24/06/2026
Guduunfaa Gamaggama Hojii Bara 2018!
=================================
Waajjirri Abbaa Alangaa Godina Arsii Lixaa waltajjii gamaaggama raawwii karoora hojii kurmaana 4ffaa bara 2018 guyyoota lamaaf jechuun gaafa guyyaa 16-17/10/2018 ALItti Waajjiraale Abbaa Alangaa Aanaalee Godina Arsii Lixaa fi Mana Sirreessaa Godina Arsii Lixaa wajjiin Magaalaa Shaashamanneetti gaggeeffamaa ture guyyaa har'aa kana karaa milkii ta'een xumuramee jira. waltajjii kun Abbootii Alangaa Godinaa fi Aanaalee Godina Arsii Lixaa, hojjattoota bulchiinsaa Godinaa, hojjataa karooraa fi dursaa garee humna namaa Waajjiraalee Abbaa Alangaa Aanaalee fi qooda fudhattoota biroo karaa hirmaachiseen gaggeeffamee jira.
Waltajjichi kun eebba manguddootaatiin jalqabee Itti Gaafatamaan Waajjira Abbaa Alangaa Godina Arsii Lixaa Kabajamoo Obboo Darajjee Daddafoo ergaa baga nagayaan dhuftanii fi haasaya baniinsaa taasisuun kallattii gamaaggamaa kennuun waltajjii kana ifatti jalqabsiisanii jiru.
Baniinsa waltajjii qorannoo kana irrattis Itti Aanaa Bulchaa Bulchiinsa Godina Arsii Lixaa Kabajamoo Obboo Asaffaa Tolosaa argamuun haasaa taasisanii jiru. Gabaasni raawwii hojii kurmaana 4ffaa bara 2018 Waajjira Abbaa Alangaa Godina Arsii Lixaa, Mana Sirreessaa Godina Arsii Lixaa fi kan Waajjiraalee Abbaa Alangaa Aanaalee Arsii Lixaa, gabaasa duubdeebii daawwannaa hojii dirree Aanaalee, xiinxala galmeewwan murtii argatanii fi sakatta'iinsa poosti odiitii galmeewwanii dhiyaatee jira. Dabalataanis Leenjii Moosaajii pismis irratti kennamee jira. Gabaasota dhiyaatee fi leenjii kenname irratti gaafii fi yaanni mana keessaa ka'ee irratti mari'atamee jira. Gaafilee fi yaadota mana keessaa ka'an irratti hoogganttoonni hojii isaan ilaallatu deebii kennanii jiru!
Qorannoo waltajjii gamaaggama kana irratti ciminaalee galmaa'anii fi hanqinnaalee bara kana raawwii hojii keessatti nu mudatanis adda baasuun mariin gaggeeffamee jira! Guduunfaa waltajjii qorannoo kana irratti Itti Aanaa Hoogganaa Biiroo Abbaa Alangaa Waliigalaa Oromiyaa Kabajamoo Obboo Mallasaa Abbaayinaa, Pirezidaantii Mana Murtii Olaanaa Godina Arsii Lixaa kan ta'an Kabajamoo Obboo Bukaarii Kadiiroo fi Itti Gaafatamaan Waajjira Bulchiinsa Godina Arsii Lixaa Obboo Mi'eessoon argamanii jiru! Kabajamoo Obboo Mallasaa Abbaayinaa fi Obboo Darajjee ciminaalee galmaa'an itti fuufsisuudhaan hanqinnaalee mul'an galtee karooraa hojii bara 2019 taasifachuun irratti karoorfachuu akka qabamus kallatti hojii kennanii jiru!
Dhuma irratti sirni beekamtii fi badhaasaa Abbootii Alangaa fi Waajjiraalee Abbaa Alangaa Aanaalee Godina Arsii Lixaa gama hojii hubannoo seeraatiin raawwii caalmaa qaban galmeessanii fi Waajjiraalee raawwii hojii waliigalaatiin raawwii caalmaa qaban galmeessaniif waraqaa ragaa beekamtii fi geeba badhaafamanii jiru.
Haala kanaan hubannoo seeraatiin Waajjirri Abbaa Alangaa Aanaa Gadab Hasaasaa sadarkaa 1ffaa, Kokkossaa 2ffaa fi Shaallaa 3ffaa bahuun waraqaa beekamtii argatanii jiru. Abbootii Alangaa hubannoo seeraatiin Ramadaan Aadam sadarkaa 1ffaa, Abdii Waarituu 2ffaa fi Abbishuu Irreesso 3ffaa qabachuun waraqaa beekamtii argatanii jiru!
Raawwii hojii waliigalaatiin wajjirri Abbaa Alangaa Aanaa Adaabbaa fi Aanaa Kofalee sadarkaa 5ffaa fi 4ffaa qabachuun waraqaa beekamtii kan argatan yoo ta'u Waajjirri Abbaa Alangaa Aanaa Dodolaa sadarkaa 3ffaa bahuun waraqaa beekamtii fi geeba, Waajjirri Abbaa Alangaa Aanaa Gadab Hasaasaa 2ffaa bahuun waraqaa beekamtii fi geeba badhaafamanii jiru! Waajjiraalee Abbaa Alangaa Aanaalee Godina Arsii Lixaa keessaa bara kana jechuun bara 2018 1ffaa bahuun waraqaa beekamtii fi geeba kanvbadhaafaman Aanaa Nageellee Arsii shaampiyoonaa ta'uun xumuree jira! Kanumaan waltajjiin qorannoo hojii guyyoota lamaaf Magaalaa Shaashamanneetti gaggeeffamaa ture har'a gaafa 17/10/2018tti milkiin xumuramee jira!
