Office of the President-Tigray

26/08/2026

ስራሕ ፈፃሚ ብ/ክ/መ/ትግራይ ሎሚ ዕለት 20 ነሓሰ/2018 ዓ/ም ኣብ ዘካየዶ ስሩዕ ኣኼብኡ ኣብ ኣርባዕተ ዓበይቲ ጉዳያት ተመያይጡ ውሳነ ኣሕሊፉ ኣሎ::
 ፈለማ እቲ ስራሕ ፈፃሚ ዝረኣዮ ብዝተፈላለዩ ገበናት ኣብ ቤት ህንፀት ዝርከቡ ተሃነፅቲ ዝቐረበ ናይ ይቅርታ ውሳነ ሓሳብ ዝዘተየ ኮይኑ ን573 ተሃነፅቲ ብይቅርታ ክፍትሑ ወሲኑ ኣሎ::
 ስዒቡ እቲ ስራሕ ፈፃሚ ዝረኣዮ ኣብ ዙርያ መምርሒ ብሄራዊ ኮሚቴ ፀረ ግዕዝይና ምጥያሽ ኮይኑ ኣብ ትግራይ ብሰፊሑ ዝፍፀሙ ዘለዉ ገበናት ግዕዝይናን ሳዕቤኖምን ንምክልኻል፣ ንምቁፅፃርን ተሓታትነት ንምርግጋፅን ተመጣጣኒ ግብረ መልሲ ንምሃብን ብዝተፈለየ ትኹረት ብሄራዊ ኣጀንዳ ኮይኑ ተሳትፎ ሕብረተሰብ ብዘረጋግፅ መንገዲ መሰረታዊ ለዉጢ ንምምፃእ ብብርኪ ክልል ብሄራዊ ኮሚቴ ክጣየሽ ዘኽእል መምርሒ ኣፅዲቑ ኣሎ::
 ቐፂሉ እቲ ስራሕ ፈፃሚ ብ3ይ ደረጃ ዝረኣዮ ኣሰራርሓን ስነ ምግባርን ቤት ምኽሪ ስራሕ ፈፃሚ ብ/ክ/መ/ትግራይ ኣመልኪቱ ዝቐረበ ደንቢ ድሕሪ ምዝታይ ነቲ ዝተዳለወ ደንቢ ኣፅዲቕዎ ኣሎ::
 ኣብ መወዳእታ ድማ እቲ ስራሕ ፈፃሚ ዝረኣዮ ካሊእ ጉዳይ ኣብ ፕሮግራም ቃልኪዳን ሰቖጣ ተጠቀምቲ ብዛዕባ ዝኾና ተወሰክቲ 19 ወረዳታት ኣመልኪቱ ዝቐረበ ውሳነ ሓሳብ ብዕምቆት ድሕሪ ምዝታይ እተን ወረዳታት ተጠቀምቲ እቲ ፕሮግራም ክኾና ውሳነ ኣሕሊፉ ኣሎ::

ቤት ፅሕፈት ፕሬዚደንት
ነሓሰ 20/2018 ዓ/ም
መቐለ

25/08/2026

ኣብ ትግራይ ኣጋጢሙ ዘሎ ሓደጋ ድርቂ ንምክልኻል መንግስታዉያንን ዘይመንግስታዉያን ትካላት ዝገብርዎ ድጋፍ ተጠናኺሩ ክቕፅል ፕረዚደንት መንግስቲ ትግራይ ፀዊዖም።

ፕረዚደንት ብ/ክ/መ/ ትግራይ ዶ/ር ደብረፅዮን ገ/ሚካኤል ሎሚ 19 ነሓሰ 2018 ዓ/ም ብኣመራርሓ ቢሮ ሕርሻን ሃፍቲ ተፈጥሮን ትግራይ፣ ስግግር ሕርሻ ኢ/ያ ጨንፈር ትግራይን ኢንስቲትዩት ምርምር ሕርሻን ዝተገብረ ዳህሳስ ኣመልኪቶም ንዝቐረበ ፀብፃብ መሰረት ብምግባር እዩ።

