ውድብና ትግራይ ካብ ዝኣተወቶ ሓደጋ ብሔራዊ ህልውና ኣናጊፉ ብሔራዊ ረብሓታታ ናብ ምውሓስ ከሳግራ ዝኽእል ፖሊሲታትን መማረጽታትን ብምሕንጻጽ ንተግባራውነቱ ብዙሕ ጽዒሩ እዩ። ብተመሳሳሊ ትግራይ ክብትኑ ዝኽእሉ ውሳነታትን ተግባራትን እውን ብትረት ተቓሊሱን ኣቃሊዑን እዩ። እንተኾነ ግና ኣብ ትግራይ ኣንዊሑ ዝሰረተ ዓሻኽ ፖለቲካዊ ስርዓት ኣብ ክንዲ ንባዕሉ እውን ዝድሕነሉ ሓበራዊ ብሔራዊ ድሕነተ ዘቐድም ክባር ዋጋ ብሔራዊ ህልውናን ሓድነትን ንጸቢብ ጉጅላዊ ረብሓኡ እናሓንሸሾ ቀጺሉ እዩ። 'ወይ ምሳና ወይ ጸላኢና' ብዝብል ድሑር ፈሊጥ ዝተፈለየ ኣረኣእያ ዘለዎም ምስዳድን ትካላት ምፍራስን ከም ኣውራ ዕማም ተወፊሩሉ እዩ። እንተተኻኢሉ ዓጃቢኡ ንምግባር እንተዘይተኻኢሉ ድማ ንምፍራስ ዝብል ዝዓለገ ድሑር ስልቲ ብቓልዕን ብስዉርን ኣብ ልዕሊ ውድብና ተወፊሩ እዩ። ኣክቲቭስታትን ኣፈኛታትን ስርዓት ህወሓት ናይ ውድብና ቁጽጽር ክሳብ ዝመስሉ ብውሽጥን ብደገን ዝተዋደደ ኢድኣታውነት ንምግባር ዘይፈንቀልዎ እምኒ የለን።

ውድብና እዚ ዝተዋደደ ጥቕዓት ብፖለቲካዊ ብስለትን ብትካላዊ ሕገደንባዊ ኣገባባትን እናመከቶ መጽዩ እዩ ክቕጽለሉ እውን እዩ። ውድብ ናጽነት ኣፈላላያት ከተኣናግድ ዘኽእል ስነሓሳብ፣ ሕገደንብን ናይ ውሳነ ኣካላትን ዘለውዎ ውድብ እዩ። ዘለናሉ ኹነታት ንሱሩዕ ሰላማዊ ከይዲ ዝብድህ ኣዙዪ ከቢድ መስተጋብር ከምዝኾነ ንማንም ኣእምሮ ዘለዎ ዝተኸወለ ኣይኮነን። ውድብና ንከምዙይ ዓይነት ኣኽኣላይ ዘይኮነ ኩነታት ዝገርሐሉ ንጹር ሕገደንባዊ ኣንፈት ዘለዎ ኣማታይ ውድብ እዩ። ብዙይ መሰረት ካብ ደገ ዝመጽእ ተጻብኦ ብፖለቲካዊ ብስለትን ትካላውነትን ኣብ ውሽጢ ዝፍጠር ኣፈላላያት ድማ ብመሰረት ሕገደምባዊ መርሆታትን መትከላትን ክፈትሕ ዘኽእል ትካላዊ መደላድል ዘለዎ ውድብ እዩ። ስለዝኾነ መላእ ኣባላትን ደገፍትን ናፅነት አዚ ዝስዕብ መተሓሳሰቢ ክትግነዘቡ ሓለዋ ናፅነት የፍልጥ፣

