06/08/2026
ლაგოდეხის მუნიციპალიტეტის საკრებულოში წყალმომარაგების სისტემის განვითარების მიზნით პროექტის საჯარო განხილვა გაიმართა.
შეხვედრას საქართველოს ინფრასტრუქტურის მინისტრის მოადგილე გიორგი კობერიძე, საქართველოს პარლამენტის წევრი გურამ მაჭარაშვილი, კახეთის მხარეში სახელმწიფო რწმუნებული პლატონ კალმახელიძე, შპს „საქართველოს გაერთიანებული წყალმომარაგების კომპანიის“ დირექტორი ბესიკ ჯიქურაული, კომპანიის დირექტორის მოადგილე აკაკი მშვიდობაძე, ლაგოდეხის მუნიციპალიტეტის საკრებულოს თავმჯდომარე კახა ჯამბურია, ლაგოდეხის მუნიციპალიტეტის მერი ჯონდო მდივნიშვილი, ადგილობრივი თვითმმართველობის წარმომადგენლები, კომპანიის თანამშრომლები და დაინტერესებული მოქალაქეები ესწრებოდნენ.
შეხვედრის ფარგლებში მოსახლეობას წარედგინა წყალმომარაგების სისტემის განვითარების სამი შესაძლო ტექნიკური გადაწყვეტა, რომლებიც ითვალისწინებს წყლის რესურსის გაზრდას, ახალი წყალაღების შესაძლებლობების შექმნას, საფილტრი სადგურის მოწყობასა და შესაბამისი ინფრასტრუქტურის განვითარებას.
პრეზენტაციის დასრულების შემდეგ შეხვედრა კითხვა-პასუხისა და ღია დისკუსიის ფორმატში გაგრძელდა. მონაწილეებს შესაძლებლობა ჰქონდათ გაცნობოდნენ თითოეული ალტერნატივის დეტალებს, დაესვათ კითხვები და წარმოედგინათ საკუთარი მოსაზრებები.
ადგილობრივმა მოსახლეობამ ყველაზე მეტი მხარდაჭერა იმ ტექნიკურ გადაწყვეტას გამოუცხადა, რომელიც N4 სანიტარული ზონის ტერიტორიაზე ან მის მიმდებარედ ახალი ჭაბურღილების მოწყობასა და წყალმომარაგების სისტემისთვის საჭირო ინფრასტრუქტურის განვითარებას ითვალისწინებს.
