25/05/2026
Í gjár var opið hús í Haraldsstovuhandlinum, har møguleiki var at síggja umvældu hølini, sum nú eru gjørd klár til eitt íverksetarahús mitt í Sandavági.
Samstundis varð listaverkið FLØSKUR avdúkað. Verkið er komið til í verkstovuni SKAP, sum er partur av Undurfagri mai, har kvinnur og menn hava arbeitt við at skapa eitt listaverk, har tey hava bundið fløskur, sum eru á veg í endurnýtslu ella enda sum burturkast. Verkstovan hevur verið ein bundin samrøða um plast, fløskur, binding, skulptur og komandi panthøllina í Sandavági.
Bjarni Prior, borgarstjóri bjóðaði vælkomin og setti orð á týdningin av at geva Haraldsstovuhandlinum nýtt lív og nýtt innihald. Síðani greiddi Randi Samsonsen, listakvinna frá arbeiðinum við verkstovuni og tonkunum handan FLØSKUR, sum ætlanin er at handa IRF til nýggju panthøllina í Sandavági.
Røðan hjá borgarstjóranum kann lesast við at klikkja á leinkjuna í viðmerkingunum.
Myndir: Krutl / Jonas G. Rossum