1. ብመሰረት ኣብ ሕገደንቢ ውድብና ዝተቐመጡ ድንጋገታትን ኣገባብን ኣብ ዝኾነ ብርኪ ዝውሰዱ ናይ ድስፕሊን ስጉምቲታት ብዝምልከቶ ቀጺሉ ዘሎ ላዕለዋይ ብርኪ ውድብ ናይ መወዳእታ ዕልባት ክሳብ ዝግበረሎም ምሉእ ተፈጻምነት ሃልይዎም ተግባራዊ ኮይኖም ከም ዝጸንሑ ኩሎም ኣካላት፣ መሪሕነት፣ ኣባላትን ደገፍትን ውድብና ክግንዘቡ ይግባእ። ካብ ትካላዊ መትከላትን ደንብን ወጻኢ ድሌትካ ንምርዋይ ዝግበር ናይ ጸለመ ጎስጓስ፣ ምድንጋራትን ኣብ ውልቃዊ ድሌት ዝተደረኹ ድምዳመታትን ተወሳኺ ጥሕሰት ደንብን ውድባዊ ኣሰራርሓን ከምዝኾኑ ምፍላጥ የድሊ። ዝህልዉ ሕቶታት ወይ ቅሬታታት ሕጋዊ ኣካይዳ ተኸቲልካ ምቕራብ እናተኽኣለ ኣብ ውልቃዊ መደምደምታ ዝተመስረቱ ውንጀላታት፣ ጸለመታትን ምድንጋራትን ምግባር ወሰን ተሓታትነት ዘስፍሕ ከቢድ ስነ-ምግባራዊ ጥሕሰት ምዃኑ ክፍለጥ ኣለዎ። ስለዚይ ብመሰረት ስሩዕ ትካላዊ ደንቢ ብሕጋዊ መንገዲ ዝተመሓላለፉ ውሳነታትን ኣንፈታትን እቲ ውድብ ምሉእ ብምሉእ ከኽብሩን ክፍጸሙን ከምዘለዎም፣

2. ካብ ማዕቀፍ ትካላዊ መስርሕ ወጻኢ ብውልቀ ይኹን ብጉጅለ ዝግበር ዝኾነ ይኹን በይናዊ ክያዶን ስጉምትታትን ፍሩስን ሕጋዊ ተቐባልነት ዘይህልዎን ምዃኑ ክፍለጥ ኣለዎ። ማንም ውልቀሰብ ወይ ጉጅለ ስልጣን እቲ ውድብ ክምንዝዕ፣ ካብ ሕጋዊ መዝነቱ ወጻኢ ተፈላጥነት ክሓትት ወይ ምስ ሕጋዊ መሓውር እቲ ውድብ ዝጋጨዉ ተጻረርቲ መሓውራት ክተክል ኣይፈቀደሉን። ተናሓናሕቲ ናይ ስልጣን ማእኸላት ንምፍጣር፣ ጉጅላውነት ንምስፋሕ፣ ኣብ መንጎ ኣባላት ፍሕፍሕ ንምዝራእ ወይ ነቶም ብሕጋዊ መንገዲ ዝቖሙ መሪሕነትን ትካላትን ንምድኻም ዝግበር ዝኾነ ይኹን ጻዕሪ ከም ከቢድ ጥሕሰት ውድባዊ ስነ-ስርዓትን ውድባዊ ሓድነትን ክውሰድ እዩ። ስለዚ እዙይ ብምርዳእ ኩሎም ናይ ውድብ ኣካላት፣ መሓውራት፣ መራሕቲ፣ ኣባላትን ደገፍትን ኣብ ብስሩዕ ዘይተጸወዑ ኣኼባታት፣ ተጻረርቲ መሓውራትን ምንቅስቃሳትን ካብ ምስታፍ፣ ምምችቻው፣ ወይ ድጋፍ ካብ ምሃብ ክቑጠቡ፣

3. ኩሎም ዘይምርድዳኣት፣ ይግበአኒታት ወይ ጥርዓናት በተን ዝተዘርግሓ ትካላዊ ኣሰራርሓታት እቲ ውድብ ጥራይ ከቕርቡ ይግባእ። ሓድነት፣ ውሕስነት፣ ተኣማኒነትን ዲሞክራስያዊ ኣሰራርሓን እቲ ውድብ ክሕለዉ ኣለዎም። ጉጅላውነት፣ ዘይተጻረየ ውልቃዊ ወረታት፣ ትካላዊ ዕንወትን ንውድብ ንምፍራስ ዝዓለሙ ስጉምታትን ንምስፋሕ ዝግበሩ ኩሎም ፈተነታት ክትነጽጉን ባህጊ ወለዶታት ትግራይ ዝተሓንገጠ ዕላማ ናፅነት ካብ ዓጃብነት ኲናትን ተበለጽቲ ሓይልታትን ክትሕልዉ ብኣጽንኦት ነተሓሳስብ።

ሓለዋ ናጽነት

ናጽነት ንብሔራዊ ክብረት!