ፕረዚደንት መንግስቲ ትግራይ ዶ/ር ደብረፅዮን ገ/ሚካኤል እቲ ኣጋጢሙና ዘሎ ፀገም ብመንፅር እቲ ዝካየድ ዘሎ ህልዉናና ናይ ምርግጋፅ መኸተ ክምራሕ ከምዘለዎ ብምሕባር ብዋናነት ኣብ ዓርሰ ምርኮሳ መሰረት ዝገበሩ ስራሕቲ ዓብይ ጠመተ ምሃብ፣ ህይወት ሰብን እንስሳን ከምኡ ድማ ሃፍቲ ተፈጥሮ ኣብ ምድሓን ኣብ ትግራይ ዝርከቡ ኩሎም መንግስታዉን ዘይመንግስታዉን ትካላት ክረባረቡ ፀዊዖም።
ኣብ ኽልልና ዝፀንሐ ናይ ዓርሰ ምትሕግጋዝ ፅቡቕ ባህሊ ተጠናኺሩን ተዓቂቡን ክኸይድ ድማ ኣገንዚቦም።

ዛጊድ እቲ ከም ኽልል ገጢሙና ዘሎ ሓደጋ ድርቂ ንምቕላልን ሳዕቤኑ ንምንካይን መንግስታዉን ዘይመንግስታዉን ትካላት ክገብርዎ ዝፀንሑ ሰናይ ተግባር ብምምስጋን እቲ ፀገም ዓብይ ብምኻኑ ሕዚ እዉን ዘይተሓለለ ፃዕሮም ኣጠናኺሮም ንኽቕፅሉ ዶ/ር ደብረፅዮን ዝገለፁ እንትኾን በቢብርኩ ዘሎ ኣመራርሓ ድማ ብመንፅር ናይ ህልዉና መኸተ ክመርሕ ከምዘለዎ ኣተሓሳሲቦም።
ቤት ፅሕፈት ፕረዚደንት
19 ነሓሰ 2018 ዓ/ም

25/08/2026

Statement on Former President Olusegun Obasanjo's Visit to Tigray

20/08/2026

20/08/2026

"ዝኽሪ ተጋደላይ መለስ ዝኽሪ ኩሎም ስውኣትና ብምዃኑ ዝተቓለስሉ ዓላማ ሽትኡ ንኽወቅዕ ብሓድነት ክንቃለስ ኣለና"

ኣይተ ኣማኑኤል ኣሰፋ
ም/ፕረዚደንት መንግስቲ ትግራይ

ምክትል ፕረዚደንት መንግስቲ ትግራይ ኣይተ ኣማኑኤል ኣሰፋ ነዚ ዝበሉ ብምትሕብባር ኣከዳሚ ኣመራርሓ መለስ፣ ኮሚሽን ሓርበኛታት ትግራይን ድምፂ ወያነን ኣብ ዝተሳለጠ መበል 14 ዓመት ዝኽሪ መስዋእቲ ተጋደላይ መለስ ዜናዊ ተረኺቦም ኣብ ዘመሓልላለፍዎ መልእኽቲ እዩ።

ኣይተ ኣማኑኤል ናይ ሎሚ ዓመት ዝኽሪ ተጋደላይ መለስ ዜናዊ ፍልይ ዘብሎ ተጋደላይ መለስን ብፆቱን ብዝኸፈልዎ ረዚን መስዋእቲ ንዘመናት መልሲ ዘይተውሃቦ ሕቶ ህዝቢ መልሲ ክረክብ ዝገበሩ እንትኾን ኣብዚ ሐዚ ሰዓት ግና ዝተኸልከለሉ ኩነታት ብምዃኑ እዩ ኢሎም።

