08/07/2026
აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, ანაკლიაში, აფხაზეთიდან დევნილ ახალგაზრდებს შეხვდა და აფხაზეთის მთავრობის თავმჯდომარის თანამდებობაზე ყოფნის ერთი წლის საქმიანობა შეაჯამა.
შეხვედრაზე გიორგი ჯინჭარაძემ განხორციელებულ მნიშვნელოვან პროექტებზე ისაუბრა. აღნიშნა, რომ 2026 წელს წინა წელთან შედარებით მნიშვნელოვნად გაიზარდა ჯანდაცვის, სოციალური მხარდაჭერის, განათლების, კულტურის, სპორტისა და სოფლის მეურნეობის პროგრამული ნაწილის დაფინანსება.
მთავრობის თავმჯდომარემ ხაზი გაუსვა, საქართველოს პრემიერ-მინისტრის განსაკუთრებულ მხარდაჭერას, რამაც ბიუჯეტის უპრეცედენტო ზრდა გახადა შესაძლებელი.
„როდესაც ვიწყებთ საუბარს ახალ პროგრამებზე, ახალ ინიციატივებზე, მთავარი არის ბიუჯეტი და მინდა, სიამაყით აღვნიშნო, რომ საქართველოს პრემიერ-მინისტრის ბატონი ირაკლი კობახიძის მხარდაჭერით აფხაზეთის მთავრობის ბიუჯეტი გადასცდა 50 მილიონს წელს, შესაბამისად, გაზრდილმა ბიუჯეტმა მოგვცა შესაძლებლობა, განგვეხორციელებინა ყველა მიმართულებით თვისობრივად ახალი პროექტები, პროგრამები", - განაცხადა გიორგი ჯინჭარაძემ.
მთავრობის თავმჯდომარის განცხადებით, აფხაზეთის მთავრობის უმთავრეს პრიორიტეტად, კვლავ ჯანდაცვის მიმართულება რჩება. მისი თქმით, მნიშვნელოვნად გაიზარდა პროგრამების დაფინანსება, რომელიც დევნილი და ოკუპირებულ ტერიტორიაზე მცხოვრები მოსახლეობისთვის ხორციელდება.
„დავიწყებ ყველაზე მნიშვნელოვანით - ჯანმრთელობის დაცვის მიმართულებით ჩვენ ბიუჯეტი გავზარდეთ სამჯერ და ბიუჯეტი გახდა რვა მილიონ ოთხასი ათასი, ეს არის პროგრამული ბიუჯეტი, რომელიც მიემართება უშუალოდ დევნილების ჯანმრთელობის დაცვას. მომართვიანობა გაზრდილია და შეადგენს 12 ათას ბენეფიციარს. 12 ათასი ბენეფიციარიდან 500 იყო სასიცოცხლოდ მნიშვნელოვანი მოცემულობა, სადაც ჩვენი ჩართულობით 500-ზე მეტი ადამიანის სიცოცხლე გადავარჩინეთ. ეს ერთი წლის შედეგია და შემდეგი წლები ჯანდაცვის მიმართულებას მეტ შესაძლებლობას მისცემს.
მინდა აღვნიშნო, რომ დევნილთა პოლიკლინიკები უმთავრესი პრიორიტეტია, ამ კუთხით სამი მილიონი ლარია გამოყოფილი, რომელიც მოხმარდება როგორც ინფრასტრუქტურულ აღჭურვას, ასევე ტექნიკურს. სიახლეა ის, რომ ინფრასტრუქტურის გაუმჯობესებასთან ერთად ჩვენ გვექნება ახალი პოლიკლინიკა წყნეთში და სამომავლოდ, ფოთში ვგეგმავთ ახალი პოლიკლინიკის აშენებას“, - განაცხადა გიორგი ჯინჭარაძემ.