24/06/2026

#ሓበሬታ ንመላእ ኣባላትን ደገፍትን ውድብ ናጽነት ትግራይ
************************************************
ፈጻሚ ስራሕ ናጽነት፡ ውድብና ብፍላይ ኣብዚ ባጀት ዓመት እዚ ብውሽጥን ብደገን ዝገጠሞ ዝተዋደደ ፈተናን ሓርጎፅጎፅን በቢ እዋኑ እናገምገመን ከከም ኣመፃፅኣኡ ዝብድህ ኣንፈት እናቐመጠን ንዝምልከቶም ናይ ውድብና ናይ ውሳነ ኣካላት እናሓበረን እናተግበረን ክሳብ ሕዚ መፂኡ እዩ፡፡ ኮይኑ ግና ብድፍኢት ጉጅለ ህወሓትን ኮራኹሩን፡ ሕዚ እውን እዞም ፈተናታት ተጠናኺሮም ይቕፅሉ ከም ዘለውን ተዓዚብና ኣለና።

ከም ውድብ ኣብ ማኒፌስቶናን ካልኦት ሰነዳትናን ብግልፂ ብዝተነፀረ ስልትን ስትራተጂን ቃልሲ መሰረት፥ ውድብና ዘሰጉም ኮይኑ ኣብ ቅድሚ ስርዓት ኢትዮጵያ ይኹን ኣብ ቅድሚ ማ/ሰብ ዓለም ብኩርዓት ጠጠው ኢሉ ንክሙግት ኮይኑ ክምዝገብ ስለ ዝነበሮ፤ እዚ ንምምላእ ምስ ቦርድ መረፃ ኢ/ያ ዝተገበረ ህልኽ ዘወድእ ውፃእ ውረድ ሓሊፍና ሕጋዊ ውድብ ካብ ንኸውን እነሆ 2 ዓመት መሊኡና እዩ። በዚ ድማ ንናይ ወሎዶታት ናይ ናጽነት ቃልሲ ዓቢ እምነ ኩርናዕ ኣንቢርና ኢና።

ውድብና ካብ ዝተመስረተሉ ሰረተ-ሓሳብን ስትራተጂ ቃልሲን ወፃእ፡ እግሪ እግሪ ጉጅለ-ህወሓት ክንከይድ፥ ንሱ እንትፅመድ ንሕና እውን ክንፅመድ፥ ንሱ ናብ ኲናት እንትኣቱ ንሕና እውን ክንዕጅብን ኣብ ናይ ጥፍኣት ድግሱ መጋበርያ ክንከውንን ዝነበረ ሃልኪ እውን ከም ውድብ ኣፍሺልናዮ ኢና።

ይኹን እምበር፡ ጉጅለ ህወሓት ካብ ኣሜሪካ ክሳብ ኣ/ኣን መቐለን ብዘዋደዶ ኔትዎርክ - "ህወሓት ናይ መኸተ ሓይሊ እዩ፥ ኲናት ህወሓት ፍትሓዊ ኲናት እዩ፥ ፅምዶ ህወሓትን ሻዕቢያን ናይ ህዝብታት ርክብ እዩ፥..." እናተብሃለ "ተዓመቱ እሞ ከነዐሽወኩም" ብዝዓይነቱ በለፀኛ ሕጫጨ፡ መንገዲ ክንስሕት ብዙሕ ተፃዒሩን፥ ተጠናኺሩ እውን ይቕፅል ኣሎን።

