30/07/2026
“Xukuumaddii Xalka ahayd Ee Aan Xulka Ahayn”
Dalkeennu wuxuu noqday guri dusha ka qurux badan, hoostana ka madow. Bilicda muuqata laguma qarin karo duruufaha adag ee ay shacabka intooda badan la tacaalayaan.
Shacabku waxay codkooda ku doorteen xukuumad ay ka filayeen isbeddel, caddaalad iyo xal. Waxay rajaynayeen in laga baxo xaaladihii cakirnaa ee dalka ka jiray, balse maanta dareenka jira wuxuu yahay in halkii xal laga filayay ay xaalado badani sii adkaadeen.
Waxaa ka sii murugo badan in shacabka dulman, bukaanka, danyarta iyo qof kasta oo ka hadla dhibaatada haysata lagu jawaabo hadallo u muuqda eedayn, iyadoo la leeyahay, “Dawlado kale ayaa idinka dambeeya” ama “Cid kale ayaa idinku shaqaysanaysa.” Haddii cabashada shacabka, Haldoorka, Aqoonyahanka iyo Xusbiyada mucaardku jawaabtoodu noqoto eedayn, yaa markaa shacabka u hadlaya?
Waxyaabaha qaar xitaa caqliga saliimka ahi wuu ka xishoodaa in lagu hadlo, balse maanta waxaad mooddaa in jawaabtii xukuumaddu noqotay, “Adigu yaad Tahay iyo waa lagugu adeeganayaa?” ama “Yaad u shaqaysaa?” Halkii shacabka loo soo bandhigi lahaa qorshe iyo xal, waxaa la sii hurinayaa kala shaki iyo kala fogaan.
Jawaabihii ka soo baxay masuuliyiinta Wasaaradda Caafimaadka waxay noqdeen kuwo dood cusub abuuray, balse aan shacabka u soo bandhigin xal ay ku qancaan. Bulshadu ma sugayso hadallo; waxay sugaysaa adeeg caafimaad oo hagaaga, dawo la heli karo iyo nidaam wax ka qabta cabashadooda.
Waxaa ka sii daran marka masuul xil qaran haya uu waqtigiisa ku bixiyo waxyaabo aan bulshada waxba u kordhinayn, halkii laga filayay inuu ka shaqeeyo xalinta dhibaatooyinka shacabka.
Balse jawaab waxay uga dhigeen Nin laleeyahayaw adigu yaad leedahay iyo Wasiirki dhamaa ee caafimadka oo yidhaahda dawlado kalaa idinku shaqaysta iyo Agaasimihi wasaarada oo isaguna heesaha dhalinyarta Rap ka qaada intu isku soo duubo shacabka ugu jawaabo Noloshayda laga xun yahay iyo Hollywood baan gelayaa waa mid subhanallah.
Maanta Waxaan lahadlaya shacabka caqliga saliimka ah iyo kuwa aan qabyaaladdu indhaha tirin. Iyaga ayaa looga fadhiyaa inay si miyir leh ula xisaabtamaan cid kasta oo ay codkooda ku aamminaan hoggaanka dalka.
Xukuumad laga cabanayo oo shacabka u soo gurmanaysa ma muuqato. Cabashooyinka la xidhiidha nolosha, caafimaadka, waxbarashada, shaqo la’aanta iyo hoy la’aantu way sii badanayaan, halka masuuliyiintuna u muuqdaan kuwo ku mashquulsan difaac iyo marmarsiinyo.
Madaxweynihi ay rajada ka sugayeen ee dalka ugu sareeyay ayaa cagaf geliyay shacabkisii oo caawa hoy la,aan ah.
Dawladnimadu ma aha in shacabka lagu canaanto markay cabanayaan. Dawladnimadu waa in shacabka loo adeego. Xilku sharaf ma aha ee waa masuuliyad. Qofka xilka loo dhiibay waxaa lagu qiimeeyaa waxa uu bulshada u qabto, ee laguma qiimeeyo hadallada uu ku weeraro shacabka.
Shacabka Somaliland waxay mudan yihiin dawlad dhegaysata cabashadooda, ilaalisa karaamadooda, kana shaqaysa dantooda. Waxaase muuqata in rajadii isbeddelka ay isu beddeshay niyad-jab iyo su’aalo badan oo aan weli jawaab loo hayn.
Waxaan ugu baaqayaa shacabka sharafta leh ee reer Somaliland inay codkooda si nabad ah u muujiyaan, isla markaana ay dalbadaan isla-xisaabtan dhab ah. Waxaan sidoo kale ugu baaqayaa culimada, waxgaradka, aqoonyahanka iyo dhammaan qaybaha bulshada inay ka hor yimaaddaan dulmi kasta, kana shaqeeyaan badbaadinta qaranka iyo danta guud.
Shacabka ayaa xukunka bixiya, shacabka ayaana xisaabta qaada. Xil kasta waa dhammaanayaa, laakiin taariikhdu way hadhaysaa.
Wabillaahi Tawfiiq.
Xooghaya xisbiga kaah ee magaalada Sheffield
Cabdiqani cali Yuusuf(Bulay)
