იმერეთი • ძლიერი საქართველო

04/09/2026

"ძლიერი საქართველო - ლელოს" იმერეთის რეგიონის პოლიტიკური კურატორი და ადგილობრივი ლიდერები ქუთაისში გერმანიის საელჩოს კულტურის, პრესისა და პოლიტიკის ატაშეს, რებეკა ლინჰოფს შეხვდა და იმერეთის რეგიონში მიმდინარე პროცესები გააცნო

04/09/2026

"ძლიერი საქართველო - ლელოს" იმერეთის რეგიონის პოლიტიკური გუნდი ქუთაისში გერმანიის საელჩოს კულტურის, პრესისა და პოლიტიკის ატაშეს, რებეკა ლინჰოფს შეხვდა და იმერეთის რეგიონში მიმდინარე პროცესები გააცნო.

შეხვედრაზე საუბარი შეეხო იმ გამოწვევებს, რომელსაც "ძლიერი საქართველო - ლელო" ადგილობრივ საკრებულოებში მუშაობისას აწყდება. ამასთან ერთად, კოალიციის წარმომადგენლებმა გერმანიის საელჩოს ატაშეს მიაწოდეს ინფორმაცია ქვეყანაში არსებული რეპრესიული კანონმდებლობისა
და პოლიტიკურად მოტივირებული პროცესების შესახებ.

შეხვედრას "ძლიერი საქართველო - ლელოს" იმერეთის რეგიონის პოლიტიკური კურატორი თორნიკე ართქმელაძე, ქუთაისის ორგანიზაციის წევრი ვანო კაპანაძე, სამტრედიის საკრებულოს წევრი გივი ჯულაყიძე, ჭიათურის საკრებულოს წევრი დავით ჭუმბურიძე და კოალიციის ტყიბულის ორგანიზაციის წევრი ლაშა ბოჭორიშვილი ესწრებოდნენ.

02/09/2026

02/09/2026

"ძლიერი საქართველო - ლელოს" ლიდერებმა 3 ოქტომბრის შუალედურ არჩევნებში მონაწილე მაჟორიტარობის კანდიდატებთან დღეს სამუშაო შეხვედრა გამართეს. მაჟორიტარობის კანდიდატებმა საარჩევნო პროგრამა წარადგინეს და იმ პრობლემებზე ისაუბრეს, რომელიც ადგილობრივ მოსახლეობას წლების განმავლობაში აწუხებს.

"ძლიერი საქართველო - ლელოს" ლიდერების განცხადებით, მათთვის მნიშვნელოვანია თითოეული მოქალაქე და მისი ინტერესების დაცვა.

📍 წალკის საარჩევნო ოლქში, რომელიც აერთიანებს სოფლებს: იმერას, ბარეთს, საბეჭისსა და ლივადს, "ძლიერი საქართველო - ლელოს" კანდიდატი იქნება ზაზა შანთაძე.

📍 ვანის მუნიციპალიტეტის სოფელ ფერეთაში კოალიციას ბექა კოპალაძე წარმოადგენს.

📍 დმანისის მუნიციპალიტეტის სოფელ სარკინეთში კი "ძლიერი საქართველო - ლელოს" კანდიდატი ვაჟა ნონიაშვილი იქნება.

"ძლიერი საქართველო" არც ერთ მოქალაქეს არ დატოვებს მარტო და არც ერთი ადამიანის ინტერესს არ დათმობს. სადაც მოქალაქეა, იქ უნდა იყოს მისი პოლიტიკური წარმომადგენელიც, ჩვენი მთავარი ვალდებულება ადამიანების ინტერესების დაცვაა. ავტორიტარული რეჟიმი არაფერს თმობს ბრძოლის გარეშე, ეს ბრძოლა ყველა პოლიტიკურ სივრცეში უნდა გაგრძელდეს. ამიტომ "ლელო" არ ტოვებს ბრძოლის არც ერთ ველს. ჩვენ ერთდროულად ვაგრძელებთ ბრძოლას საერთაშორისო მიმართულებით, საზოგადოებრივ პროტესტში, ინსტიტუციურ სივრცეში, ადგილობრივ თვითმმართველობებში და რა თქმა უნდა, არჩევნებში!