ዝኽሪ መለስ ዝኽሪ ኩሎም ስውኣት ደቂ ትግራይ እዩ ዝበሉ ምክትል ፕረዚደንት መንግስቲ ትግራይ ኣይተ ኣማስኑኤል ኣሰፋ፤ ህዝቢ ሕገ መንግስታዊ መሰሉ ዘረጋገፀ ህዝቢ ትግራይ ብዘካየዶ መስተንክራዊ ቃልስን ብፍላይ ድማ ብመሪሕነት ተጋደላይ መለስን ብፆቱን ብዘካየድዎ ዘይተሓለለ ተጋድሎ ምርካቡ ሓቢሮም። ኾይኑ ግና መልሲ ረኺቡ ዝፀንሐ ሕቶ ህዝቢ ብምልካዊ ኣገዛዝኣ ጆኖሰይዳዊ ኣብይ ኣሕመድ ተኸልኪሉ ከም ህዝብን ብሄርን ክንበታተንን ክንጠፍእን ዘኽእል ሓደጋ ገጢሙና ኣሎ ኢሎም።

ህዝቢ ትግራይ ህላውኡ ኣብ ሓደጋ ወዲቑ፣ ልኣላውነቱ ተመንጢሉ፣ ከምህዝቢ ኣብ ምብታን ወይ ምጥፋእ ጫፍ ይርከብ ዝበሉ ኣይተ ኣማኑኤል፤ ነዚ ገጢሙና ዘሎ ሓደጋ ሓድነትና ኣስጢምና ብምምካት ህላወናና ክነረጋግፅ ይግባእ ኢሎም።

ኣይተ ኣማኑኤል ዘለውና ኣፈላላያት ገዲፍና በቶም ሓደ ዝገብሩና ዛዕባታት ብሄራዊ ሓድነትና ኣደላዲልና ነዚ ገጢሙና ዘሎ ፈተና ክንሰግርን ኣብዚ ትኹረት ገይርና ክንንቀሳቀስን ኣለና ኢሎም።

ዳይረክተር ኣካዳሚ ኣመራርሓ መለስ ፕሮፌሰር ክንፈ ኣብርሃ ብወገኖም ቀንዲ ውራይ ኣካዳሚ ኣመራርሓ መለስ ዜናዊ ከም መለስ ዝብሉ ብቑዓት መራሕቲ ምፍራይ እዩ ኢሎም። ብምዃኑ ድማ ክብርታትን ኣስተምህሮታትን መለስ ዓትዒትና ብምሓዝ ነዚ ተሸኪምናዮ ዘለና ዓብይ ግደ ክነዕውት ኣለና ኢሎም።

ቤት ፅሕፈት ፕረዚደንት
14ነሓሰ 2018 ዓ/ም

07/08/2026

''ስርዓት ብልፅግና ንፖለቲካዊ ፀገማት ትግራይ ብሰላማዊ መንገዲ ክፈትሕ ኣይኽእልን''

ዶ/ር ደብረፅዮን ገ/ሚካኤል
ፕረዚደንት መንግስቲ ትግራይ

05/08/2026

ፈፃሚ ስራሕ ብሄራዊ ክልላዊ መንግስቲ ትግራይ ኣብቲ ትማሊ 28 ሓምለ 2018 ዓ/ም ኣብ ዘሳለጦ ስሩዕ ኣኼብኡ ምስ ሓይልታት ፀረ መኸተ ትግራይ ተሰሊፎም ዝርከቡ ተጋሩ ፃዉዒት መንግስቲ ትግራይ ተቐቢሎም ናብ ዓዶም ተመሊሶም ናብርኦም ንኸመርሑ ኣብ ዝምጥኖም ዓዉደ ስራሕ ክዋፈሩን ድጋፍ ክግበረሎምን ዘኽእል ዝፀደቐ መፈፃሚ ማንዋል ከምዚ ዝስዕብ ቀሪቡ ኣሎ።
ቤት ፅሕፈት ፕረዚደንት
መቐለ

04/08/2026

ቤት ምኽሪ ፈፃሚ ስራሕ ብ/ክ/መንግስቲ ትግራይ 6ይ ዘመን መበል 12 ኣብ ዘካየዶ ስሩዕ ኣኼባ ኣብ ክልተ ኣጀንዳ ተመያይጡ ውሳነ ኣሕሊፉ ኣሎ።

