17/08/2026
ყაზბეგის მუნიციპალიტეტის მასშტაბით, საგზაო და მუნიციპალური ინფრასტრუქტურის გაუმჯობესების მიზნით, პროექტები აქტიურად მიმდინარეობს.
მიმდინარე სამუშაოები ითვალისწინებს საავტომობილო გზების საფუძვლის მომზადებასა და ასფალტ-ბეტონის საფარის მოწყობას, დამცავი ჯებირებისა და სანიაღვრე სისტემების მშენებლობას, ტროტუარებისა და გარე განათების განახლებას, ასევე საჰაერო კომუნიკაციების ეტაპობრივად მიწისქვეშ განთავსებას. რამდენიმე ქუჩაზე დაგეგმილია მწვანე ნარგავების გაშენება და შესაბამისი ინფრასტრუქტურის მოწყობა.
ამ ეტაპზე ხელშეკრულებები გაფორმებულია და ხორციელდება შემდეგი პროექტები:
სოფელ ყანობში მიმდინარეობს სანიაღვრე ქსელის მშენებლობა, რომლის დასრულების შემდეგ მოეწყობა ასფალტ-ბეტონის საფარი;
სოფელ ხურთისის გზაზე მოეწყო გზის დამცავი ჯებირი და თოვლდამჭერი ღობე;
სოფელ გარბანში მიმდინარეობს შიდა ცენტრალური გზის სანიაღვრე სისტემის მოწყობა, რის შემდეგაც დაიგება ასფალტ-ბეტონის საფარი;
დაბა სტეფანწმინდაში, ალექსანდრე ყაზბეგის ქუჩაზე მიმდინარეობს სრული რეაბილიტაცია — ეწყობა ტროტუარები, მოაჯირები, სანიაღვრე სისტემები და ახალი გარე განათების ინფრასტრუქტურა;
გერგეტის უბანში მიმდინარეობს შიდა ცენტრალური გზის ასფალტ-ბეტონის საფარის მოწყობის სამუშაოები;
უახლოეს დღეებში დაიწყება დაბა სტეფანწმინდაში თბილისის ქუჩის სრული რეაბილიტაცია; პარალელურად, დაბა სტეფანწმინდაში მიმდინარეობს შიდა საუბნო გზების ორმოული შეკეთება;
მიმდინარეობს არშის, გორისციხის, სტეფანწმინდისა და სიონის სკოლების შესაბამისი ინფრასტრუქტურის გაუმჯობესების სამუშაოები, მათ შორის სოფელ სიონში საფეხბურთო მოედნის მოწყობა;
მიმდინარეობს სნოსა და სტეფანწმინდის საბავშვო ბაღების რეაბილიტაცია და განახლება;
დაიწყო დაბა სტეფანწმინდაში რაგბის სტადიონის მშენებლობა.
აღნიშნული პროექტების განხორციელება მნიშვნელოვნად გააუმჯობესებს როგორც საგზაო და საინჟინრო ინფრასტრუქტურას, ასევე მოსახლეობის ყოველდღიურ საცხოვრებელ პირობებს, უსაფრთხოებასა და მუნიციპალიტეტის ტურისტულ გარემოს.
„მუნიციპალიტეტის მასშტაბით დაგეგმილია არაერთი სხვა სამშენებლო, სარეაბილიტაციო და ინფრასტრუქტურული პროექტის ეტაპობრივი განხორციელება. თითოეული ახალი პროექტისა და დაგეგმილი სამუშაოს შესახებ მოსახლეობას დამატებით მივაწვდით დეტალურ ინფორმაციას.
კარგად გვესმის, რომ მუნიციპალიტეტში ჯერ კიდევ არსებობს არაერთი ინფრასტრუქტურული საჭიროება, რომელიც შესაბამის რეაგირებას მოითხოვს. არსებული რესურსებისა და შესაძლებლობების ფარგლებში, ეტაპობრივად გაგრძელდება სამუშაოები როგორც დაბა სტეფანწმინდაში, ისე მუნიციპალიტეტის სოფლებში.
ჩვენი მიზანია, ინფრასტრუქტურის განვითარება ეტაპობრივად შეეხოს მთელ მუნიციპალიტეტს და განხორციელებული პროექტები პასუხობდეს მოსახლეობის რეალურ საჭიროებებს.
ასევე გვინდა, ბოდიში მოვუხადოთ მოსახლეობასა და ჩვენს სტუმრებს მიმდინარე სამუშაოებით გამოწვეული დროებითი დისკომფორტისთვის.
სამწუხაროდ, სამუშაოების მნიშვნელოვანი ნაწილი ტურისტული სეზონის პიკურ პერიოდს ემთხვევა. ყაზბეგის მაღალმთიანი კლიმატური პირობებისა და მოკლე სამშენებლო სეზონის გამო, სამშენებლო ნორმებისა და ტექნოლოგიური მოთხოვნების დაცვით, მთელი რიგი გარე სამუშაოების შესრულება წლის სხვა პერიოდში პრაქტიკულად შეუძლებელია.
სწორედ ამიტომ მაქსიმალურად ვიყენებთ ხელსაყრელ სამშენებლო პერიოდს, რათა დაგეგმილი პროექტები ხარისხიანად, უსაფრთხოდ და დროულად განხორციელდეს." - განაცხადა ყაზბეგის მუნიციპალიტეტის მერმა კობა გელაძემ.
