12/08/2026
სანამ საქართველოს მთავრობის წევრები იმას გვიმტკიცებენ, თუ რა კარგად ცხოვრობს საქართველო მათი მმართველობის პირობებში, ამასობაში თურქეთის პარლამენტიდან ჩვენი ქვეყნის მისამართით ღიად არამეგობრული განცხადებები გაჟღერდა.
თურქი დეპუტატები 10 პოლიტიკური პარტიიდან ანკარას მოუწოდებენ, აღიაროს აფხაზეთის დე ფაქტო პასპორტები და დაამყაროს პირდაპირი საზღვაო და საჰაერო მიმოსვლა თურქეთსა და აფხაზეთს შორის. ჯამში, ეს პოლიტიკური ძალები თურქეთის პარლამენტში 206 მანდატს ფლობენ, რაც პარლამენტის დაახლოებით 34%-ს შეადგენს.
ერთ-ერთი ვერსიით, ეს განცხადებები შიდა თურქული აუდიტორიისთვის გაკეთდა. თურქეთში საკმაოდ ძლიერი ჩერქეზულ-აფხაზური დიასპორაა, რომელიც აქტიურად ლობირებს აფხაზეთის საკითხს. თუმცა, საკმაოდ საგანგაშოა ის ფაქტი, რომ მოქმედი პარლამენტის დაახლოებით ერთი მესამედი ამგვარ პოზიციას იზიარებს.
ოფიციალური ანკარა ჯერჯერობით ემიჯნება თურქეთის პარლამენტში გაჟღერებულ ანტიქართულ განცხადებებს, თუმცა არ უნდა დაგვავიწყდეს, რომ თანამედროვე თურქეთი სულ უფრო აქტიურად ავლენს საკუთარ გეოპოლიტიკურ ამბიციებს. თურქეთს დღემდე ოკუპირებული აქვს კვიპროსის ჩრდილოეთი ნაწილი, აქტიურად ერევა მეზობელი ქვეყნების საშინაო საქმეებში. ერდოღანმა 2020 წელს მეჩეთად გადააქცია და დემონსტრაციულად ილოცა აია-სოფიაში, რომელიც ჯერ კიდევ ათათურქის დროს იყო მუზეუმად გამოცხადებული. გარდა ამისა, ანკარა დღემდე აყენებს თურქი-მესხების ჩამოსახლების საკითხს.
ის, რომ თურქეთს ექსპანსიური გეოპოლიტიკური ამბიციები გააჩნია და, მათ შორის, საქართველოსაც საკუთარი გავლენის სფეროდ განიხილავს, საკითხის მცოდნე ადამიანებისთვის სიახლეს არ წარმოადგენს. თუმცა, განსაკუთრებით საგანგაშოა ქართული მხარის სრული დუმილი.
თურქეთის პარლამენტში გაჟღერებულ ანტიქართულ გზავნილებს საქართველოს მხრიდან თუნდაც ფორმალური პროტესტიც კი არ მოჰყოლია. მეტიც, არც ერთ მსხვილ ქართულ მედიასაშუალებას არ გაუვრცელებია აღნიშნული ინფორმაცია.
სიმბოლურია ისიც, რომ დღეს დიდგორობაა - ქართველთა ისტორიული გამარჯვების დღე თურქ-სელჩუკთა იმპერიის წინააღმდეგ. ისტორია გვახსენებს, რომ რეგიონში დიდი სახელმწიფოების გეოპოლიტიკური ამბიციები არასდროს ქრება. ხოლო სახელმწიფოს, რომელიც საკუთარ ეროვნულ ინტერესებს სათანადოდ ვერ იცავს, ყოველთვის ემუქრება საფრთხე, გახდეს სხვათა გეოპოლიტიკური ინტერესების ობიექტი.
