05/09/2026
გია ყრუაშვილის მიმართვა საქართველოს გენერალურ პროკურორს
მე, გულადი ყრუაშვილი მოგმართავთ ჩემი 22 წლის შვილიშვილის, დავით ბლიაძის, გარდაცვალების ფაქტთან დაკავშირებით.
2026 წლის 12 მაისს ჩემი შვილიშვილი დავით ბლიაძე გარდაცვლილი იპოვეს. ჩემი ინფორმაციით, გარდაცვალებას ნარკოტიკული ნივთიერების ზედოზირება უკავშირდება.
დავითის გარდაცვალების დღიდან ვცდილობ, დადგინდეს მისი გარდაცვალების რეალური მიზეზი და ყველა ის გარემოება, რამაც შესაძლოა მის სიკვდილამდე მიგვიყვანა. ხანგრძლივი ბრძოლის შემდეგ, როგორც იქნა, მივიღე ექსპერტიზის დასკვნა.
თუმცა, დავითის მობილური ტელეფონი დღემდე გამოძიების ფარგლებშია და მისი შესწავლა/ექსპერტიზა დასრულებული არ არის, რის გამოც ჩემთვის კვლავ პასუხგაუცემელია უმნიშვნელოვანესი კითხვები — კონკრეტულად რა უძღოდა წინ მის გარდაცვალებას, ვინ და რა ვითარებაში მიაწოდა მას ნარკოტიკული ნივთიერება და ხომ არ არსებობდა სხვა პირების მხრიდან დავითზე ზეწოლის, მუქარის, იძულების ან თანხის გამოძალვის ფაქტები.
განსაკუთრებით საეჭვოდ მიმაჩნია შემდეგი გარემოება:
გარდაცვალებამდე დაახლოებით ბოლო ორი კვირის განმავლობაში დავითს დედისთვის არაერთხელ უთხოვია 20 000 ლარი და ეუბნებოდა, რომ „შარში იყო“.
ეს ჩემთვის და მისი ოჯახის წევრებისთვის სრულიად უჩვეულო იყო. დავითს დედასთან მსგავსი საუბარი მანამდე არასოდეს ჰქონია. პირიქით — როდესაც ხელფასს იღებდა, დედას თავად ურიცხავდა თანხას და ეუბნებოდა, რომ ცოტა თანხა მისთვისაც შეენახა.
სწორედ ამიტომ ჩნდება საფუძვლიანი კითხვა: რა მოხდა დავითის ცხოვრების ბოლო კვირებში და რატომ აღმოჩნდა იგი ისეთ მდგომარეობაში, რომ დედას 20 000 ლარს სთხოვდა და ამბობდა, რომ შარში იყო?
არ მინდა და არც მაქვს უფლება წინასწარ დავასკვნა, რომ დავითის მიმართ განხორციელდა მუქარა, ძალადობა, იძულება ან თანხის გამოძალვა, ან რომ მისი გარდაცვალება თვითმკვლელობამდე მიყვანის შედეგი იყო. თუმცა მიმაჩნია, რომ აღნიშნული ვერსია აუცილებლად უნდა იქნეს გამოძიებული.
შესაძლოა, დავითზე ხორციელდებოდა ფსიქოლოგიური ზეწოლა, ემუქრებოდნენ სიცოცხლით ან ჯანმრთელობით, სთხოვდნენ თანხას, ან რაიმე სხვა გზით აიძულებდნენ ისეთ მდგომარეობაში, რომელმაც საბოლოოდ მისი დაღუპვა გამოიწვია.
განსაკუთრებით მნიშვნელოვანია დავითის ტელეფონში არსებული ინფორმაციის სრულყოფილი შესწავლა — სატელეფონო ზარები, მიმოწერები, სოციალური ქსელების შეტყობინებები, კონკრეტულ პირებთან კომუნიკაცია, თანხებთან დაკავშირებული მიმოწერა და სხვა ნებისმიერი ინფორმაცია, რომელსაც შეუძლია დაადგინოს, რა ხდებოდა დავითის გარდაცვალებამდე ბოლო დღეებსა და კვირებში.