გიორგი ჯინჭარაძემ აფხაზეთიდან დევნილთა სოციალური მხარდაჭერის მიმართულებით განხორციელებულ ბოლო ერთი წლის განმავლობაში უმნიშვნელოვანეს პროექტებზეც ისაუბრა.
„სოციალური მიმართულება, რა თქმა უნდა, რჩება უმთავრეს გამოწვევად აფხაზეთის მთავრობისთვის, თუმცა ღირსეულად ვუმკლავდებით ჩვენი რესურსის ფარგლებში და ციფრები ამაზე მეტყველებს.
მინდა დავიწყო გასული ერთი წლის განმავლობაში სარემონტო და აღდგენითი სამუშაოებით, რომელიც ჩაუტარდა ორასამდე კომპაქტურ დასახლებას, ამისთვის დაახლოებით 4 მილიონი ლარი გამოვყავით, რა თქმა უნდა, ეს პროცესი გაგრძელდება სამომავლოდ, წლევანდელი წელი ჩვენთვის არის მოტივაცია, რომ მეტი სიკეთე შევთავაზოთ ჩვენს დევნილ მოსახლეობას“, - განაცხადა აფხაზეთის მთავრობის თავმჯდომარემ.
მთავრობის თავმჯდომარემ, ასევე, განსაკუთრებული ყურადღება გაამახვილა, საანგარიშო პერიოდში, ახალგაზრდების მხარდასაჭერად განხორციელებულ პროექტებზე, მათ შორის, წარმატებული ახალგაზრდების სტიპენდიით უზრუნველყოფაზე, თანამედროვე ტექნოლოგიების შესწავლის მიმართულებით განხორციელებულ ტრენინგებსა და ახალგაზრდულ ბანაკებზე.
„როდესაც ვსაუბრობთ აფხაზეთზე და ჩვენს მშვიდობიან, ღირსეულ დაბრუნებაზე, უმთავრესია ჩვენი მომავალი თაობა და განათლება, შესაბამისად, განათლება არის უმთავრესი პრიორიტეტი, რაზეც აფხაზეთის მთავრობა ყველაზე დიდ აქცენტს აკეთებს. საკმაოდ კარგი ინიციატივები დავნერგეთ მიმდინარე წელს, ჩემი ინიციატივით, პირველად დაწესდა ყოველთვიური სტიპენდია წარმატებულ სტუდენტებზე, 221-მა წარმატებულმა სტუდენტმა ისარგებლა აღნიშნულით, ასევე, 185 ახალგაზრდას დაუფინანსდა სწავლის გადასახადი, ჯამში, 500-მა სტუდენტმა ისარგებლა ფინანსური მხარდაჭერით“, - აღნიშნა მთავრობის თავმჯდომარემ.
გიორგი ჯინჭარაძის თქმით, აფხაზეთის მთავრობის შერიგების პოლიტიკა უცვლელია და ის აფხაზებთან ურთიერთობის ღირსეულად, პატივისცემითა და ურთიერთნდობით აღდგენას ითვალისწინებს.
„რაც შეეხება ნდობის აღდგენის და შერიგების მიმართულებას, როგორც უკვე ბევრჯერ აღვნიშნე, ეს არის ჩვენი მისია, რომ ღირსეულად, პატივისცემით, ურთიერთნდობით, რომელიც საუკუნეები აფხაზ ძმებთან და დებთან გვაკავშირებდა, მოხდეს ურთიერთობის ღირსეული აღდგენა. ამ კუთხით, 15 პროექტი განვახორციელეთ, სადაც ჩართული იყო სამასამდე ადამიანი და რა თქმა უნდა, სამომავლოდ ვგეგმავთ ბევრი პროექტის განხორციელებას“, - განაცხადა გიორგი ჯინჭარაძემ
მოხსენების შემდეგ აფხაზეთის მთავრობის თავმჯდომარემ, აფხაზეთის მთავრობის წევრებთან ერთად ახალგაზრდების შეკითხვებს უპასუხა.
#აფხაზეთისმთავრობა