"ሕጊ ኣይንፈልጥ፥ ፕሪቶሪያ ኣይምልከተና፥ ዲፕሎማሲያዊ ተነፅሎ ኣየሰክፈና፥ ..." ኢሉ ቦርድ ዘይፈልጦ ጫልዳ ጉባኤ ክገብርን፥ ብሽም መናእሰይ ኣለዓዒሉ ብልሓቱ ናብ ዘይፍለጥ ኲናት ከሳውርን ውቃበ እዚ ጉጅለ ክጥብርን ክህንደድ ዝኸረመ ሓይሊ ሕዚ ብትእዛዝን ዓጀባን ህወሓት ጨርቁ ደርብዩ ናብ ኣደባባይ ክወፅእ ኣብ ጫፍ በፂሑ ኣሎ፡፡

ኮይኑ ግና ሕጋዊ ኣፍልጦ ውድብናን ሕጋዊ ብሄራዊ ቃልስናን ዓቂብና ንቀፃሊ ክነረክብ ስለ ዝግባእ፤ ዝገጠሙናን ይገጥሙና ዘለውን ፈተናታት ንምብዳህ ምስ ቦርድ መረፃ ኢ/ያ ዝተተሓሓዙ ዋኒናት ብእግባቡ ንምውዳእ ፈፃሚ ስራሕ ናጽነት ብተደጋጋሚ እናዘተየን ኣንፈት እናቐመጠን መፂኡ እዩ። ኣብ ቀረባ ድማ ቤት ምኽሪ ናጽነት ተኣኪቡ ኣንፈት ከነፅር እዩ። ስለ ዝኾነ በቢ ብርኩ ዘለኹም ኣመራርሓን ኣባላትን ውድብና ትኸፍልዎ ብዘለኹም ዋጋን ተሕልፍዎ ብዘለኹም ሓሳርን ከይተሰኮንና፥ እዚ ዝሕሰብ ዘሎ ጫልዳ ጉባኤ ውድብና ይኹን ቦርድ መረፃ ዘይፈልጦ ንህወሓትን ፅምዶ ሻዕብያን ናይ ምዕጃብ ዓላማ ዘለዎን ምዃኑ ፈሊጥኩም ካብዚ ሓላፍነት ዝጎደሎ ታሪኻዊ ስሕተት ዓርስኹም ከተድሕኑ ንሕብር። ውድብ ናጽነት ብስርገት ኣይስኮንን። ኣብ መትከልናን ዕላማናን ፀኒዕና ብጎዳና ናጽነት ክንጉዓዝን ኣንፃር ኩሎም ብድሆታት ክንዕወትን ኢና!!

ስመር፥ ... ተመዓራረ፥ ... ... ናብ ናጽነት ጠምት!
ናጽነት - ንብሄራዊ ክብረት!
ፈፃሚ ስራሕ ናጽነት!
ሰነ 17/2018 ኣ/ግ
መቐለ፡ ትግራይ

23/06/2026

👉 መግለፂ ውድብና(ናይ መዓልቲ ሰማእታት ኣመልኪቱ ዝወፀ)

21/06/2026

ሰነ 15 በዓለ ዝኽሪ ሰማእታት ትግራይ ኣመልኪቱ ካብ ውድብ ናፅነት ትግራይ ዝተውሃበ መግለፂ
******************************
ህዝቢ ትግራይ ብፍላይ ካብ ሕልፈተ-ህይወት ኣቦና ሃጸይ ዮሃንስ 4ይ ጀሚሩ ክሳብ እዚ ሐዚ በፂሕናዮ ዘለና ናይ ፅንተት ኲናት፤ ወሎዶ ሓሊፉ ወሎዶ ብዝተተከአ ቁፅሪ ስሩዕን ዘይስሩዕን ቃልሲ እናገበረን (ማለት እውን ዝተፈላለዩ ቅሉዓትን ሕቡኣትን እምቢታታት፥ ዓመፃት፥ ወያነታት እናካየደን)፤ ክባር መስዋእትነት እናኸፈለ ዝመፀን ዘሎን ህዝቢ እዩ። ኣውራ ዕላማን ምኽንያትን ቃልሱን መስዋእትነቱን ድማ፡ "መንግስቲ ኣክሱም ዝኣክል ኣብ ዓለም ዝገነነ ስርዓተ-መንግስቲ ተኺሉ፤ ባዕሉ ንባዕሉ እናመርሐ ንኣሽሓት ዓመታት ዝነበረ ህዝቢ፤ ሕዚ መንግስትነቱ ፈሪሱ፥ መሬቱ ተቖራሪሱ፥ ቁጠባኡ ደቒቑ፥ ካብ ርስቱን መረበቱን ተመዛቢሉ፣ ረዚን ታሪኹን ብሄራዊ ክብሩን ተመራሲሑን ተዋሪዱን፥ መንነታዊ ቀፃልነቱ እውን ኣብ ሓደጋ ወዲቑን ይርከብ።

