17/05/2026
🇫🇴ÁRNI 60 ÁR🇫🇴
Tað eru fá, sum eru so forvitin, lurtandi og nærløgd sum Árni. Tá hann fer undir at kanna eitt mál, gevst hann ikki, fyrr enn hann hevur gjøgnumgingið og kannað allar hugsandi smálutir og sett allar spurningar, sum setast kunnu.
Góðir eginleikar, sum ikki bara gagna okkum í Fólkaflokkinum, men allari politisku skipanini. Tí okkum tørva fólk, sum duga at lurta – og tað ger Árni. Árni ikki bara lurtar, men er altíð sakligur og sera virðiligur í øllum orðadrátti. Serliga, tá hann tosar við onkran, hann er ósamdur við.
Árni Skaale er sera virkin. Umframt at vera politikkari er hann familjumaður, vinnulívsmaður, har hann eigur og rekur fyritøkuna Look North. Árni er treiskur sum fáur, og veit frá egnum royndum, hvat krevst fyri at fáa ting at henda – og ikki minst eydnast.
Og ikki at gloyma, so er Árni skóti við stóra S. Júst tað hevur myndað hann í øllum, hann tekst við - sum leiðari, politikkari og sum menniskja sum heild. Har skótavirðini, sum snúgva seg um felagsskapin og at rúma øðrum, hava alt at siga.
Vit í Fólkaflokkinum ynskja tær hjartaliga til lukku við degnum, og takka tær fyri títt stóra og virðismikla íkast til flokkin.
Tit eru øll hjartaliga vælkomin at ynskja Árna Skaale til lukku👇🏼