ፈለማ ቤት ምኽሪ ፈፃሚ ስራሕ ብ/ክ/መንግስቲ ትግራይ ብፍላጥ ይኹን ብምድንጋር ካብ መጋቢት 2017 ዓ/ም ጀሚሩ ምስ ሓይልታት ፀረ መኸተ ትግራይ ዕጥቂ ሒዞም ዝርከቡ ተጋሩ ብሰላማዊ መንገዲ ናብ ንቡር ሂወቶም ተመሊሶም መነባብረኦም ብኣግባቡ ክመርሑ ብምግባር ኣብ ትግራይ ኮይኖም ህልውናን ድሕንነትን ህዝቦም ከረጋግፁ ዝከኣለሉ ዕድል ክወሃቦም ከም ኣጀንዳ ሒዙ ተመያይጡ ዝወሰነ ኮይኑ፤ ንፃውዒት መንግስቲ ተቐቢሎም ኣብ ዝሓፀረ ግዘ ናብ ዓዶም ንዝምለሱ ተጋሩ ብዘይምንም ፀገም ናብረኦም ንኽመርሑን በቢዝምጥኖም ዓውዲ ስራሕ ንኽዋፈሩ ዝከኣል ደገፍ ክግበረሎምን ዘኽእል መፈፀሚ መስርሕ (ማንዋል) ፀዲቑ ኣሎ። ነዚ ዝምልከት ቢሮ ሰላምን ፀፅታን ትግራይ ኣብ ቀረባ ግዘ ዝርዝር መብርሂ ክህበሉ እዩ።

ካልኣይ ናይ ቤት ምኽሪ ፈፃሚ ስራሕ ብ/ክ/መንግስቲ ትግራይ ኣጀንድኡ ድማ ኣፈፃፅማ ብሄራዊ ምትእኽኻብ እቶት በፂሕዎ ዘሎ ደረጃ ዝምልከት ኮይኑ፤ እዚ ስራሕ እዚ ብላዕለዋይነት ዘተሓባብር ዘሎ ዓብይ ኮሚቴ ዘዳለዎ ሪፖርት ስራሕ ገምጊሙ። ነዚ መደብ ኣብ ምዕዋት ደቂ ትግራይ ዝነበሮም ተሳትፎ ዕዙዝን ተስፋ ዘስነቕን ኮይኑ ብቐፃልነት ትግራይ ኣብ ዓርሰ ምርኮሳ ዝተመስረተ፣ ዝተወሃሃደን ካብ ግዕዝይና ብዝረሓቐን ኣገባብ ተመሪሑ ነቲ ፀላኢ ኣብ ልዕሌና ኣንቢርዎ ዘሎ ዕፅዋ ኣብ ምቅላልን ህልውናናን ድሕንነትናን ኣብ ምርግጋፅን ብዕቱብ ንኽስራሕ ነቲ ዓብይ ኮሚቴ መምርሒ ስራሕ ተዋሂቡ።

ናይዚ ብሄራዊ ምትእኽኻብ እቶት ቀንዲ ዕላማ እቲ ጄኖሳይዳዊ ስርዓት ንዘካየዶ ወራር ኣብ ምምካት ዋጋ ንዝኸፈሉ ሓርበኛታት ንምሕካም፣ ዝተመዛበሉ ወገናት እግሪ ንምትካልን ትግራይ ካብቲ በፂሕዋ ዘሎ ጉድኣት ንምሕዋይን ማእኸል ዝገበረ እዩ። ብምዃኑ ድማ ደቂ ትግራይ ነዚ ቅዱስ ዕላማ ንምዕዋት ዝጀመርዎ ዘበራትዕ ተሳትፎ ከሕይሉን ትግራይ ዓርሰ ምርኮሳኣ ብደቃ ክተረጋግፅን ኩሉ ትግራዋይ ሓድነቱ ኣስጢሙ ንቕድሚት ክምርሽ ፃውዒት ቀሪቡ።