ናይ 100 ዓመት ቃልሲ ወሎዶታት ትግራይ ብናይ 17 ዓመት መሪር ተጋድሎን ክባር መስዋእትን ኣብ 1983 ኣ/ግ ንስርዓት ደርግ ብምድርባይ ብዝተረኸበ ወታደራዊ ዓወት ዝተዛዘመ እኳ እንተመሰለ፤ ዕላምኡ ሓቢኡ ነዚ ብሄራዊ ቃልሲ ይመርሕ ዝነበረ ጉጅለ ብዝፈፀሞ ታሪኽ ይቕረ ዘይብሎ ብሄራዊ ጥልመት ሰለ ዝፈጸመ ብፖለቲካዊ ዓወት ክኽንበት ኣይከአለን ፤ዕላማ ሰማእታትና እውን ተኾሊፉ ተሪፋ እዩ። ህዝቢና መፃኢኡ ከይተሓተተን ህዝበ ውሳነ ከይገበረን ን ስርዓት ደርግ ዝሰዓረ ሰራዊቱ ብዘይ ትሕጋግ ክብተን፤ ትግራይና እውን ብሰሜንን ደቡብን ተቐርቂራን ተቆራሪሳን ብሕግን ትካልን ንኡሽተይ ኮይናን ኢዳን እግራን ተቖሪናን ከም ናይ ኣውደ ኣመት በጊዕ "ፅንተት/ማሕረዲ" ክትፅበ ተጌራ እያ። ድሕሪ ውድቀት ስርዓት ደርግ ድማ ህዝቢ ትግራይ ምንም እፎይታ ከይረኸበ ኣብ "ኲናት ኢትዮ-ኤርትራ" ኣትዩ፥ ከቢድ መስዋእቲ ከፊሉ እዩ። ሕዚ እውን ግና ታሪኻዊ በሰላ ድኣ ኣትረፈ እምበር፤ ዝተዓወተ ብሄራዊ ዕላማ የለን። በቢ ምዕራፉ ብዙሓት ቃልስታት ተጌሮም ብዙሕ መስዋእቲ ተኸፊሉ፤ ኣብ ኩሎም ድማ ዓበይቲ ወታደራዊ መስተንክራት ተረኺቦም እዮም። ኮይኑ ግና ኩሎም ወታደራዊ ዓወታት ብፖለቲካዊ ስዕረት እናተዓጀቡን ንዝቕፅሉ ወሎዶታት ውዝፍ ዕዳ እናውረሱን ከም ዝተኸንበቱ ግልፂ እዩ።

