22/06/2026
მაია ახალკაცი: “ვეზირიშვილების სასახლე უნდა შევინარჩუნოთ. ეს ჩვენი, ხაშურელების ღირსების საქმეა”
არ შემიძლია არ გამოვეხმაური სოფელ ოსიაურში ვეზირიშვილების სასახლის სავალალო მდგომარეობას.
ბევრი წელია ხაშურელები ამ თემაზე ვბჭობთ, ვმსჯელობთ, მოდიან და მიდიან მუნიციპალიტეტის, კულტურული მემკვიდრეობის დაცვის ეროვნული სააგენტოს ხელმძღვანელები, იღებენ გადაწყვეტილებებს, მაგრამ არაფერი იცვლება თვითონ შენობის მდგომარეობის გარდა - წლიდან წლამდე უარესი, პრაქტიკულად დანგრეული, ნაგვით და ნანგრევებით სავსე.
ვიღაცისთვის, შესაძლოა, ეს მხოლოდ ნაგვის ბუდეა, რომელიც მას დისკომფორტს უქმნის, მაგრამ ხაშურელთა უმეტესობისთვის ეს სასახლე ნიშნავს ჩვენი ქვეყნის ისტორიას, ნიშნავს ჩვენს სასახელო ადამიანებს - ბარათაშვილებს, მაჩაბლებს. მისი ასეთი მდგომარეობა ნიშნავს იმას, რომ ვერ ვივარგეთ ვერც ხელისუფლებამ და ვერც ხალხმა, რადგან ღირსეული მოქალაქეები მემკვიდრეობას ასე არ კარგავენ.
მე როგორც საკრებულოს რიგითი წევრი, ამ საკითხს აუცილებლად დავსვამ საკრებულოს სხდომაზე, მოვითხოვ ქალაქის მერთან არსებული მრჩეველთა საბჭოს გაფართოებულ შეხვედრას ამ თემაზე, მოვითხოვ ყველა შესაძლებლობის და რესურსის გამოყენებას, კულტურული მემკვიდრეობის დაცვის ეროვნული სააგენტოს აქტიურ ჩართულობას, რომ ეს საქმე სასახლის და საბოლოოდ ჩვენი მუნიციპალიტეტის სასარგებლოდ დამთავრდეს.