02/09/2026

ვანო კაპანაძე “ ქუთაისის მე-4 და მე-7 საჯარო სკოლებში სწავლა წელსაც არ დაიწყება”

“ძლიერი საქართველო -ლელო”-ს ქუთაისის ორგანიზაციაში აცხადებენ, რომ ქალაქის ორი დიდი და მნიშვნელოვანი სკოლა - მე-4 და მე-7 საჯარო სკოლები წელსაც ვერ მიიღებენ მოსწავლეებს.
“ქუთაისის მე–4 სკოლა სრულიად დანგრეულია. სკოლა 4 წლის წინ იმ დაპირებით დაანგრიეს, რომ უახლოეს მომავალში ახალი და თანამედროვე საგანმანათლებლო შენობა აშენდებოდა, თუმცა ამ დრომდე სამუშაოები არ დაწყებულა. მოსწავლეები და პედაგოგები კი დროებით მე-13 საჯარო სკოლაში არიან შეხიზნულები.
მძიმე მდგომარეობაა ქუთაისის მე–7 საჯარო სკოლაშიც. სკოლა 2 წელზე მეტია პრაქტიკულად “გამოშიგნეს” და მიატოვეს. სარემონტო სამუშაოები დაწყებულიც არ არის და არც ისაა ცნობილი, როდის გამოცხადდება ტენდერი სკოლის რეაბილიტაციაზე,”- განაცხადა ვანო კაპანაძემ.

07/08/2026

"ძლიერი საქართველო - ლელოს" ქუთაისის ორგანიზაციის წევრები 2008 წლის აგვისტოს ომში დაღუპულთა მემორიალთან მივიდნენ და საქართველოს ტერიტორიული მთლიანობისათვის ბრძოლაში დაღუპულთა ხსოვნას პატივი მიაგეს.

05/08/2026

ბორის გაბრიაძე : ”წლებია, წყალმომარაგება ტყიბულისთვის ერთ-ერთი სერიოზული პრობლემაა”

ტყიბულის მუნიციპალიტეტის საკრებულოს წევრი “ძლიერი საქართველო - ლელოდან” ბორის გაბრიაძე რამდენიმე დღის წინ ტყიბულის მერის მიერ სტრუქტურული ერთეულების ხელმძღვანელებთან გამართულ სამუშაო შეხვედრაზე გაკეთებულ განცხადებას ეხმაურება. შეხვედრაზე მერმა ყურადღება გაამახვილა ქალაქში წყალმომარაგების მოწესრიგებაზე და აღნიშნა, რომ ამ პრობლემის გადაჭრა თვითმმართველობის ერთ-ერთი მთავარი პრიორიტეტია.
ბორის გაბრიძაის განცხადებით წყალმომარაგების პრობლემა წლებია დგას ტყიბულის და მისი სოფლების წინაშე, ყველა მერი დაპირებებს იძლევა, მაგრამ ცალკეული გამონაკლისების გარდა თვითონ ქალაქსა და მუნიციპალიტეტის სოფლებში ეს პრობლემა მოუგვარებელია. არც ამ განცხადების უკან დგას რაიმე კონკრეტული ვადები ან ის არეალი, სადაც უახლოეს პერიოდში მოგვარდება წყლის პრობლემა: “მაგალითად, არავინ იცის, როდის ექნება წყალი ჩაის ფაბრიკის დასახლებას ან აფხაიძის ქუჩას. ასევე, მუნიციპალიტეტის მერის ეს განცხადება არანაირი ნუგეში არ არის სოფელ მინდიკორის, კოკას და სხვა სოფლების მოსახლეობისთვის, რომლებსაც წყალი არ აქვთ და კონკრეტულ პასუხებს ელოდებიან”, - განაცხადა ბორის გაბრიაძემ.

01/07/2026

ქუთაისში “ძლიერი საქართველო-ლელოს” იმერეთის ადგილობრივი ორგანიზაციების ლიდერების შეხვედრა გაიმართა

30 ივნისს ქუთაისში “ძლიერი საქართველო-ლელოს” იმერეთის ადგილობრივი ორგანიზაციების ლიდერების შეხვედრა გაიმართა.

შეხვედრას პარტიის რეგიონული მდივანი მამუკა კაციტაძე უძღვებოდა.

შეხვედრაზე განიხილეს ადგილობრივ პარტიულ ორგანიზაციებში და საკრებულოებში არსებული მდგომარეობა და პრობლემები, პარტიული ორგანიზაციების გაძლიერების და განვითარების ამოცანები, იმსჯელეს მიმდინარე პოლიტიკურ საკითხებზე.