ብፍላይ ናይ 1983 ገዚፍ ወታደራዊ ዓወት ዝተሓሸሸሉ ፖለቲካዊ በሃምነትን ብሄራዊ ጥልመትን ድማ ትግራይ ብቐፃልነት ኣብ ሓደጋ ህልውና ክትኣቲ ዝገበረ እዩ። ነዚ በዓል ረዚን ታሪኽን ዘይሕለል ተጋድሎን ዝኾነ ህዝብና ህዝቢ ትግራይ ግዳይ ፅንተት (ጀኖሳይድ) ክኸውን ጌርዎ እዩ። እዚ ውዙፍ ዕዳ ቀልጢፉ ዝተረድአ መላእ ህዝብና ድማ ከካብ ዝነብረሉ ዓድን ናይ ህይወት ዓውድን ብዘይ ምንም ቅድመ ኩነት ወፊሩ "ትግራይ ሃገር እያ" ኢሉ ብርሱን ብሄራዊ ወነን ፍቕርን መኪቱ መስተንክራዊ ወታደራዊ ዓወታት እኳ እንተሓፈሰ፤ እንደገና ማፍያ ስርዓት ህወሓት ምስ ዓጀብቱ ኮይኑ ብፖለቲካዊ ስዕረት ዛዚምዎ። ብሄራዊ ዕላማ ቃልስናን ብክባር ዋጋ ዝተረኸቡ ዕድላትን ሓሺሹ፥ ዓቕምታት በቲኑ፥ ኣብ ናይ ህልውና ሓደጋ ኣውዲቑና ኣሎ። እዚ ልዕሊ ብሄራዊ ህላወን ረብሓን ጉጅላዊ ህላውኡን ረብሕኡን ዘቐደመ ማፍያ ጉጅለ፤ ሕዚ እውን "ሕድሪ ሰማእታትና ኣይነዕብርን!" ብዝብል ኣፍኣዊ ሞገስን ፖለቲካዊ ጨለነትን ተዓጂቡ ስምዒት ህዝቢ ንምቕስቃስን መናእሰይ ኣብ ዘይምልከቶምን ትርጉም ኣልቦን ኲናት ንምስላፍን ይገዓር ኣሎ። ብሽም ሰማእታት እናመሓለ "ህዝቢ የፍልስ ዓዲ የፍርስ" ኣሎ።

ዝኸበርካ ኣብ ውሽጥን ደገን ዘለኻ ህዝቢ ትግራይ፥

ዝኸበርኩም ኩልኹም ተጋደልቲ ትግራይ፥

*************************************
ከም ውድብ ናጽነት ትግራይ (ናጽነት)፡ ምእንተ ብሄርካ፥ ምእንተ መሬት ዓደ 'ቦኻ፥ ምግዳልን ክባር መስዋእቲ ምኽፋልን፥ ኣብ እምንን ወረቐትን ዘይኮነስ፤ ኣብ ልቢ ሕድሕድ ወዲ ብሄር ተኸቲቡ ዘልኣለማዊ ዝኽሪ ዝልገሶ፤ ዝለዓለ ብሄራዊ ክብሪ ምዃኑ ኣንዳዕዲዕና ንርዳእ፤ ንምርሐሉ እውን ኢና። ኮይኑ ግና ስርዓት ህወሓት፡ ማፍያ ስርዓት እዩ። ዘይሕጋዊን ዘይሓላፍነታዊን ዕደና ዘካይድ፤ ኣብ ኮንትሮባንድን ዘይሕጋዊ ዝውውር ደቂ ሰባትን ዝርከብ፤ ሰባት ዝጨዊ፥ ዝስውር፥ ቀቲሉ ዝድርቢ፤ ኣብ ታሪኽ ትግራይ ንፈለማ እዋን ጀጋኑ ተጋደልቲ ዝሸጠን ዘዐስከረን ናይ ታሪኽ ተሓታቲ እዩ። ነውሪ ዝበሃል ኩሉ ብምፍፃም ስልጣኑን ረብሕኡን ካብ ምሕላው ወፃእ፤ እዚ ዝበሃል ብሄራዊ ራእይ፥ ፖለቲካዊ ዕላማ፥ ስትራተጂካዊ ንፅረት ኣይብሉን። ብሰንኩ፡ ብሄራዊ ሓድነትና ኣብ ዝተዘረገሉን ከም ብሄር ሓደ ኮይንና ክንወፍር ኣብ ዘይንኽእለሉን እዋን፤ ስምምዕ ሰላም ፕሪቶሪያ በዓል ዋና ስኢኑ ፍትሓውነት ቃልስና ዲፕሎማሲያዊ ተነፅሎ ገጢሙዎ ኣብ ዘለሉ እዋን፤ ህዝብና ተበቲኑን ኣደዳ ጥሜት ሕማምን ሞትን ኮይኑ ኣብ ዘለሉ እዋን፤ ብዚ ማፍያ ጉጅለን ዓጀብቱን ዝግበር ኲናት ይኹን ኣብዚ ኲናት ዝኽፈል ዋጋ ህልውናን ረብሓን ብሄርናን ዓደ 'ቦናን ዘኽብር እዩ ዝብል እምነት ብፍፁም ኣይብልናን። ናይዚ ጉጅለ ውቃበ ንምጥባርን ናይ ስልጣን ዕድምኡ ንምንዋሕን ክበሃል ጥራሕ ድማ ነቲ ውፃእ መዓት ዝኾነ ህዝብናን ተረፍ መስዋእቲ ዝኾነ መንእሰይናን መጋበርያ ኲናት ፅምዶ ማፍያታት ክኸውን ኣይግባእን ንብል።

