30/05/2026
📍 თუშეთის გზის გახსნა ყოველწლიურად პრობლემად რჩება.
მაშინ, როდესაც მსოფლიო მარსზე გაფრენისთვის ემზადება 🚀, თუშეთის ერთადერთი დამაკავშირებელი გზის გახსნა კვლავ რამდენიმე ერთეულ ტექნიკაზეა დამოკიდებული, რომელთა ნაწილი ჯერ კიდევ საბჭოთა პერიოდიდან არის შემორჩენილი.
❗️გამოსავალი გაცილებით მარტივია, ვიდრე ეს შეიძლება ერთი შეხედვით ჩანდეს.
სახელმწიფომ უნდა შეიძინოს 2–3 ერთეული თანამედროვე, მაღალი გამავლობის მძიმე ტექნიკა, რომლის ღირებულება დაახლოებით 600–700 ათასი დოლარი იქნება. ეს ტექნიკა ათეულობით წლის განმავლობაში მოემსახურება თუშეთს და მნიშვნელოვნად შეამცირებს გზის გახსნასთან დაკავშირებულ რისკებსა და შეფერხებებს.
🚜 მნიშვნელოვანია, რომ ტექნიკის ნაწილი ზამთრის პერიოდში თავად თუშეთში დარჩეს, ხოლო საწვავის აუცილებელი მარაგები შემოდგომაზევე შეიქმნას.
🏔️ თუ აბანოს უღელტეხილზე სამუშაოები ერთდროულად ორივე მხრიდან, თანამედროვე ტექნიკის გამოყენებით განხორციელდება, გზის გახსნა გაცილებით ადრე და ეფექტიანად იქნება შესაძლებელი.
💰 600–700 ათასი დოლარი მიზერული თანხაა იმ მილიარდებთან შედარებით, რომელსაც სახელმწიფო ყოველწლიურად ინფრასტრუქტურაზე და სხვა მიმართულებებზე ხარჯავს. ამავე დროს, ეს ინვესტიცია პირდაპირ აისახება ათასობით ადამიანის ცხოვრებაზე, უსაფრთხოებაზე, ტურიზმის განვითარებასა და მთის რეგიონის მდგრადობაზე.
⏳ თუშეთს არ სჭირდება სასწაული — სჭირდება სწორი დაგეგმვა, თანამედროვე ტექნიკა და პოლიტიკური ნება.
#თუშეთი #თუშეთისგზა #აბანოსუღელტეხილი #მთისრეგიონები #რეგიონულიგანვითარება
თუშეთის გზის გახსნის მოთხოვნით, ახმეტის მუნიციპალიტეტის სოფელ ქვემო ალვანში საპროტესტო აქცია გაიმართა
აქციის მონაწილეების თქმით, თუშეთი-აბანო-ომალოს გზის გახსნის გაჭიანურება ტურისტულ სეზონს სერიოზულ ზიანს აყენებს.
უქმდება ჯავშნები, მათ შორის საცხენოსნო ტურებიც, ხოლო ტურისტული ობიექტების ნაწილს მთაში აყვანილი პერსონალისთვის ხელფასების გადახდა უწევს.
მოსახლეობა პროცესში დამატებითი რესურსის ჩართვას ითხოვს. მათი თქმით, თუშეთის დაცული ლანდშაფტის ტექნიკა, რომელიც დაზიანებულია, ხელისუფლებამ მისი შეკეთება უნდა უზრუნველყოს, რათა გზის გაწმენდა თუშეთის მხრიდანაც დაიწყოს.
ადგილობრივები ამბობენ, რომ გზის ჩაკეტვის გამო, მთაში ვერ გადაჰყავთ მსხვილფეხა საქონელიც.
გზის მოვლა-პატრონობაზე პასუხისმგებელი კომპანია „სვისკოს“ წარმომადგენლის, იასონ ბახტურიძის განცხადებით, სამუშაოებს ხელს რთული მეტეოროლოგიური პირობები და გარკვეულ მონაკვეთზე არსებული ზვავის მასა აფერხებს.
აქციის მონაწილეები უახლოეს დღეებში ახმეტის მუნიციპალიტეტის მერიაში მისვლასა და უშუალოდ მერთან შეხვედრას გეგმავენ.
