10/05/2025
Nógv fólk vóru samlaði til Grøna kvøldi í Kaldbakshøllini hóskvøldið, har umhvørvið var á breddanum. Nógv spennandi innsløg vóru, sum bæði vóru kunnandi og lærurík.
Kristianna W. Poulsen legði fram úrslitini frá borgarafundinum um umhvørvispolitikkin hjá Tórshavnar Kommunu, Gittemarie Johansen greiddi frá Greenwashing og Guðrið Hansdóttir og Heiðrik framførdu. Eisini fingu fólk leskiligan mat, sum var framleiddur úr staðbundnum ráðvørum.
Eisini bleiv avdúkað, hvør fekk umhvørvisstuðulin og Grønu virðislønina frá Tórshavnar Kommunu og Grønu gávuna frá Etika.
Fleiri spennandi umsóknir komu inn og 7 verkætlanir fingu stuðul. Tey sum fingu stuðul vóru hesi, og tey fingu áljóðandi upphæddir:
Inspiratiónsgarður við vakstrartunli, Norðurlandahúsið – 10.000 kr.
Lánitrillibørur í Nólsoy – 20.000 kr.
Ednulundin, Fríøkið norðuri í Stong, Nólsoy – 25.000 kr.
Vakstrarhús, Serbreytin á Glasi – 40.000 kr.
Vakstrartunnil, Felagsveltan á Velbastað – 40.000 kr.
Fríøkið við Krossá, Kaldbak – 40.000 kr.
Umhvørvisstøð til túnabúgvar, Grannalagið í Krossgøtu – 150.000 kr.
Tá virðislønirnar vóru handaðar, var tíðin komin til Grønu virðislønina frá Tórshavnar Kommunu, og Grønu gávuna frá Etika, sum er ein peningalig gáva, sum kemur inn fyri sølu av vatni í matstovunum. Í ár var upphæddin 49.640kr.
Grøna virðislønina frá Tórshavnar Kommunu fór til Tjóðhild Patursson. Grundgevingin var, at hon, við at veita skeið og kunning, undirvísa og reka matstovur, sum leggja dent á lokalar rávørur og laga seg eftir árstíðini, slóðar fyri einum nýggjum hugburði til matgerð og matnýtslu í Føroyum, og gevur íblástur til hvussu tú við góðum mati kanst betra um bæði heilsu og vælveru.
Grøna gávan í ár varð latin verkætlanini NýNý hjá Bláa krossi. NýNý er seymistova, sum seinastu skjótt 6 árini hevur slóðað fyri nýnýtslu av klæðum. Nýnýtsla er tað, sum á enskum eitur upcycling. Umframt at framleiða m.a. barnaklæðir burturúr klæðum, sum verða latin til endurnýtslu, men ikki verða seld, so er NýNý eisini ein verkstaður, har ein og hvør kann koma og seyma sær eitt nýtt plagg úr endunýtslutilfari, ella broyta, bøta og betra eitt gamalt. Og NýNý hevur fólk á staðnum, sum vegleiða og leggja lag á.
NýNý hevur sett gongd á eina móta- ella klædnaringrás í Føroyum, sum minkar um klædnaburturkast og gevur fólki møguleika og førleika til at fáa eitt burðardyggari klædnaskáp.
Eitt gevandi og mennandi kvøld í Kaldbak og verður tað spennandi at fylgja við í ymsu verkætlanunum, og hvussu tey fara at gera sína jaligu ávirkan á umhvørvi í Tórshavnar Kommunu.