ውድብና ውድብ ናጽነት ትግራይ (ናጽነት)፡ ምእንተ ብሄራዊ ህላወ፥ ምእንተ መንነታዊ ቀፃልነትን ጎይታ ነብስነትን ትግራይ ክብሉ፤ በቢምዕራፉ ኣብ ዝተገበሩ ብሄራዊ ቃልስታት ዝወደቑን፤ ኣብዚ ዘለናሉ እዋን ዘጋጠመና ኲናት ፅንተት ንምምካትን ናጽነት ትግራይ ንምግሃድን መተካእታ ዘይብሉ ክባር ዋጋ ዝኸፈሉን ሰማእታትና ኩሎም፡ ደሞም ኣይደረቐን፤ ብሄራዊ ዕላምኦም ገና ኣይተዓወተን፤ ብሄራዊ ቃልስና እውን ገና ኣይተዛዘመን፤ ኢሉ ብፅኑዕ ይኣምን። ሰማእታትና ዝድበሱ ድማ፡ ዝተሰውኡሉ ዕላማ ተሓንጊጥና፥ ብኣዕፅምቶም ፅሒፎም ብደሚቕ ደሞም ፈሪሞም ዝገደፉልና ልዕሊ መቓብር ዝነብር ቃለ ሕድሮም - "እወ ንናጽነት" - ብዝብል ህዝበ ውሳነ "ባንዴራ ናጻን ልኡላዊትን ሃገረ ትግራይ" ኣብ ሰማየ ሰማያት እንትምብልበል እዩ ኢልና እውን ንኣምን። ምእንቲ እዙይ እውን ከም ውድብ ብትሪ ከም እንቃለስ ደጊምና ቃል ንኣቱ።

ሃገረ ትግራይ - ደበስ ሰማእታትናን ገዝሚ መፃኢናን እያ!

ዘለኣለማዊ ክብርን ሞጎስን ንጀጋኑ ሰማእታትና!

ናጽነት - ንብሄራዊ ክብረት!

ውድብ ናጽነት ትግራይ (ናጽነት)
ሰነ 14/ 2018 ኣ/ግ
መቐለ፡ ትግራይ

21/06/2026

ሓላፊ ቤት ፅሕፈትን ፈፃሚ ስራሕን ውድብና ብፃይ Teame Hagos Gebru ቅድሚ 9 ወርሒ ኣብ ላዛ ትግርኛ ትሕቲ ሰማይ ትግራይ ተረኺቡ ካብ ዝተዛረቦ ዝተወሰደ እዩ። ተዓደሙታ!

14/06/2026

፣
http://sharevideo1.com/v/aEgtaGk4Tmwtelk=?t=ytb&f=co

13/06/2026

ም/ል ኣቦ መንበር ውድብና ብፃይ Alemseged Aregay ቅድሚ 10 ወርሒ ኣብ ላዛ ትግርኛ ትሕቲ ሰማይ ትግራይ ተረኺቡ ካብ ዝተዛረቦ ዝተወሰደ እዩ። ተዓደሙታ!

13/06/2026

ካብ መግለፂ ውድብና ዝተወሰደ !
http://sharevideo1.com/v/aEgtaGk4Tmwtelk=?t=ytb&f=co