აქედან გამომდინარე, გთხოვთ:
პირადად დაინტერესდეთ დავით ბლიაძის გარდაცვალების საქმის გამოძიებით და შეამოწმოთ, სრულყოფილად და ობიექტურად მიმდინარეობს თუ არა გამოძიება;
უზრუნველყოთ დავით ბლიაძის მობილური ტელეფონის დროული და სრული ექსპერტიზა/ციფრული მონაცემების გამოკვლევა, რათა დადგინდეს მისი გარდაცვალების წინ არსებული კომუნიკაცია და შესაძლო ზეწოლის ან მუქარის ფაქტები;
გამოიკვლიოთ დავითის მიერ გარდაცვალებამდე ბოლო ორი კვირის განმავლობაში დედისთვის 20 000 ლარის მოთხოვნის მიზეზი და დაადგინოთ, ვისთან ან რომელ გარემოებებთან შეიძლება ყოფილიყო ეს დაკავშირებული;
დაიკითხონ დავითის ოჯახის წევრები და სხვა პირები, რომლებსაც შეეძლებათ დაადასტურონ მისი ქცევის ცვლილება, მისი საუბრები, შესაძლო პრობლემები, მუქარა ან სხვა მნიშვნელოვანი გარემოებები;
შემოწმდეს, ჰქონდა თუ არა დავითს გარდაცვალებამდე პერიოდში მუქარის, იძულების, თანხის გამოძალვის ან სხვა სახის ზეწოლის ფაქტები;
დადგინდეს, ვინ მიაწოდა დავითს ნარკოტიკული ნივთიერება, რა ვითარებაში მოხდა ეს და არსებობდა თუ არა ამ პირის მხრიდან განზრახი ქმედება;
გამოძიების შედეგად გამოვლენილი გარემოებების შესაბამისად, თუ დადასტურდება სხვა პირის მიერ დავითზე განხორციელებული მუქარა, იძულება, გამოძალვა ან თვითმკვლელობამდე მიყვანის ნიშნები, მოხდეს სისხლის სამართლის საქმის შესაბამისი სამართლებრივი კვალიფიკაციის გადახედვა/შეცვლა;
წერილობით მაცნობოთ, რა საგამოძიებო მოქმედებები განხორციელდა აღნიშნული გარემოებების დასადგენად და რა ეტაპზეა ამჟამად გამოძიება.
მე არ ვითხოვ წინასწარ ვინმეს დადანაშაულებას. ვითხოვ მხოლოდ ერთ რამეს — დადგინდეს სიმართლე.
ჩემი შვილიშვილი 22 წლის იყო. თუ მან თვითნებურად მიიღო ნარკოტიკული ნივთიერება, უნდა დადგინდეს, რატომ მივიდა ამ მდგომარეობამდე. ხოლო თუ მის უკან იდგა ადამიანი ან ადამიანთა ჯგუფი, რომელიც მას ემუქრებოდა, ფულს სთხოვდა, შანტაჟებდა, აიძულებდა ან სხვა გზით მიჰყავდა სასოწარკვეთამდე, ესეც აუცილებლად უნდა დადგინდეს.
არ შეიძლება საქმის დასრულება მხოლოდ იმ დასკვნით, რომ ახალგაზრდა ნარკოტიკის ზედოზირებით გარდაიცვალა, თუ პასუხგაუცემელი რჩება კითხვა ვინ მიაწოდა ნარკოტიკი, რა უძღოდა წინ მის მიღებას და რატომ სთხოვდა გარდაცვალებამდე რამდენიმე კვირით ადრე დედას 20 000 ლარს იმ სიტყვებით, რომ „შარში იყო“.
გთხოვთ, უზრუნველყოთ აღნიშნული გარემოებების საფუძვლიანი, ობიექტური და სრულყოფილი გამოძიება.
პატივისცემით,
გულადი ყრუაშვილი
ტელეფონი: 599477484
მისამართი: თბილისი ზესტაფონის ქ.22ა