ቤት ፅሕፈት ፕረዚደንት
28 ሓምለ 2018 ዓ/ም

03/08/2026

ካብ መንግስቲ ትግራይ ዝተውሃበ እዋናዊ መብርሂ
================================
ጀኖሳይዳዊ ውልቀ መላኺ ስርዓት ብልፅግና ብዕለት 25 ሓምለ 2018 ዓ.ም ካብ ወጋሕታ ጀሚሩ ኣብ ምዕራብ ትግራይ ብኣንፈት ሸረሪና ኣብ ልዕሊ ሰራዊት ትግራይ ቅሉዕ ውግእ ከም ዝኸፈተ ይፍለጥ። ኣብ’ቲ ውግእ ህፁፅ ሓይልታት ደገፍ ተባሂሉ ዝፅዋዕ ብሞሓመድ ሓምዳን ዳጋሎ (ሔሚቲ) ዝምራሕ ዕጡቕ ሓይሊ ሱዳንን ካብ’ቲ ከባቢ ተገዲዶም ዝተኣከቡ ዕጡቓትን እውን ዝተሳተፉ ኮይኖም፡ ዕሱብ ሰራዊት ጀኖሳይዳዊ ውልቀ መላኺ ስርዓት ብልፅግና ብዕስለ ተዳጒኑን ኣለኒ ዝብሎ ኩሉ ዓይነት ዓቕምታት ሓይሊ ምድርን ኣየርን ተጠቒሙን ካብ ወጋሕታ ጀሚሩ ክሳብ ኣጋምሸት ተደጋጋሚ መጥቃዕትታት ከካይድ ፈቲኑ እዩ። ይኹን እምበር፡ ፍትሓዊ ዕላማ ተሓንጊጡ “ሕድሪ ስዉኣተይ ኣየዐብርን” ዝበለ ጅግና ሰራዊት ትግራይ ነቲ ተሃንዲዱ ዝመፀ ወራሪ ብምምካት ንሕልሚ ፀላኢ ከፍሽሎ ክኢሉ እዩ። ብምኻኑ፡ ሰራዊትና ሎሚ እውን ከም ትማሊ ብቕያ ዝዝንቶ፣ ንታሪኽ ዝስነድ፣ ዘኹርዕን መስተንክራውን ጅግንነት ፈፂሙ ኣሎ፤ ክብርን ሞሳን ድማ ይግብኦ!

እቲ ተዳጒኑ ዝኣተወ ዕሱብ ሰራዊት ብልፅግናን መሻርኽቱን ንምርኣዩ ብዘሕዝን መንገዲ ዝሃለቐ ኮይኑ፡ ሕዚ ትካላት ጥዕና ምዕራብ ትግራይ፣ ጎንደርን ከባቢኡን ብውጉኣት ፀላኢ ዓብለቕለቕ ኢለን ይርከባ። ነዚ ስዒቡ ኣብ’ቲ ከባቢ ንዝተፈጠረ ምድንጋፅ ንምሽፋን ብዙሓት ውጉኣት ብኣውሮፕላን ተፃዒኖም ናብ ካልኦት ከባብታት ኢትዮጵያ ተወሲዶምን ይውሰዱን ኣለዉ።

ብልፅግና ንህዝቢ ትግራይ እንተየብረሰ ፈፂሙ ክድቅስ ኣይኽእልን። ብምዃኑ፡ ትማሊ ዝፈተኖ ብዕስለ ዝተሰነየ ወራር ኣብ ዝኾነ እዋን ብዝኾነ ኣንፈት ክቕፅለሉ ከም ዝኾነ ኣየጠራጥርን። ህዝቢ ትግራይ ድማ ህልውንኡን ድሕንነቱን፣ ሉኣላውነቱን መሰል ዓርሰ ውሳንኡን ናይ ምውሓስ ሕጋውን ተፈጥሮኣውን መሰል ኣለዎ። ስለ’ዚ ኣብ መንጎ ምብራስን ምህላውን ኣብ ዝካየድ ግጥም ዓወት ናይ መን ምዃኑ ዓለማዊ ተሞኩሮ ኮነ ናይ ባዕልና ታሪኽ ህያው ምስክር እዩ።

ክብርን ሞገስን ንጀጋኑ ስዉኣትና!

ዘበት ንብሄራዊ ብርሰት!

ብሄራዊ ክልላዊ መንግስቲ ትግራይ

26 ሓምለ 2018 ዓ.ም

መቐለ