Siunnersuisoqatigiinnut Aalajangiisartunullu Aqutsisoqarfik nutaamik taajutitaarpoq
Julip aallaqqaataani atuutilersumik Siunnersuisoqatigiinnut Aalajangiisartunullu Aqutsisoqarfiup taaguutaa allanngorpoq Atuisoqarnermut Unammilleqatigiinnermullu Aqutsisoqarfimmik taaguuteqalerluni. Taaguummik allannguineq tassaavoq Namminersorlutik Oqartussani siunnersuisoqatigiit aalajangiisartullu assigiinngits
ut ataatsimoorlutik inissisimanerinik takussutissiisussaq. Laura Aggernæs-imit
Ukiorpassuarni Siunnersuisoqatigiinnut Aalajangiisartunullu Aqutsisoqarfik ataatsimut ukua taaguutigisimavaat: Unammilleqatigiinnermut Nakkutilliisoqarfik, Atuisartut Siunnersuisoqatigiivi, Unammilleqatigiinnermut Ataatsimiititaliaq, Ineqarneq pillugu Maalaaruteqartarfik, Atuisartunut Pisisartunullu Maalaaruteqartarfiup Ataatsimiititaliaa, Avatangiisit Illersorneqarnissaat pillugu Naammagittaalliortarfik, Pinngortitap Illersorneqarnera pillugu Naammagittaalliortarfik, kiisalu Isumaginninnermi Naammagittaalliortarfik. Taaguummik allannguineq taassaavoq siunnersuisoqatigiit aalajangiisartullu assigiinngitsut maannamit ataatsimoornerullutik inissisimalernissaannut suliaqarnerup alloriarnera siulleq. Ataatsimut katersuunneq
Taaguutip allanngortinneqarnerata saniatigut Atuisartoqarnermut Unammilleqatigiinnermullu Aqutsisoqarfik juulip naalernerani Grønlandsbankip allaffeqarfikuanut nutsissaaq. Tassani siornatigumut sanilliullugu sulisut imminnut qaninnerullutik inissisimalissapput. Aammattaaq nutaamik ilisarnaatitaassapput, ataatsimoorussamik attaveqatigiinnermut periuseqalissapput, aammalu tamarmiullutik ataatsimut nutaamik nittartagartaassallutik oktoberip ingerlanerani atuutilersussatut naatsorsuutigineqartumik. Matumani siunertaq tassaavoq innuttaasunut ajornannginnerusumik piffimmi ataatsimi paasissutissanik aallersinnaanngornissaq.
“Innuttaasut ilisimanngilaat tamarmiulluta ataatsimut inissisimasugut. Taaguutitta allanngornera, aammalu allami allaffeqarfeqalernissaq suliniutinullu tamakkununnga tunngassutillit nutarterinerup ilagai. Maannamut immikuutaartunik sunik suliaqarnerput aallaavigalugu taaguuteqarsimavugut, maannali tassa ataatsimut taaguuteqalerpugut”, taama oqarpoq Nivi Frenderup-Strunz, Siunnersuisoqatigiinnut Aalajangiisartunullu Aqutsisoqarfik-mmi nutartereqqinnermi suliap ingerlanneqarnerani aqutsisoq. Naleqartitanik nutarterineq
Siunnersuisoqatigiinnut Aalajangiisartunullu Aqutsisoqarfiup nutarteqqinneqarnerani suliat pingaarnerit ilagaat siunnersuisoqatigiit aalajangiisartullu assigiinngitsut ataatsimoorutaat ersersissallugu. Matumani Nivi Frenderup-Strunz-ip oqaatigaa kalaallit oqaluttuaatitoqaasa ilaat Kaassassuk,
Atuisartoqarnermut Unammilleqatigiinnermullu Aqutsisoqarfimiittut siunnersoqatigiit aalajangiisartullu atuuttuuffigisaannut atussallugu qanoq tulluartigisoq. Oqaluttuatoqqamimi tassani oqaluttuarineqarpoq nukappiarannguup Kaassassuup qanoq atugaqarnera aqqusaagaqarneralu. Nunaqarfimmini amerlanerpaanit suusupagineqarluni kusanaatsumik pissusilersorfigineqartarpoq. Nerilluataaleriartoq qajumik uunartumik uutinneqartarpoq, imaluunniit kigutaarneqartarluni. Pissaap Inua silaannakkut ingerlaarluni takkuttappoq, qimmitut/teriannissatut isikkulittut oqaluttuatoqqat malillugit isikkoqarluni. Kaassassuk annilaangagaluaqaluni qimmip/teriannissap pamiuanut nermuttarpoq. Taamaalisorlu nersutip ingeriuttarpaa, Kaassassullu kaavillorissutut nunami assakaasarluni. Ilisarnaat oqaluttuaatitoqqanit
Kaassassuup assakaanermini “pinngussani” katagartarpai, tassalu nukangassutigisani katagartarpai. Taamaalluni nunaqarfimminut uternissaminut piareerami uterpoq, tassalu ajornartorsiutit aqqusaartakkani nammineerluni anigorniarsinnaanngorsimallugit paasillugu. Nammineq inuunerminut akisussaassutsimik tigummiarsinnaanngorsimavoq. Nivi Frendrup-Strunz nassuiaavoq taamatut aamma Kalaallit Nunaanni innuttaasut, Pissaap Inuanit aqqutissiorneqartutullusooq ilillutik Atuisartoqarnermut Unammilleqatigiinnermullu Aqutsisoqarfik ikiortissaasuanerminni saaffigisarsinnaagaat. Atuisartoqanermut Unammilleqatigiinnermullu Aqutsisoqarfiup ilisarnaatitaavata teriannissap niaquanik pamiuanillu isikkoqarnera asuli toqqagaanngilaq, kisianni isumaqartinneqartumik toqqagaavoq.
“Pissaap Inua ikiuisartutut oqaluttuarisaarnermi ilisimaneqartut pingaarutillit ilaasa ilagaat. Taassuma Kaassassuk aqqutissiorlugulusooq pivaa, kingusinnerusukkut nammineerluni imminut isumagisunngorniassammat. Taamatut inissisimasariaqartugut isumaqarpunga, maannakkumut immikuutitaarluta suliagut aallaavigalugit inissisimanitsitut pinnata”, Nivi Frenderup-Strunz oqarpoq.