15/06/2026

თედო ჭოლაძე : “ცივ ტბას არავინ უვლის ისე, როგორც საჭიროა, და რეაბილიტაციის შემდეგ ფაქტიურად ძველ მდგომარეობას დაუბრუნდა”

წყალტუბოში ცივი ტბის რეაბილიტაცია თადააპირველად 2016 წელს განხორციელდა. შემდეგ 2023 წელს ხელახლა მოხდა ტბის და მიმდებარე ტერიტორიის სრულმასშტაბიანი რეაბილიტაცია. ამ პროექტისთვის “ქალაქების და კურორტების განვითარების” პროგრამის ფარგლებში 16 მლნ. ლარი გამოიყო.

რეაბილიტირებული ტბა და მის გარშემო სივრცე ზარ-ზეიმით გაიხსნა, მაგრამ ერთ წელიწადში ბევრი რამ მოიშალა.
ადგილობრივები აცხადებენ, რომ თვითონ რეაბილიტაციის პროცესში ცივი ტბა სათანადოდ არ გაიწმინდა და ახლა ისევ სავალალო მდგომარეობაშია. მაგრამ, რაც მთავარია, წყალტუბოს მერია ტბის გარშემო სივრცის და თვითონ ტბის მდგომარეობის მონიტორინგს არ ახორციელებს და არც სათანადო ზომებს იღებს მისი წესრიგში ყოფნისთვის. ტბას სისტემატური გაწმენდა ესაჭიროება და მხოლოდ რეაბილიტაციის ფარგლებში არ უნდა ხდებოდეს მისი გასუფთავება.

როგორც “ძლიერი საქართველო-ლელოს” საკრებულოს წევრი წყალტუბოს მუნიციპალიტეტის საკრებულოში თედო ჭოლაძე აცხადებს “ცივი ტბა” წყალტუბოს სახე და სავიზიტო ბარათია და მისი მოვლა ადგილობრივი ხელისუფლების პრეროგატივაა: “ტბა რეაბილიტაციიდან რეაბილიტაციამდე კი არ უნდა იწმინდებოდეს, არამედ ეს უნდა იყოს სისტემატური პროცესი. ასევე, საჭიროა ტბის ირგვლივ ტერიტორია მუდმივად დასუფთავდეს, წესრიგი და სისუფთავე, ნარგავების განახლება, ინვენტარის შეკეთება - ეს ყოველდღიური საქმიანობა უნდა იყოს და არა ეპიზოდური. ამ საკითხს საკრებულოს სხდომაზე დავსვამ”, - განაცხადა თედო ჭოლაძემ.

02/06/2026

მიხეილ ჭიპაშვილი: „რა გვაქვს დასამალი, რატომ ვეწინააღმდეგებით საკრებულოს სხდომის პირდაპირი ეთერით გადაცემას, რა გვაშინებს“


ხარაგაულის მუნიციპალიტეტის საკრებულოს დღევანდელ სხდომაზე მიხეილ ჭიპაშვილმა, საკრებულოს წევრმა კოალიციიდან „ლელო – ძლიერი საქართველო“, სხდომის პირდაპირ ეთერში გადაცემა მოითხოვა. ამის საჭირობა კი იმით დაასაბუთა, რომ მოსახლეობას აინტერესებს, რას და როგორ საქმიანობენ დეპუტატები, რა გადაწყვეტილებებს იღებენ, რას უჭერენ მხარს და რას ეწინააღმდეგებიან.

საკრებულომ ამ საკითხს, დებულების თანახმად, კენჭი უყარა. სხდომის პირდაპირ ეთერში გადაცემას მხარი მხოლოდ დეპუტატმა გივი მაისურაძემ (პარტიიდან „გახარია საქართველოსთვის“) დაუჭირა.

„რა გვაქვს დასამალი, რატომ ვეწინააღმდეგებით საკრებულოს სხდომის პირდაპირი ეთერით გადაცემას, რა გვაშინებს“, – მიმართა მიხეილ ჭიპაშვილმა კოლეგებს.

დეპუტატებმა „ქართული ოცნებიდან“ განაცხადეს, რომ საკრებულოს სხდომები ღია და გამჭვირვალეა და დასწრების უფლება ყველა მოქალაქეს აქვს, სხდომებს მედია აშუქებს.

მიხეილ ჭიპაშვილი აპირებს, რომ საკრებულოს პირდაპირ ეთერში სხდომის გადაცემაზე უარის დასაბუთება მოსთხოვოს.

ამ ინფორმაციას დამოუკიდებელი მედიაგამოცემა “ჩემი ხარაგაული” აქვეყნებს.